Akoobil 23

Isirayeel yab jiŋaalib wiiŋyi

1 Ti-Dindaan bí Mooyiisi 2 ń tùkù Isirayeel yab yii:

«Ni yaa kóoǹ ki kpáfì kí jāam̀ man ni-Dindaanee, jiŋaakpaambi bin ni làá nīn jīǹee sɔ̀.

Ŋwiŋŋuŋfikaa bɔti

3 «Kinyɔŋ poonee, ni cáá iwiin iluu kí tɔ̄ ni-tundi. Ama ŋwinluluúti dal sá ŋwiŋŋuŋfikaa ní, diŋuŋfil wiiŋŋu ŋun ni làá kóoǹ kí kpāfì kí jāam̀-mee. Laakin kamaa ni yaa bàn̄ ki kóòyee, ní taa tɔ̄ ditundi ŋwiŋŋuŋfikaa dal, ama ní dū-ŋu kí sú-mi^a.»

4 Man ni-Dindaan jiŋaalib bin ŋyunti yaa bàn̄ ní kóoǹ kí kpāfì kí jī kí jāam̀-mee sɔ̀.

Dilákatil jiŋaaliu

5 Dilákatil jiŋaaliu un bi jīǹ ki tìì ti-Dindaan tinyoolee kífí uŋmapeepeekaa, ŋwiin ŋubɔ kpá saalku dal kujoopɔŋ ní^b.

6 «Iwiin saalku dalee, ní jī jiŋaal un bi ŋmóò kpɔnɔb bin kaa cáá ŋkpɔnɔnyɔkɔee kí jāam̀ ti-Dindaan. Ní ŋmɔ́ kpɔnɔb bin kaa cáá ŋkpɔnɔnyɔkɔee iwiin iluli. 7 Kinyɔŋ gbanti wimpeepeekaaŋuee, ní kóoǹ kí kpāfì kí jāam̀-mi. Yaadalee ní taa tɔ̄ ditundi báà diba. 8 Iwiin iluli gbanti kɔkɔ poonee, ní ŋá saraabi kí dūú wà ŋŋmi kí tīī man ni-Dindaan. Ŋwinluluúti dalee, ní kóoǹ kí kpāfì kí jāam̀-mi. Ní taa tɔ̄ ditundi báà diba^c.»

Dijimbɔ́ndi dipeepeekaal jiŋaaliu

9 Ti-Dindaan bí Mooyiisi 10 ń tùkù Isirayeel yab yii:

«Ni yaa láa kɔ́ kitiŋ kin m làá tīī-nee poon, ní ki yaa láa bíi cēē ni-kpaajintee, dibɔ́ndi din ni làá péé péé kí cēē, ní cáań kí tīī usaraaŋal. 11 Ŋwiŋŋuŋfikaa yaa jítì ku wúntèe, usaraaŋal ń yòon̄ dibɔ́ndee kí cáań ti-Dindaan nimbiin, ní kí yòon̄-dì yilpu kí túĺ kutaa kí fíiǹ fíiǹ ní ti-Dindaan ń fōō. 12 Daliŋkin ni làá cáań tijincɔ̀fikaal dibɔ́ndi ti-Dindaan nimbiinee, ní cáań dipibil din cáá dibindi diba di-laaba kaa wɔ̀b̄ee kí ŋá saraawɔkaa kí tīī ti-Dindaan. 13 Ní dū ŋyim min bi dū ŋkpam ki búuńee kiiloobi biluu kí ŋá saraa. An sá saraa un bi dùú wà ŋŋmi u-sɔnsɔfiŋu sɔ̀ŋkī m-pɔbilee. Ní dāá dū ndamam liitiri ubɔ nì dijandi mun kí fá-mi. 14 Naa máaǹ kí ŋmɔ́ tijimpɔn gbanti kpɔnɔu àá ti-fiŋyi in bi púĺee, àá ti-biliŋ ŋin sá apɔɔnee kí dāá sāā ŋwiin ŋun ní ni làá cáań saraa kí tīī man ni-Nimbɔtiuee. Laakin kamaa ni yaa bàn̄ ki kóòyee, ní nīn ŋúb́ dibɔkpaal nee kí nīn cáa cá jaanjaan.»

