Joosuwa Gbɔŋku 10

Isirayeel yab jáń ki pɔ́ɔkiǹ Amɔɔr yab bɔtiibi

1 Jeerusaleem bɔtiu Adoonii-Seedeeki nìn gbìl̄ yii Joosuwa jáń ki fōō Aayi tiŋki, ki nāaǹ-kì kɔkɔ. U nín nìn pée ŋá Jeeriikoo tiŋki nì ki-bɔtiu puee, míǹ mbaantiim ní u nìn ŋá Aayi tiŋki nì ki-bɔtiu. U gbìl̄ mun yii Gabawɔn yab nì Isirayeel yab sòon̄ ki gbìlīǹ tɔb ŋgbansɔŋfi ń nīn bí bi-kansikin ní bi kíǹ ki kóò bi-kansikin. 2 U nín gbìl̄ mimmee ní tifaandi cúú u nì u-yab tikpil, kun puee Gabawɔn nìn sá kitiŋkpaaŋŋi ní kii ntimu mun cáá bibɔtiibee, ki nìn wīikí ki jítiǹ Aayi tiŋki, ní ki-ninjab kɔkɔ sá bibaatandambi ŋma. 3 An puee ní Jeerusaleem bɔtiu Adoonii-Seedeeki lēē binib ki tú Eebrɔn bɔtiu Ookam nì Yaarmuti bɔtiu Piiram nì Lakiisi bɔtiu Yafiya nì Eeglɔn bɔtiu Deebiir cee bi cūtìi tùkū-bi yii: 4 «Ní dāam̄maan kí tūtuǹ-mi tí jáǹ Gabawɔn tiŋki yab, kun puee bi nì Joosuwa nì Isirayeel yab sòon̄ ki gbìlīǹ tɔb ki ŋá mpèé.»

5 Di sá ní Amɔɔr yab bɔtiibi biŋmoo gbanti, an dàkà yii Jeerusaleem bɔtiu, nì Eebrɔn bɔtiu, nì Yaarmuti bɔtiu, nì Lakiisi bɔtiu, nì Eeglɔn bɔtiu kóoǹ ki kpáfì dicilpu, bi nì bi-janjaliibi kɔkɔ, ki cūtìi māntì ki gíb́ Gabawɔn tiŋki ki bíi jáà nì ki-nib. 6 Ní Gabawɔn yab lēē binib ki tú Giilgaal naapaal pu, ní bi cūtìi tùkū Joosuwa yii: «Taa dū timbi a-tɔntɔnliibi kí fá! Dāan̄ malaa kí jòò-ti! Dāá fīī-ti kun puee Amɔɔr yab bɔtiibi bin bin kóò ajoon puee kɔkɔ kpáfì kinyɔkɔ ki bíi jáà nì ti!» 7 Ní Joosuwa yíkì Giilgaal ki nín jɔ́ḿ Gabawɔn, u nì Isirayeel yab janjaliibi bin sá bibaatandambee kɔkɔ. 8 Ní ti-Dindaan bí Joosuwa yii: «Taa pée fàŋkì-bi, kun puee m dū-bi ki ŋá a-ŋaan ní. Bi-kansikin báà ubɔ kaa làá ŋmā kí yūĺ a-nimbiin.» 9 Joosuwa kpáaǹ u-yab ki cōom̀ kunyamɔŋu ní ki dāa dūu cíl̀ binib gbanti pu baa nyí u-pu. 10 Ní ti-Dindaan yāntì bi fāŋkì ní ki kíǹ ki sáń ajan kɔkɔ pu Isirayeel yab nimbiin. Bi nìn jáń ki pɔ́ɔkiǹ-bi sɔ́kɔ sɔkɔ Gabawɔn caŋin niin ki jìn̄-bi ki nóó nsan ŋun jɔ́ḿ Beeti-Oorɔn gbantaŋki puee. Bi nìn nàn̄-bi ki tin bàn̄ Aseeka nì Makeeda timmun. 11 Bi nín bí ki sáń Isirayeel yab ki bíi wúntí Beeti-Oorɔn gbantaŋkee, ní ti-Dindaan yāntì ataanyiŋkumbil akpaan nyánní yilpu ki tābitì ki kūū-bi. Bi-kansikin bin ní ataanyiŋkumbil tābitì ki kūūyee nìn wīikí ki jítiǹ bin bin Isirayeel yab nìn dū ntàataajimu ki kūūyee.

12 Ŋwiin ŋun ti-Dindaan dū Amɔɔr yab ki ŋá Isirayeel ŋaan mimmee ní Joosuwa sòon̄ nì ti-Dindaan, Isirayeel yab kɔkɔ nimbiin yii:

«Ŋwìiń, yūĺ kí bíití Gabawɔn tiŋki yilpu!

Uŋmal, sii yūĺ kí bíití Ayalɔn tantakal!»

