Dikàandi Gbɔŋku 28

Saraabi marab a. Ŋwiin kamaa saraabi

1 Ti-Dindaan bí Mooyiisi 2 ń tīī Isirayeel yab mara nee yii: «Ní nīn nyí kí cáań-mi saraabi ŋyunti ŋun an sá bí cáań-bee deedee, m-saraabi bin sá tijin bí dūú wà ŋŋmi mi-sɔnsɔfiŋu sɔ̀ŋkī m-pɔbilee.

3 «Á tùkù-bi yii saraabi bin bi làá nīn ŋáań ki tìì-mee sɔ̀. Kutaa kamaayee, bí cáań apibil ŋin cáá abin ali, ŋi-laaba kaa wɔ̀b̄ee kí ŋá saraawɔkaa kí tīī-mi. An di sá saraawɔkaa un bi làá nīn ŋáań ki tìì-mi múlmul kí taa gbèen̄ee. 4 Bí dū dipibil diba kí ŋá saraa kutaafaau, ní kí dū din kíǹee kí ŋá saraa kujoou. 5 Bí dū ŋyim kiiloobi bita, kí dū ɔliifi kpam min wāĺ kílkilee liitiri ubɔ nì dijandi kí búuń ŋyimee kí dūú kūtì kí ŋá saraa. 6 An di sá saraawɔkaa un ni làá nīn ŋáań múlmul kii un bi nìn ŋá Siinaayi jool puee. An sá saraa un sɔnsɔfiŋu sɔ̀ŋkī m-pɔbilee. 7 Ní dū ndamam liitiri ubɔ nì dijandi kí kūtì kí ŋá saraapeepeekaa. Circir kɔŋkooŋŋun, ni-Dindaan nimbiin ní ni làá ŋá saraa gbanti nì ndaam min pɔ̄ɔ̄yee. 8 Saraaliliitee, kujoou ní ni làá ŋá úǹ kí tīī-mi. Tiwan tin kɔkɔ ni kútì ki ŋá saraapeepeekaayee, tíǹ tibaantiil ní ni làá tí dūú kūtì kí ŋá saraaliliiti mun. An di sá saraawɔkaa un sɔnsɔfiŋu sɔ̀ŋkī m-pɔbilee.

b. Ŋwiŋŋuŋfikaa saraau

9 «Ŋwiŋŋuŋfikaa dalee, ní dū dibindi diba pibiliŋ ali ŋin laaba kaa wɔ̀b̄ee kí ŋá saraa. Ní dū ŋyim kiiloobi biluu, kí dū ŋkpam ki búuń, ní ki dū ndamam kí kūtì kí ŋá saraa gbanti. 10 Ŋwiŋŋuŋfikaa kamaa saraau dee. Ní dūú kūtì saraawɔkaa un ni làá nīn pée ŋáań baabadalee pu.

c. Uŋmal wimpeekaaŋu saraau

11 «Uŋmal kamaa wimpeekaaŋu dalee, ní dū inajaa ili nì upìja ubɔ nì apibil aluli ŋin cáá dibindi dibee kí ŋá-mi saraa. Tiwaŋkuti gbantee, tì-laaba ń taa nīn wɔ̀b̄. 12 Unaja kamaa saraau puee, ní dū ŋyim kiiloobi biwa kí dū ŋkpam kí búuń, ní upìja kamaa saraau puee, ní dū ŋyim kiiloobi biluu kí búuń ŋkpamin kí dūú kūtì kí ŋá saraa. 13 Dipibil kamaa saraau puee, ní dū ŋyim kiiloobi bita kí dū ŋkpam kí búuń kí dūú kūtì kí ŋá saraa. An di sá saraawɔkaa un sɔnsɔfiŋu sɔ̀ŋkī m-pɔbilee. 14 Ní dū ndamam liitirib bita kí kūtì unaja kamaa saraau pu, ní kí dū ndamam liitirib bili kí kūtì upìja kamaa saraau pu, ní kí dū ndamam liitiri ubɔ nì dijandi kí kūtì dipibil kamaa saraau pu. Saraabi bin ni làá nīn ŋáań uŋmal kamaa wimpeepeekaaŋu dal kí tin cáá sāā dibindee dee. 15 Ní dāá dū uŋɔja ubɔ kí ŋá ikpiti pɔ̄tam saraau kí dūú kūtì saraawɔkaa un ni làá nīn ŋáań baabadal nì ndamamee pu.

