Dikàandi Gbɔŋku 31

Isirayeel yab jáń kí pɔ́ɔkiǹ Madiyan yab

1 Ní ti-Dindaan sòon̄ nì Mooyiisi ki bí-u yii: 2 «Ikpiti in Madiyan yab ŋá Isirayeel yabee puee, á cùú tɔ̀-bi ipɔntoon^a, ní kí nín kpú kí cùú ŋàl̄ a-baabi.» 3 Ní Mooyiisi bí Isirayeel yab yii: «Ni-kansikin biba ń bɔ́ntí kí cùú jáǹ Madiyan yab kí tɔ̀-bi ipɔntoon kii ti-Dindaan nín bí yii tí ŋá puee. 4 Ní lēē Isirayeel yab naakooku kamaa poonee binib kutuku bí cù kujaau gbanti.»

5 Ní bi lēē kunaakoou kamaa poon bijanjaliibi kutuku, ní bijanjaliibi kɔkɔ kpáfì kutukub saalaa nì bili ki bóob́ kí cù kujaau. 6 Ní Mooyiisi dū Isirayeel yab naakooku kamaa nib kutuku ki tú kujaau. Usaraaŋakpil Eeleeyasaar jipɔɔn Fineeyaasi nìn céeǹ-bi ki ŋúb́ circir wanti nì dikantándi ki búǹ ki tìì-bi kujaau daanti. 7 Ní bi cūtìi jáń nì Madiyan yab kii ti-Dindaan nín tùkū Mooyiisi yii bí ŋá puee, ní ki pɔ̄fì Madiyan ninjab kɔkɔ. 8 Bi kūū bi-bɔtiibi biŋmoo mun: Eefi nì Reekeem nì Suur nì Yuur nì Reeba, ki kūū ki kpáaǹ Beewɔɔr jipɔɔn Balaam. 9 Ní Isirayeel yab cúú Madiyan nimpoobi nì bi-biyaamu kuyuŋu, ki cúú bi-waŋkuti kɔkɔ, ní ki kóoǹ bi-gaajawanti kɔkɔ. 10 Bi nìn tūū bi-diiŋŋi nì bi-kaai ŋŋmi. 11 Bi nìn yōoǹ bi nín jáń ki fōoń tiŋyee, an dàkà yii binib nì tiwaŋkuti ki kpáàa búntì. 12 Bi nìn cáá kɔkɔ ki cūnnì Moowaab tantakal din pìlīǹ Jɔɔdan ki túĺ Jeeriikoo tiŋkee, ki dūu dàkā Mooyiisi nì usaraaŋakpil Eeleeyasaar nì Isirayeel samaau kɔkɔ.

13 Ní Mooyiisi nì usaraaŋakpil Eeleeyasaar nì Isirayeel yab kpilib nyáń dinaapaal boon ki túŋkì-bi. 14 Mooyiisi nín ká mimmee ní u fōō bijanjakpilib nì adican kpilib nì bikpootiliibi bin kɔkɔ nìn cūtì kujaau gbantee pu diŋuul. 15 U bí-bi yii: «Ba pu ní ni yāntì binimpoobi kaa kūū-bi? 16 Nimbi ni-ba nyí yii Peewɔɔr bɔti poonee, Madiyan nimpoobi gbanti ní Balaam nìn sáŋkì bi kíil̀ Isirayeel yab ki tɔ́ tilaakpaal poon. An di dāa yāntì ti-Dindaan dáaĺ Isirayeel yab tafal ŋkpitim pu. 17 Ní kpɔ̀ mbininjabiyaamu kɔkɔ, kí kpɔ̀ binimpoobi bin béè bininjabee kɔkɔ kɔŋkɔnnee. 18 Ama ní taa kpɔ̀ nsapɔmbiyaamu mun kaa láá béè bininjabee, ní yàntī bíǹ ń nīn bí kí tīī-ni. 19 Ni-kansikin bin kɔkɔ kūū unil kujaaun àá ki gbēē utaŋkpiilee ń nyā kí nīn bí dinaapaal boon iwiin iluli, kí ŋá akoobil winta dal nì winluli dal ní kí fàtīí kpántí circir. Mara gbanti sá ki tīī nimbi nì bin kɔkɔ ni cúuń kuyuŋuee ní. 20 Ní ŋá abɔkuti nì igban nì tiŋɔkuti wanti nì idɔ wanti kɔkɔ circir.»

21 Ní usaraaŋakpil Eeleeyasaar bí bijanjaliibi bin kɔkɔ cūtì kujaauee yii: «Kpèèmaan mara un ti-Dindaan nìn tīī Mooyiisi u ŋmàn̄ ki yóoǹee sèé: 22 <Tiwan tin kɔkɔ sá sindaariya nì animbil kúti nì tasa nì tikúti nì tikúpinee, 23 tiwan tin kɔkɔ kaa wù ŋŋmee, ní dū ŋŋmi kí fùuǹ-tì ní tí kpántí circir, kí dū nnyim min lèekī ikpitee kí dūú cántí-tì. Ama tin ŋŋmi wùee, ní dū tíǹ ki ŋá nnyim gbantin kí fíntí ní tí kpántí circir wanti. 24 Ni yaa fíntì ni-bɔkutiŋ iwiin iluli dalee, ni kíǹ ki bí circir dee, mimmee ni ŋūǹ kí fàtīí gítí dinaapaal pu.»

