Diteetil Gbɔŋku 4

Unimbɔti tīī u-nibooliŋu marab

1 Kɔŋkɔnnee Isirayeel yab, pīlifìmaan abɔkpaa nì akoobil ŋin mama m-ba bíi cáa dàkà-ni nee kí ŋá ŋi nín bí yii ní ŋá puee. Ni yaa ŋá mimmee, ni làá nīn bí dimaŋfalin ní kí kɔ́ kí fōō kitiŋ kin ní ti-Dindaan, ni-baabi Nimbɔtiu làá dūú tīī-ni nee. 2 Ní taa gbéeǹ tiba nì tiba tibɔti tin man cáa kpáafí-ni nee pu, kí taa tí bàtī tiba mun ti-pu kí fá. Ní nīn ŋúb́ ti-Dindaan ni-Nimbɔtiu marab bin m cáa bíi kpáafí-ni nee^a.

3 Nimbi ni-ba ni-nimbil ká tin ti-Dindaan nìn ŋá Baal Peewɔɔr tiŋkinee^b. Ti-Dindaan ni-Nimbɔtiu nìn kūū ki céetì bin kɔkɔ nìn pée jáam̀ diwaal Baal Peewɔɔree ki nyántì ni-kansikin. 4 Ama nimbi bin nìn síl̀ nì ti-Dindaan ni-Nimbɔtiu deedeeyee, ni-kɔkɔ gbíntìi bí dimaŋfalin díǹ pu.

5 Kpèèmaan, m dàkā-ni abɔkpaa nì akoobil kii ti-Dindaan m-Nimbɔtiu nín kpáafì-mi puee. Ni yaa láa bàn̄ kitiŋ kin ni làá kɔ́ kí fōō kí nīn kíǹ ki yèe poonee, ní dū-ŋi kí ŋá ditundi. 6 Ni yaa ŋúb́ abɔkpaa gbanti tiŋanee, anibul ŋin kíǹee làá dāá gbìl̄ bi sòoǹ ni-marab nee pu ní bí yíiń-ni binyiliibi nì biciŋfitiibi kí lì yii: «Tiŋman, ditimbuŋkpaandi nee nib lafun sá binyiliibi nì biciŋfitiibeeee!» 7 Tiŋman, ditimbundi dilal, báà di yaa sá dikpaandi min min ní di-waaŋi pìl̄-dì kii ti-Dindaan ti-Nimbɔtiu nín pìl̄-ti ki ŋáań tikɔkɔ ki tìì-ti ŋyunti ŋun ní ti yaa kúuǹ ki yíiń-u na? 8 Ditimbuŋkpaandi diba gíti bí ki cáá abɔkpaa nì akoobil sá amɔnti kii marab bin m cáa tìì-ni díǹ naaa?

9 Ama ní cúúmaan ni-ba, ní nīn nyíǹ ni-ba tiŋan kí taa súntí tin tin ni-nimbil kée. Ní yàntī tin ni kée ń nīn kā ni-pɔbilin ní nīn cáá-tì ki dàkà ni-biyaamu nì ni-naantiibi, ni-maŋfal wiiŋyi kɔkɔ poon.

