Joosuwa Gbɔŋku 16

Jooseefi naantiibi tinjandi

1 Ditinjandi din bi nìn tīī Jooseefi naantiibee kpaanyɔkɔ kíĺ Jɔɔdan buŋŋu ní, Jeeriikoo tiŋki caŋin, ki gítí mbun ŋun pùntī Jeeriikoo tiŋki ŋwìiń nyalaŋki pú, ki nóó kuteeu kun dɔ̄ Jeeriikoo tiŋki kí dūú dàb̄ dijool kí tin nyā Beeteel tiŋkinee. 2 Ki yíkì Beeteel tiŋkee ní ki nìkī Luusi tiŋkin, ki cāatì ki cūtìi kpākaǹ Arkii yab tiŋki kpaanyɔkɔ ní ki tin bàn̄ Atarooti tiŋkin. 3 Niinee ní ki sīntì ŋwìiń jeetilaŋki pú ki nín cá Yafileeti yab tiŋki kpaanyɔkɔ pú, ki pūntì Beeti-Oorɔn taapu tiŋki nì Geeseer tiŋki ní ki tin gbēeǹ Meediiteeranee tiŋkuu. 4 Ditinjandi din bi nìn tīī Jooseefi jipɔmbi Manasee nì Eefiraayiim naakɔtin yab bi yākatèe dee.

5 Ditinjandi din bi nìn tīī Eefiraayiim naakookun yab bi yākatì ki nóó nì bi nín pēē pēē mmaal puee sèé. Ŋwìiń nyalaŋki púee, kikpaanyɔkɔ yōoǹ Atarooti-Adaar tiŋki ki tin cáa sāā Beeti-Oorɔn yilpu tiŋki. 6 Ŋwìiń jeetilaŋki púee, kikpaanyɔkɔ di sá kitiŋ kin dɔ̄ ki tin bàn̄ Miikimeetati tiŋki ŋgan púee, ki pɔ́ĺ ki cūtì Taanati-Siiloo tiŋki ŋwìiń nyalaŋki pú, ki nìkī ki tin bàn̄ Yanoowa tiŋki ŋwìiń nyalaŋki pú. 7 Ki yōoǹ Yanoowa tiŋki ní ki nín cá Atarooti nì Naara timmu watil pú ki tin bàn̄ Jeeriikoo tiŋki ní ki gbēeǹ Jɔɔdan buŋŋu. 8 Ki yōoǹ Tapuuwa tiŋki ki dūu túĺ ŋwìiń jeetilaŋki pú ki tin bàn̄ Kana buŋŋu ní ki cáa gbēeǹ Meediiteeranee tiŋkuu. Ditinjandi din bi nìn tīī Eefiraayiim naakookun yab bi yākatì ki nóó nì bi nín pēē pēē mmaal puee dee. 9 Bi nìn dū ntimu nì mu-timbilimmu mun nìn bí Manasee naakookun yab tinjandinee ki kútì-bi. 10 Baa nìn jìn̄ Kanaan yab bin nìn kóò Geeseer tiŋkinee. An puee bíǹ dáá gbíntìi kóò Eefiraayiim yab kansikin ki dāa sāā díǹ pu nee. Ama ní Eefiraayiim yab nìn dū-bi ki kpántì iyumbu bi kíǹ ki tūǹ atuun ŋin pɔ̄ɔ̄yee ki tìì-bi.