Akoobil 21

Marab bin bi síiǹ bisaraaŋaliibee a. Bisaraaŋaliibi bimbim

1 Ti-Dindaan bí Mooyiisi ń tùkù bisaraaŋaliibi, Aarɔn jipɔmbi yii:

«Unil ubɔ yaa kpíì bisaraaŋaliibi naakookunee, usaraaŋal ń taa gbēē-u kí kɔ́ǹ u-ba tijɔkɔndi. 2 Asee an yaa sá u-niliu kiŋkiŋ, an dàkà yii u-na àá u-baa àá u-jipɔɔn àá u-bisal àá u-naal àá u-maan 3 àá u-niisal un kaa láá mɔ́ǹee, kun puee u-niisal gbanti dáá gbíntìi bí u-dicaŋkun kaa mɔ́ǹ. 4 Usaraaŋal sá uyidaan ní u-nibul kansikin, an puee waa máaǹ kí kɔ́ǹ u-ba tijɔkɔndi kí fá u-nyooti.

5 «Bisaraaŋaliibi yaa ká dikpoolee, bí taa kòol̀ kí cùkū bi-yiliŋ àá kí kòol̀ bi-nyimpuliŋ kpaanceetii ŋmaniŋma àá kí cāfì bi-wunti nì njimu. 6 Bi máaǹ kí dū bi-ba kɔkɔ kí sú man bi-Nimbɔtiu, kí nīn nyí kí taa bīil̀ m-yindi. Di sá yii bíǹ di tìì man bi-Dindaan bi-Nimbɔtiu saraabi bin bi cáa wù ŋŋmee. An puee ní bi máaǹ kí nīn bí circir.

7 «Usaraaŋal ń taa cáá unimpu un ŋá dilaakpaatundi ki kée, àá unimpu un uninja ubɔ ŋmātiǹ-u ki dōoǹ nì uee, àá unimpu un cal jìn̄-uee, kun puee bi dū usaraaŋal ki sú man u-Nimbɔtiu ní. 8 Isirayeel yab kɔkɔ máaǹ kí nīn nyí yii bisaraaŋaliibi sá circir nib ní, kun puee bíǹ di ŋáań saraabi ki tìì man ni-Nimbɔtiu. An puee ubɔ ń taa kpèè bisaraaŋaliibi nín bí circir puee fám. Di sá yii man ni-Dindaan bí circir ní, ní ki gāntì-ni ní nīn sá m-yab.

9 «Usaraaŋal bisal yaa bíi ŋáań dilaakpaatundi ki bíil̀ u-bee, u-baa ní u bíi bíiĺ. Bí wà u-bisal gbanti ŋŋmi.

10 «Usaraaŋakpil di sá un yil pu bi bātì ŋkpam ki sītì u pèentí asaraaŋabɔkutee. An puee ú taa yàntī u-yikpiti ń nīn bí fikil fikil, kí taa cátí u-wampeeŋkaati kí dàkà yii u bí kunimbaaun. 11 Ú taa sútí kí pìl̄ utaŋkpiil. Báà u-na àá u-baa di yaa kpíì, ú taa kɔ́ǹ u-ba tijɔkɔndi. 12 Ú taa nyā ti-Dindaan circir kɔŋkooŋŋun kí bīil̀-ŋu. Di sá yii bi bātì man u-Nimbɔtiu kpam ki sītì u-yil pu ki dū-u ki sú-mi. Man di sá ni-Dindaan.

13 «U yaa làá cáá unimpuee, ú cáá usapɔɔn un kaa nyí uninja ki kée. 14 Ú taa cáá ukpiipu, kí taa cáá unimpu un cal jìn̄-uee àá un ŋá dilaakpaatundi ki bíil̀ u-bee. Ama ú kpèè u-nibul kansikin usapɔɔn un kaa nyí uninja ki kée kí cáá, 15 án nín làá ŋá pu ú taa cáań mmaanyeen ŋun bíil̀ee u-maaliŋu poonee. Man di sá ni-Dindaan un gāntì-u ú nīn bí m-tundinee.»

b. Kun ŋūǹ kí pìin̄ unil nsan ú taa kpántí usaraaŋalee

16 Ti-Dindaan bí Mooyiisi 17 ń tùkù Aarɔn yii:

«A-maaliŋu poon kí nīn cée, nsan kaa pú unil un laaba wɔ̀b̄ee ń sútí kí pìl̄ nsaraafan kí ŋá saraa kí tīī-mi. 18 Tiŋman, un laaba wɔ̀b̄ee kaa máaǹ kí sútí kí pìl̄ nsaraafan, an dàkà yii ujɔfu, àá un tà u-taal puee, àá umaŋfamatifu, àá un taal àá u-ŋal ŋubɔ fɔ̀kɔǹ ŋun kíǹee, àá 19 unil un taal àá u-ŋal fātèe, 20 àá ugulfu, àá kinikaŋkaliŋŋi, àá un nimbil pée, àá un cáá digbàndi àá tikalindee, àá ufaal. 21 Usaraaŋakpil Aarɔn maaliŋu poonee, un laaba wɔ̀b̄ee kaa máaǹ kí sútí kí pìl̄ nsaraafan kí ŋá saraa bí dūú wà ŋŋmi kí tīī man ni-Dindaan. U nín wɔ̀b̄ee puee, waa máaǹ kí ŋá saraabi kí tīī man u-Nimbɔtiu. 22 U ŋūǹ kí jī tijin tin bi cáań ki ŋá saraa ki tīī man u-Nimbɔtiuee, saraabi bin sá circiree nì bin sá circir páaayee. 23 Ama u nín wɔ̀b̄ee puee, waa máaǹ kí sútí kí pìl̄ ŋŋaapìtikaa nì nsaraafan, án nín làá ŋá pu ú taa kpèè m-circir kɔŋkooŋŋu nì tin bí ŋu-poonee fámee. Di sá yii man di sá ni-Dindaan un gāntì bisaraaŋaliibi bí nīn bí m-tundinee.»

24 Ní Mooyiisi kàan̄ tibɔti gbanti ki tùkū Aarɔn nì u-jipɔmbi nì Isirayeel yab kɔkɔ.