Dikàandi Gbɔŋku 29

f. Ifaal jiŋaaliu bɔti

1 «Uŋmaluluúti wimpeekaaŋu dalee^a, ní kpāfì kí nyɔ̄ŋkìmaan man ni-Dindaan. Yaadal wiiŋŋuee ní taa tɔ̄ ditundi báà diba. Án nīn sá-ni ifaal wiiŋŋu. 2 Ní dāá dū unaja ubɔ nì upìja ubɔ nì apibil aluli ŋin cáá dibindi dibee kí ŋá-mi saraawɔkaa un sɔnsɔfiŋu sɔ̀ŋkī m-pɔbilee. Tiwaŋkuti gbanti laaba ń taa nīn wɔ̀b̄. 3 Ní dū ŋkpam kí búuń ŋyim kiiloobi biwa kí dūú kūtì unaja pu kí ŋá saraa, ní kí dū ŋkpam kí búuń ŋyim kiiloobi biluu kí kūtì upìja pu kí ŋá saraa. 4 Ní dū ŋkpam kí búuń ŋyim kiiloobi bita kí dūú kūtì kí ŋá dipibil kamaa saraau, 5 ní kí dū uŋɔja ubɔ kí ŋá ni-pu ikpiti pɔ̄tam saraau. Bí dāá ŋá ni-pu akoobil ŋin bi máaǹ kí ŋée, ní kí ká ni-kpitii pɔ̄tam. 6 Saraabi nee kɔkɔ ń dāá dūú kūtì saraawɔkaa un ni ŋáań kutaa kamaayee, nì bin ni ŋáań uŋmal kamaayee, nì ŋyim nì ndamam min ni cáa kútí ki ŋáań saraabi gbantee. Saraabi bin ni ŋáań ki wù ŋŋmee sɔnsɔfiŋu di sɔ̀ŋkī m-pɔbil.

g. Ikpiti pɔ̄tam wiŋkpaaŋŋu

7 «Uŋmaluluúti iwiin saalaa dalee, ní kpāfì kí nyɔ̄ŋkì-mi, kí bóob́ kinyɔkɔ, kí taa tɔ̄ ditundi báà diba yaadal wiiŋŋu. 8 Ní dāá dū unaja nì upìja nì apibil aluli ŋin cáá dibindi diba kaa wɔ̀b̄ee ki ŋá-mi saraawɔkaa un sɔnsɔfiŋu sɔ̀ŋkī m-pɔbilee. 9 Ní dū ŋkpam kí búuń ŋyim kiiloobi biwa kí dūú kūtì unaja pu kí ŋá saraa, kí dū ŋkpam kí búuń ŋyim kiiloobi bita kí dūú kūtì upìja pu kí ŋá saraa. 10 Ní dū ŋkpam kí búuń ŋyim kiiloobi biluu kí dūú kūtì dipibil kamaa pu kí ŋá saraa. 11 Ní dū uŋɔja ubɔ ki ŋá ikpiti pɔ̄tam saraau. Saraabi gbanti kɔkɔee ń dāá dūú kūtì ikpiti pɔ̄tam saraau un ni ŋá ikpiti pɔ̄tam wiŋkpaaŋŋu dalee nì saraawɔkaa un ni ŋáań kutaa kamaa nì ŋyim nì ndamamee pu^b.»

gb. Tantib jiŋaaliu

12 Uŋmaluluúti poon iwiin saalku dalee ní kpāfì kí nyɔ̄ŋkì man ni-Dindaan, kí taa tɔ̄ ditundi báà diba yaadal wiiŋŋu. Ní dāá dū iwiin iluli kí nyɔ̄ŋkì man ni-Dindaan^c. 13 Ní dāá dū inajaa saalaa nì ita nì ipijaa ili nì apibil diba kpá saalku ŋin cáá dibindi dibee, kí ŋá saraawɔkaa un sɔnsɔfiŋu sɔ̀ŋkī man ni-Dindaan pɔbilee. Tiwaŋkuti gbanti kɔkɔ laaba ń taa nīn wɔ̀b̄. 14 Ní dū ŋkpam kí búuń ŋyim kiiloobi biwa kí dūú kūtì unaja kamaa pu kí ŋá saraa, ní kí dū ŋkpam kí búuń ŋyim kiiloobi biluu kí dūú kūtì upìja kamaa pu kí ŋá saraa. 15 Ní dū ŋkpam kí búuń ŋyim kiiloobi bita kí kūtì dipibil kamaa pu kí ŋá saraa. 16 Ní dū uŋɔja kí ŋá ikpiti pɔ̄tam saraau. Saraabi gbanti kɔkɔee ń dāá kūtì saraawɔkaa un ni ŋáań kutaa kamaa nì ŋyim nì ndamamee pu.