Bi nín jáń ki fōoń tiwan tiŋyee yàkatitam

25 Ní ti-Dindaan bí Mooyiisi yii: 26 «Sii nì Eeleeyasaar nì adican kpilib, ní kàaǹ ni nín jáń ki fōoń binib bin kuyuŋuee nì tiwaŋkuti kɔkɔ. 27 Ní cúú binibee nì tiwaŋkutee kí yàkatī mili pu, kí dū dijandi diba kí tīī bijanjaliibi bin cūtì kujaauee, ní kí dū dijandi din kíǹee kí tīī samaa kɔkɔ. 28 Binib alaataa aŋmoo kamaa puee, á lēē unil ubɔ kí pà man bi-Dindaan, ní kí lēē tiwaŋkuti mun alaataa aŋmoo kamaa pu kubɔ, an dàkà yii inaa nì ipii nì iŋoobu. 29 Bi yaa lēē bi-jandi poon tin sá man yatee ki tīī-mee, á dūú tīī usaraaŋakpil Eeleeyasaar. 30 Samaa wanti puee, á lēē binib imuŋku ili nì saalaa kamaa pu unil ubɔ, ní kí lēē tiwaŋkuti mun imuŋku ili nì saalaa kamaa puee kubɔ, an dàkà yii inaa nì ipii nì iŋoobu. A yaa fōōyee á dūú tīī Leefii yab bin bí man circir kɔŋkooŋŋu poon ki tūǹ atuunee.»

31 Ní Mooyiisi nì usaraaŋakpil Eeleeyasaar ŋá kii ti-Dindaan nín bí yii bí ŋá puee. 32 Bi nín nìn cúú tin kujaaunee, tin kíǹ bi cáańee nyɔkɔm sɔ̀. Ipii nì iŋoobu nìn sá kutukub alaataa aluu nì kutukub biŋmoo kpá imuŋku inaa. 33 Inaa nìn sá kutukub imuŋku ita nì saalaa nì bili. 34 Mmamu nìn sá kutukub imuŋku ita nì kutuku ubɔ. 35 Bisapɔmbi bin kaa nyí bininjabee nìn sá kutukub mmuŋku nì saalaa nì bili. 36 Dijandi din bi nìn lēē ki tīī bin cūtì kujaauee nìn sá ipii nì iŋoobu kutukub alaataa ata nì kutukub bita kpá imuŋku ili nì alaataa aŋmoo. 37 Bi nìn lēē tiwaŋkuti gbanti poon alaataa aluu nì tiŋmoo kpá imuŋku inaa ki pàn̄ ti-Dindaan. 38 Inaa nìn sá kutukub binaa kpá imuŋku ili, ní bi lēē imuŋku ita nì saalaa nì ili ki pàn̄ ti-Dindaan. 39 Mmamu nìn sá kutukub mmuŋku nì saalaa nì alaataa aŋmoo, ní bi lēē imuŋku ita nì kiba ki pàn̄ ti-Dindaan. 40 Binib nìn sá kutukub saalku nì ubɔ, ní bi lēē binib mmuŋku nì saalaa nì bili ki pàn̄ ti-Dindaan. 41 Ní Mooyiisi fōō tin bi pàn̄ ti-Dindaanee ki dūu tīī usaraaŋakpil Eeleeyasaar, kii ti-Dindaan nín bí ú ŋá puee. 42 Dijandi din Mooyiisi nìn lēē ki tīī bijanjaliibee nì din nìn kíǹ u dūu tīī samaayee nìn ŋmà ní. 43 Dijandi gbanti nìn sá ipii nì iŋoobu kutukub alaataa ata nì kutukub bita kpá imuŋku ili nì alaataa aŋmoo. 44 Inaa nìn sá kutukub binaa kpá imuŋku ili. 45 Mmamu nìn sá kutukub mmuŋku nì saalaa nì alaataa aŋmoo. 46 Binib nìn sá kutukub saalku nì ubɔ. 47 Mooyiisi nìn lēē samaa jandi poonee binib imuŋku ili nì saalaa kamaa puee unil ubɔ, ki lēē tiwaŋkuti pu mun míǹ ki tīī Leefii yab bin bí ti-Dindaan circir kɔŋkooŋŋun ki tūǹ atuunee, kii ti-Dindaan nín nìn bí yii ú ŋá puee.

Nlammɔntiim saraau

48 Bijanjakpilib bin nìn kpōotì ajanjakiti kutukub kutukubee nì bin nìn kpōotì ajanjakiti alaataa alaataayee nìn dɔ́miń ki ká Mooyiisi, 49 ní ki bí-u yii: «Ti nín kàan̄ ti-janjaliibi bin ti kpōotì kujaaunee, ti ká yii bi-kansikin báà ubɔ kaa fɔ́tì. 50 An pu ní ti cáań tiwampɔkaal kí ŋá ti-Dindaan saraa ú fíntí-ti kí nyāntí ti-jɔkɔntin. Ti cáań sindaariya wanti, an dàkà yii abɔmbil nì mbɔmbiyaamu nì falfatib nì tiléeŋkaal tin báà ŋma kánní kujaaunee.»

51 Ní Mooyiisi nì usaraaŋakpil Eeleeyasaar fōō sindaariya wantee bi-ŋaan. 52 Bijanjakpilibee nín nìn cáań sindaariya wanti tin ki ŋá ti-Dindaan saraayee nyiŋfiŋu nìn sá kiiloobi dilaataal nì imuŋku ita nì saalaa ní. 53 Bijanjaliibi ŋwaamuee kaa nìn cáań tin bi kánní kujaaunee ki tīī, bi nìn dūu kpáafì bi-ba ní. 54 Ní Mooyiisi nì usaraaŋakpil Eeleeyasaar fōō bijanjakpilibee cee sindaariya wanti, ní ki cáa kɔ́ǹ circir kɔŋkooŋŋu poon ti-Dindaan nimbiin, án nín làá ŋá pu ú taa súntí Isirayeel yab puee.