Diteetil Gbɔŋku 22

Á kpèè a-juti wanti tiŋan

1 A-nabiki naau yaa wáŋkì àá u-piiiu di wáŋkì ní a kée, á taa fàtī a-boon kí tīī. Péetí unaayee àá upiiyee kí cáá tīī u-dindaan. 2 A-nabikee yaa kóò an dátiǹ-si àá saa pée nyí udaanee, á péetí-u kí cáá gbìn̄ a-dumpu kí nīn kpèé-u kí cáá sāā daliŋkin unaayee àá upiiyee dindaan làá dāan̄ kí nyàab̀ u-wantee, ní á gíiǹ kí tīī-u. 3 An yaa tí sá a-nabiki maŋki àá u-bɔkutil àá u-wanti tin kamaa yaa pée wáŋkì ní a kée, a nín máaǹ kí ŋá puee dee. Á taa fàtī a-boon kí tīī a-juti wanti.

4 A yaa tí ká a-nabiki maŋki àá u-naau lítì ki dɔ̄ nsan caŋinee, á taa fàtī a-boon kí tīī. Tūtuǹ udaan ú yòon̄ kuwaŋkuluuee kí síiń ku-taaŋi pu^a.

5 Unimpu kaa máaǹ kí lòon̄ tininjawan. Míǹ mbaantiim ní uninja mun kaa máaǹ kí lòon̄ tinimpuwan. Bin bin ŋáań mimmee sá bitiŋwiiliibi ní ti-Dindaan ni-Nimbɔtiu cee.

6 A yaa bíi còom̄ ki cá ní ki tin ká nsan caŋinee, kunɔmbidii pá busubu bubɔ pu àá kù dɔ̄ kitiŋ ní kinɔmbiki bí ku-poon nì ki-biyaamu àá ki náká ki-jiŋŋi puee, á taa cúú kinɔmbikee kí kpáaǹ ki-biyaamu. 7 Á yòon̄ mbiyaamu kí yàntī unaati ń búntí. A yaa ŋá mimmee, án làá bútí-si ní á kàl̄ kitiŋ pu kí yúntí.

8 A yaa máń kudipɔŋuee, á bɔ̀b̄ ku-yilpu kí mā digundi kí màntīí tū yilpu laakin a bɔ̀b̄ee ubɔ ń taa láa nyā kudiiyee yilpu kí lítí kitiŋ kí dū u-kpuulool kí lúntí a-pu.

9 A yaa kùn̄ bufiinyikpaayee, á taa dū busubu bubɔ biliŋ kí bɔ̄l̀ bukpaabaantiibuee poon. An yaa kaa sá míǹ, fiinyee nì asubil ŋin a búĺ ki kútèe yaa láa lòon̄ee, an kɔkɔ dāa sá ki tīī Unimbɔti ní. 10 Á taa dū unaa nì kimaŋ kí kpāfì kí kpàl̄ bí kpɔ̀ tikpaal. 11 Aa máaǹ kí pèen̄ tiwan tin ní bi dū ipii kuti nì gulfa ki ŋmālim̀ ki lùn̄ee^b.

12 Á lù a-satabiiŋkaau nyɔɔjuuŋi naatil pu igbeeŋgbeen^c.

