Diteetil Gbɔŋku 25

Ubɔsoonli ń sòoǹ tibɔti ti-pú

1 Binib bili yaa jáàyee, bí cù kubɔsoondiin ní bibɔsoonliibi ń sòoǹ bi-bɔti kí pɔ̀ un bɔti ŋān̄ee ní kí kpɔ̀ un bɔti kaa ŋān̄ee bɔti. 2 An yaa sá bí gbá un jíń dibɔkpilee, ubɔsoonli ń yàntī ú dòon̄ kitiŋ u-nimbiin ní kí yàntī bí gbá-u anaalab. U-bɔkpil nín bàlifī bí gbá-u puee, míǹ ní bi máaǹ kí gbá-u. 3 Ama ubɔsoonlee kaa máaǹ kí yàntī bí gbá-u kí jītí anaalab imuŋku ili pu^a. Kun puee bi yaa gbáń-u an jítì míǹ puee, ni kíǹ ki bíi kpèé ki sìŋkīǹ ni-nabiki dee.

Unaa

4 Ní taa bóob́ unaa un tà ki gbátí adibilee nyɔkɔ^b.

Ukpiipu un kaa cáá kibikee bɔti

5 Nnabiyaamu di yaa bí ní ki kóò dicilpu, ní bi-kansikin ubɔ yaa cáá unimpu kaa láá màl̄ kibiki ní ki kpíì ki fá u-nimpuuee, ukpiipuee kaa máaǹ kí nyā kudicaŋuee poon kí cùú mɔ̄ǹ ubɔ laaba. U-cal nabiki kiba di fòol̄-u kí cáá ní kí ŋá kii mara nín bālifì puee. 6 U-cal nabikee yaa cáá-uee, kibininjabiki kipeekaai kin u làá màal̀ee di làá téeǹ utaŋkpiilee yil u-yindi ń nīn bí ki cá jaanjaan Isirayeel tiŋkin^c.

7 Ama uninjee yaa kaa là kí fōō u-nabiki kpiipuuee, ukpiipuee ń cù kí ká bitindaŋkpilib, kitiŋ punyɔkɔpu ní kí tùkù-bi yii: «M-cal nabiki kaa là u-nabiki utaŋkpiil yindi ń nīn bí ki cá Isirayeel yab kansikin. M-cal nabiki yíì kaa là kí ŋá min u máaǹ kí ŋá kí tīī-mee.» 8 Niinee ní bitindaŋkpilib ń yíiń-u tibuul ní kí sòoǹ nì u. U yaa gbíntìi tɔ́kɔ́ ki lì yii: «Maa là kí fōō ukpiipuee», 9 ní ukpiipuee ń còom̀ kí cù u-nimbiin bikpilib nín kā puee, ní kí tákatí u-naatakal diba ní kí tíiĺ kí pɔ̀l̄ u-nimbiin ní kí lì yii: «Bi nín ŋáań unil un kaa là kí màal̀ kí téeǹ u-nabiki yilee puee dee!» 10 Niinee ní Isirayeel tiŋki poonee bí pɔ̄ kijapaai gbanti dicaŋku diyindi yii: «Un taalin bi tákatì dinaatakalee dicaŋku.»

Kujaau poon laakin baa máaǹ kí cúúyee

11 Bininjab bili yaa bíi jáà ní un bi bíi gbáàyee nimpuu yaa bàà cūtì kí fīī u-cal un bíi gbáà-uee ŋaan, ní u yaa tāntì u-ŋal ki cúú un bíi gbáà u-calee ninjatee, 12 ní gāā kí gùutī u-ŋal. Ní taa sɔ̄ u-saai báà fiii pu.

Nnyiŋfi nì mpúun ŋmàntitam bɔti

13 Ní taa nín̄ cáá ni-lookun tikúti tin bi cáa ŋmàntī nnyiŋfee mili pu, diba ń nīn nyìm̀, din kíǹee ń taa nín̄ nyìm̀ ní nīn cáa mùul̄. 14 Ní taa nín̄ tí cáá ni-dumpu asambiŋmantikaa mili pu, diba ń nīn sá dikpaandi, din kíǹee ń nīn sá kiwaai. 15 Ni máaǹ tikúti tin ni cáa ŋmàntī nnyiŋfee ń nīn sá deedee kúti, ní asambil ŋin ni cáa ŋmàntī tiwanee ń nīn sá deedee sambiliŋ. Mimmee ni làá kàl̄ kitiŋ kin ti-Dindaan ni-Nimbɔtiu làá tīī-nee poon kí yúntí. 16 Di sá yii bin kɔkɔ ŋáań míǹ ki cáa mùul̄ee sá ntimbiil nib ní ti-Dindaan ni-Nimbɔtiu nimbiin^d.

Bi nín máaǹ kí ŋá Amaleeki yab puee

17 Ní téetímaan Amaleeki yab nín nìn ŋá-ni pu ŋyunti ŋun ni nìn nyáń Eejipiti tiŋkin ki dòońee. 18 Ŋyunti ŋun ni nìn gīī kaa ti pée ŋūǹ kí ŋá tibee, ní bi cílìń ni-boon pú ki nāaǹ bin nìn pánní boonee. Baa nìn fāŋkì Unimbɔti báà fiii. 19 Ti-Dindaan ni-Nimbɔtiu yaa láa nyántì-ni ni-nannanliibi bin māntì ki tú-nee ŋaan ki tīī-ni diŋuŋfil kitiŋ kin u làá dūú tīī-ni ní nīn kíǹ ki yèe poonee, ní dāá kpɔ̀ kí céetí Amaleeki yab kitiŋ pu, án nín làá ŋá pu báà ubɔ ń taa ti téetí bi-puee. Ní taa súntí tibɔti gbanti^e!