10 Ní téetí ŋwiin ŋun ni nìn síl̀ ti-Dindaan ni-Nimbɔtiu nimbiin Ooreeb jool caŋinee. Ti-Dindaan nìn tùkū-mi yii: «Kóoǹ samaa nee kɔkɔ kí kpāfì m-cee. M làá yàntī bí gbìl̄ m-nyɔɔbuŋŋi án nín làá ŋá pu bi-wiiŋyi in kɔkɔ bi cáá kí kàl̄ kitiŋ nee puee, bí bīfì kí nīn kíǹ ki fàŋkí-mi ní kí nīn cáa dàkà bi-biyaamuee.» 11 Ŋyunti gbantee ní ni sútì ki pìl̄ dijool ki yú di-taapu. Dijool nìn fōō ŋŋmi ní aŋmilimbil nìn yíkí ki jɔ́ḿ kutaa ní atagbambɔn nì dibɔmbɔŋkpaandi nìn māntìi tú-dì. 12 Ti-Dindaan nìn sòon̄ nì ni ŋŋmee poon. Nneen ŋubɔ nìn sòoǹ ní ni gbìl̀ nneenee pu, ama ní kaa wāĺ ubɔ. Kun kun ni nìn pée gbìl̀ee di sá nneen gbanti^c. 13 U nìn cántì u-poondi din u pōoǹ-nee taapu ki tùkū-ni, ní ki bí yii ní ŋúb́ marab saalaa bin u síiǹ-nee. U nìn ŋmàn̄ marab gbanti titaŋkpapilindi tili pu^d. 14 Ŋyunti gbanti mbaanti poon ní ti-Dindaan tīī-mi mara yii ḿ dàkà-ni abɔkpaa nì akoobil ŋin ni làá nīn ŋúb́ ni yaa bàn̄ kitiŋ kin ni làá dùtī kí fōō kí nīn kíǹ ki yì nee poonee.

Ní nīn nyíǹ ni-ba nì iwaatooti

15 Ní nīn nyíǹ ni-ba, di sá yii ŋwiin ŋun ti-Dindaan nìn sòon̄ nì ni ŋŋmi poon Ooreeb jool puee, naa nìn wál̀ báà kujiliŋu kubɔ. 16 Ní taa kɔ́ǹ ni-ba tijɔkɔndi kí cùú nīn māā àá ki kpítí awaa aba kí nántíǹ uninja àá unimpu^e. 17 Ní taa tí kpítí tiba kí nántíǹ tiwaŋkuti tin bí kitiŋ puee àá inoon, 18 kí taa tí kpítí tiba mun ki nántíǹ tin fù kitiŋee àá ijɔm^f. 19 Míǹ mbaantiim ní ní taa wáaǹ kutaa kí kpèè ŋwìiń nì uŋmal nì iŋmalbijaa, an dàkà yii tin kɔkɔ pée bí kutaa puee, kí yàntī tí lábití ni-landɔkɔŋu ní nīn kíǹ ki gbàantí ti-taapu ki jáaḿ-tì. Ti-Dindaan ni-Nimbɔtiu dū atuun gbanti ki tīī anibul ŋin kɔkɔ kíǹ ki bí kitiŋ puee ní. 20 Ama nimbee, ti-Dindaan yōoǹ-ni ki nyántìń kipaai ŋmiŋu poon Eejipiti tiŋkin ní nīn kíǹ ki sá nnibool ŋun sá ki tīī-uee, kii ni nín sá pu díǹ ki tīī-u nan ní^g.

21 Ni-puee, ti-Dindaan gíí m-pu diŋuul ní ki pūtì yii m kpá kí dùtī Jɔɔdan buŋŋu kí kɔ́ kitimmɔntii kin ti-Dindaan ni-Nimbɔtiu làá dūú tīī-ni án kpántí ni-yakee poon^h. 22 Di sá yii m làá kpú kitiŋ kin bí nee poon ní, maa làá ŋmā kí dùtī Jɔɔdan buŋŋu. Ama nimbee, ni làá dùtī-dì kí fōō kitiŋee kí nīn kíǹ ki yì. 23 Míǹ puee ní nīn nyíǹ ni-ba kí taa súntí dipoondi din ti-Dindaan ni-Nimbɔtiu pōoǹ-nee. Ní taa tin nín̄ nāantí awaa ki nántíǹ tiba kii ti-Dindaan ni-Nimbɔtiu nín bí yii ní taa ŋá puee. 24 Kun puee ti-Dindaan ni-Nimbɔtiu sá ŋŋmi ŋun wù ki céetée ní. U sá Unimbɔti un cáá ipoompoonee níⁱ.

