Diteetil Gbɔŋku 5

Unimbɔti tīī u-nibul marab saalaa

1 Mooyiisi yíiń Isirayeel yab kɔkɔ ki kpáfì ní ki bí-bi yii:

«Pīlifìmaan Isirayeel yab, pīlifìmaan abɔkpaa nì akoobil ŋin m làá dūú sòoǹ kí ŋá ni-tafalin díǹ nee, kí bīfì-ŋi, kí nīn ŋúb́-ŋi, kí nīn ŋáań kii ŋi nín bí yii ní ŋá puee. 2 Ti-Dindaan ti-Nimbɔtiu pūtì ki pōoǹ-ti dipoondi Ooreeb jool pu. 3 An kaa nìn sá ti-baabi ní ti-Dindaan nìn pūtì ki pōoǹ dipoondi gbanti, ama timbi bin kɔkɔ bí doo díǹ ki bí dimaŋfalin nee ní u nìn pūtì ki pōoǹ dipoondi gbanti. 4 Ni-nimbiin niin, dijool pu ní ti-Dindaan sòon̄ nì ni ŋŋmi poon. 5 Ŋyunti gbantee, man nìn sí ni nì ti-Dindaan kansikin ní ki cáá ti-Dindaan nyɔɔbundi ki nàatī-ni, kun puee ni nìn fàŋkí ŋŋmi gbanti kaa nìn kíí kí dàb̄ dijool. Ti-Dindaan nìn lī yii:

6 «Man di sá a-Dindaan a-Nimbɔtiu un di nyántìń-si kuyuŋun Eejipiti tiŋkinee.

7 «Á taa jāam̀ unimbɔti ubɔ kí kūtì man pu.

8 «Á taa mɔ́ɔ́ diwaal diba kí nántíǹ tiba tin bí yilpuee àá tin bí kitiŋ pu taapu dooyee àá tin bí nnyimin kitiŋ taapuee. 9 Á taa gbàan̄ awaa gbanti nimbiin ní kaa nín jáam̀-ŋi, kun puee mama a-Dindaan a-Nimbɔtiuee, m sá Unimbɔti un cáá ipoompoonee ní. Ubɔ yaa ná-mee, m dátí udaan tafal ní kí dāá dáaĺ u-biyaamu mun tafal kí cáá sāā anaantitɔntɔkɔ ata kii anaa pu. 10 Ama bin néeń-mi ki ŋúb́ m-marabee, m ŋáań-bi tiŋan ní kí cáá sāā anaantitɔntɔkɔ kutuku pu.

11 «Á taa nín̄ yíì man a-Dindaan a-Nimbɔtiu yindi fám fám, kun puee man a-Dindaan kaa làá dūú pɔ̄ un ŋáań mimmee.

12 «Á nīn tɔ́ ŋwiŋŋuŋfikaa ŋú nīn sá circir wiiŋŋu ki tīī-si, kii man a-Dindaan a-Nimbɔtiu nín síiǹ-si á ŋá puee. 13 A cáá iwiin iluu kí tɔ̄ ditundi, kí ŋá tin kɔkɔ a cáá kí ŋée. 14 Ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man a-Dindaan a-Nimbɔtiuee. Á taa tɔ̄ báà ditundi diba ŋwiin gbanti. Sii a-baaa, a-jipɔmbaaa, a-bisalibaaa, a-tɔntɔnliibi bininjab nì binimpoobaaa, a-naayaaa, a-mammuɔɔɔ, a-waŋkutaaa, binicambi bin kóò a-pueeyaaa, ubɔ ń taa tɔ̄ ditundi. A-tɔntɔnliibi bininjab nì binimpoobi máaǹ kí tɔ̄ bi-ba kí ŋùŋfì kii siiyee ŋwiin gbanti. 15 Á téetí yii a nìn kāl̀ kuyuŋu Eejipiti tiŋkin ní man a-Dindaan a-Nimbɔtiu dū m-pɔŋkpaaŋŋu ki nyántìń-si kitiŋ gbantin. An pu ní man a-Dindaan a-Nimbɔtiu tīī-si mara yii á nīn tɔ́ ŋwiŋŋuŋfikaa.

16 «Á nīn tɔ́ a-baa nì a-na kii man a-Dindaan a-Nimbɔtiu nín síiǹ-si mara yii á ŋá puee. A yaa ŋá mimmee, a làá kàl̄ kitiŋ pu kí yúntí ní an bútí-si kitiŋ kin man a-Dindaan a-Nimbɔtiu làá dūú tīī-see poon.

