Akoobil 13

Iween in tòó unil wunti puee marab

1 Ti-Dindaan bí Mooyiisi nì Aarɔn yii:

2 «Ubɔ wunti pu laaba yaa díkí àá tikalindi nyáń u-wunti pu laaba àá u-wunti pu laaba líkitì ki jìl̀ ní ki dāa dūu ŋá mbuun kii dinyaŋgbandee, bí cáá udaan kí dàkà usaraaŋakpil Aarɔn àá u-jipɔmbi kansikin ubɔ. 3 Usaraaŋal ń kpèè mbuun ŋun bí udaan wunti puee. Tikuti tin bí mbuunee poonee yaa pīiǹ ní mbuun yaa ŋmɔ́ ki kɔ́ tiwunnan poonee, mimmee an sá dinyaŋgbandi buuŋŋu. Usaraaŋal nín kpēē-u ki ká mimmee ní ú sòoǹ báà ŋma ń gbìl̄ yii udaan kɔ́ tijɔkɔndi. 4 Ama u-wunti pu laakin líkitèe yaa pīiǹ ní kaa ŋmɔ́ ki kɔ́ tiwunnan poon, ní tikuti mun kaa píil̀ee, usaraaŋal ń dū-u kí pìin̄ kudii ú nīn bí niin u-baba iwiin iluli. 5 Ŋwinluluúti dalee ní usaraaŋal ń tí kpèè-u. U yaa ká yii mbuunee kaa kpántì, kaa wāaǹ muee ní ú fàtīí tí dū-u kí pìin̄ kudii ú nīn bí niin u-baba iwiin iluli. 6 Ŋwinluluúti dalee ní usaraaŋal ń gíti tí pìitī-u nliliitiim kí kpèè-u. Mbuun yaa píil̀ fàaa kaa wāaǹee, usaraaŋal ń sòoǹ báà ŋma ń gbìl̄ yii unilee kaa kɔ́ tijɔkɔndi, an pée sá tikalindi ní. Udaan ń fíntí u-wampeeŋkaati kí ŋāŋkì. 7 Ama usaraaŋal nín ká yii waa kɔ́ tijɔkɔndee ní boonee tikalindee yaa lālim̀ee, ú fàtīí gítí kí dū u-ba kí dàkà usaraaŋal ú kpèè-u. 8 Usaraaŋal yaa dáań ki ká yii tikalindi lālim̀ ki gbí tiwun kɔkɔ puee ní ú sòoǹ báà ŋma ń gbìl̄ yii udaan kɔ́ tijɔkɔndi, an sá dinyaŋgbandi.

9 «Dinyaŋgbandi weeŋyi iba yaa tɔ́ ubɔee, bí cáań-u usaraaŋal cee. 10 Usaraaŋal ń kpèè-u. An yaa sá disiŋkpeepindi di bí udaan wunti pu ní disiŋkpeelee poon tikuti bí ki pīiǹ ní mbuun nútìńee, 11 an sá dinyaŋgbandi buuŋŋu di tɔ́ udaan. Usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. An kaa ti bàlifī ú dū-u kí pìin̄ kudii, di sá yii an nyáń mpaampiin pu yii u kɔ́ tijɔkɔndi. 12 Ama usaraaŋal yaa dáań ki ká yii dinyaŋgbandi weeŋŋuee kpátìi gbí udaan wunti kɔkɔ pu kí kíĺ diyil kí cáá sāā ataayee, 13 usaraaŋal ń mɔ̀tīí kpèè tiŋan. U yaa ká yii an píń u-wunti kɔkɔ puee, ú sòoǹ báà ŋma ń gbìl̄ yii waa kɔ́ tijɔkɔndi. Di sá an píń u-wunti kɔkɔ pu ki pīiǹ, waa kɔ́ tijɔkɔndi. 14 Ama ŋwiin ŋun u yaa ká udaan wunti léetèe, ŋwiin gbantee u kɔ́ tijɔkɔndi. 15 Usaraaŋal yaa pée ká udaan wunti léetèe, ú sòoǹ báà ŋma ń gbìl̄ yii u kɔ́ tijɔkɔndi. U-wunti nín léetèe dàkà yii an sá dinyaŋgbandi weeŋŋu. 16 Ama u-wunti laakin léetèe yaa fātìi píil̀ee, ú gítí kí ká usaraaŋal. 17 Usaraaŋal ń gíti kpèè-u. U mun yaa ká yii u-wunti laakin léetèe píil̀ee, ú sòoǹ báà ŋma ń gbìl̄ yii ŋweenee kaa sá tijɔkɔndi weeŋŋu, ní un pu ŋu kēe mun kaa kɔ́ tijɔkɔndi.

