Akoobil 12

Umatimpɔɔn marab

1 Ti-Dindaan sòon̄ nì Mooyiisi ki bí-u yii: 2 «Tùkù Isirayeel yab yii unimpu yaa cáá dipool ki màl̄ kibininjabikee, mara poonee, u kɔ́ tijɔkɔndi kí cáá sāā iwiin iluli dal kii u nín yaa ká u-ba, u bí tijɔkɔndin puee. 3 Ŋwinniniiti dalee, bí gíí kibikee dikpancandi^a. 4 Míǹ boonee, ú gíti kàl̄ iwiin mmuŋku nì saalaa nì ita kí nyā fatiku un nyáń-uee jɔkɔntin. Waa máaǹ kí gbēē tiwan tin bí circir bi dūu sú ti-Dindaanee, kaa máaǹ kí kɔ́ circir kɔŋkooŋŋu cindin kí cáá sāā ŋyunti ŋun u làá nyā u-matinti jɔkɔntinee.

5 «An yaa sá kibinimpubiki ní u màl̄ee, mara poonee, u kɔ́ tijɔkɔndi kí cáá sāā nnyɔmu muli kii u nín yaa ká u-ba, u bí tijɔkɔndin puee. Míǹ boonee ní ú gíti kàl̄ iwiin imuŋku ita nì iluu kí nyā fatiku un nyáń-uee jɔkɔntin.

6 «An yaa sá kibininjabiki àá kibinimpubiki ní u màl̄ ní ki kāl̀ iwiin in mara bālifèe ki tin sāāyee, ú cùú ká usaraaŋal circir kɔŋkooŋŋu punyɔkɔki nyɔkɔpu. Ú cáań dibindi diba pibil kí ŋá saraawɔkaa nì dinanjil àá dibeenanjil kí ŋá ikpiti pɔ̄tam saraau. 7 Ní usaraaŋal ń fōō tiwaŋkutee kí cáá ŋá saraa ti-Dindaan nimbiin kí fíntí unimpuee kpitii ú nyā fatiku un nyáń-uee jɔkɔntin.»

Mara un bi nìn síiǹ unimpu yaa màl̄ kibininjabiki àá kibinimpubikee dee.

8 «Unimpu ŋaan yaa kaa nyìm̀ ú dā dipibilee, u ŋūǹ kí cáań ananjil ali àá abeenanjil^b ali ní kí dū diba kí ŋá saraawɔkaa ní kí dū din kíǹee kí ŋá ikpiti pɔ̄tam saraau, ní usaraaŋal ń dūú ŋá saraa kí fíntí u-kpitii ní ú nyā fatiku un nyáń-uee jɔkɔntin.»