Akoobil 24

Circir kɔŋkooŋŋu fitilab bɔti

1 Ti-Dindaan bí Mooyiisi yii:

2 «Yàntī Isirayeel yab ń cáań-si ɔliifi kpam min ŋān̄ ki wāĺ kílkilee á dūú ŋá fitilab poon, án nín làá ŋá pu fitilab ń nīn pée fòol̄ ŋyunti kamaayee. 3 Aarɔn ń dū fitilab gbanti kí síiń circir kɔŋkooŋŋu poon, ŋŋaapìtikaa ŋun bīī baa wāĺ Dipoondi dakaauee nimbiin. Ú bɔ́ntí-bi tiŋan án nín làá ŋá pu fitilabee ń nīn pée fòol̄ ŋyunti kamaa kí yòon̄ kujoou kí cáá sāā kutaafaauee. Ní nīn ŋúb́ dibɔkpaal nee kí nīn cáa cá jaanjaan. 4 Aarɔn máaǹ kí nīn kpèé fitilab bin tɔ́kɔ́ fitilab tɔ́kɔŋkaati tin bi dū sindaariya ki nyūntèe pu, ní bí nīn fòol̄ ŋyunti kamaa ti-Dindaan nimbiin.»

Kpɔnɔb bin bi dūu ŋá Unimbɔti saraayee

5 «Á dū ŋyim kí ŋá kpɔnɔb saalaa nì bili, kpɔnɔ kamaa nyiŋfiŋu ń nīn sá kiiloobi biluu. 6 Á dū-bi kí páań teebil un sí m-nimbiin bi dū sindaariya ki nyūntèe pu. Á páań-bi ipɔ̀n ili pu, mpɔ̀n kamaa ń nīn cáá kpɔnɔb biluu^a. 7 Mpɔ̀n kamaa puee, á dū talaalu un sá umɔntee kí páań án nīn sá kudaaŋŋu man Unimbɔti nimbiin yii saraa gbanti sá ki tīī-mi, ní bí dāá dū talaaluee kí wà ŋŋmi kpɔnɔbee yil pu kí tīī man ni-Dindaan.»

8 «Ŋwiŋŋuŋfikaa kamaa kí yòon̄ kí nīn cá jaanjaanee, ní nīn pāantí kpɔnɔb gbanti man ni-Dindaan nimbiin. Án nīn sá tin Isirayeel yab máaǹ kí nīn ŋáań ki cá jaanjaanee. 9 Aarɔn nì u-jipɔmbi di yì kpɔnɔb gbanti. Bi yaa làá ŋmɔ́-bee, bí ŋmɔ́-bi mpaan ŋun bí circiree pu. Di sá yii saraabi gbanti sá circir páaa wanti tin bi lēē circir saraabi bin bi dù kí wà ŋŋmi kí tīī man ni-Dindaanee poon ní. Bíǹ di yì-tì kí nīn cá jaanjaan^b.»

Bin sòoǹ ki bíiĺ Unimbɔtee tafadaaldi

10 Unaacimpɔɔn ubɔ di nìn bí ní u-na sá uisirayeelnimpu ní u-baa sá ueejipitija, ní u dɔ́miń ki kóò Isirayeel yab kansikin. Dalbee, dinaapaal pu niinee, ní kujaau kɔ́ unaacimpɔɔnee nì Isirayeel tindambiki kiba kansikin. 11 Niinee, unaacimpɔɔn un na sá Isirayeelee kíĺ ki bíi sòoǹ ki bíiĺ Unimbɔti yindi ki sìí-u. Ní bi cáań-u Mooyiisi cee. U-na Dibrii bisal Seeloomiiti nìn sá Daani naakookun ní. 12 Ní bi dū-u ki pīiǹ kudii kí cīití ti-Dindaan u-ba ń sòoǹ u-bɔti.

13 Niinee ní ti-Dindaan bí Mooyiisi yii: 14 «Nyāntí kijapaayee dinaapaal kpaanceetiŋu ní bin kɔkɔ gbìl̄ u nín sòon̄ puee ń dū bi-ŋalii kí páań u-yil pu, ní samaa kɔkɔ ń yāŋkì-u ataŋkpee kí kpɔ̀. 15 Á sòoǹ nì Isirayeel yab kí kpāafì-bi tibɔti nee yii:

«Un di yaa sòon̄ ki bíil̀ u-Nimbɔtiuee, see ú túń u-kpitii tafadaaldi. 16 Un yaa sòon̄ ki bíil̀ man ni-Dindaan yindee, see bí kpɔ̀-u. Samaa kɔkɔ ń yāŋkì-u ataŋkpee. Udaan yaa sá unicaanaaa, kitindambikaaa, u nín pée ŋá pu ní ki sòon̄ ki bíil̀ Unimbɔti yindee, see ú kpú.

17 «Unil un yaa lēē u-juti maŋfalee, bí lēē u mun yal^c. 18 U yaa tí kūū ubɔ waŋkulukuee, ú nyàab̄ kí téeǹ-u.

19 «Ubɔ yaa ŋá u-juti tiweendee, bí ŋá u mun tiweendi. 20 Un yaa fáá ki gíì u-juti kpabilee, bí fáá kí gíí u mun yal, un yaa lēē u-juti nimbilee, bí lēē u mun yal, un yaa lēē u-juti nyindee, bí lēē u mun nyindi. Un yaa pée ŋá u-juti tiweendi tiŋyee, bí ŋá u mun míǹ deedee^d.

21 «Un yaa kūū kuwaŋkuluuee, ú nyàab̀ kubɔ kí téeǹ. Ama un yaa kūū unilee, bí kpɔ̀ u mun.

22 «Ni nín sòoǹ unicaan bɔti puee, míǹ mbaantiim ní ni máaǹ kí sòoǹ kitindambiki mun bɔti, di sá yii man di sá ni-Dindaan ni-Nimbɔtiu^e.»

23 Míǹ ní Mooyiisi nìn sòon̄ nì Isirayeel yab. Bi nìn nyántì un sòon̄ ki bíil̀ Unimbɔti yindee dinaapaal kpaanceetiŋu ní ki yáŋkì-u ataŋkpee ki kūū. Ti-Dindaan nín nìn tùkū Mooyiisi yii bí ŋá puee, míǹ deedee ní bi nìn ŋá.