Joosuwa Gbɔŋku 11

Meeroom buŋŋu caŋin kɔndi

1 Asɔɔr bɔtiu Jabiini nín nìn gbìl̄ tin jítèe ní u lēē binib ki tú Maadoon bɔtiu Joobaab, nì Simroon bɔtiu nì Akisaafi bɔtiu cee. 2 U nìn tú bibɔtiibi bin kóòń ŋgan pú ajoon puee, nì ditantakalin Kiineereeti mɔɔl ŋgiil pú, nì Seefeelaa paal puee, nì Dɔɔr tiŋki kin bí ŋwìiń jeetilaŋki púee cee. 3 U nìn gíti tú Kanaan yab bɔtiibi bin kóòń ŋwìiń nyalaŋki pú nì ŋu-jeetilaŋki púee, nì Amɔɔr yab nì Eeti yab nì Peeriisi yab nì Jeebusi yab bin kóò ajoon puee, nì Eefi yab bin kóò Eermɔn jool taapu Miisipa tiŋkinee bɔtiibi cee. 4 Ní bi-kɔkɔ yíkìi kālìń nsan pu, bi nì bijanjaliibi kɔkɔ. Bijanjaliibee nìn wīikí tikpil tikpil kii tiŋkugbandi bulee, ní itaamu nì janjatɔrɔkub bin bi nìn kāńee mun wīikí an kaa cáá bí lì. 5 Bibɔtiibi gbanti nìn kóoǹ ki kpáfèe ní ki cūtìi gāā dijanjanaapaal Meeroom buŋŋu caŋin kí jáǹ Isirayeel yab.

6 Ní ti-Dindaan bí Joosuwa yii: «Taa pée fàŋkì-bi, kun puee fool naŋkɔnampuee mama m-ba fu kūū bi-kɔkɔ ki tīī Isirayeel yab dee. Á fu gàatì ki gīfì bi-taamui taaŋi ní kí fu wà bi-janjatɔrɔkub ŋŋmi.» 7 Joosuwa nì Isirayeel yab nìn cūtìi túuǹ-bi Meeroom buŋŋu caŋin ní ki páatìi jéetì bi-pu. 8 Ti-Dindaan nìn dū-bi ki ŋá Isirayeel yab ŋaan ní bíǹ jáǹ ki pɔ́ɔkiǹ-bi. Bi nìn jìn̄-bi ki tin bàn̄ Siidɔn-Raaba nì Miisireefɔti-Maayiim timmu ŋwìiń jeetilaŋki pú, ní ki jìn̄-bi ki tin bàn̄ Miisipa tantakalin ŋwìiń nyalaŋki pú. Bi nìn kūū bi-kɔkɔ, báà uniseen kaa kíǹ. 9 Joosuwa nìn gāatì ki gífì bi-taamui taaŋi ní ki wùn̄ bi-janjatɔrɔkub ŋŋmi, ki nóó nì ti-Dindaan nín nìn tùkū-u yii ú ŋá puee.

Isirayeel yab jáń ki fōō Asɔɔr tiŋki

10 Míǹ boonee, Joosuwa nìn fātìi gítì ki cūtìi jáń ki fōō Asɔɔr tiŋki kin nìn sá atimbun gbanti kɔkɔ tiŋyilee, ní ki kūū ki-bɔtiu. 11 Bi nìn kūū binifoobi bin kóò kitiŋ gbantinee kɔkɔ. Báà uniseen kaa nìn kíǹ, ní ki sēē-kì ŋŋmi. 12 Joosuwa nìn fōol̀ bibɔtiibi gbanti timmu kɔkɔ ki cútì bibɔtiibee bi-ba ki kūū. U nìn kūū ki céetì bi-kɔkɔ kii ti-Dindaan tɔntɔnliu Mooyiisi nín nìn sòon̄ pu ki síiǹee. 13 Ama Isirayeel yab kaa nìn wùn̄ ntimu mun bi máń ki tɔ́kɔ́ǹ ŋgbantamu^a puee báà kiba, asee Asɔɔr tiŋki baba ní Joosuwa nìn pée wùn̄ ŋŋmi. 14 Isirayeel yab nìn yōoǹ tiwan tin bi nìn jáń ki fōō ntimu gbanti poonee ki kpáaǹ tiwaŋkuti. Ama bi nìn kūū ki céetì ntimuee nib kɔkɔ. Báà uniseen kaa nìn kíǹ. 15 Tin ti-Dindaan nìn tīī u-tɔntɔnliu Mooyiisi mara ú ŋée, tíǹ ní Mooyiisi mun nìn dūu tīī Joosuwa. Ní Joosuwa nìn ŋá tin ti-Dindaan nìn tīī Mooyiisi mara ú ŋée deedee, kaa bātì báà tiba ki fá.

Isirayeel yab púntìi fōō Kanaan tiŋki kɔkɔ

16 Míǹ ní Joosuwa nìn jáń ki fōō kitiŋ gbanti kɔkɔ. U nìn fōō ntimu mun bí ajoon puee, nì Neegeeb teekun kɔkɔee, nì Gooseen timmu kɔkɔ, nì ntimu mun bí Seefeelaa paal puee nì mun bí Arabaa teekunee, nì mun bí Isirayeel jool nì ki-paal puee. 17 U nìn gíti fōō kí yòon̄ Alaaki jool din bí ki cá Seeyiir tiŋki watil púee, kí tin cáá sāā Baal-Gaadi tiŋki kin bí Leebanɔn tantakalin, Eermɔn jool taapuee. U nìn cútì ntimu gbanti bɔtiibi kɔkɔ ki kūū. 18 Joosuwa nìn dū iwiin kupaau ní ki jáń nì bibɔtiibi gbanti kɔkɔ. 19 Kitiŋ báà kiba nib nì Isirayeel yab kaa nìn sòon̄ ki gbìlīǹ tɔb ki ŋá mpèé, asee Eefi yab bin nìn kóò Gabawɔn tiŋkinee baba. Isirayeel yab nìn jáń ní ki fōol̀ ntimu mun kíǹee kɔkɔ. 20 Ti-Dindaan di nìn pɔ́ɔkì ntimu gbanti nib pɔbiliŋ ní bi kíí ki jáń nì Isirayeel yab, án nín làá ŋá pu ní bíǹ ń kpɔ̀ kí céetí-bi kí taa sɔ̄ bi-saai kii ti-Dindaan nín nìn tīī Mooyiisi mara puee.

21 Ŋyunti gbantee ní Joosuwa cūtì ki jáń nì Anaaki yab bin nìn kóò ntimu mun bí ajoon puee, an dàkà yii Eebrɔn nì Deebiir nì Anaab timmu, nì ntimu mun kɔkɔ bí Juuda nì Isirayeel jooŋŋi puee. Joosuwa nìn kūū ki céetì binib gbanti ní ki nāaǹ bi-timmu kɔkɔ. 22 Anaaki yab báà unil kaa nìn gíti kíǹ Isirayeel yab tiŋkin, asee Gaasaa nì Gaati nì Asidoodi timmun ní bikaaŋkaabi biba nìn kíǹ ki bí. 23 Joosuwa nìn fōō kitiŋee kɔkɔ ki nóó nì ti-Dindaan nín nìn tīī Mooyiisi mara puee, ní ki dū-kì ki yākatì ki tīī Isirayeel yab bí nīn kíǹ ki yì, ki nóó nì bi-naakɔti nín sá puee. Niinee ní ŋgbansɔŋfi dɔ́miń kitiŋee pu ní kujaau gbēeǹ.