Dikàandi Gbɔŋku 33

Isirayeel yab nín kàal̀ ki yíkí puee

1 Isirayeel yab nín nyáń Eejipiti tiŋkin, Mooyiisi nì Aarɔn kpòotī-bi bi nóó tɔb akiti akiti pu ki kàal̀ ki yíkí puee sɔ̀. 2 Bi-saŋkindi poonee, ti-Dindaan yaa nìn dàkā-bi yii bí kàl̄ laakin kí ŋùŋfì kí nín nìkēe, Mooyiisi nìn ŋmà niin yindi ní. Bi nín nìn kāl̀ kāl̀ laakiŋyee yiŋŋi sèé.

3 Isirayeel yab nìn yíkì Ramseesi, Eejipiti tiŋkin dibindi ŋmapeepeekaau iwiin saalku dal ní. Bi nìn jíń Dilákatil jiŋaaliu kutaa wúntì ní bi tɔ́ bi-ba ki nyáń Eejipiti yab ŋaan ki búntì ní bi kā ki kpèé-bi. 4 Ŋyunti gbantee, Eejipiti yab bíǹ nìn bíi síb̀ bi-biseebiyaamu nninjabiyaamu mun ti-Dindaan nìn kūūyee dee. Ti-Dindaan nìn ŋá míǹ kí dáaĺ bi-waaŋi tafal ní. 5 Isirayeel yab yíkì Ramseesee, ní ki cūtìi kāl̀ Sukooti. 6 Bi yíkì Sukootee, ní ki cūtìi kāl̀ Eetaam, kuteeu kpaanyɔkɔ. 7 Bi yíkì Eetaamee ní ki túlifì bi-boon ki dī Pii-Ayirooti, kitiŋ kin nì Baal-Seefɔn túĺ tɔbee, ní ki cūtìi kāl̀ Miigidool nyɔkɔpu. 8 Bi yíkì Pii-Ayirooti ní ki dūtì dimɔɔl, ki cōom̀ iwiin ita Eetaam teekun ní ki dūu nyáń Maara tiŋki pu ní ki kāl̀ niin. 9 Bi yíkì Maaree ní ki dūu bàn̄ Eeliim tiŋkin. Niin ní bi ká inyimbul saalaa nì ili nì ibafi imuŋku ita nì saalaa, ní ki gbíntì niin ki kāl̀. 10 Bi yíkì Eeliimee ní ki cūtìi kāl̀ ki pìlīǹ Tikati mɔɔl. 11 Bi yíkì Tikati mɔɔl ceeyee ní ki cūtìi kāl̀ Siini teekun. 12 Bi yíkì Siini teekunee ní ki cūtìi kāl̀ Doofika tiŋkin. 13 Bi yíkì Doofikee ní ki cūtìi kāl̀ Aluusi tiŋkin. 14 Bi yíkì Aluusee ní ki cūtìi kāl̀ Reefiidiim tiŋkin, laakin Isirayeel yab nìn bàn̄ nnyim kpá bí nyɔ̀ee.

15 Bi yíkì Reefiidiimee ní ki cūtìi kāl̀ Siinaayi teekun. 16 Bi yíkì Siinaayi teekunee ní ki cūtìi kāl̀ Kiibirooti-Taafa tiŋkin. 17 Bi yíkì Kiibirooti-Taafee ní ki cūtìi kāl̀ Aseerooti tiŋkin. 18 Bi yíkì Aseerootee ní ki cūtìi kāl̀ Riitima tiŋkin. 19 Bi yíkì Riitimee ní ki cūtìi kāl̀ Riimɔn-Peereesi tiŋkin. 20 Bi yíkì Riimɔn-Peereesee ní ki cūtìi kāl̀ Liibina tiŋkin. 21 Bi yíkì Liibinayee ní ki cūtìi kāl̀ Riisa tiŋkin. 22 Bi yíkì Riisayee ní ki cūtìi kāl̀ Keeyeelata tiŋkin. 23 Bi yíkì Keeyeelatayee ní ki cūtìi kāl̀ Seefeer jool pu. 24 Bi yíkì Seefeer jool puee ní ki cūtìi kāl̀ Arada tiŋkin. 25 Bi yíkì Aradayee ní ki cūtìi kāl̀ Makeelooti tiŋkin. 26 Bi yíkì Makeelootee ní ki cūtìi kāl̀ Tayati tiŋkin. 27 Bi yíkì Tayatee ní ki cūtìi kāl̀ Teera tiŋkin. 28 Bi yíkì Teerayee ní ki cūtìi kāl̀ Miitika tiŋkin. 29 Bi yíkì Miitikayee ní ki cūtìi kāl̀ Yasimoona tiŋkin. 30 Bi yíkì Yasimoonayee ní ki cūtìi kāl̀ Mooseerooti tiŋkin. 31 Bi yíkì Mooseerootee ní ki cūtìi kāl̀ Beenee-Yaakan tiŋkin. 32 Bi yíkì Beenee-Yaakanee ní ki cūtìi kāl̀ Yɔɔr-Giidigaadi tiŋkin. 33 Bi yíkì Yɔɔr-Giidigaadee ní ki cūtìi kāl̀ Yootibata tiŋkin. 34 Bi yíkì Yootibatayee ní ki cūtìi kāl̀ Abiroona tiŋkin. 35 Bi yíkì Abiroonayee ní ki cūtìi kāl̀ Eesiyɔn-Geebeer tiŋkin. 36 Bi yíkì Eesiyɔn-Geebeeree ní ki cūtìi kāl̀ Kadeesi tiŋkin, Siini teekun. 37 Bi yíkì Kadeesee ní ki cūtìi kāl̀ Yɔɔr jool pu, ki pìlīǹ Eedoom tiŋki kpaanyɔkɔ.