25 Ni yaa láa kāl̀ kitiŋ gbanti poon ki yúntì ní ki yaa láa cáá mbiyaamu nì naantiibee, ní taa láa kpítí awaa kí nántíǹ tiba kí kɔ́ǹ ni-ba tijɔkɔndi. Ní taa láa ŋá ikpiti gbanti ti-Dindaan ni-Nimbɔtiu nimbiin kí gbítí u-ŋuul. 26 Ama ni yaa ŋá mimmee, ibaamɔn ní m bíi tùkù-ni, kutagbɔŋu nì kitiŋ sá m-seeradambi díǹ yii naa làá pée sūŋkì ní kí kpú kí céetí kitiŋ kin ni làá dùtī Jɔɔdan buŋŋu kí tin kɔ́ nee poon. Naa làá kàl̄ ki-poon kí yúntí báà fiii, di sá yii ni làá kpú ní kí céetí malaa. 27 Ti-Dindaan làá dāá yàntī ní yàl̄ kí tin nín̄ bí atimbun aban. Ni-wíiŋŋu làá dāá bàtī ní ní kíń fiii atimbun ŋin poon ti-Dindaan làá dāá jà-ni kí cùnnèe. 28 Atimbun gbantinee, ni làá dāá nīn tòotī awaa ŋin ní unil dū u-ŋalii ki máńee, awaa ŋin sá idɔ nì ataŋkpee kaa wāĺaaa, kaa gbìl̀aaa, kaa jīǹ tijinaaa, kaa tíkì nnumee. 29 Ntimu gbanti poonee, ni làá dāá nyàab̀ ti-Dindaan ni-Nimbɔtiu. Ni yaa láa nyàab̄-u nì ni-pɔbiliŋ kɔkɔ nì ni-nammu kɔkɔee, ni làá dāá ká-u^j. 30 Ni-nimbinaamandi poonee, tin kɔkɔ m sòon̄ nee làá dāá bàń-ni, ní ní dāá fàtīí gítiń ti-Dindaan ni-Nimbɔtiu cee, ní kí nīn kíǹ ki tɔ́-u. 31 Di sá yii ti-Dindaan ni-Nimbɔtiu sá disaasɔl Nimbɔtiu ní. Waa làá dū-ni kí fá, kaa làá kpɔ̀ kí céetí-ni, kaa làá tí súntí dipoondi din u pūtì ki pōoǹ ni-baabee mun pu.

Ti-Dindaan baba di sá Unimbɔti

32 Mimmee Isirayeel yab, naa bàlifī kí béé iyuntikpiki pu níii? Bàlifìmaan ŋyunti ŋun baa nìn dá láá màl̄-nee pu, ŋwiin ŋun Unimbɔti nìn náań unil kitiŋ puee kí cáá sāā díǹ pu. Bàlifìmaan kitiŋ kílilaŋki kí bàlifì ki-kúntilaŋki. Bàlifìmaan kí kpèè yii atuŋkpaan aba gíti ŋá laaba kii ŋi neeee? Ni pée gbìl̄ tiba tì náań nì tin bí nee dalbaaa? 33 Dinibul diba nib gíti bí laaba ki gbìl̄ unimbɔti ubɔ sòon̄ nì bi ŋŋmi poon baa kpíì kii ni nín gbìl̄ pu kaa kpíì neeee? 34 Àá unimbɔti ubɔ gíti bí laaba ki mākaǹ ki ŋá maamaacib nì atuŋkpaan nì dikɔ̀ndi nì mpɔŋkpaan tuuŋŋi nì atuun ŋin kɔ̄ntí tifaandee dalba kí nyāntí ditimbundi diba di-juti ŋaan kí gāā u-bindaaa^k? Too míǹ ní ti-Dindaan ni-Nimbɔtiu ŋá ki nyántì-ni Eejipiti tiŋkin, nimbi ni-ba nimbil ká.

