Diteetil Gbɔŋku 1

Diteetil

gbɔŋku

MOOYIISI SÒON̄ MPEEPEEKAAM UNIMBƆTI MARAB PU

1 Kugbɔŋu nee di sá tibɔti tin Mooyiisi nìn sòon̄ nì Isirayeel yab kɔkɔ ŋyunti ŋun baa nìn dá láá dūtì Jɔɔdan buŋŋu, ki nìn dá láá bí Arabaa teeku puee. Kuteeu gbanti nìn dɔ̄ kitiŋ kin bi yíì Suufee caŋin, ní ki nìn bí Paaran tiŋki nì Toofeel nì Laaban nì Aseerooti nì Dii-Saab timmu kansikin. 2 (Kí nyā Ooreeb jool kí dūú dī Seeyiir jool^a pú kí cù Kadeesi Barneeya tiŋkinee, an sá iwiin saalaa nì ŋubɔ saŋkindi ní.) 3 Bi nín nyáń Eejipiti tiŋkin boon abin imuŋku ili, iŋmal saalaa nì ubɔ wimpeepeekaaŋu dalee, ní Mooyiisi dū tibɔti tin ti-Dindaan nìn kpáafì-u ú dūú tùkù Isirayeel yabee ki nāatì-bi. 4 Mooyiisi nín jáń ki pɔ́ɔkiǹ Amɔɔr yab bɔtiu Siiwɔn un nìn kóò Asibɔn tiŋkinee, ki jáń ki pɔ́ɔkiǹ Baasan bɔtiu Ɔɔgi un nìn kóò Asitarooti, Eedreeyii tiŋkinee, boon ní u nín dū tibɔti gbanti ki nāatì Isirayeel yab^b.

5 Bi nìn dá láá bí Moowaab tiŋkin kaa láá dūtì Jɔɔdan buŋŋu ní Mooyiisi kíĺ ki bíi cántí Unimbɔti marab nì u-dàkatam taapu ki tùkù-bi. U nìn bí-bi yii:

Unimbɔti pú Isirayeel yab nsan bí yīkì

6 Ti-Dindaan ti-Nimbɔtiu nìn sòon̄ nì ti Ooreeb jool pu. U nìn lī yii: «Ni kāl̀ dijool nee pu ki yúntì. 7 Yīkìmaan kí nīn cá Amɔɔr yab nín kóò ajoon tiŋki kinee. Nín̄ cámaan ntimu mun māntìi tú-ŋee poon, Arabaa teekun nì ajoon ŋin mun dī-kuee ni. Ní càatīmaan kí cù Seefeelaa paal pu nì Neegeeb teekun, nì kitiŋ kin dɔ̄ dimɔɔgbandee, kí bà Kanaan yab nì Leebanɔn timmun, kí cáá sāā Eefiraati buŋkpaaŋŋu^c. 8 Kpèèmaan, m dū kitiŋ nee ki tīī-ni. Nín̄ cámaan kí fōō kitiŋ kin ní man ni-Dindaan nìn pōoǹ kí tīī ni-naanjab Abraam nì Isaaki nì Jaakɔb nì bi-naantiibi bin làá dāá páanní boonee.»

Mooyiisi kāaǹ bibɔsoonliibi

9 Niinee ní Mooyiisi nìkī ki lī yii: «M nìn tùkū-ni ŋwiin gbanti yii ni sá diwaŋgul din nyìm̀ tikpilee ki tīī-mi ḿ ŋmā kí túń m-baba^d. 10 Ti-Dindaan ni-Nimbɔtiu yāntì díǹ nee, ni būtì ki kíǹ ki wīikí kii iŋmalbijaa in bí kutaa puee. 11 M mèé yii ti-Dindaan ni-naanjab Nimbɔtiu ń yàntī ní mɔ̀tīí bùtī míǹ ŋfunyɔm kutuku pu, ní kí bìin̄ ni-boon kii u nín nìn pōoǹ-ni puee. 12 Ama mana ní m làá ŋmā kí túń ni-gìŋ́ŋi nì ni-bɔlii kí nīn sòoǹ ni-bɔti m-baba? 13 An puee ní lēē kunaakoou kamaa poon binib bin cáá dinyil ki cáá iciin ki gbìl̀ tibɔti taapuee, ḿ dū-bi kí kpántí ni-yidambi.» 14 Ní ni kíí-mi yii: «A nín bí yii tí ŋá puee ŋān̄.» 15 Míǹ ní m dū ni-naakɔtin yidambi, binib bin cáá dinyil bi nyí bi-puee, ki kpántì ni-kpootiliibi. Biba sá binib kutuku ubɔ kpootiliibi, biba sá binib dilaataal kpootiliibi, biba sá binib imuŋku ili nì saalaa kpootiliibi, biba sá binib saalaa kpootiliibi. M nìn lēē biba mun bí nīn kpèé ni-naakɔti poon bɔti. 16 Niinee ní m kpáafì ni-bɔsoonliibi ŋyunti gbanti yii: «Ni-nabiyaamu yaa cáań-ni tibɔti ní sòoǹee, ní pīlifìmaan-bi. Isirayeel yab kansikin ubɔ nì u-nabiki àá unicaan un kóò ni-puee kansikin ní tibɔti yaa bí ní bi cáań-tì ní sòoǹee, ní sòoǹ-tì nì ibaamɔn. 17 Taa nín̄ cáámaan digàntil ibɔsoon poon. An yaa sá kibikaaa, unikpaanaaa, ní pīlifiǹ bi-kɔkɔ mbaantiim. Taa fàŋkìmaan báà ubɔ, kun puee Unimbɔti di yì ibɔsoon ki làá sòoǹ kí tīī-ni. Tibɔti tin yaa pɔ̄ɔ̄ ki tīī-nee, ní cáań-tì m-cee ḿ kpèè-tì.» 18 Míǹ ní m nìn kpáafì-ni, ŋwiin gbanti tin kɔkɔ ni máaǹ kí ŋée.

