Akoobil 9

Aarɔn nì u-jipɔmbi saraapeepeekaabi bɔti

1 Ŋwinniniiti dalee ní Mooyiisi yíiń Aarɔn nì u-jipɔmbi nì Isirayeel yab kpilib. 2 U nìn bí Aarɔn yii: «Nyàab̀ dinabil kí dūú ŋá a-kpitii pɔ̄tam saraau nì upìja kí dūú ŋá a-saraawɔkaau. Tiwaŋkutee liitil laaba ń taa nīn wɔ̀b̄ ní á cáań-tì ti-Dindaan nimbiin. 3 Míǹ boonee á tùkù Isirayeel yab bí cáań uŋɔja kí dūú ŋá ikpiti pɔ̄tam saraau nì dinabil din cáá dibindi dibee nì dipibil din cáá dibindi dibee ŋi-laaba ń taa nīn wɔ̀b̄ bí dūú ŋá saraawɔkaa. 4 Bí cáań unaja nì upìja kí ŋá mpèé saraau kí tīī ti-Dindaan, ní kí dū ŋyim min bi dū ŋkpam ki búuńee kí ŋá tijimpin saraau. Kun puee díǹ nee, ti-Dindaan làá nyāntí u-ba kí dàkà-ni.»

5 Ní bi cáań tin kɔkɔ Mooyiisi bālifèe circir kɔŋkooŋŋu nyɔkɔpu, ní samaa kɔkɔ sútìń ki kíǹ ki sí ti-Dindaan nimbiin. 6 Ní Mooyiisi lī yii: «M làá dàkà-ni tin ti-Dindaan kpáafì-ni ní ŋée. Ni yaa lafun ŋá míǹ, u làá lēē u-nyooti kí dàkà-ni.» 7 Niinee ní Mooyiisi bí Aarɔn yii: «Sútí kí pìl̄ nsaraafan kí ŋá a-kpitii pɔ̄tam saraau nì a-saraawɔkaau, kí pítí a-kpitii nì samaa kpitii. Míǹ boonee á ŋá saraabi bin ní samaa cáańee kí pítí bi-kpitii, kii ti-Dindaan nín síiǹ mara puee^a.»

8 Ní Aarɔn sútì ki pìl̄ nsaraafan ní ki lāntì úǹ u-ba kpitii pɔ̄tam saraau nabil. 9 Ní u-jipɔmbi cáań-u fatiku ní u dū u-ŋambiki ki sēē fatikuee ki dūu jōō nsaraafan kpiŋŋi pu ní ki kpáatì un kíǹee ki pɔ̀l̄ nsaraafan taapu. 10 U dū ŋkpam nì aceebil nì mpɔɔlamee ki wùn̄ ŋŋmi nsaraafan pu kii ti-Dindaan nín nìn kpáafì Mooyiisi puee. 11 Ama ní ki yōoǹ tinan nì ŋgbanee ki nyántì dinaapaal kpaanceetiŋu ki wùn̄ ŋŋmi.

12 Míǹ boonee ní Aarɔn lāntì upìja un bi cáań kí ŋá saraawɔkaayee, ní u-jipɔmbi cáań-u fatiku ní u dūu yāaǹ nsaraafan pu ki māntìi tú. 13 Bi càkā upìjee nanti ní ki dū diyil ki kútì ki tīī-u ní u dūu wùn̄ ŋŋmi nsaraafan pu. 14 U fíntì ina nì ayaka ki dūu páaǹ saraawɔkaa un pá nsaraafan puee ki wùn̄ ŋŋmi.

15 Míǹ boonee ní Aarɔn cáań samaa kɔkɔ saraabi: u yōoǹ samaa kɔkɔ kpitii pɔ̄tam ŋɔjau ki lāntì ki ŋá saraa kii u nín bàà ŋá dinabil puee. 16 Bi cáań saraawɔkaa waŋkutee nyɔkɔpu ki ŋá saraa kii bi nín síiǹ mara bí nīn ŋáań-u puee. 17 Bi yōoǹ tijimpin saraau ki yáfì diŋaŋkul ki dūu wùn̄ ŋŋmi nsaraafan pu, ki kpáaǹ saraawɔkaa un bi ŋáań kutaafaau kamaayee. 18 Boonee ní u lāntì unaja nì upìja un samaa kɔkɔ cáań kí ŋá mpèé saraauee^b, ní u-jipɔmbi cáań-u fatiku ní u dūu yāaǹ nsaraafan pu ki māntìi tú. 19 Bi gíti tí cáań-u unajee nì upìjee kpam, an dàkà yii ajugbin nì ŋkpam min pá ina puee nì aceebil nì mpɔɔlam, 20 ní ki dūu páaǹ unajee nì upìjee biŋŋi pu ní Aarɔn dū ŋkpamee ki wùn̄ ŋŋmi nsaraafan pu. 21 Aarɔn yōoǹ tiwaŋkuti biŋŋi nì diŋaŋgiitaal yilpu ní ki fíiǹ fíiǹ ti-Dindaan nimbiin kii Mooyiisi nín nìn pée síiǹ-u mara puee.

22 Ŋyunti ŋun Aarɔn ŋá ikpiti pɔ̄tam saraau nì saraawɔkaa nì mpèé saraau ki dóòyee ní u yōoǹ u-ŋalii ki túĺ samaa^c ki mēē ki bīiǹ bi-pu ní ki kpákatì nsaraafan pu. 23 Mooyiisi nì Aarɔn nín kóò dikpafindi tantiun. Bi dāa fātìi nyánnée ní ki mēē ki bīiǹ samaa kɔkɔ pu. Niinee ní ti-Dindaan nyántì u-nyooti ki dàkā samaa kɔkɔ. 24 Ní ŋŋmi ŋubɔ nyánní ti-Dindaan nimbiin ki dɔ́miń ki wùn̄ saraawɔkaa nì ŋkpam min pá nsaraafan puee. Samaa kɔkɔ nín ká mimmee ní bi fáá iwiliili nì dipɔɔpindi, ní ki tātìi dōoǹ dicincibil.