35 Ama nimbee, ni cáá diyimɔɔl ki ká an bɔti, án nín làá ŋá pu ní béé yii ti-Dindaan baba di sá Unimbɔti, ní unimbɔti ubɔ kaa ti bí laaba ki kútì úǹ puee^l. 36 Doooo yilpu ní u yāntì ni gbìl̄ u-neen pu kí dàkà-ni ní nīn tɔ́-u, ní ki yāntì ni ká ŋŋmikpaan ŋun poon u sòon̄ nì nee kitiŋ pu. 37 Di sá yii u nìn néeń ni-naanjab, ní ki lēē nimbi bin sá bi-naantiibee, ki dū u-pɔŋkpaaŋŋu ki nyántìń-ni Eejipiti tiŋkin. 38 U làá jà anibul ŋin sá akpaan ki pɔ̄ɔ̄ ki jítiǹ-nee, kí cáá-ni kí kɔ́ǹ bi-timmu poon, ní kí dū ntimuee kí tīī-ni mú kpántí ni-yamu. 39 Ní dàkafì tiŋan kí béé díǹ nee yii yilpu yilpu fɔ́ŋŋŋ nì kitiŋ taapuee, ti-Dindaan di sá Unimbɔti, Unimbɔti ubɔ kaa ti bí laaba. 40 Nín̄ ŋúb́maan u-bɔkpaaŋi nì u-marab bin m tīī-ni díǹ pu neeyee. Ni yaa ŋúb́-bee, án làá bútí ni nì ni-biyaamu mun làá dāá páań ni-boonee. Míǹ ní ni làá kàl̄ kí yúntí kitiŋ kin ti-Dindaan ni-Nimbɔtiu làá dūú tīī-ni jaanjaanee poon.

41 Niinee ní Mooyiisi lēē ntimu muta Jɔɔdan buŋgbandi ŋwìiń nyalaŋki pú ki síiǹ, 42 yii ubɔ yaa kaa nyí ní ki kūū u-nabiki, ní an kaa sá nì kináŋee, udaan ń sāǹ kí kɔ́ ntimu gbanti kiba poon. Udaan yaa ŋúń ki sáǹ ki kɔ́ ntimu gbanti kiba poonee, ú ŋmátí^m. 43 Ntimuee sɔ̀. Bi nìn lēē Beeseer tiŋki kin bí kuteeu gbantaŋki puee ki tīī Rubeen yab, ní ki lēē Raamooti tiŋki kin bí Galaadee ki tīī Gaadi yab, ní ki lēē Goolan tiŋki kin bí Baasanee ki tīī Manasee yab.

MOOYIISI SÒON̄ NLILIITIIM UNIMBƆTI MARAB PU

4–11

44 Marab bin Mooyiisi nìn dūu tīī Isirayeel yabee sɔ̀. 45 Isirayeel yab nín nyáń Eejipiti tiŋkinee, marab nì abɔkpaa nì akoobil ŋin Mooyiisi nìn dūu tīī-bee sèé. 46 Ŋyunti gbantee, baa nìn dá láá dūtì Jɔɔdan buŋŋu. Bi nìn dá láá bí Beeti-Peewɔɔr tantakal caŋin ní. Dijandi gbanti nìn bí Siiwɔn, Amɔɔr yab bɔtiu un nìn kóò Eesbɔnee tiŋki pu ní. Ubɔti gbanti ní Mooyiisi nì Isirayeel yab nìn jáń ki jíń ŋyunti ŋun bi nyáń Eejipiti tiŋkinee. 47 Bi nìn jáń ki fōō u-tiŋki ki kpáaǹ Baasan yab bɔtiu Ɔɔgi tiŋki. Bibɔtiibee liitil nìn sá Amɔɔr yab bin nìn bí Jɔɔdan buŋgbandi, ŋwìiń nyalaŋki púee ní. 48 Kitiŋ kin Isirayeel yab nìn fōōyee nìn dɔ̄ kí yòon̄ Arooweer tiŋki kin bí Arinɔn buŋgbandee kí cáá sāā Siiwɔn jool, an dàkà yii Eermɔn jool. 49 An nìn kpáaǹ Arabaa tiŋki kin kɔkɔ bí Jɔɔdan jandi ŋwìiń nyalaŋki pú púee, kí cáá sāā Arabaa mɔɔl din dɔ̄ Piisga jool taapuee.