Akoobil 22

c. Saraabi jinti jītam koobiliŋ

1 Ti-Dindaan bí Mooyiisi yii:

2 «Tùkù Aarɔn nì u-jipɔmbi yii, kí taa kpèè m-circir yindi fámee, bí nīn tɔ́ circir saraabi bin Isirayeel yab cāabìń ki tìì-mee. Man di sá ni-Dindaan. 3 Tùkù-bi yii:

«Ni-maaliŋu poon kí nīn cée, unil ubɔ yaa bí tijɔkɔndin ní ki sútì ki pìl̄ m-circir saraabi bin Isirayeel yab cāabìń ki tìì man ni-Dindaanee, bí nyāntí-u m-tundin. Man di sá ni-Dindaan. 4 Aarɔn maaliŋu poon un di yaa būǹ dinyaŋgbandi àá batikuee kaa máaǹ kí jī circir saraabi jinti kí cáá sāā ŋwiin ŋun u làá pɔ̄ɔkèe. Míǹ mbaantiim un di yaa gbēē unil un gbēē dinikpil ki kɔ́ tijɔkɔndi, àá unil un nyéem̀ tijatee, 5 àá unil un di yaa gbēē kuwaŋkuluu kun ni kòóyee ki kɔ́ tijɔkɔndee, àá unil un di yaa gbēē un bí tijɔkɔndee, báà tijɔkɔndi tin ní an yaa sée, udaan kaa máaǹ kí jī saraabi gbanti jinti. 6 Un di yaa gbēē unil un bí mimmee kɔ́ tijɔkɔndi kí cáá sāā kujoou. Kí wàatī ú jī m-circir saraabi jintee, asee ú fàl̀. 7 Ŋwìiń yaa jéetèe, u nyáń tijɔkɔndin. Míǹ boonee, u ŋūǹ kí nīn kíǹ ki jīǹ circir saraabi jinti, kun puee u-jinti dee. 8 Usaraaŋal kaa máaǹ kí ŋmɔ́ kuwaŋkuluu kun kpíìyee, àá kun an cúúyee nanti án kɔ́ǹ-u tijɔkɔndi. Man di sá ni-Dindaan.

9 «Bisaraaŋaliibi ń nīn ŋúb́ tin ní m kpáafì-bee, án nín làá ŋá pu saraabi jinti puee, bí taa yòon̄ ikpiti iba kí túńee. Bi yaa kpēē saraabi jinti fámee, asee bí kpú. Man di sá ni-Dindaan un gāntì bisaraaŋaliibi bí nīn bí m-tundinee.

10 «Unil un kaa sá usaraaŋal dicaŋkunee kaa máaǹ kí jī circir saraabi jinti. Unicaan un dɔ́miń ki kɔ́ usaraaŋal puee nì usaraaŋal paadaaŋwu kaa máaǹ kí jī circir saraabi gbanti jinti. 11 Ama usaraaŋal yumbuu un u dū u-nimbiliŋ ki dée, nì un bi màl̄ u-dicaŋkunee ŋūǹ kí jī tijin tin usaraaŋal jīǹee. 12 Usaraaŋal bisal yaa kaa mɔ́ǹ bisaraaŋaliibi naakookunee, waa cáá nsan kí jī tijin tin ní bi lēē circir saraabi poonee. 13 Ama usaraaŋal bisal yaa kpántì ukpiipu, àá u nì u-cal yākatì tɔbin waa cáá kibiki, ní ki fātìi gítì u-baa dicaŋkun ki kā kii u nín nìn pée kā u-sapɔntin puee, u ŋūǹ kí jī tijin tin u-baa jīǹee. Un kaa sá bisaraaŋaliibi naakookunee kaa cáá nsan kí jī tijin gbanti.

14 «Ubɔ yaa kaa nyí ní ki jíń circir saraabi jintee, ú nyàab̀ tin u jíńee nyɔkɔm kí cáań kí téeǹ usaraaŋal, ní kí kūtì bi yaa yākatì tin u jíńee miŋmoo puee diba pu.

15 «Bisaraaŋaliibi ń taa kpèè Isirayeel yab nín lèekī dijandi din bi-saraabi poon ki tìì man bi-Dindaanee fám. 16 Bi yaa kaa máaǹ kí jī tijin gbanti ní ki jíń-tèe, bi kɔ́ tibɔtin ní an bàlifī yii bí ŋāŋkì. Man di sá ni-Dindaan un gāntì bisaraaŋaliibi bí nīn bí m-tundinee.»