Kudiceeu jiŋaaliu

15 «Ŋwiŋŋuŋfikaa ŋun ni cáań tijincɔ̀fikaalee, ku yaa wúntèe ní kíĺ kí kàaǹ nnyɔmu mululi. 16 Ní kàaǹ iwiin imuŋku ili nì saalaa kí cáá sāā kutaa ń wúntí nnyɔmu mululi wiŋŋuŋfikaaŋu, ní ní cáań tijimpɔn saraau kí tīī man ni-Dindaan. 17 Laakin kamaa ní ni yaa kóòyee, ní cáań kpɔnɔb bin ni dū ŋyim kiiloobi biluu nì ŋkpɔnɔnyɔkɔ ki ŋée bili kí fíiǹ fíiǹ kí tīī man ni-Dindaan. An di sá tijincɔ̀fikaal saraau un ni cáań ki tīī man ni-Dindaanee. 18 Ní cáań apibil aluli ŋin cáá dibindi diba ŋi-laaba kaa wɔ̀b̄ee, nì unaja nì ipijaa ili kí kūtì kpɔnɔbee pu. Ní dū an waŋkutee kí ŋá saraawɔkaa, kí kpáaǹ tijin saraau nì ndaam min bi cáa kútí saraabi gbanti puee. An di sá saraa un bi dùú wà ŋŋmi u-sɔnsɔfiŋu sɔ̀ŋkī man ni-Dindaan pɔbilee. 19 Míǹ boonee ní ní dū uŋɔja mun kí ŋá ikpiti pɔ̄tam saraau, ní kí dū apibil ŋin cáá dibindi dibee ali kí ŋá mpèé saraau. 20 Niinee ní usaraaŋal ń yòon̄ apibil alee nì tijincɔ̀fikaal kpɔnɔbee yilpu kí fíiǹ fíiǹ man ni-Dindaan nimbiin. Saraabi gbantee, bi dū-bi ki sú man dee, usaraaŋal di yì. 21 Yaadal wiiŋŋuee, ní kóoǹ samaa kɔkɔ kí kpāfì kí jāam̀-mi. Ní taa tɔ̄ ditundi báà diba. Laakin kamaa ni yaa bàn̄ ki kóòyee, ní nīn ŋúb́ dibɔkpaal nee kí nīn cáa cá jaanjaan^d.

22 «Ni yaa láa bíi cēē ni-kpaajintee, ní taa cā kí bà ŋkpaabuku, kí taa gítí ni-boon mun kí lūlifì. Dūú tīīmaan bifalaadambi nì binicambi. Man di sá ni-Dindaan, ni-Nimbɔtiu^e.»

Diteetil nì ifaal wiiŋŋu

23 Ti-Dindaan gíti bí Mooyiisi 24 ń tùkù Isirayeel yab yii:

«Uŋmaluluúti wimpeekaaŋu dal sá diŋuŋfikpaandi wiiŋŋu ní. Ŋwiin gbantee, ní kóoǹ kí kpāfì kí fáá iwiliili kí téetí m-pu. 25 Ní taa tɔ̄ ditundi báà diba, ní kí dāá ŋá saraabi kí dūú wà ŋŋmi kí tīī man ni-Dindaan^f.»

Ikpiti pɔ̄tam wiŋkpaaŋŋu dal

26 Ti-Dindaan bí Mooyiisi yii:

27 «Uŋmaluluúti poon iwiin saalaa dal sá ikpiti pɔ̄tam wiŋkpaaŋŋu ní^g. Ní dāá kóoǹ kí kpāfì kí bóob́ kinyɔkɔ kí ŋá saraabi kí dūú wà ŋŋmi kí tīī man ni-Dindaan. 28 Ní taa láa tɔ̄ ditundi báà diba ŋwiin gbanti, kun puee an sá ikpiti pɔ̄tam wiŋkpaaŋŋu ŋun bi ŋáań ni-pu akoobil ki fíntí ni-kpitii kɔkɔ man ni-Dindaan ni-Nimbɔtiu nimbiinee ní. 29 Un yaa kaa bóob́ kinyɔkɔ ŋwiin gbantee, bí nyāntí-u Isirayeel nibul kansikin. 30 Un mun di yaa tí túń ditundi ŋwiin gbantee, mama m-ba di làá kúntí-u Isirayeel nibul kansikin. 31 Ní taa pée tɔ̄ ditundi ní. Laakin kamaa ni yaa bàn̄ ki kóòyee, ní nīn ŋúb́ dibɔkpaal nee kí nīn cáa cá jaanjaan. 32 An sá diŋuŋfil wiiŋŋu kii ni nín ŋáań pu ŋwiŋŋuŋfikaa dalee ní. Ní dāá bóob́ kinyɔkɔ. Uŋmal gbanti poon iwiin iwa dal kujoou kí cáá sāā ku yaa wúntèe kujoou ní ŋwiŋŋuŋfikaa gbanti sá^h.»