13 Ní ŋwìiń yúl̀ kaa ti bíi còom̄ ní uŋmal mun gbíntì u-laŋki kaa ti bíi sútí, ki tin sāā ŋyunti ŋun Isirayeel nibul jáń ki pɔ́ɔkiǹ bi-nannanliibee. An bɔti gbanti ŋmàn̄ ki kā Deedeedaan gbɔŋku poon míǹ. Ŋwiin gbantee, ŋwìiń nìn yúl̀ kutagbɔŋu kansikin nì kansikin ní kaa nìn jìkī yii ŋu làá jēetí, ki bàn̄ kii ŋwimmɔn. 14 Dalba dalba ti-Dindaan kaa fōō unifoo nyɔkɔ kii yéè ki ká kii ŋwiin gbantee, ní ŋwiin gbanti boonee, an kaa tí jítì míǹ ki ká jaanjaan. Tiŋman, yaadalee, ti-Dindaan di nìn jáń kujaau ki tīī Isirayeel yab.

15 Míǹ boonee ní Joosuwa nì Isirayeel yab kɔkɔ fātìi nín gítí Giilgaal naapaal pu.

Joosuwa kūū bibɔtiibi biŋmoo bin u jáń ki jíńee

16 Bibɔtiibi biŋmooyee bíǹ nìn sáǹ ki cūtìi bál̀ kutaŋkpanaakoou kubɔn, Makeeda tiŋkin. 17 Binib biba nìn ká-bi niin ní ki cūtìi tùkū Joosuwa yii: «Ti ká bibɔtiibi biŋmooyee bál̀ kutaŋkpanaakoou kubɔ poon, Makeeda tiŋkin.» 18 Ní Joosuwa bí yii: «Ní bíntí ataŋkpakpaan kí pìin̄ kutaŋkpanaakoouee nyɔkɔpu, kí lēē binib biba bí nīn cí. 19 Ama nimbee, ní taa gbíntí niin. Ní jà ni-nannanliibi boon kí gāā kí kíntí-bi, kí taa yàntī bí fàtīí sāǹ kí kɔ́ bi-timmun. Di sá yii ti-Dindaan ni-Nimbɔtiu di dū-bi ki ŋá ni-ŋaan!» 20 Joosuwa nì Isirayeel yab nìn ŋman kūū ki kúntì bi-kɔkɔ ní. Binikaaŋkaabi di nìn ŋúń ki sáǹ ki kɔ́ ntimu mun bi máń agun ki māntìi túee poon. 21 Boonee ní Isirayeel yab kɔkɔ nín gítí dijanjanaapaal pu nì ŋgbansɔŋfi Joosuwa cee, Makeeda tiŋkin. Báà unil kaa nìn pée gíti wàantí u-nyɔkɔ ní kaa nín múlifì tiba Isirayeel yab pu.

22 Niinee ní Joosuwa bí yii: «Ní cúúmaan ataŋkpee kí lēē kí wàatī kutaŋkpanaakoouee nyɔkɔ, kí cúuń bibɔtiibi biŋmooyee kí cáań-mi doo!» 23 Ní bi lafun pīitìń bibɔtiibi biŋmooyee kutaŋkpanaakoouee poon ki cáań Joosuwa cee. An dàkà yii Jeerusaleem bɔtiu nì Eebrɔn bɔtiu nì Yaarmuti bɔtiu nì Lakiisi bɔtiu nì Eeglɔn bɔtiu. 24 Bi nyántìń bibɔtiibi biŋmooyee ki cáań Joosuwa ceeyee, ní u yíiń Isirayeel yab kɔkɔ ki kpáfì ní ki bí bijanjaliibi kpilib u nì bin nóóyee yii: «Ní sútiḿmaan doo, kí tāā bibɔtiibi nee silii kí nákáǹ kitiŋ.» Ní bi sútìń u-cee ki dū bi-taaŋi ki tāā bibɔtiibee silii ki nákáǹ kitiŋ. 25 Ní Joosuwa tùkū-bi yii: «Ní taa fàŋkìmaan, kí taa yàntī ni-wunti ń yɔ̀tī. Ní ká dipɔbil kí taa fàŋkì baa tiba, kun puee ti-Dindaan nín làá ŋá binannanliibi bin kɔkɔ ni nì bi làá jée puee dee.» 26 Joosuwa sòon̄ míǹ ki dóòyee ní ki kūū bibɔtiibee ŋmootil, ki yāntì bi dū-bi ki lúntì isufi iŋmoo pu ní bi lúń niin ki tin sāā kujoou. 27 Ŋwìiń jéetèe ní Joosuwa pú kinyɔkɔ yii bí kpákatiń bibɔtiibee wunti isufee pu kí cáá tɔ̄ kutaŋkpanaakoou kun poon bi nìn bál̀ee. Bi dóòyee ní ki tōō ataŋkpakpaŋkpaan ki kpúkuǹ nyɔkɔpu. Ataŋkpee gbanti dáá gbíntìi kpúkú niin díǹ pu nee.