17 «Á taa kpɔ̀ unil.

18 «Á taa ŋá tilaakpaal.

19 «Á taa yɔ̀.

20 «Á taa lēē inyimɔn seerau kí túń a-juti pu.

21 «Á taa nín̄ cáá a-juti nimpuu pu nnimbitaataam. Á taa nín̄ cáá a-juti diiku àá u-tiŋki àá u-tɔntɔnliu uninja àá unimpu àá u-naau àá u-maŋki àá tin pée sá a-juti wantee pu nnimbitaataam.»

22 An nìn sá ŋŋmi nì ditagbandi nì dibɔmbɔŋkpaandi poon ní ti-Dindaan nìn sòon̄ nì ni-kɔkɔ mpɔn dijool pu ní ki tīī-ni marab nee. Waa nìn gíti kútì tiba an pu. Míǹ boonee ní u ŋmàn̄ marabee titaŋkpapilindi tili pu ní ki dūu tīī-mi.

Mooyiisi, Unimbɔti bɔnaatiliu

23 Ŋyunti ŋun ni gbìl̄ nneen sòoǹ dibɔmbɔndi poon dijool mun fōō ŋŋmee ní ni-naakɔti kpilib kɔkɔ nì ni-kpootiliibi sútì ki pìlīń-mi, 24 ní ki lī yii: «Kpèè, ti-Dindaan ti-Nimbɔtiu yāntì ti ká u-nyooti nì u nín sá ukpaan miŋyee, ní ki yāntì ti gbìl̄ u-neen mun pu ŋŋmi poon. Díǹ ní ti nín ká yii Unimbɔti ŋūǹ kí sòoǹ nì unil, ní unil gbantee ń taa kpú kí nīn gbíntìi bí dimaŋfalin! 25 Kɔŋkɔnnee, ba pu ní tí dū ti-ba kí tīī ŋŋmikpaan nee ń wà-ti tí kpú ní? Ti yaa gbíntìi bíi pílifí ti-Dindaan ti-Nimbɔtiu nín sòoǹ pu ŋŋmikpaan nee poonee, see tí kpú. 26 Di sá yii nisaal ulɔu di pée gbìl̄ dimaŋfal Nimbɔtiu neen pu, u sòon̄ ŋŋmi poon kii timbi nín bíi gbìl̀ pu nee ki ŋmátì^a? 27 Míǹ puee, sii sútí kí pìl̄ ti-Dindaan ti-Nimbɔtiu kí pīlifì tin u làá sòoǹee. Míǹ boonee á gítiń kí tùkù-ti tin kɔkɔ ti-Dindaan ti-Nimbɔtiu tùkū-see. Timbi làá pīlifì tin a làá sòoǹee kí ŋá míǹ^b.» 28 Ti-Dindaan nìn gbìl̄ tibɔti tin ni nìn sòon̄ m-ceeyee ní ki bí-mi yii: «M gbìl̄ tin kɔkɔ binib nee tùkū-see. Tin kɔkɔ bi lēe, an kítì míǹ. 29 Bi-pɔbiliŋ yaa bàà bɔ́ntì kí nīn fàŋkí-mi kí ŋúb́ m-marab kɔkɔ baabadal, án bàà làá nīn ŋān̄ ki tīī bi nì bi-biyaamu kí nīn cáa cá jaanjaan! 30 Cùú tùkù-bi yii báà ŋma ń nīn gítí u-tantiun. 31 Ama siiyee, gbíntí m-cee doo ḿ dū m-marab nì m-bɔkpaaŋi nì m-koobiliŋ kí tīī-si á cáá dàkà-bi, bi yaa bàn̄ kitiŋ kin m làá dūú tīī-bi bí nīn kíǹ ki yèe poonee, bí nīn ŋúb́-bee.»

32 An puee ní nīn nyíǹ ni-ba kí ŋá kii ti-Dindaan ni-Nimbɔtiu nín bí yii ní ŋá puee, kí taa kpòotī kí cù ŋgiil púɔɔɔ, kí taa kpòotī kí cù ŋgan pú. 33 Ní nīn dī nsan ŋun ti-Dindaan ni-Nimbɔtiu cátì ki bíl̀ ni-nimbiinee, án nín làá ŋá pu ní nīn bí dimaŋfalin kí jī nnaam kí kàl̄ kitiŋ kin ni làá fōō kí nīn kíǹ ki yèe poon kí yúntée.