Tantib jiŋaaliu

33 Ti-Dindaan bí Mooyiisi 34 ń tùkù Isirayeel yab yii:

«Uŋmaluluúti gbanti poon iwiin saalku dalee, ní jī tantib jiŋaaliu kí tīī man ni-Dindaan yindi tinyool. Ní dāá jī jiŋaal gbanti iwiin iluli. 35 Ŋwimpeepeekaa dalee, ní kóoǹ kí kpāfì kí jāam̀-mi. Ní taa tɔ̄ ditundi báà diba. 36 Iwiin iluli gbanti kɔkɔ poonee, ní ŋá saraabi kí dùú wà ŋŋmi kí tīī man ni-Dindaan. Ŋwinniniiti dalee, ní kóoǹ kí kpáfì kí jāam̀-mi ní kí ŋá saraa kí dūú wà ŋŋmi kí tīī-mi. Yaadal ní jiŋaal gbanti kúntí. Ní taa láa tɔ̄ ditundi báà diba.

37 «Jiŋaalib bin ni máaǹ kí nīn jīǹ ki tìì man ni-Dindaan tinyoolee dee. Ni yaa bíi jīǹ jiŋaalib gbantee, ní kóoǹ kí kpāfì kí jāam̀ man ni-Dindaan, kí nīn ŋáań saraawɔkaa nì tijin saraabi nì mpèé saraabi nì ndaam saraabi kii jiŋaal kamaa wiiŋŋu koobiliŋ nín sá puee. 38 Saraabi gbanti sá kí dūú kūtì bin ni ŋáań ŋwiŋŋuŋfikaa kamaa dalee pu ní, ní kí kūtì dipɔl saraau nì saraabi bin bi ŋáań kí pà ipoon pɔndee nì nlammɔntiim saraabi bin ni pée ŋáań ki tìì man ni-Dindaanee.

39 «Ni yaa cáń ni-kpaajinti uŋmaluluúti iwiin saalku dalee, ní jī iwiin iluli jiŋaaliu kí tīī man ni-Dindaan yindi tinyool. Ŋwimpeepeekaa dal nì ŋwinniniiti dal sá diŋuŋfil wiiŋyi ní. 40 Ŋwimpeepeekaa dalee, ní nyàab̀ asubimɔnti nì tikpakpati nì isufi in cáá tifaal sùuuyee paŋŋi nì ŋkpinni sufii faati, ní kí fàal̀ man ni-Dindaan ni-Nimbɔtiu nimbiin iwiin iluliⁱ. 41 Dibindi kamaayee, ní dū iwiin iluli kí jī jiŋaal nee kí tīī man ni-Dindaan tinyool. Ní nīn ŋúb́ dibɔkpaal nee kí nīn cáa cá jaanjaan. Uŋmaluluúti poonee, ní jī jiŋaal gbanti. 42 Iwiin iluli gbantee, nimbi Isirayeel yab kɔkɔ ń nīn kóò tantib poon. 43 Mimmee ni-biyaamu kɔkɔ làá béé yii m nín nìn nyántìń-ni Eejipiti tiŋkinee, tantib poon ní m nìn yāntì ni kóò. Man di sá ni-Dindaan, ni-Nimbɔtiu^j.»

44 Míǹ ní Mooyiisi cántì ki tùkū Isirayeel yab bi nín máaǹ kí nīn jīǹ ti-Dindaan jiŋaalib ki tìì-u tinyool puee.