Dikàandi Gbɔŋku 30

1 Ní Mooyiisi dū tin kɔkɔ ti-Dindaan sòon̄ nì uee ki tùkū Isirayeel yab.

Ipoon marab

2 Boonee ní Mooyiisi dū ti-Dindaan marab nee ki tùkū Isirayeel yab naakɔti kpilib yii: 3 «Ni-kansikin ubɔ di yaa pōoǹ ti-Dindaan yii u làá ŋá tiba kí tīī-u, àá u lēē u-ban ki pūtì yii u làá kòò tibee, udaan ń ŋá tin nyáń u-nyɔkɔn yii u làá ŋée deedee. Ú taa lákatí tin nyáń u-nyɔkɔn u pōoǹ yii u làá ŋée pu^a.

4 «An yaa sá usapɔɔn di pōoǹ àá u pūtì yii u làá ŋá tiba kí tīī ti-Dindaan ŋyunti ŋun u dáá bí u-baa ceeyee, 5 ní boonee u-baa gbìl̄ yii u pōoǹ àá u pūtì kí ŋá tiba kí tīī ti-Dindaan ní kaa lī-u tiba an puee, u máaǹ kí ŋá u nín pōoǹ puee. 6 Ama u-baa yaa gbìl̄ ní ki yíì yii waa máaǹ kí pòon̄ kí lēē u-ban kí kòò tibee, mimmee u-pooŋyi in u lēē u-ban ki pōoǹee ŋá fám dee. Ti-Dindaan làá dūú pɔ̄-u, kun puee an sá u-baa di yíì.

7 «An yaa tí sá yii usapɔɔn kaa dākafì an píkí ní ki pōoǹ àá ki pūtì kí lēē u-ban yii u làá kòò tiba, ní boonee ki mɔ́ǹ. 8 U-cal yaa gbìl̄ ní kaa lī tibee, unimpuee ń nīn gbíntìi ŋúb́ u-pooŋyi. 9 Ama daliŋkin ní u-cal yaa gbìl̄ ní kaa kííyee, ú kpìtī u-pooŋyi nì u-pùtil, ti-Dindaan làá dūú pɔ̄-u.

10 «Ama unimpu un yāntì ticatee àá unimpukpiipu di yaa pōoǹee, an pée sá ú ŋá min u pōoǹee ní.

11 «An yaa sá unimpu un mɔ́ǹee di yaa pōoǹ àá u lēē u-ban yii u làá kòò tibee, 12 u-cal yaa béè ní kaa mɔ́tiǹ-uee, mimmee u máaǹ kí nīn gbíntìi ŋúb́ min u lēē yii u làá ŋée. 13 Ama ní u-cal yaa gbìl̄ ní ki yíì yii waa pú-u nsanee, ú kpìtī u-pooŋyi, ti-Dindaan làá dūú pɔ̄-u. 14 An puee unimpu yaa pōoǹ àá u yaa pūtì ki bàà là kí ŋá tibee, u-cal di ŋūǹ kí yàntī án ŋá míǹ àá án kpìtī. 15 Ama uninja yaa gbìl̄ míǹ ní kutaa dūu wúntì waa lī tibee, mimmee unimpu ŋūǹ kí nīn gbíntìi ŋúb́ u-pooŋyi nì min u lēē yii u làá ŋée, kun puee u-cal nín gbìl̄ ŋwimmɔn kaa lī tibee dàkā yii an ŋān̄ dee. 16 Ama u yaa gbìl̄ míǹ kaa lī tiba yaadal ní an yúntì ní u dāa bíi yíití yii waa là u-nimpuu ń ŋá mimmee, úǹ di dāa tūntí u-nimpuu pooŋyi kpitii.»

17 Mara un ti-Dindaan tīī Mooyiisi ipoon pu, uninja nì unimpu kansikin, nì ubaati nì u-bisal kansikin, ŋyunti ŋun usapɔɔn dáá bí u-baa cindinee dee.