Unimpu un bi túǹ dibɔgabilee

13 Ubɔ yaa cáá unimpu ní ki dōoǹ nì u, ní boonee kaa ti là-u, 14 ní ki túǹ-u dibɔgabil ki bíil̀ u-yindi ki lī yii: «M nín cáá unimpu nee ki dōoǹ nì uee, maa ká kudaaŋŋu kun dàkà yii waa nìn nyí uninjee». 15 Niinee ní usapɔɔnee baa nì u-na ń cáań kudaaŋŋu kun dàkà yii bi-bisal kaa nìn nyí uninjee kí tīī bitindaŋkpilib bin kā kitiŋ punyɔkɔpuee. 16 Ní ubaati ń bí bitindaŋkpilibee yii: «M dū m-bisal ki tīī uninja nee ticati, ama waa ti là-u, 17 ní ki bíi tūntí-u dibɔgabil ki lì yii m-bisal béè uninja ní ki nín mɔ́ǹ-u. Ama kpèèmaan kun dàkà yii m-bisal kaa nìn nyí uninjee.» Niinee ní ubaati ń kpátí sata un pu bi nìn dōoǹ kunyapeepeekaauee kí bíĺ bitindaŋkpilib nimbiin. 18 Ní bitindaŋkpilibee ń cúú uninjee kí dáaĺ u-tafal. 19 Míǹ boonee ní bí gíí-u dipɔndi animbil kúti dilaataal ú pà kí tīī usapɔɔnee baa, kun puee u bíil̀ uisirayeelsapɔɔn un kaa nyí uninjee yindi. Kí kúntée usapɔɔnee làá nīn gbíntìi sá u-nimpuu ní kí cáá sāā u-kúm dal, waa ti cáá nsan kí jà-u.

20 Ama uninjee nín lī puee yaa sá ibaamɔn ní baa lafun ká kudaaŋŋu kun dàkà yii usapɔɔnee kaa nìn lafun nyí uninjee, 21 ní bí cáá-u kí cùnnì u-baa diiku punyɔkɔpu ní kitiŋ gbanti yab bin sá bininjabee ń yāŋkì-u ataŋkpee kí kpɔ̀. Di sá yii u ŋá icoo bɔti Isirayeel tiŋkin ki kāl̀ u-baa dicaŋkun ki ŋá tilaakpaal. Míǹ ní ni máaǹ kí ŋá ní kí nyāntí ikpiti ni-kansikin.

22 Ubɔ yaa dōoǹ nì u-juti nimpuu ní ni cúú-uee, ní kpɔ̀-u kí kpáaǹ unimpuee mun. Míǹ ní ni máaǹ kí ŋá ní kí nyāntí ikpiti ni-kansikin.

23 Usapɔɔn di yaa tí cáá bɔɔn ní uninja ubɔ yaa ká-u kitiŋin ki dōoǹ nì uee, 24 ní nyāntí bi-liitilee kitiŋ punyɔkɔpu kí yāŋkì-bi ataŋkpee kí kpɔ̀. Bí kpɔ̀ usapɔɔnee, kun puee u bí kitiŋin kaa kúuǹ ki yíiń binib bí dāá fīī-u, ní kí kpɔ̀ uninjee, kun puee u dōoǹ nì ubɔ nimpuu. Míǹ ní ni máaǹ kí ŋá ní kí nyāntí ikpiti ni-kansikin. 25 Ama an yaa sá kusaaun ní ubɔ ká usapɔɔn un cáá bɔɔnee ki ŋá-u mpɔn ki dōoǹ nì uee, uninja un ŋá mimmee baba ní ni máaǹ kí kpɔ̀. 26 Ní taa ŋá usapɔɔn tiba, di sá yii waa ŋá ikpiti in máaǹ ŋkúmee. Tibɔti gbantee náań nì ubɔ nín cútí u-juti kí kpɔ̀-u puee ní. 27 Di sá yii uninjee ká usapɔɔn kusaaun ní. Báà usapɔɔnee yaa gbáń ibiilaaa, ubɔ kaa bí niin kí fīī-u.

28 Ubɔ yaa tí ká usapɔɔn un kaa cáá bɔɔnee ní ki yaa ŋá mpɔn ki dōoǹ nì u ní bi yaa cúú-bee, 29 uninjee máaǹ kí pà usapɔɔnee baa tikúti nimbiliŋ jitɔmbi imuŋku ili nì saalaa, ní kí cáá usapɔɔnee, di sá yii u bíil̀-u. Waa ti cáá nsan mun dalba dalba kí jà-u kí cáá sāā u-kúm dal^d.