Tiwaŋkuti tin ní bi máaǹ kí dūú ŋá saraabee

17 Ti-Dindaan bí Mooyiisi 18 ń tùkù Aarɔn nì u-jipɔmbi nì Isirayeel yab kɔkɔ yii:

«Isirayeel yab ubɔ àá binicambi bin kóò Isirayeel tiŋkinee ubɔ yaa là kí ŋá saraawɔkaa kí tīī man ni-Dindaanee, an yaa sá kí pà ipooneeee, an yaa tí sá kí ŋá nlammɔntiim saraaueeee, 19 udaan ń cáań unaja àá upìja àá uŋɔja ní ḿ nín fōō u-saraau. 20 Ní taa dū kuwaŋkuluu kun laaba wɔ̀b̄ee kí ŋá saraa kí tīī-mi, di sá yii maa làá fōō an saraau^a. 21 Ubɔ yaa là kí ŋá mpèé saraauee, an yaa sá kí pà ipooneeee, an yaa sá nlammɔntiim saraaueeee, án nīn sá unaa àá upii àá uŋoobu un laaba kaa wɔ̀b̄ee ní ḿ nín fōō saraa gbanti. 22 Ní taa dū kuwaŋkuluu kun jɔ̀b̄ee, àá kun an kūū àá kun fōō tiweendee, àá kun cáá ibuun àá digbàndi àá kideeŋŋee kí ŋá saraa kí tīī man ni-Dindaan. Ní taa dū tiwaŋkuti tin bí mimmee kí ŋá saraa bí cáá wà ŋŋmi nsaraafan pu kí tīī man. 23 Ni ŋūǹ kí dū unaa àá upii un taal diba fɔ̀kɔǹ ŋin kíǹee, àá un taal diba kaa fɔ̀kɔ̀ ki bàn̄ ŋin kíǹee kí ŋá nlammɔntiim saraau kí tīī man ni-Dindaan, ama naa ŋūǹ kí dū-u kí ŋá saraa kí pà ipoon ḿ fōō. 24 Ní taa dū kuwaŋkuluu kun kuntancakabiliŋ wīī àá ki mátì àá bi gíí ki lēēyee kí ŋá saraa kí tīī man ni-Dindaan. Naa máaǹ kí ŋá míǹ gba ni-tiŋkin. 25 Ní taa dā unicaan ubɔ cee tiwaŋkuti tin bi fāatì mimmee kí ŋá saraa kí tīī man ni-Dindaan. Bi nín fāatì-tì mimmee, ti wɔ̀b̄ dee. Ni yaa dū-tì ki ŋá saraayee, maa làá fōō-tì.»

26 Ti-Dindaan bí Mooyiisi yii:

27 «Bi yaa màl̄ kinabiki àá kipibiki àá kiŋɔbikee, kí nīn bí ki-na cee kí cáá sāā iwiin iluli. Kí yòon̄ iwiin inii dal kí nīn cée, bi yaa dū-kì ki ŋá saraa ki wùn̄ ŋŋmi kí tīī-mee, m làá fōō. 28 Ama ní taa kpɔ̀ unaaŋkpil àá upiŋkpil àá uŋɔŋkpil nì u-biki ŋwimbaanti.

29 «Ni yaa bíi ŋáań ijaam saraauee, nóómaan mara nín sá puee ní ḿ fōō. 30 Ní ŋmɔ́ tinan kɔkɔ ŋwiin gbanti kí taa yàntī tiba ń kíń kí wúntí kutaa. Man di sá ni-Dindaan.

31 «Nín̄ ŋúb́maan m-marab kí ŋá bi nín lī puee. Man di sá ni-Dindaan. 32 Ní taa kpèè m-circir yindi fám, án nín làá ŋá pu Isirayeel yab kɔkɔ ń béé yii m sá circirdaanee. Man di sá ni-Dindaan un gāntì-ni ní nīn sá man yabee. 33 Man di nyántìń-ni Eejipiti tiŋkin kí nīn sá ni-Nimbɔtiu. Man di sá ni-Dindaan.»