Joosuwa jáń ki fōō ntimu mun bí ŋgiil púee

28 Ŋwimbaanti gbanti ní Joosuwa jáń ki fōō Makeeda tiŋki, ki kūū ki-bɔtiu nì ki-nib kɔkɔ, kaa kíǹ báà uniseen. U nìn ŋá Makeeda bɔtiu kii u nín nìn pée ŋá Jeeriikoo bɔtiu puee ní.

29 Joosuwa nì Isirayeel yab yíkì Makeeda tiŋkinee ní ki nìkī ki cūtìi bíi jáà nì Liibina tiŋki yab. 30 Ti-Dindaan nìn dū kitiŋ gbanti mun ki ŋá Isirayeel yab ŋaan ní bi kūū ki mun nib kɔkɔ, kaa kíǹ báà uniseen. Bi nìn ŋá ki mun bɔtiu kii bi nín nìn ŋá Jeeriikoo bɔtiu puee ní.

31 Joosuwa nì Isirayeel yab yíkì Liibina tiŋkinee ní ki nín cá Lakiisi tiŋki. Bi bàn̄ee ní ki māntìi gíb́ kitiŋ gbanti ki bíi jáà nì ki-nib. 32 Ti-Dindaan nìn dū Lakiisi tiŋki mun ki ŋá Isirayeel yab ŋaan ní bi jáń ki fōō-kì ŋwinliliiti dal, ki kūū ki-nib kɔkɔ kii bi nín nìn ŋá Liibina tiŋki puee. 33 Niinee ní Geeseer bɔtiu Ooram yíkìń kí bàà dāá tíkiń Lakiisi tiŋki yab, ní Joosuwa kūū u nì u-janjaliibi kɔkɔ, báà uniseen kaa kíǹ.

34 Joosuwa nì Isirayeel yab kɔkɔ yíkì Lakiisi tiŋkinee ní ki cūtìi māntìi gíb́ Eeglɔn tiŋki ki bíi jáà nì ki. 35 Ŋwiin gbanti mbaanti ní bi jáń ki fōō Eeglɔn tiŋki, ki kūū ki-nib kɔkɔ nì kitàataajiki kaa kíǹ báà uniseen, kii bi nín nìn ŋá Lakiisi tiŋki puee.

36 Joosuwa nì Isirayeel yab kɔkɔ yíkì Eeglɔn tiŋkin ní ki nìkī ki cūtìi bíi jáà nì Eebrɔn tiŋkin yab. 37 Bi nìn jáń ki fōō Eebrɔn tiŋki ní ki kūū ki-nib kɔkɔ, ki kpáaǹ ki-bɔtiu. Bi nìn jáń ki fōō ntimu mun pìlīǹ-kèe mun ní ki kūū mu-nib kɔkɔ. Kii Joosuwa nín nìn kúntì Eeglɔn tiŋki puee, míǹ mbaantiim ní u kúntì Eebrɔn tiŋki nì binib bin pée kóò ki-nee kɔkɔ, báà uniseen kaa kíǹ.

38 Míǹ boonee ní Joosuwa nì Isirayeel yab kɔkɔ yíkì Eebrɔn tiŋkin ní ki fātìi lábitìń ki túĺ Deebiir tiŋki pú ki cūtìi bíi jáà nì kì. 39 Bi nìn jáń ki fōō Deebiir tiŋki ki cúú ki-bɔtiu. Bi nìn fōō ntimu mun pìlīǹ-kèe ki kūū ki-nib kɔkɔ, báà uniseen kaa kíǹ. Kii Joosuwa nín nìn ŋá Eebrɔn tiŋki nì ki-bɔtiu nì Liibina tiŋki nì ki-bɔtiu puee, míǹ mbaantiim ní u ŋá Deebiir tiŋki mun.

40 Míǹ ní Joosuwa nìn jáń ki fōō kitiŋ gbanti kɔkɔ, an dàkà yii ntimu mun bí ajoon puee, nì mun bí Neegeeb teekunee, nì mun bí Seefeelaa paal puee, nì ntimu mun nákáǹ ajoon tikiŋŋee kɔkɔ, ní ki cúú mu-bɔtiibi. Waa nìn yāntì báà uniseen kíǹ. U nìn kūū binifoobi kɔkɔ kii ti-Dindaan Isirayeel Nimbɔtiu nín nìn tīī mara bí ŋá puee. 41 Joosuwa nìn jáń ki pɔ́ɔkiǹ bi-kɔkɔ, ki yōoǹ Kadeesi-Baarneeya tiŋki ki tin cáa sāā Gaasaa tiŋki, ní ki yōoǹ Gooseen^a tiŋki kɔkɔ ki tin cáa sāā Gabawɔn tiŋki. 42 Joosuwa nìn nyáń ki cūtì kujaau dibaba ja ní ki ŋúń ki jáń ki pɔ́ɔkiǹ bibɔtiibi gbanti kɔkɔ ki fōol̀ bi-timmu, kun puee ti-Dindaan Isirayeel Nimbɔtiu di nìn jáà ki tìì Isirayeel yab. 43 Míǹ boonee ní Joosuwa nì Isirayeel yab kɔkɔ fātìi nín gítí Giilgaal naapaal pu.