Isirayeel yab yīntiǹ Unimbɔti

19 Míǹ boonee ní ti yíkì Ooreeb jool taapu ki kíĺ Amɔɔr yab jool saŋŋu kii ti-Dindaan ti-Nimbɔtiu nín nìn tīī-ti mara puee. Kii ni nín nyí puee, ti nìn dūu dī kuteeu kun nimbi ni-ba ká ku sá kukpaaŋŋu ki nyāŋkèe pu ní ki tin nyáń Kadeesi Barneeya tiŋki^e. 20 Niinee ní m tùkū-ni yii: «Kɔŋkɔnnee, ni bāań Amɔɔr yab jooŋŋi pu dee. Kitiŋ gbanti ní ti-Dindaan ti-Nimbɔtiu dūu tīī-ti. 21 Kpèèmaan, ti-Dindaan ni-Nimbɔtiu dū kitiŋ nee ki tīī-ni. Míǹ puee, cùú fōōmaan-kì kí nīn kíǹ ki yì kii ti-Dindaan, ni-baabi Nimbɔtiu nín nìn tùkū-ni puee. Ní taa pée fàŋkìmaan, kí taa yàntī ni-wunti ń yɔ̀tī!»

22 Niinee ní ni-kɔkɔ sútìń ki pìl̄-mi ki lī yii: «Tí tɔ̄maan binib ti-nyɔkɔpu bí cù kí kpèè kitiŋ gbanti nín bí puee. Bi yaa cūtì ki fātìi gítìń ti-ceeyee, bí tùkù-ti nsan ŋun ti máaǹ kí dēe nì ntimu mun poon ti cée nín bí puee.» 23 Ni lī mimmee ní m ká yii míǹ kítì ní m lēē ni-kansikin binib saalaa nì bili, kunaakoou kamaa poon unil ubɔ ubɔ. 24 Niinee ní bi kíĺ dijool saŋŋu ki tin nyáń Eeskool^f tantakal pu, ki kpēē kitiŋee nín bí puee kɔkɔ. 25 Bi kpēē kitiŋee míǹ ki dóòyee ní ki kītì kitiŋ gbanti sufii biliŋ ki cáań ti-cee. Bi nín fātìi gítìń ti-ceeyee ní bi lī yii: «Kitiŋ kin ti-Dindaan ti-Nimbɔtiu dūu tīī-tee baasii ŋān̄ ní!» 26 Nì míǹ kɔkɔee, ni yíì kaa cūtì ní ki ŋá mpɔɔgbifin kaa ŋá ti-Dindaan ni-Nimbɔtiu nín bí yii ní ŋá puee. 27 Ni kíĺ ki bíi gbùkum̄ ni-tantib poon ki lì yii: «Kináŋ ní ti-Dindaan ná-ti ní ki nyántìń-ti Eejipiti tiŋkin kí dū-ti kí ŋá Amɔɔr yab ŋaan bí kpɔ̀ kí céetí-ti! 28 Ba pu ní tí cù niin ní? Ti-nabiyaamu mun nyánní niinee mun bíil̀ ti-pɔbiliŋ ki lī yii: <Binib bin kóò kitiŋ gbantinee pɔ̄ɔ̄ ní ki sá tinikpaandi ki jítiǹ timbi, ní bi-timmu sá ntiŋkpaamu, ní agun ŋin bi máń ki māntìi tú-muee fɔ̀kɔ̀ ki tin sāā kutagbɔŋu.> Ní bi gíti lī yii: <Áli gba ti ká Anaaki yab tinikpaandi^g niin!>»

