Joosuwa Gbɔŋku 17

1 Ditinjandi din bi nìn tɔ́ kasi ki lēē ki tīī Jooseefi jipɔŋkpiliu Manasee naakookun yabee sɔ̀. Bi nìn pée dū Galaadi nì Baasan ki tīī Manasee jipɔŋkpiliu Makiir un sá Galaadi baayee, kun puee u nìn sá ubaatandaan. 2 Manasee naantiibi bin kíǹee mun nìn fōō bi-tinjandi ki yākatì ki nóó nì bi nín nìn pēē pēē mmaal puee. Bíǹ di sá Abiyeeseer naantiibi nì Eeleeki naantiibi nì Asiriyeel naantiibi nì Siikeem naantiibi nì Eefeer naantiibi nì Seemiida naantiibi. Bin sá Jooseefi jipɔɔn Manasee naantiibi poon bininjabee dee, bi-kɔkɔ nì bi-dicaŋŋi.

3 Seeloofaadi nìn sá Eefeer jipɔɔn, ní Eefeer sá Galaadi jipɔɔn, ní Galaadi sá Makiir jipɔɔn, ní Makiir sá Manasee jipɔɔn. Seeloofaadi kaa nìn màl̄ mbininjabiyaamu, ama nnimpubiyaamu ŋma ní u nìn màl̄. Mu-yiŋŋi di nìn sá Maala nì Nɔɔwa nì Ɔgila nì Miilka nì Tiirsa. 4 Seeloofaadi bisalib gbanti nìn cūtìi ká usaraaŋakpil Eeleeyasaar nì Nuuni jipɔɔn Joosuwa nì Isirayeel yab tindaŋkpilib ní ki bí-bi yii: «Ti-Dindaan nìn tùkū Mooyiisi yii ú tīī ti mun ditinjandi kii bi nín tīī ti-nabiyaamu bininjab puee.» Ní Joosuwa lēē ntimu ki tīī-bi kii bi nín tīī bi-nabiyaamu bininjab puee, ki nóó nì ti-Dindaan nín nìn sòon̄ ki yóoǹ puee. 5 An puee Manasee naakookun yab nìn fōō atinjan saalaa ní, kí kūtì Galaadi nì Baasan timmu mun bíń Jɔɔdan buŋgbandi din bí ŋwìiń nyalaŋki jaaŋŋu púee. 6 Di sá yii Manasee naantiibi bin sá mbinimpubiyaamuee nìn fōō bi-tinjandi kii bi-nabiyaamu bininjab nín nìn fōō puee, ama bi nìn dū Galaadi tiŋki ki tīī Manasee naantiibi bin kíǹee ní.

7 Manasee tinjandi kpaanyɔkɔ nìn kíĺ Aseer tiŋki ní ki tin sāā Miikimeetati tiŋki kin bí Siikeem tiŋki ŋwìiń nyalaŋki púee ní, ki nìkī ŋgiil pú ki tin sāā binib bin kóò Eeni-Tapuuwa tiŋkee. 8 Manasee yab di nìn yì Tapuuwa tiŋki, ama Eefiraayiim yab di nìn yì Tapuuwa tiŋki dijandi din bí Manasee yab tinjandi kpaanyɔkɔee. 9 Manasee yab tinjandi kpaanyɔkɔ yíkì niinee ní ki nín sìntī Kana buŋŋu ŋgiil pú. Ama ntimu mun nìn bí niinee sá Eefiraayiim yab timmu ní, min kamaa mu nìn bí Manasee yab tinjandinee. Manasee yab tinjandi kpaanyɔkɔ bí mbunee ŋgan pú ní, ki cáa gbēeǹ Meediiteeranee tiŋkuu. 10 Eefiraayiim yab di nìn yì ŋgiil pú ní Manasee yab yì ŋgan pú ní Meediiteeranee tiŋkuu sá-bi ŋwìiń jeetilaŋki kpaanyɔkɔ. Manasee yab tinjandi nìn nákáǹ Aseer yab tinjandi ŋgan pú ní ki nákáǹ Isakaar yab tinjandi ŋwìiń nyalaŋki pú. 11 Isakaar yab nì Aseer yab tinjaŋŋi poonee, Manasee yab di nìn gíti yì Beeti-Seeyan tiŋki nì ki-timbilimmu, nì Yeebileeyam tiŋki nì ki-timbilimmu, nì binib bin kóò Dɔɔr nì Eeni-Dɔɔr timmuee nì mu-timbilimmu, nì Taanaki nì Meegiidoo yab timmu nì mu-timbilimmu. Kitintataatii di sá Dɔɔr tiŋki. 12 Ama ní Manasee naantiibi kaa ŋúń ki jìn̄ ntimu gbanti nib ki nyántì, di sá yii Kanaan yab di yóoǹ yii bíǹ kpá ki làá yīkì ntimu gbanti pu. 13 Isirayeel yab nín dāa pɔ́ɔkiǹ Kanaan yabee ní bi dū-bi ki kāaǹ bi-taapu ní ki yāntì bi kíǹ ki tūǹ-bi atuun kii iyumbuee. Ama baa nìn jìn̄-bi kitiŋee pu.

14 Jooseefi naantiibi sòon̄ nì Joosuwa ní ki bí-u yii: «Ba pu ní a tīī-ti ditinjandi dibaba ja, timbi bin ti-Dindaan bīiǹ ti-boon ti būtì tiŋan pu ki wīikí tikpil nee?» 15 Ní Joosuwa kíí-bi yii: «Ni yaa wīikí tikpil ní Eefiraayiim jooŋŋi kaa bàn̄ ní kàl̄ee, ní cù Peeriisi yab nì Reefa yab bambaŋkun kí ŋàtī kí kàl̄.» 16 Ní Jooseefi naantiibi fātìi bí-u yii: «Tiŋman, dijool tiŋki nee kaa làá lafun bà-ti. Kí kūtèe, Kanaan yab bin kóò kitiŋ kin tèen̄ee cáá tikúti janjatɔrɔkub ní, ki kpáaǹ Beeti-Seeyan tiŋki nì ki-timbilimmu yab, nì Jisirayeel tantakalin yab kɔkɔ.» 17 Niinee ní Joosuwa bí Jooseefi naantiibi, an dàkà yii Eefiraayiim nì Manasee naakɔtin yab yii: «Ni lafun wīikí tikpil ní ki cáá mpɔn tiŋan pu, naa làá fōō ditinjandi dibaba ja. 18 Nimbi di làá nīn yì dijool pu tiŋki, nì min ní kì sá kubambaŋŋuee. Ní ŋàtī kí ŋāŋkì ki-kɔkɔ kí nīn kíǹ ki yì. Ni làá ŋmā kí jà Kanaan yab, báà nì bi nín cáá tikúti janjatɔrɔkub ki cáá mpɔŋkpaan nee!»