d. Dilákatil jiŋaaliu bɔti

16 «Dibimpɔndi ŋmapeepeekaau ŋwiin ŋubɔ kpá saalku dalee, ní jī man ni-Dindaan jiŋaaliu un bi yíì Dilákatil jiŋaaliuee, an dàkà yii jiŋaal un Isirayeel yab làá nīn jīǹ ki téetí Unimbɔti nín nìn nyántì-bi Eejipiti tiŋkin puee^a. 17 Iwiin saalku dalee ní kíĺ jiŋaal kí nīn ŋmóò kpɔnɔb bin baa ŋá ŋkpɔnɔnyɔkɔee kí tin cáá sāā iwiin iluli. 18 Jiŋaal gbanti wimpeekaaŋu dalee, ní kpāfì kí nyɔ̄ŋkìmaan man ni-Dindaan, ubɔ ń taa tɔ̄ ditundi diba ŋwiin gbanti. 19 Ní dāá dū inajaa ili nì upìja ubɔ nì apibil aluli kí dūú ŋá saraawɔkaa kí tīī-mi. Tiwaŋkuti gbanti kɔkɔ laaba ń taa nīn wɔ̀b̄. 20 Ní dāá dū ŋkpam kí búuń ŋyim kiiloobi biwa kí dūú kūtì unaja kamaa saraau pu ní kí dū ŋkpam kí búuń ŋyim kiiloobi biluu kí dūú kūtì kí ŋá upìja kamaa saraau. 21 Ní dū ŋkpam kí búuń ŋyim kiiloobi bita kí dūú kūtì kí ŋá dipibil kamaa saraau. 22 Ní dū uŋɔja ubɔ kí ŋá saraawɔkaa ní bí dū saraayee kí ŋá dikoobil din bi máaǹ kí ŋée ní ní ká ni-kpitii pɔ̄tam. 23 Saraabi nee kɔkɔ ń dāá dūú kūtì saraawɔkaa un ni ŋáań kutaafaau kamaayee pu. 24 Ní nīn ŋáań bisaraawɔkaabi baabadal kí tin sāā iwiin iluli. Saraabi gbanti sɔnsɔfiŋu di sɔ̀ŋkī man ni-Dindaan pɔbil. Saraabi gbanti ń dūú kūtì bisaraawɔkaabi nì bi-damam pu. 25 Ní ŋwinluluúti dalee ní kpáfì kí nyɔ̄ŋkì-mi. Yaadalee ubɔ ń taa tɔ̄ ditundi báà diba^b.

ee. Kudiceeu jiŋaaliu bɔti

26 «Tijincɔ̀fikaal jiŋaaliu dal ni yaa cáań tijimpɔn kí ŋá man ni-Dindaan saraayee, ní kpāfì kí nyɔ̄ŋkì-mi, kí taa tɔ̄ ditundi báà diba yaadal wiiŋŋu^c. 27 Ní dāá dū anajapɔmbil ali nì upìja ubɔ nì apibil aluli ŋin cáá dibindi dibee kí ŋá-mi saraawɔkaa, ní u-sɔnsɔfiŋu ń sɔ̀ŋkì m-pɔbil. 28 Ní dū ŋkpam kí búuń ŋyim kiiloobi biluu kí dūú kūtì unaja kamaa saraau pu, 29 ní kí dū ŋkpam kí búuń ŋyim kiiloobi bita kí dūú kūtì dipibil kamaa saraau pu. 30 Ní dū uŋɔjee kí ŋá saraa, ní bí ŋá akoobil ŋin bi máaǹ kí ŋá ni-puee ní ká ni-kpitii pɔ̄tam. 31 Saraabi nee kɔkɔ ń dāá dūú kūtì saraawɔkaa nì tijin saraabi bin ni ŋáań baabadalee pu. Ní dū tiwaŋkuti tin laaba kaa wɔ̀b̄ee nì ndamam kí nīn cáa ŋáań saraabi.