Akoobil 10

Ti-Dindaan ŋmiŋu wùn̄ Aarɔn jipɔmbi bili

1 Aarɔn jipɔmbi Nadaab nì Abiyuu yōoǹ bi-sambiyaamu mun poon bi tùutī talaaluee ki pātì ŋŋmi ki dū talaalu ki páká. Bi nìn cáań ŋŋmi ŋun an kaa pú nsan bí cáań ti-Dindaan nimbiinee, kun puee an kaa nìn nóó nì ti-Dindaan nín síiǹ-bi puee. 2 Niinee ní ti-Dindaan yāntì ŋŋmi ŋubɔ dɔ́miń ki wùn̄-bi ní bi kpíì dibɔbil pu niin ti-Dindaan nimbiin. 3 Ní Mooyiisi bí Aarɔn yii: «An ní ti-Dindaan nìn kpáafì-ni ki lī yii:

<Bin sútiń ki pìl̀-mee

ní m là bí dàkà m nín bí circir puee,

ní ki là bí dàkà m-nyooti samaa kɔkɔ nimbiin.>»

Ní Aarɔn wunti kpíì.

4 Niinee Mooyiisi yíiń Aarɔn baawaai Usiyeel jipɔmbi Miisayeel nì Eeliisafan ki bí-bi yii: «Dāam̄maan kí yòon̄ ni-nabiyaamu circir kɔŋkooŋŋu nyɔkɔpu kí cáá nyāntí dinaapaal kpaanceetiŋu.» 5 Ní bi dɔ́miń ki yōoǹ bi nì bi-bɔkutiŋ ki nyántì dinaapaal kpaanceetiŋu kii Mooyiisi nín bí yii bí ŋá puee. 6 Ní Mooyiisi bí Aarɔn nì u-jipɔmbi Eeleeyasaar nì Itamaar yii: «Ní taa yàntī ni-yikpiti ń nīn bí fìkil fikil kí taa cátí ni-bɔkutiŋ mun kí dàkà yii ni bí kunimbaaun. Ni yaa ŋá mimmee, ni làá kpú ní kí yàntī ti-Dindaan ń gíí samaa kɔkɔ pu diŋuul. Ní yàntī ni-nabiyaamu Isirayeel yab kɔkɔ ń kàl̄ bin ti-Dindaan dū ŋŋmi ki kūūyee kpool. 7 Nimbee, ní taa nyā Circir kɔŋkooŋŋu punyɔkɔpu, án nín làá ŋá pu ní taa kpúee, di sá yii bi bātì ŋkpam ki sītì ni-yiliŋ pu ki dū-ni ki sú ti-Dindaan ní.» Ní Aarɔn nì u-jipɔmbi ŋá ki nóó nì Mooyiisi nín bí yii bí ŋá puee.

Idafi in pɔ̄ɔ̄yee marab

8 Ti-Dindaan bí Aarɔn yii: 9 «Sii nì a-jipɔmbi, ni yaa kóò circir kɔŋkooŋŋu poonee, ní taa nyɔ̀ ndamam àá ndaam min pɔ̄ɔ̄yee miba, án nín làá ŋá pu ní taa kpúee. Án nīn sá dibɔkpaal ki tīī ni nì ni-biyaamu kí nīn cá jaanjaan. 10 Mimmee ni làá ŋmā kí gàntī tin bí circiree nì tin kaa bée, nì tin bi kòóyee nì tin baa kòóyee. 11 Ni làá gíti ŋmā kí dàkà Isirayeel yab abɔkpaa ŋin ti-Dindaan dī Mooyiisi pu ki tīī-bee.»

Saraabi nanti marab

12 Mooyiisi bí Aarɔn nì Eeleeyasaar nì Itamaar, u-jipɔmbi bili bin kíǹee yii: «Bi nín lēē tijimpin saraau poon dijandi ki wùn̄ ŋŋmi ki tīī ti-Dindaanee, dijandi din kíǹee, ní dūú ŋá tijin kí jī nsaraafan caŋin ŋkpɔnɔnyɔkɔ ń nīn kpá poon, di sá yii an sá circir páaa jinti ní. 13 Mpaan ŋun bí circiree pu ní ní jī tijin gbanti, di sá yii saraabi bin bi cāabìń ki tìì ti-Dindaanee, dijandi din sá ki tīī sii nì a-jipɔmbee dee. Ti-Dindaan nín síiǹ-mi puee dee. 14 Tiwaŋkuti bindi din bi yōoǹ kutaa ki fíiǹ fíiǹee nì ditaal din bi lēē ki dūu tīī ti-Dindaanee, sii nì a-jipɔmbi nì a-bisalib ń kàl̄ laakin bí circiree kí jī an jinti, di sá yii mpèé saraau un Isirayeel yab ŋáańee, dijandi gbanti di sá ki tīī sii nì a-jipɔmbi. 15 Bi yaa lēē ditaal nì dibindi din bi làá fíiǹ fíiǹee, bí lēē ŋkpam min bi làá cáá wà ŋŋmee, ní kí yòon̄ yilpu kí fíiǹ fíiǹ ti-Dindaan nimbiin. Míǹ boonee sii nì a-jipɔmbi di yì, di sá yii dijandi din sá ki tīī-ni kí nīn cá jaanjaanee dee, kii ti-Dindaan nín tīī mara puee.»

16 Boonee Mooyiisi dāa béè yii uŋɔja un bi dūu ŋá ikpiti pɔ̄tam saraauee, bi dūu wùn̄ ŋŋmi. Niinee ní Mooyiisi gíí Eeleeyasaar nì Itamaar, Aarɔn jipɔmbi bin kíǹee pu diŋuul, ní ki bālifì-bi yii: 17 «Ba pu ní naa ŋmɔ́ ikpiti pɔ̄tam saraau nanti mpaan ŋun bí circiree pu ní, kun puee tinan gbanti bí circir páaa ní? Ti-Dindaan di dū-tì ki tīī-ni yii ní fōō samaa kɔkɔ kpitii kí túń kí ŋmā kí fíntí bi-kpitii ti-Dindaan nimbiin. 18 Baa dū uŋoobu gbanti fatikuu ki kɔ́ǹ circir kɔŋkooŋŋu poon, an puee an bàà sá ní ŋmɔ́ u-nanti ní, kii m nín síiǹ-ni mara puee.» 19 Ní Aarɔn kíí Mooyiisi yii: «Díǹ di sá ŋwimpeepeekaa ŋun bi ŋá ikpiti pɔ̄tam saraau nì saraawɔkaayee, ní sii a-ba nyí tin jítì m-puee. Mimmee an kítì ti-Dindaan nimbiin yii ḿ bàà ŋmɔ́ ikpiti pɔ̄tam saraau nanti díǹ wiiŋŋuaaa?» 20 Mooyiisi gbìl̄ an nyɔɔbuŋŋee ní ki tīī-u imɔ̀ń.