Diteetil Gbɔŋku 23

1 Ubɔ ń taa cáá u-baa nimpoobi kansikin ubɔ. U yaa ŋá mimmee, u kpēē u-baa dooŋu fám^a.

Bin kaa máaǹ kí nīn bí Unimbɔti samaau kansikinee

2 Uninja un sá ufaalee àá un ninjati bi yaa gíí ki tūkutèe kaa máaǹ kí kɔ́ ti-Dindaan samaau kansikin.

3 Unil un sá dikpacantibilee nì u-naantitɔntɔkɔŋ kí tin sāā saalaa pu gba kaa máaǹ kí kɔ́ ti-Dindaan samaau kansikin.

4 Amɔn yab nì Moowaab yab nì bi-naantitɔntɔkɔŋ kí tin sāā saalaa pu gba kaa máaǹ kí kɔ́ ti-Dindaan samaau kansikin^b. 5 Di sá yii ŋyunti ŋun ni nìn nyánní Eejipiti tiŋkin ki dòońee, baa nìn nyánní ki túŋkì-ni kí tīī-ni tijin nì nnyim. Ní míǹ boonee, bi cūtìi yōoǹní Beewɔɔr jipɔɔn, Balaam un sá Peetɔɔr tiŋki kin bí Aram Naarayiimee, ki tīī-u animbil ú tɔ̄-ni mbusu. 6 Nì míǹ kɔkɔee, ti-Dindaan ni-Nimbɔtiu kaa nìn pílifiǹ Balaam gbanti. Ama u nìn yāntì u nín tòó-ni mbusu uŋyee kpántí dibiindi ní ki tìì-ni, kun puee ti-Dindaan ni-Nimbɔtiu néeń-ni ní^c. 7 Dalba dalba ní taa nyàab̀ atimbun ali gbanti nyɔkɔpu cùtam, kí taa píí-bi kubɔɔtiiu.

8 Ní taa nín kpèé ki sìŋkīǹ Eedoom yab kii bi sá ntimbiil nibee, di sá yii bi sá ni-nabiyaamu ní^d. Ní taa kpèè kí sìŋkīǹ Eejipiti yab mun, di sá yii ni kāl̀ bi-tiŋkin kunicaŋu. 9 Bi-naantitɔntɔkɔl ditataatiil ŋūǹ kí kɔ́ ti-Dindaan samaau kansikin.

Dijanjanaapaal pu nyaŋkanti

10 Ni yaa yíkì ki cá kí jáǹ ni-nannanliibi ní ki kóoǹ ki kpáfì laaba ki ŋātì dijanjanaapaalee, ní nīn nyíǹ ni-ba kí taa ŋá tin kamaa kaa ŋān̄ee. 11 Ni-kansikin ubɔ yaa dɔ̄ ki gèeǹ kunyeeu ní ki nyéem̀ tijati ki kɔ́ tijɔkɔndinee, udaan ń nyā dinaapaalin kí taa kɔ́nní ŋwiin gbanti. 12 Ama kujoou yaa bíi jóotée, ú nyàab̀ nnyim kí fàl̀, ní ŋwìiń yaa jéetèe ú fàtīí gítiń bin kíǹee cee.

13 Ní lēē dinaapaal kpaanceetiŋu laaba kí nīn cáà niin ataa pu. 14 Ujanjal kamaa máaǹ kí nīn cáá tigbakaal ní u yaa cūtì ataa puee, ú gbà mbòó kí sɔ́ntí, ní u yaa dóòyee ú kàfì ntam kí bìin̄. 15 Di sá yii ti-Dindaan ni-Nimbɔtiu dòoń ki màntī ni-naapaal pu kí wúń ni-pu, ní kí nyāntí-ni ni-nannanliibi ŋaan kí tīī-ni dijajil. An puee ni-naapaal máaǹ kí nīn bí circir ní, án nín làá ŋá pu ú taa ká ni-kansikin titantan tiba kí fàtī u-boon kí tīī-nee.

Uyumbu un sáǹee bɔti

16 Uyumbu yaa sáǹ ki kɔ́-see, á taa fàtīí gíiǹ-u kí tīī u-dindaan. 17 U ŋūǹ kí kɔ́ ni-kansikin, laakin yaa fáatì-uee, nì kitiŋ kin u yaa lēē kí nīn bée poon. Á taa mùul̀-u.

Alaakpaatuun bɔti

18 Isirayeel sapɔmbi nì Isirayeel naacimpɔmbi ubɔ ń taa dū u-ba kí tīī alaakpaatuun^e. 19 Unimpu àá uninja yaa ŋá alaakpaatuun ní ki ká animbilee, ú taa cáań animbil gbanti kí pà ipoon in ní u pōoǹ ti-Dindaan ni-Nimbɔtiuee pɔndi, kun puee alaakpaanimbil sá ntimbiil wanti ní ti-Dindaan Unimbɔti cee.

Kí pìnnì animbil bí pà kí páań

20 Ni yaa pīnnì ni-nabiki animbil àá tijin àá tin ní an yaa pée sée, ní taa páb́-u ú téeǹ-ni kí páań. 21 Ni ŋūǹ kí pìnnì unicaan kí yàntī ú dāá téeǹ-ni kí páań, ama ní taa ŋá míǹ ni-nabiki Isirayeel niliu cee. Ni yaa ŋá mimmee ti-Dindaan ni-Nimbɔtiu làá bìin̄ ni-tuuŋŋi kɔkɔ pu kitiŋ kin ni làá kɔ́ kí fōō ki nīn kíǹ ki yèe poon^f.

Diwampoondi bɔti

22 Ni yaa pōoǹ kí ŋá tiba kí tīī ti-Dindaan ni-Nimbɔtiuee, ní pà ni-pɔndi malaa, di sá yii ti-Dindaan ni-Nimbɔtiu làá dāá pée bàlifì-ni, ní ní dāá fōō dibɔkpil^g. 23 Ama ni yaa kaa pōoǹ tibee, naa yīntì mun. 24 Tin nyáń ni-nyɔkɔnee, see ní pɔ́ɔǹ kí ŋá míǹ, kun puee ni-ba nyɔkɔn ní an nyáń ní ni pōoǹ ti-Dindaan ni-Nimbɔtiu dipoondi.

Nsan pú unil ń kìtī asubil kí ŋmɔ́

25 Ni yaa kɔ́ ni-nabiki fiinyi kpaabunee, ni ŋūǹ kí kìtī fiinyi biliŋ kí ŋmɔ́ ni nín là puee, ama ní taa kìtī kí ŋá ni-lookun.

26 Ni yaa tí kɔ́ ni-nabiki bilee kpaabun, ni ŋūǹ kí dū ni-ŋalii kí lēē ifin kí ŋmèem̀ kí ŋmɔ́, ama naa máaǹ kí dū ugɔti kí cā^h.