Diteetil Gbɔŋku 27

ISIRAYEEL YAB BÍI PÀKÀ UNIMBƆTI POONDI

Ataŋkpee ŋin bi cóoǹ Eebaal jool puee

1 Isirayeel tindaŋkpilib nìn kútì Mooyiisi pu ki tīī Isirayeel yab mara nee yii: «Nín̄ ŋúb́maan marab bin kɔkɔ m tīī-ni díǹ nee. 2 Ni yaa láa dūtì Jɔɔdan buŋŋu ki kɔ́ kitiŋ kin ti-Dindaan ni-Nimbɔtiu làá dūú tīī-nee poonee, ní dāá nyàab̀ ataŋkpakpaan kí cóoń ní kí dū kaaluupiin kí pīil̀-ŋi. 3 Ni yaa láa pée dūtì mbunee, ní dāá ŋmà marab nee ataŋkpee gbanti pu. Boonee ní ní dāá kɔ́ kitiŋ kin ní ti-Dindaan ni-Nimbɔtiu dūu tīī-nee poon. Kitiŋ kin ní ti-Dindaan ni-naanjab Nimbɔtiu làá dūú tīī-ni kii u nín nìn pōoǹ-ni puee poonee, nnaabiim nì tisiil di còol̀^a. 4 Ni yaa láa dūtì Jɔɔdan buŋŋu ki dóòyee, ní dāá dū ataŋkpee gbanti kí cóoń Eebaal jool pu kii m nín kpáafì-ni díǹ yii ní ŋá puee, ní kí dāá dū kaaluupiin kí pīil̀-ŋi. 5 Míǹ boonee ní dū ataŋkpee ŋin baa dū kukúluu ki kpítèe kí mā ti-Dindaan ni-Nimbɔtiu nsaraafan niin. 6 Ni nín pée yōoǹ ataŋkpee ŋi bí pu amɔnee, ní dūú mā^b ti-Dindaan ni-Nimbɔtiu nsaraafan, ní kí ŋá ŋu-pu saraawɔkaa kí tīī ti-Dindaan ni-Nimbɔtiu. 7 Ní dāá ŋá mpèé saraau mun, ní kí jī kí fàal̀ ti-Dindaan ni-Nimbɔtiu nimbiin niin. 8 Ataŋkpee ŋin ní ni cóoǹee puee, ní dāá ŋmà marab nee an nīn wāĺ tiŋan^c.»

9 Míǹ boonee ní Mooyiisi nì Leefii yab bisaraaŋaliibee bí Isirayeel yab kɔkɔ yii: «Isirayeel yab, ŋmīĺmaan kí pīlifì. Díǹ nee ni kpántì ti-Dindaan ni-Nimbɔtiu nibul. 10 Nín̄ tɔ́maan ti-Dindaan ni-Nimbɔtiu, kí ŋá kii u-marab nì u-bɔkpaaŋi ŋin m tīī-ni díǹ nee nín bí yii ní ŋá puee.» 11 Ŋwiin gbanti mbaanti ní Mooyiisi tīī Isirayeel yab mara nee, yii: 12 «Ni yaa láa dūtì Jɔɔdan buŋŋuee, Simeeyɔn nì Leefii nì Juuda nì Isakaar nì Jooseefi nì Beenjameen naakɔti ń dāá sīĺ Geerisiim jool pu kí mèè kí bìin̄ diniwul kɔkɔ pu. 13 Ní Rubeen nì Gaadi nì Aseer nì Sabulɔn nì Daani nì Neefitalii naakɔti ń dāá sīĺ Eebaal jool pu kí tɔ̄ mbusu.»

Mbusub saalaa nì bili

14 Leefii yab ń téeń mpɔn kí sòoǹ nì Isirayeel yab kɔkɔ yii:

15 «Mbusu dɔ̄ ki cí unil un di kpítì diwaal àá ki dūntì tikúti ki máń diwaal kí nīn jáaḿ-dì dibalinee^d. Ti-Dindaan nimbil kaa là kí wāl̀ an wanti tin ní unil dū u-ŋalii ki máńee.» Ní samaa kɔkɔ ń kíí yii: <Ameeni!>

16 «Mbusu dɔ̄ ki cí unil un di kpēē u-baa nì u-na fámee^e.» Ní samaa kɔkɔ ń kíí yii: <Ameeni!>

17 «Mbusu dɔ̄ ki cí un di cúú ditaŋkpal din cɔ́ u nì u-juti kpaanyɔkɔ ki cóotì ki nìkēe^f.» Ní samaa kɔkɔ ń kíí yii: <Ameeni!>

18 «Mbusu dɔ̄ ki cí un di kaa dàkā ujɔfu nsammɔnti u tin wáŋkèe^g.» Ní samaa kɔkɔ ń kíí yii: <Ameeni!>

19 <Mbusu dɔ̄ ki cí un di kaa sòon̄ unicaan nì ditaŋkpiibil nì ukpiipu bɔti nì ibaamɔnee^h.> Ní samaa kɔkɔ ń kíí yii: <Ameeni!>

20 <Mbusu dɔ̄ ki cí un di dōoǹ nì u-baa nimpoobi kansikin ubɔee, di sá yii u nín ŋá mimmee, u kpēē u-baa dooŋu fám deeⁱ.> Ní samaa kɔkɔ ń kíí yii: <Ameeni!>

21 <Mbusu dɔ̄ ki cí un di dōoǹ nì kuwaŋkuluuee^j.> Ní samaa kɔkɔ ń kíí yii: <Ameeni!>

22 <Mbusu dɔ̄ ki cí un di dōoǹ nì u-niisal, pēē baa àá pēē nee^k.> Ní samaa kɔkɔ ń kíí yii: <Ameeni!>

23 <Mbusu dɔ̄ ki cí un di dōoǹ nì u-coo, an dàkà yii u-nimpuu nee^l.> Ní samaa kɔkɔ ń kíí yii: <Ameeni!>

24 <Mbusu dɔ̄ ki cí un di gbáń ki kūū u-juti dibalinee.> Ní samaa kɔkɔ ń kíí yii: <Ameeni!>

25 <Mbusu dɔ̄ ki cí un di kíí ki fōō tiba kí kpɔ̀ maanyiibee.> Ní samaa kɔkɔ ń kíí yii: <Ameeni!>

26 <Mbusu dɔ̄ ki cí un di kaa tɔ́ Unimbɔti marab nee, kaa ŋá bi nín bí yii ú ŋá puee^m.> Ní samaa kɔkɔ ń kíí yii: <Ameeni!>