Dikàandi Gbɔŋku 32

Tinaakɔti tin kāl̀ Jɔɔdan buŋŋu ŋwìiń nyalaŋki púee

1 Rubeen nì Gaadi naakɔti yab nìn cáá tiwaŋkuti tikpil, ní bi nìn dáań ki ká yii Yaseer tiŋki nì Galaadi tiŋki ŋān̄ diwaŋkpàal. 2 An pu ní bi cūtìi ká Mooyiisi nì usaraaŋakpil Eeleeyasaar nì Isirayeel yab kpilib ki bí-bi yii: 3 «Atarooti tiŋki nì Diibɔn tiŋki nì Yaseer tiŋki nì Niimra tiŋki nì Eesbɔn tiŋki nì Eelalee tiŋki nì Seebaam tiŋki nì Neeboo tiŋki nì Beeyɔn tiŋki 4 nìn sá ntimu mun ti-Dindaan nìn jáń ki fōō ki tīī Isirayeel yabee ní. Ntimuee ŋān̄ diwaŋkpàal, ní timbi a-tɔntɔnliibi mun cáá tiwaŋkuti. 5 A yaa bàà kíikí kí dū ntimu gbanti kí tīī-ti, timbi ń taa dùtī Jɔɔdan buŋgbandi lapu pu.»

6 Ní Mooyiisi kíí Gaadi nì Rubeen naakɔti yab yii: «Ba pu ní ni-nabiyaamu ń búntí kujaau ní nimbi ń gbíntí ki kā doo? 7 Ba pu ní ni bí ki yɔ̀tī ni-nabiyaamu Isirayeel yab wunti bí taa cùú fōō kitiŋ kin ti-Dindaan dūu tīī-bee? 8 Míǹ ní ni-baabi mun nìn tí ŋá ŋyunti ŋun ti nìn bí Kadeesi-Baarneeya m nìn tú-bi bí cùú cɔ̄ŋkì Kanaan tiŋkee. 9 Bi nìn jɔ́m̀ áli ki bàn̄ Eeskool tantakalin ki kpēē kitiŋ, ní boonee bi yɔ̄tì Isirayeel yab wunti bí taa kɔ́ kitiŋ kin ti-Dindaan tīī-bee poon^a. 10 Ti-Dindaan nìn fōō bi-pu diŋuul ŋwiin gbanti ní ki pūtì ki lī yii: 11 <Binib bin nìn nyáń Eejipiti tiŋkin kuyuŋu ki nìn cáá abin mmuŋku kí nīn cée, bi kpá kí kɔ́ kitiŋ kin m pōoǹ kí tīī Abraam nì Isaaki nì Jaakɔbee, kun puee baa yúliǹ-mi deedee. 12 See Yeefunee jipɔɔn Kaaleeb un sá Keenaasi maaliŋunee nì Nuuni jipɔɔn Joosuwa baba di làá kɔ́ kitiŋ gbantin, kun puee bíǹ yúliǹ-mi deedee kaa kpōoǹ laaba.> 13 An pu ní ti-Dindaan nìn fōō Isirayeel yab pu diŋuul ki yāntì bi tú ki yìiǹ kuteeun abin imuŋku ili, ní bin kɔkɔ nìn yīntiǹ-uee kpíì^b. 14 Nimbi binikpitib nee làá nóó ni-baabi tabɔbiliŋ kí gbítí ti-Dindaan ŋuul Isirayeel yab puɔɔɔ? 15 Míǹ puee nimbi di yaa fātì ni-boon ki tīī ti-Dindaanee, u làá gíti yàntī Isirayeel yab ń yúntí kuteeun, ní nimbi di làá dāá túń samaa gbanti kpuulool.»