18 «Dinal yaa nìn tɔ́ ubɔ ní ki kpíì, 19 ama ní laakin dinalee nìn tɔ́ee, ndulim miba nyáń àá niin léetì ki pīiǹ fàaayee, udaan ń cáá u-ba kí dàkà usaraaŋal. 20 Usaraaŋal ń kpèè-u. Laakin ŋá ndulim àá an léetèe yaa ŋmɔ́ ki kɔ́ tiwunnan poon ní tikuti tin bí ŋu-poonee pīiǹee, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. Dinyaŋgbandi buuŋŋu di nyáń dinalee buŋweekun. 21 Ama usaraaŋal yaa dáań ki ká yii tikuti tin bí mbuunee poon kaa pīiǹ ní mbuunee kaa ŋmɔ́ ki kɔ́ tiwunnan poon, ní kaa léetèe, ú dū-u kí pìin̄ kudii u-baba iwiin iluli. 22 Míǹ boon mbuunee yaa nyātèe, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi: dinyaŋgbandi buuŋŋu dee. 23 Ama mbuunee yaa kaa kpántì kaa wāaǹ muee, mimmee an sá dinalee buŋweeku. Usaraaŋal ń lì báà ŋma ń gbìl̄ yii udaan kaa kɔ́ tijɔkɔndi.

24 «Ŋŋmi yaa nìn wùn̄ ubɔ ní an ŋá ndulim kubuŋweeu poon ki pīiǹ fàaa àá ki máǹ wèeeeyee, 25 usaraaŋal ń kpèè-u. Tikuti tin bí ndulim poonee yaa pīiǹ ní mbuun yaa ŋmɔ́ ki kɔ́ tiwunnan poonee, an sá dinyaŋgbandi di nyáń kubuŋweeuee poon. Usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. 26 Ama usaraaŋal yaa ká yii tikupin kaa bí ndulim poon ní kaa ŋmɔ́ ki kɔ́ tiwunnan poon, kaa tí pīiǹ fàaayee, usaraaŋal ń dū-u kí pìin̄ kudii u-baba iwiin iluli. 27 Iwiin iluli dal, usaraaŋal yaa fātìi kpēē-u ki ká yii an wāaǹee, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. An sá dinyaŋgbandi buuŋŋu. 28 Ama ndulimee yaa kaa wāaǹ ki gbíntì dibɔɔbaantiil ní kaa pīiǹ fàaayee, an sá ndulim fám ní. Usaraaŋal ń sòoǹ báà ŋma ń gbìl̄ yii udaan kaa kɔ́ tijɔkɔndi, an sá ŋŋmi buŋweeku.