38 Niinee ní usaraaŋakpil Aarɔn jɔ́m̀ Yɔɔr jool pu kii ti-Dindaan nín nìn tùkū-u puee, ní ki kpíì niin. Isirayeel yab nín nyáń kuyuŋu Eejipiti tiŋkinee, abin imuŋku ili, uŋmaŋmooŋmooti wimpeepeekaaŋu dal ní u kpíì. 39 U nìn cáá abin dilaataal nì mmuŋku nì ata ní ki nín kpíì^a. 40 Niinee ní ukanaanja, Araadi yab bɔtiu un nìn kóò Neegeeb, Kanaan tiŋkinee, gbìl̄ yii Isirayeel yab tóobiń-u.

41 Bi yíkì Yɔɔr jool puee ní ki cūtìi kāl̀ Salmoona tiŋkin. 42 Bi yíkì Salmoonayee ní ki cūtìi kāl̀ Puunɔn tiŋkin. 43 Bi yíkì Puunɔŋyee ní ki cūtìi kāl̀ Oobooti tiŋkin. 44 Bi yíkì Oobootee ní ki cūtìi kāl̀ Yee-Abariim, Moowaab yab tiŋki kpaanyɔkɔ. 45 Bi yíkì Yee-Abariimee ní ki cūtìi kāl̀ Diibɔn-Gaadi tiŋkin. 46 Bi yíkì Diibɔn-Gaadee ní ki cūtìi kāl̀ Almɔn-Diibilatayiim tiŋkin. 47 Bi yíkì Almɔn-Diibilatayiimee ní ki cūtìi kāl̀ Abariim jooŋŋi pu, ki túĺ Neeboo. 48 Bi yíkì Abariim jooŋŋi puee ní ki cūtìi kāl̀ Moowaab tantakalin, an pìlīǹ Jɔɔdan buŋŋu ki túĺ Jeeriikoo tiŋki. 49 Ní bi kāl̀ Jɔɔdan buŋgbandi ki yōoǹ Beeti-Yeesimooti ki tin cáa sāā Afeel-Siitiim, Moowaab tantakalin.

Ti-Dindaan tīī mara bí já kí fōō Kanaan tiŋki

50 Ti-Dindaan sòon̄ nì Mooyiisi, Moowaab tantakal din túĺ Jeeriikooyee yii 51 ú tùkù Isirayeel yab yii: «Ni yaa dūtì Jɔɔdan buŋŋu ki kɔ́ Kanaan tiŋkinee, 52 ní jà binib bin kóò kitiŋ gbanti poonee kɔkɔ kí cùnnì ndan kí wàatī ni-ba, kí gbá kí kpìtī bi-waaŋi ŋin sá ataŋkpeeyee kɔkɔ, kí gbá kí wìil̀ tikúti tin bi dūu mɔ́ɔ́ ki nántiǹ awaayee, ní kí bīil̀ ipaan in pu bi cá ki jáaḿ awaayee. 53 Ní fōō kitiŋ gbanti kí nīn kíǹ ki kóò, di sá nimbi ní m dū kitiŋ gbanti ki tīī ní nīn kíǹ ki yì. 54 Ní dāá tɔ̄ kasi ní an lēē kunaakoou kamaa nín máaǹ dijandi diŋyee. Kunaakoou kun nib yaa wīikée, ní tīī-bi kitiŋ ń nīn wīikí, kun nib yaa kaa náaǹee, ní tīī-bi án taa nín̄ náaǹ. Ní kunaakoou kamaa ń nīn yì dijandi din bi tɔ́ kasi ku jíńee. Ní yàkatīmaan kí nóó nì ni-baabi naakɔti nín sá puee^b. 55 Ama ni yaa kaa jìn̄ binib bin kóò kitiŋ gbantinee ki cūnnì ndan kí wàatī ni-bee, bin ni kíǹee di dāa kpántí ikuŋkum ki sàatī ni-nimbiliŋ, ní ki dāa sá akuŋkunjal ki sàatī ni-takakalii. Bi làá dāá nīn páb̀-ni kitiŋ kin ni làá cùú kàl̄ nee poon. 56 Ní man nín bàà yóoǹ kí dáaĺ bi-tafal miŋyee, ḿ dāá dūú dáaĺ nimbi tafal.»