29 Ama ní m tùkū-ni yii: «Ni-pɔbiliŋ ń taa bīil̀. Ní taa pée fàŋkìmaan-bi! 30 Ti-Dindaan ni-Nimbɔtiu un līī ni-nyɔkɔpuee di yì dikɔ̀ndi ki làá já kí tīī-ni kii u nín nìn ŋá pu ki tīī-ni ŋyunti ŋun ni nìn dáá bí Eejipiti tiŋkinee, nimbi ni-ba nimbil ká míǹ, 31 ní kuteeunee ni gíti ká míǹ. Kí yòon̄ ŋwiin ŋun ni yíkìń Eejipiti tiŋkin ki dāa bāań mpaan ŋun pu ni bí díǹ neeyee, ti-Dindaan ni-Nimbɔtiu di wúń ni-pu kii unil nín wúǹ u-biki pu miŋyee.» 32 Nì míǹ kɔkɔee, naa dū ni-mákal ki páaǹ ti-Dindaan ni-Nimbɔtiu pu. 33 Too, ni-Nimbɔtiu gbanti mun di nìn līī ni-nyɔkɔpu, ní ki nìn nyàab̀-ni mpaan ni kàal̀ ki ŋùŋfī. Úǹ ubaantee di nìn tí cáá ŋŋmi ki ŋmíntí-ni nsan ŋun ni dēe kunyeeu, ní ki cáá ditagbandi ki dàkà-ni nsan ŋwiimpu.

34 Ti-Dindaan nìn gbìl̄ tin ni nìn sòon̄ee ní ki gíí diŋuul ki pūtì ki lī yii: 35 «Binikpitib nee kansikin ubɔ kpá kí wāl̀ kitimmɔntii kin m nìn pōoǹ kí tīī bi-naanjabee, 36 asee Yeefunee jipɔɔn Kaaleeb baba di làá wāl̀-kì. Úǹ nì u-biyaamu ní m làá dū kitiŋ kin pu u cōom̀ee kí tīī, kun puee u ŋá min ní m lèe kɔkɔ.»

37 An ŋá mimmee ní ti-Dindaan gíí ma mun pu diŋuul ni-pu ní ki lī yii: «Si mun, a kpá kí kɔ́ kitiŋee poon. 38 Ama Nuuni jipɔɔn Joosuwa un tútúǹ-see di làá cù niin. Míǹ puee á tīī-u kunyannyaau, kun puee úǹ di làá cáá Isirayeel yab kí kɔ́ǹ kitiŋ gbantin. 39 Ni-biyaamu mun ni cáá yii mu làá kpántí iyumbu kí tīī ni-nannanliibee, ni-biyaamu mun kaa nyí díǹ pu kí gàntī tiŋan nì tikpitilee, múǹ gba di làá cù kitiŋ gbantin. Múǹ ní m làá dū kitiŋ gbanti kí tīī mú nīn kíǹ ki yì. 40 Nimbee, fàtīmaan ni-boon kí cùú dī Tikati mɔɔl^h saŋŋu kí nīn gítí kuteeu watil pú.»

41 Niinee ní ni kíí-mi yii: «Ti yīntiǹ ti-Dindaan. Kɔŋkɔnnee ti làá cù dikɔ̀ndi kii ti-Dindaan ti-Nimbɔtiu nín bí yii tí ŋá puee.» Ni lī mimmee ní báà ŋma yōoǹ u-janjawanti ki bàà dākafì yii an làá nīn sá sɔkɔmii ní ŋmā kí já kí fōō ajoon pu tiŋki. 42 Ama ní ti-Dindaan bí-mi yii: «Tùkù-bi bí taa cù ní kaa nín jáń, di sá yii maa làá nīn bí bi-kansikin. Bí taa yàntī bi-nannanliibi ń já kí pɔ̄ɔkiǹ-bi.» 43 Ní m dū tibɔtee ki tùkū-ni, ama ní naa pílifiǹ-mi. Nì min kɔkɔ ti-Dindaan kpáafì-nee, naa pée fātìi tɔ́-u ní ki ŋá dilambil ki nín jɔ́ḿ ajoon tiŋkin. 44 Ŋyunti ŋun Amɔɔr yab bin kóò ajoon pu niinee ká-nee ní bi nyánní, ki kītì ki bīiǹ ni-boon kii dinaŋgbansikpuuloolee, ki jáń ki pɔ́ɔkiǹ-ni sɔ́kɔ sɔkɔ ki kíĺ Seeyiir tiŋki ki tin nyáń Ɔrima tiŋki.

45 Ni fātìi bāańee ní ki súń ki yáliŋkì ti-Dindaan nimbiin, ama ti-Dindaan kaa fātìi kpēē-ni gba ní kaa nín gbìl̄ tin ni sòon̄ee. 46 Niinee ní ni kpáá ki kāl̀ Kadeesi tiŋkin ki yúntì tikpil.