Akoobil 11

TIWAN TIN BI KÒÓYEE NÌ TIN BAA KÒÓYEE

Tiwaŋkuti tin bi kòóyee nì tin baa kòóyee

1 Ti-Dindaan bí Mooyiisi nì Aarɔn yii 2 bí tùkù Isirayeel yab yii^a:

«Tiwaŋkuti tin kɔkɔ còom̄ kitiŋ puee poonee, tin ni ŋūǹ kí ŋmɔ́ee sɔ̀. 3 Ni ŋūǹ kí ŋmɔ́ tiwaŋkuti tin tafuŋfukuti látì ní tì kpìkitī ki fàtīi ŋmóòyee. 4 Ama tiwaŋkuti tin kpìkitī ki fàtīi ŋmóò àá ti-tafuŋfukuti látèe kansikinee,

- ni kòó ugutaamu, di sá yii u kpìkitī ki fàtīi ŋmóò, ama ní kaa cáá titafuŋfukul, ni kòó kuwaŋkuluu gbanti.

5 - Ni kòó ujaŋgbeenapul, di sá yii u kpìkitī ki fàtīi ŋmóò, ama ní kaa cáá titafuŋfukul.

6 - Ni kòó kiwuŋ, di sá yii u kpìkitī ki fàtīi ŋmóò, ama ní kaa cáá titafuŋfukul.

7 - Ni kòó ugbeeti, di sá yii u-tafuŋfukuti látì, ama waa kpìkitī ki fàtīi ŋmóò.

8 Ní taa ŋmɔ́ tiwaŋkuti gbanti nanti. Ní taa gbēē ti-waŋkpil, tí nīn sá-ni dikoobil.

9 «Tin kɔkɔ kóò nnyiminee, án yaa sá kubɔɔuneeee, dimɔɔlineeee, ibunneeee, ni ŋūǹ kí ŋmɔ́ ijɔm in cáá ipɔkɔ nì ifeenee. 10 Ama ní taa ŋmɔ́ tin kɔkɔ pée bí nnyimin, amɔɔ poon àá ibun poon kaa cáá ipɔkɔ nì ifeenee. 11 Tí nīn sá-ni dikoobil. Ní taa ŋmɔ́ ti-nanti kí taa gbēē ti-waŋkpil. 12 Ni kòó tin kɔkɔ pée bí nnyimin kaa cáá ifeenaaa, kaa cáá ipɔkɔee.

13 «Inoon kansikinee, in ni kòó kaa máaǹ kí ŋmɔ́ee sèé: ukaalun nì ukaabu nì nnyimin kaaluŋwu, 14 nì kikaaliŋkpaŋ nì kaajiiku nì u-buluku, 15 digaliŋgaal nì di-buluku, 16 taataa nì kitulinjakpatibooi nì ŋkpinni kpɔkpɔfiiu nì kaasaabi nì bi-buluku, 17 ditulinjool nì jɔmbaaŋki nì unanjikaabu, 18 nì kpɔkpɔfiibi bin sil fɔ̀kɔ̀ee nì kpɔkpɔfiibi bin cáá nnyɔlee nì ukpiŋkaabu, 19 nì naakpaapiin nì kikpiŋkaabiki nì ki-buluku nì yikpitikooja nì kunanjiŋu.

20 «Inaaki in kɔkɔ cáá iyakal inaa ki cáá ifeenee, ni kòó. 21 Ama ni ŋūǹ kí ŋmɔ́ in cáá iyakal ki yùkufī kitiŋee, 22 an dàkà yii inaakitoon nì i-buluku, ipɔɔm nì i-buluku, nì imaliŋgoon nì i-buluku. 23 Ama kunaakibuluu kun kíǹ ki cáá ifeen nì iyakal inaayee, ni kòó.»

Tin kɔ̄ntí unil tijɔkɔndee

24 «Tiwaŋkuti tiba kɔ̄ntí unil tijɔkɔndi. Un yaa gbēē ti-waŋkpilee kɔ́ tijɔkɔndi kí cáá sāā kujoou. 25 Un di yaa tí yōoǹ ti-waŋkpilee kɔ́ tijɔkɔndi kí cáá sāā kujoou, ú fíntí u-wampeeŋkaati. 26 Ni kòó tiwaŋkuti tin tafuŋfukuti kaa látì ní kaa kpìkitī kí fàtīí ŋmɔ́ee. 27 Ni kòó tiwaŋkuti tin kɔkɔ cáá ataa anaa ki còom̄ ti-taaŋi poonee. Tì yaa kpíì ní ubɔ gbēē-tèe, udaan mun kɔ́ tijɔkɔndi kí cáá sāā kujoou. 28 Un mun yaa túǹ ti-waŋkpilee kɔ́ tijɔkɔndi kí cáá sāā kujoou. Udaan ń fíntí tiwan tin u pēēyee, di sá yii ni kòó tiwaŋkuti gbanti.