16 Bi gbìl̄ mimmee ní ki sútìi pìl̄ Mooyiisi, ní ki bí-u yii: «Ti làá mā doo nee tikpuŋkpun ti-piii nì ti-ŋoobui ń nīn kóò, ní kí mā ti-biyaamu adiin. 17 Ti yaa ŋá mimmee, ní tí yòon̄ tijanjawan malaa kí lìntī ti-nabiyaamu Isirayeel yab nyɔkɔpu, ní kí cáá-bi kí bànnì kitiŋ kin bi tīī-bee. Ŋyunti gbantee timbi biyaamu bí ntimu mun bi máń agun ki túee poon, binib bin kóò kitiŋ nee puee ń taa ŋmā kí ŋá-bi tiba. 18 See ti-nabiyaamu Isirayeel yab yaa bàn̄ báà ŋma fōō u-tinjandee ní timbi ń nīn gítiń ti-cee. 19 Ama timbi kaa dāa gíti cáá kí fōō tiba kitiŋ kin a làá dāá tīī bíǹ lapu pu buŋgbandee poon, di sá timbi gíti dáá fōō ti-fakal doo pú buŋgbandi.» 20 Ní Mooyiisi bí-bi yii: «Ni nín lī puee, ní ŋámaan míǹ. Ní bɔ́ntí kí cù kujaau, kii ti-Dindaan nín tīī mara puee. 21 Bin kɔkɔ sá bininjab ki bàl̄ tijanjawanee ń dùtī Jɔɔdan buŋŋu, kii ti-Dindaan nín tīī mara puee. Bí nīn bí niin kí tin sāā ŋyunti ŋun ti-Dindaan làá jà u-nannanliibi kɔkɔ, 22 ní kitiŋee nib kɔkɔ ń sìntī bi-ba ki tīī ti-Dindaanee. Boonee ni ŋūǹ kí nīn gítí ni-cee. Ŋyunti gbantee ni nyáń ti-Dindaan bɔtin, ki nyáń ni-nabiyaamu Isirayeel yab mun bɔtin, ní kitiŋ laakin ni bí nee ń kpántí ni-yaka ti-Dindaan nimbiin. 23 Ama ni yaa kaa ŋá mimmee, ni ŋá ti-Dindaan ikpiti, ní ni-kpitii gbanti làá nīn pée dī-ni. 24 An puee ní māmaan ni-biyaamu adiin kí mā ni-piii nì ni-ŋoobui tikpuŋkpun. Ama ní ŋá tin ni pōoǹ yii ni làá ŋée mun.» 25 Ní Gaadi nì Rubeen naakɔti yab bí Mooyiisi yii: «Timbi a-tɔntɔnliibi làá ŋá kii sii ti-dindaan nín bí yii tí ŋá puee. 26 Ti-nimpoobi nì ti-biyaamu nì ti-picaŋkpunti nì ti-ŋɔcaŋkpunti nì ti-naai kɔkɔ làá gbíntí Galaadi tiŋkin doo ní. 27 Ní timbi a-tɔntɔnliibi ń yòon̄ ti-janjawanti kí cùú já ki nóó nì ti-Dindaan nín tīī mara puee, kii a nín lī puee.»

28 Ní Mooyiisi tīī mara nee usaraaŋakpil Eeleeyasaar nì Nuuni jipɔɔn Joosuwa nì Isirayeel yab naakɔti kɔkɔ kpilib bi-pu. 29 U nìn bí-bi yii: «Gaadi nì Rubeen naakɔti yab bin kɔkɔ sá bijanjaliibee yaa bāań, ní ni-kɔkɔ dūtì Jɔɔdan buŋŋu ki cūtìi jáń kii ti-Dindaan nín tīī mara puee ki fōō kitiŋee, ní dāá dū Galaadi tiŋki kí tīī-bi. 30 Ama bi yaa kaa dɔ́miń ki kútì ni-pu ni jáńee, Kanaan tiŋkin ní bi làá tin yàkatī ni nì bi kɔkɔ atinjan.» 31 Ní Gaadi nì Rubeen yab tí kíí yii: «Ti-Dindaan nín pée bí tí ŋá puee, míǹ ní ti làá ŋá. 32 Timbi ti-ba làá yòon̄ tijanjawan kí cù Kanaan tiŋkin kí já kii ti-Dindaan nín tīī-ti mara puee. Ama timbi tinjandi din bi làá tīī-tee di sá Jɔɔdan buŋgbandi doo pú yal ní^c.»

33 Ní Mooyiisi dū Amɔɔr yab bɔtiu Siiwɔn, nì Baasan yab bɔtiu Ɔɔgi timmu, nì ntimu mun gíti bí mu-kpaanceetii ki māntìi tú-muee ki tīī Gaadi nì Rubeen naakɔtin yab, nì Jooseefi jipɔɔn Manasee naakooku dijandi yab.

34 Gaadi naakookun yab nìn fātìi máń Diibɔn nì Atarooti nì Arooweer timmu, 35 nì Atarooti-Soofan nì Yaseer nì Yoogeebeeya 36 nì Beeti-Niimra nì Beeti-Yaran timmu. Bi nìn fātìi máń ntimu gbanti kɔkɔ ní ki máń agun ki māntìi tú-mu, ní ki máń bi-piii nì bi-ŋoobui tikpuŋkpun.

37 Ní Rubeen naakookun yab fātìi máń Yeeseebɔn nì Eelalee nì Kiiriyatayiim 38 nì Neeboo nì Baal-Meeyɔn nì Siibima timmu. Boonee bi dāa kpántì ntimu gbanti yiŋŋi ki pú-mu ayimpɔɔn.

39 Ní Manasee jipɔɔn Makiir yab jáń nì Galaadi yab ki fōō bi-tiŋki, ní ki jìn̄ Amɔɔr yab bin nìn kóò ki-puee. 40 Ní Mooyiisi dū kitiŋ gbanti ki tīī-bi bí nīn kíǹ ki kóò. 41 Manasee jipɔɔn Yayiir yab nìn cūtìi jáń nì Amɔɔr timbilimmu kí fōō-mu, ní ki pú-mu diyindi yii Yayiir timbilimmu. 42 Ní Noobiya cūtìi jáń ki fōō Keenaati tiŋki nì ki-timbilimmu, ní ki dū úǹ u-ba yindi ki pú kitiŋee yii Noobiya.