29 «Ŋween ŋubɔ yaa tɔ́ uninja àá unimpu ubɔ yil àá u-nyɔɔkpaalee, 30 usaraaŋal ń kpèè ŋween gbanti. U yaa ká yii ŋweenee ŋmɔ́ ki kɔ́ tiwunnan poon ní tikuti bí ki sá kpalku kaa múkúee, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. An sá kideeŋŋi kin sá dinyaŋgbandi ki tòó diyil àá dinyɔɔkpaalee. 31 Ama usaraaŋal yaa ká yii ŋweenee kaa ŋmɔ́ ki kɔ́ tiwunnan poon, ní tikuti tin bɔ̀ǹee kaa bí ki-poonee, ú dū-u kí pìin̄ kudii u-baba iwiin iluli. 32 Iwiin iluli dalee, usaraaŋal ń fàtīí kpèè ŋweenee. U yaa ká yii ŋuaa wāaǹ, ní tikuti tin sá kpalkuee kaa bí ŋu-poon ní kaa ŋmɔ́ ki kɔ́ tiwunnan poonee, 33 udaan ń kòol̀ u-yil kí gɔ́ntí laakin ŋween bée. Míǹ boonee usaraaŋal ń fàtīí dū-u kí pìin̄ kudii u-baba nliliitiim iwiin iluli. 34 Iwiin iluli dalee, usaraaŋal ń fàtīí kpèè ŋween gbanti. An yaa kaa wāaǹ, kaa ŋmɔ́ ki kɔ́ tiwunnan poonee, usaraaŋal ń sòoǹ báà ŋma ń gbìl̄ yii waa kɔ́ tijɔkɔndi. Ú pée fíntí u-wampeeŋkaati ní kí nyā tijɔkɔndin. 35 Ama usaraaŋal nín kpēē-u ki dóò ki lī yii u bí circiree, boonee kideeŋŋee yaa wāaǹee, 36 usaraaŋal ń tí fàtīí kpèè-u. U yaa ká yii kideeŋŋee wāaǹee, an kaa ti bàlifī ú nyàab̀ kí kpèè yii tikuti tin sá kpalkuee báaa an kpá, udaan kɔ́ tijɔkɔndi. 37 Ama kideeŋŋee yaa kaa wāaǹ ní tikubɔn yaa nyáń ki-nee, mimmee kideeŋŋee kpíì dee, un pu kì tɔ́ee kaa kɔ́ tijɔkɔndi. Usaraaŋal ń lì báà ŋma ń gbìl̄ yii udaan kaa kɔ́ tijɔkɔndi.

38 «Uninja àá unimpu ubɔ wunti yaa lēē ki ŋá aliki aliki ki pīiǹee, 39 usaraaŋal ń kpèè-u. Alikee yaa pīiǹ fàaayee, mimmee an sá ncabiyaamu. Udaan kaa kɔ́ tijɔkɔndi.

40 «Ubɔ yaa kaa cáá tiyikpiti u-yil puee, mimmee uyiŋatifu dee, waa kɔ́ tijɔkɔndi. 41 U-yigbeel yaa kaa cáá tiyikpiti ní ki jɔ̀m̀ee, mimmee un yigbeel ŋātèe dee, waa kɔ́ tijɔkɔndi. 42 Ama mbuun yaa tɔ́ u-yil kansikin àá u-yigbeel laakin ŋātèe ki pīiǹ fàaayee, an sá dinyaŋgbandi di kíĺ ki bíi tòó-u. 43 Usaraaŋal ń kpèè-u. U yaa ká yii mbuun ŋun tɔ́ u-yil kansikin àá u-yigbeel laakin ŋātèe pīiǹ fàaa ki náań nì dinyaŋgbandee, 44 mimmee udaan sá unyaŋgbanti ní, ki kɔ́ tijɔkɔndi. Di sá u-yil ní ŋweenee tɔ́.

45 «Un būǹ dinyaŋgbandee máaǹ kí pèen̄ tiwan tin cátèe, kí taa ti càatī u-yil, kí bìin̄ u-nyɔɔkuti pu, ní kí nīn kūuntí ki lì yii: <M kɔ́ tijɔkɔndeeee! M kɔ́ tijɔkɔndi!> 46 Udaan làá nīn bí tijɔkɔndin míǹ kí nīn cí ŋyunti ŋun dinyaŋgbandi buuŋyi làá dóóyee. U làá nīn kóò u-baba, dinaapaal kpaanceetiŋu.