17 Ŋwinliliitee ní dū inajaa saalaa nì ili nì ipijaa ili nì apibil diba kpá saalku ŋin cáá dibindi dibee kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄. 18 Ní dū saraa yim nì ndamam kí kūtì unaja kamaa saraau nì upìja kamaa saraau nì dipibil kamaa saraau pu, kii an nín bālifì bí dū tin ní kí ŋá saraabi gbantee. 19 Ní dū uŋɔja ubɔ kí ŋá ikpiti pɔ̄tam saraau, ní kí dūú kūtì saraawɔkaa un ni ŋáań kutaa kamaa nì ŋyim saraau nì u-damamee pu. 20 Ŋwintataatee ní dū inaa saalaa nì ubɔ nì ipijaa ili nì apibil diba kpá saalku ŋin cáá dibindi dibee kí dūú ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄. 21 Ní dū saraa yim nì an damam kí kūtì unaja kamaa saraau nì upìja kamaa saraau nì dipibil kamaa saraau pu, kii an nín pée bàlifī miŋyee. 22 Ní dū uŋɔja kí ŋá ikpiti pɔ̄tam saraau kí dūú kūtì saraawɔkaa un ni ŋáań kutaa kamaa nì u-yim nì u-damamee pu. 23 Ŋwinnanaatee, ní dū inajaa saalaa nì ipijaa ili nì apibil ŋin cáá dibindi dibee diba kpá saalku kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄. 24 Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá miŋyee. 25 Ní dū uŋɔja kí ŋá ikpiti pɔ̄tam saraau kí dūú kūtì saraawɔkaa un ni ŋáań kutaa kamaa nì ŋyim nì ndamamee pu. 26 Ŋwiŋŋmooŋmootee, ní dū inajaa iwa nì ipijaa ili nì apibil ŋin cáá dibindi dibee diba kpá saalku kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄. 27 Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá saraabi gbanti miŋyee. 28 Ní dū uŋɔja kí ŋá ikpiti pɔ̄tam saraau, kí dūú kūtì saraawɔkaa un ni ŋáań kutaa kamaa nì u-yim nì u-damamee pu. 29 Winluu dalee, ní dū inaa inii nì ipijaa ili nì apibil ŋin cáá dibindi dibee kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄. 30 Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá saraabi gbanti miŋyee. 31 Ní dū uŋɔja kí ŋá ikpiti pɔ̄tam saraau, kí dūú kūtì saraawɔkaa un bi ŋáań kutaa kamaa nì u-yim nì u-damamee pu. 32 Ŋwinluluútee, ní dū inajaa iluli nì ipijaa ili nì apibil diba kpá saalku ŋin cáá dibindi dibee kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄. 33 Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá saraabi gbanti miŋyee. 34 Ní dū uŋɔja ubɔ kí ŋá ikpiti pɔ̄tam saraau, kí dūú kūtì saraawɔkaa un ni ŋáań kutaa kamaa nì u-yim nì u-damamee pu.

35 Ŋwinniniitee di dāa sá jiŋaal kúntidal. Ní taa tɔ̄ diba yaadal wiiŋŋu. 36 Yaadalee ní dāá dū unaja nì upìja nì apibil aluli ŋin cáá dibindi dibee kí ŋá-mi saraawɔkaa un sɔnsɔfiŋu sɔ̀ŋkī m-pɔbilee. Tiwaŋkuti gbanti kɔkɔ laaba ń taa nīn wɔ̀b̄. 37 Ní dū saraa yim nì an damam kí kūtì kuwaŋkuluu kamaa pu, kí ŋá saraa kii an nīn pée bālifì yii bí dū tin ní ki ŋá saraabi gbantee. 38 Ní dū uŋɔja ubɔ kí ŋá ikpiti pɔ̄tam saraau, kí dūú kūtì saraawɔkaa un ni ŋáań kutaa kamaa nì ŋyim nì ndamamee pu.

39 Saraabi bin ni máaǹ kí ŋá-mi ni-jiŋaalib wiiŋyi dalee dee, ní kí dūú kūtì nlammɔntiim saraabi nì ipoon saraabi nì bisaraawɔkaabi nì ŋyim nì ndamam saraabi nì mpèé saraabi.