29 «Tiwaŋkuti tin kpátìi gbí kitiŋ puee, tin ni kòó ti-kansikinee sèé: tumbuŋku nì unapul nì dijikpal nì di-buluku, 30 nì kijipatii nì jilkantoolii nì kaŋkampu nì ulɔ nì kunaatoou. 31 Béémaan yii ni kòó tiwaŋkuti gbanti. Ubɔ yaa gbēē ti-waŋkpilee, udaan kɔ́ tijɔkɔndi kí cáá sāā kujoou. 32 Tì yaa kpíì ní ki lítì tiba puee, an yaa sá ndɔ sambikaaa, tiwampeeŋkaalaaa, ŋgbanaaa, ditɔkɔlaaa, tin kamaa ní bi pée cáa tūǹ ditundee, tiwan gbanti kɔ́ tijɔkɔndi. Bí dū nnyim ki fíntí-tì ní tí sīĺ kí cáá sāā kujoou ní kí nyā tijɔkɔndin. 33 Tiwaŋkuti gbanti kubɔ yaa kpíì ki jéetì ditansambilin àá diboolinee, tin kā poonee kɔkɔ kɔ́ tijɔkɔndi, bi máaǹ kí gbá kí wīī ditansambil àá dibool gbanti. 34 An yaa sá nnyim di kā di-ni ní nnyimee kpáatì ki sītì tijin tin baa kòóyee puee, tijin gbanti mun kɔ́ tijɔkɔndi. An yaa tí sá nnyinnyɔkaam àá ndaam poon ní nnyim gbanti yaa kɔ́ee, báà mi yaa kā kun poonee, nnyim àá ndaam gbanti mun kɔ́ tijɔkɔndi. 35 Tiwan tin kamaa ní tiwaŋkutee yaa kpíì ki gbēēyee kɔ́ tijɔkɔndi. An yaa sá dibubul àá ŋfan puee, see bí gbá kí wīī-ŋu, di sá yii ŋu mun kɔ́ tijɔkɔndi dee. 36 Nì míǹ kɔkɔee, kuwaŋkuluu yaa jéetì nnyimbul àá dinyimbɔbil din poon ní nnyim dɔ̀ee ki kpíìyee, nnyim gbanti kaa kóò tijɔkɔndi. Ama un di yaa gbēē kuwaŋkuluu gbanti wuntee di kóò tijɔkɔndi. 37 Diwaŋkpil gbanti dijandi diba yaa lítì ŋwambool puee, ŋwambool gbanti kaa kɔ́ tijɔkɔndi. 38 Ama bi yaa wōoǹ ŋwambool ní diwaŋkpilee yaa gbēēyee, ŋwambool gbanti kɔ́ tijɔkɔndi.

39 «Tiwaŋkuti tin ni jīǹee kubɔ yaa kpíì ní ubɔ gbēē-kuee, udaan kɔ́ tijɔkɔndi kí cáá sāā kujoou. 40 Un di yaa ŋmɔ́ tinan gbantee máaǹ kí fíntí u-wampeeŋkaati, udaan kɔ́ tijɔkɔndi kí cáá sāā kujoou. Un mun di yaa yōoǹ diwaŋkpilee máaǹ kí fíntí u-wampeeŋkaati, udaan kɔ́ tijɔkɔndi kí cáá sāā kujoou.

41 «Ni kòó ŋwambilimu mun kpátìi gbí kitiŋ pu ki fòotēe. Ní taa pée ŋmɔ́-tì. 42 Ni kòó tin fù ti-pooŋi puee nì tin còom̄ ataa anaa àá ataa kupaau puee. Ní taa pée ŋmɔ́-tì. 43 Ní taa dū tiwaŋkuti gbanti tiba kí kɔ́ǹ ni-ba tijɔkɔndi. Taa pée yàntīmaan tí kɔ́ǹ-ni tijɔkɔndi án nín làá ŋá pu ní ti-puee, ní kpántí bijɔkɔndambee. 44 Di sá yii man di sá ni-Dindaan ni-Nimbɔtiu. Nín̄ bímaan circir, kun puee man bí circir ní. Taa yàntīmaan tiwan tin fòotī ki kpátìi gbí kitiŋ pu nee kansikin kubɔ ń kɔ́ǹ-ni tijɔkɔndi. 45 Man di sá ni-Dindaan un nyántìń-ni Eejipiti tiŋkin kí nīn sá ni-Nimbɔtiuee. Míǹ puee nín̄ bímaan circir, kun puee man m-ba bí circir ní^b.»

46 Marab bin bi nìn síiǹ tiwaŋkuti nì inoon nì tiwan tin kɔkɔ fòotī ki kóò nnyiminee nì tin kɔkɔ kpátìi gbí kitiŋ puee dee. 47 Marab gbanti di nìn yàntī bi gàntī tiwaŋkuti tin bi kòóyee nì tin baa kòóyee, nì tiwaŋkuti tin bi máaǹ kí jēe nì tin baa máaǹ kí jēe.