Dinyaŋgbandi din tòó tiwampeeŋkaal puee marab

47 «Tí lì yii dinyaŋgbandi daaŋku nyáń ki kā tiwampeeŋkaal tin bi dū ipii kuti àá gulfapiin káŋkaŋ ki lùn̄ee pu, 48 àá sata pu àá tiŋgiliisi un bi dū gulfapiin káŋkaŋ ki lùn̄ee pu, àá ŋgban àá tin kɔkɔ pée sá ŋgbanee pu. 49 Kudaaŋŋu gbanti yaa sɔ̀m̀ gùuu àá ku yaa máǹ wèeee ki táká tiwampeeŋkaal àá ŋgban, àá sata, àá tiŋgiliisi, àá tin kɔkɔ bi dū ŋgban ki lùn̄ee puee, an sá dinyaŋgbandi. Bí cáá dàkà usaraaŋal. 50 Usaraaŋal ń kpèè kudaaŋŋuee ní kí cáá tiwan tin pu ku kēe kí síiń dibalin iwiin iluli. 51 Iwiin iluli dalee, ú kpèè kudaaŋŋuee. Ku yaa lālim̀ tiwampeeŋkaal pu, àá sata pu, àá tiŋgiliisi pu, àá ŋgban pu, àá tin kɔkɔ pée sá ŋgbanee puee, an sá dinyaŋgbandi. Tiwan gbanti kɔ́ tijɔkɔndi. 52 Usaraaŋal ń dū tiwampeeŋkaalee, àá satee, àá tiŋgiliisee, àá tin kɔkɔ pée sá ŋgbanee kí cáá wà ŋŋmi. Kii an nín sá kudaaŋŋu kun baa ŋūǹ kí lēē kí fée puee, bí cáá an wantee kí wà ŋŋmi. 53 Ama usaraaŋal yaa kpēē kudaaŋŋuee ki ká yii kuaa lālim̀ tiwampeeŋkaalee pu, àá satee pu, àá tiŋgiliisee pu, àá tin kɔkɔ sá ŋgbanee puee, 54 ú yàntī bí fíntí tiwan tin pu kudaaŋŋuee kēe, ní ú cáá síiń dibalin nliliitiim iwiin iluli. 55 Bi nín fíntì míǹ ki dóòyee ní usaraaŋal ń fàtīí kpèè. U yaa ká yii kudaaŋŋuee pée gbíntìi bí kii ku nín nìn bí puee, báà ku yaa kaa lālim̀aaa, tiwanee kɔ́ tijɔkɔndi. Bí cáá-tì kí wà ŋŋmi, di sá yii tiwanee poon àá ti-boon bíil̀. 56 Ama bi nín fíntì míǹ boonee ní usaraaŋal yaa kpēē ki ká yii kudaaŋŋuee gbíntìi kā kaa lālim̀ tiwampeeŋkaal pu àá ŋgban pu, àá sata pu, àá tiŋgiliisi puee, ú gíí kí lēē dijandi gbanti tiwampeeŋkaal pu, àá ŋgban pu, àá sata àá tiŋgiliisi pu kí fá. 57 Ama boonee, kudaaŋŋuee yaa fātìi nyáń ki kā tiwampeeŋkaalee pu, àá satee pu, àá tiŋgiliisee pu, àá ŋgban wantee puee, an sá bí wà-tì ŋŋmi ní, kun puee dinyaŋgbandi di bíi tòó-tì.

58 «Ama an yaa sá tiwampeeŋkaal, àá sata, àá tiŋgiliisi, àá ŋgban wanti tin bi fíntì ní kudaaŋŋuee wáŋkèe, bí fàtīí fíntí-tì nliliitiim ní tí nyā tijɔkɔndin.»

59 Mara un bi nìn síiǹ kí ŋmā kí béé yii tiwampeeŋkaal, àá sata, àá tiŋgiliisi, àá ŋgban wanti tin pu kudaaŋŋu bée kɔ́ tijɔkɔndaaa, taa kɔ́ee dee.