Diteetil Gbɔŋku 24

Unimpu un bi jìn̄ee bɔti

1 Ubɔ yaa cáá unimpu ní ki ká yii unimpuee bɔti kaa ti mɔ̄ǹ-u kun puee u ká u-pu tibee, ú ŋmà kugbɔŋu^a kun dàkà yii u jìn̄-uee kí ŋúbíǹ-u ní kí nín jà-u u-cindi. 2 Unimpuee yaa búntì ní ki tin ká uninja ubɔ ki mɔ́ǹ, 3 ní uninja liliiti un u mɔ́ǹ gbantee mun yaa bí yii waa ti là-u ní ki mun ŋmàn̄ gbɔŋku kun dàkà yii u jìn̄-uee ki ŋúbiǹ-u ní ki mun tí jìn̄-u u-cindi, àá tí lì yii u-cal liliiti gbanti kpíì. 4 Niinee, u-cal peepeekaa un nìn jìn̄-uee kaa ti cáá nsan kí fàtīí cáá-u, di sá yii unimpuee kɔ́ tijɔkɔndi. Waa ti ŋūǹ kí cáá-u. U yaa fātìi cáá-uee, an sá ntimbiil tundi ní ti-Dindaan nimbiin. Ní taa kɔ́ǹ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe tijɔkɔndi.

Uninja un cáá unimpucaanee

5 Uninja un cáá unimpucaanee kaa máaǹ kí cù kujaau. Baa máaǹ kí tīī-u ditundi diba mun ú tɔ̄. U cáá dibimmɔndi kí tɔ̄ u-ba kí kàl̄ mmɔŋki kí kɔ̀ntī unimpu un u cááyee nimbiliŋ.

Toolima bɔti

6 Ubɔ yaa cáá-ni dipɔndee, ní taa cùú yòon̄ u-naaku toolima, kí taa yòon̄ u-namintidɔŋu gba. Ni yaa ŋá mimmee, an bí kii ni fōō kun u ŋáań ki jīǹ ki bí dimaŋfalinee ní toolima.

Unil un bi cúú mpɔnee

7 Ni yaa ká ubɔ cúú u-nabiki Isirayeel nib kansikin ubɔ ki dū-u ki kpántì u-yumbuu àá u dū-u ki nyáfèe, ní kpɔ̀ udaan. Ní ŋá míǹ kí nyāntí ikpiti ni-kansikin^b.

Dinyaŋgbandi bɔti

8 An yaa sá dinyaŋgbandi weeŋŋu jandee, ní kpèè tiŋan kí ŋá kii Leefii yab bisaraaŋaliibi^c nín dàkā yii ní ŋá puee deedee. Ni máaǹ kí ŋá tin m kpáafì-bi bí dūú dàkà-nee. 9 Ní téetí ni nín nyáń Eejipiti tiŋkin ki dòoń ti-Dindaan ni-Nimbɔtiu ŋá Miiriyam pu nsannee^d.

Toolima bɔti tiba mun

10 Ni yaa pīnnì ni-juti tibee, ní taa bìl̄ kí kɔ́ u-dumpu kí yòon̄ tiba toolima. 11 Ní nīn yú mmɔŋki ní ni-pɔnliu u-ba ń cáań-ni kun u làá dūú tīī-ni toolimee. 12 Udaan yaa sá usoodaan ní ki yaa dū u-satabiiŋkaau ki tīī-ni toolimee, ní taa yàntī kutaa ń wúntí u-toolimau gbanti pu ni-dumpu. 13 Ní fàtīí gíiǹ u-satau kí tīī-u ní ŋwìiń ń nín jēetí, án nín làá ŋá pu ú ŋmā kí ká kí bìin̄ kunyeeuee. Ni yaa ŋá mimmee, u làá mèè kí bìin̄ ni-pu ní án nīn sá min kítì ti-Dindaan ni-Nimbɔtiu ceeyee^e.

Bí nīn tɔ́ usoodaan

14 Ní taa mùul̀ upaadaan un sá usoodaan kaa cáá tibee. An yaa sá ni-nabiyaamu Isirayeel yab ubɔ àá binicambi bin kóò ni-tiŋkinee kansikin ubɔɔɔ, ní taa mùul̀ udaan. 15 Ní pà u-paati ní ŋwìiń ń nín jēetí, di sá yii u sá usoodaan, ní animbil gbanti pu ní u máká. An yaa kaa sá mimmee, u làá tīminsì ti-Dindaan kí tɔ̄ ni-pu ní ní kɔ́ ikpitin^f.

Unil kamaa kpitii pu ní bi làá kpɔ̀-u

16 Baa máaǹ kí kpɔ̀ bibaatiibi bi-biyaamu kpitii pu, kaa tí máaǹ kí kpɔ̀ mbiyaamu bi-baabi kpitii pu. Báà ŋma kpitii pu ní u máaǹ kí kpú^g.

Bi nín máaǹ kí ŋá bisoodambi puee

17 Ní taa mùul̀ unicaan àá ditaŋkpiibil ibɔsoon poon, kí taa yòon̄ ukpiipu bɔkutil toolima. 18 Téetímaan yii ni nìn sá iyumbu ní Eejipiti tiŋkin ní ti-Dindaan ni-Nimbɔtiu dá-ni ki líì^h. An pu ní m kpáafí-ni ní ŋúb́ tibɔti nee.

19 Ni yaa bíi cēē ni-kpaajinti ní ki yaa súntì dibɔ́ndi diba pu boonee, ní taa fàtīí gítí ni-boon kí yòon̄-dì. Ní yàntī-dì, binicambi nì ataŋkpiibil nì bikpiipoobi yaa bíi lúlifí ki tin kée, bí yòon̄ ní ti-Dindaan ni-Nimbɔtiu ń bìin̄ ni-tuuŋŋi kɔkɔ pu. 20 Ni yaa kītì ɔliifi biliŋee, ní taa fàtīí gítí kí lūlifì. Ní yàntī abil ŋin kíǹ ki lúń busubu puee kí tīī binicambi nì ataŋkpiibil nì bikpiipoobi. 21 Ni yaa tí kītì fiinyi biliŋee, ní taa fàtīí gítí kí lūlifì. Ní yàntī abil ŋin kíǹ ki lúńee kí tīī binicambi nì ataŋkpiibil nì bikpiipoobiⁱ. 22 Ní taa súntí yii nimbi ni-ba nìn sá iyumbu ní Eejipiti tiŋkin. An pu ní m kpáafí-ni ní ŋúb́ tibɔti nee.