Diteetil Gbɔŋku 26

Tikpaajin tipeekaal nì tisaalaatiil bɔti

1 Ni làá kɔ́ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe poon. Ni yaa láa ká ŋkakaamɔnti ki kāl̀ee, 2 báà ŋma ń dāá lēē tikpaajin tin kɔkɔ u kùn̄ kitiŋ gbantinee tipeekaal kí ŋá kukabikun, kí yòon̄ kí cùnnì mpaan ŋun pu ti-Dindaan lēē kí nīn bí ní nīn jáaḿ-uee^a. 3 Ni yaa bàn̄ee ní báà ŋma ń tùkù usaraaŋakpil un bí ŋyunti gbanti niinee yii: «M lì díǹ ti-Dindaan a-Nimbɔtiu nimbiin yii m bāań kitiŋ kin poon u nìn pōoǹ ti-naanjab yii u làá dūú tīī-tee.» 4 Ní usaraaŋakpil ń fōō kukabikuee u-ŋaan kí dūú síiń ti-Dindaan ni-Nimbɔtiu saraafaŋŋu caŋin.

5 Niinee ní udaan ń lì ti-Dindaan ni-Nimbɔtiu nimbiin yii:

«M-naanja nìn sá uaranja ní ki nìn tú ki yìiǹ^b, ní ki dāa yíkìi sīntì Eejipiti tiŋkin ki kāl̀ niin kunicaŋu. Bin nìn táá-uee kaa nìn náaǹ, ama boonee bi dāa dūu kpántì ditimbuŋkpaandi. Bi nìn cáá mpɔn ki wīikí mun. 6 Ama Eejipiti yab nìn wɔ́b́-ti ki sāaǹ-ti, ní ki nìn yāntì ti túń atuun ŋin pɔ̄ɔ̄yee. 7 Niinee ní ti kúuǹ ki yíiń ti-Dindaan, ti-naanjab Nimbɔtiu ní u gbìl̄ ti-neen pu, ki ká ti-falaau nì ti-gìńdi nì bi nín wɔ́b́-ti puee. 8 Ti-Dindaan nìn túń atuŋkpaan nì mpɔŋkpaan tuuŋŋi nì atuun ŋin kɔ̄ntí tifaandee 9 ki cáań-ti doo, ní ki dū kitiŋ kin pu ní nnaabiim nì tisiil dɔ̄ ki còol̀ nee ki tīī-ti^c. 10 Kɔŋkɔnnee, m-Dindaan, m cáań-si tikpaajin tipeekaal tin m cáń kitiŋ kin ní a tīī-mee pu.»

U yaa lī míǹ ki dóòyee ní ú dū kukabikuee kí síiń ti-Dindaan ni-Nimbɔtiu nimbiin ní kí gbàan̄ kí jāam̀-u. 11 Míǹ boonee, ni nì Leefii yab nì binicambi bin kóò ni-puee ń dū tin kɔkɔ ti-Dindaan ni-Nimbɔtiu tīī ni nì ni-dicaŋŋee kí jī kí fàal̀.

Dibintataatiil poon tin bi lèekēe

12 Dibintataatiil poonee, an dàkà yii tisaalaatiil bindi poonee, ni yaa láa lēē ni-kpaajinti kɔkɔ pu tisaalaatiil ki síiǹee, ní dāá dū-tì kí tīī Leefii yab nì binicambi bin kóò ni-puee nì ataŋkpiibil nì bikpiipoobi, án nín làá ŋá pu laakin ni kóòyee, bí ká kí jī kí díkée^d. 13 Niinee ní ní tùkù ti-Dindaan ni-Nimbɔtiu yii: «Ti nyántì ti-kpaajinti dijandi din bí circiree ti-dumpui ki dū-dì ki tīī Leefii yab nì binicambi nì ataŋkpiibil nì bikpiipoobi kii a nín kpáafì-ti yii tí ŋá puee. Taa fātì ti-boon ki tīī a-marab, kaa tí súntì bi-kansikin báà ubɔ mun pu. 14 Taa kāl̀ dikpool ki dū tisaalaatiil jandi ki jíń, kaa tí lēē-tì ŋyunti ŋun ní ti bí tijɔkɔndinee, kaa lēē mun ki ŋá saraa ki tīī utaŋkpiil ubɔ. Ti-Dindaan ti-Nimbɔtiu, ti ŋá a nín kpáafì-ti yii tí ŋá puee deedee. 15 Míǹ puee gbóonní doooo yilpu laakin a kóòyee, kí bìin̄ a-niboolii Isirayeel yab nì kitiŋ kin ní a tīī-tee pu, kii a nín nìn pōoǹ ti-naanjab puee. Kitiŋ gbanti puee, nnaabiim nì tisiil di còol̀^e.»

Isirayeel yab sá ti-Dindaan nibul

16 Ti-Dindaan ni-Nimbɔtiu kpáafì-ni díǹ yii ní nīn ŋúb́ abɔkpaa nì akoobil nee. Ní pɔ́ɔm̀maan ni-ba kí ŋá kii ŋi nín bí yii ní ŋá puee nì ni-pɔbil kɔkɔ nì ni-naŋki kɔkɔ. 17 Ni lī díǹ yii ti-Dindaan sá ni-Nimbɔtiu ní ni làá nīn ŋáań u nín là puee, kí nīn ŋúb́ u-bɔkpaaŋi nì u-marab nì u-koobiliŋ ní kí nīn tɔ́-u. 18 Ní ti-Dindaan mun pōoǹ-ni ki lī díǹ yii ni sá u-nibul, binib bin u làá nīn yíì u-gaajawammɔntiitee^f kii u nín pōoǹ puee. Ní nīn ŋúb́ u-marab kɔkɔ. 19 Ti-Dindaan ni-Nimbɔtiu làá yòon̄-ni yilpu, kí yàntī ní nīn jítiǹ atimbun ŋin kɔkɔ u náańee, kí tīī-ni tinyool, kí yàntī ní nyā diyindi kí jītíǹ ŋi-kɔkɔ. Di sá yii u là ní nīn sá u-circir nibul kii u nín lī puee ní.