Akoobil 8

BI DŪ BISARAAŊALIIBI KI SÚ UNIMBƆTI

Bi dū Aarɔn nì u-jipɔmbi ki sú Unimbɔti

1 Ti-Dindaan^a bí Mooyiisi yii: 2 «Yíiń Aarɔn nì u-jipɔmbi, kí cáań asaraaŋabɔkuti nì ŋkpam nì ikpiti pɔ̄tam nabil nì ipijaa ili nì kpɔnɔb bin baa ŋá ŋkpɔnɔnyɔkɔee an nīn kā kukabikun. 3 Míǹ boonee á yíiń samaa kɔkɔ ń kpāfì circir kɔŋkooŋŋu punyɔkɔki nyɔkɔpu.»

4 Ní Mooyiisi ŋá ti-Dindaan nín bí yii ú ŋá puee ní samaa kɔkɔ kóoǹ ki kpáfì circir kɔŋkooŋŋu punyɔkɔki nyɔkɔpu. 5 Niinee ní Mooyiisi bí samaa yii: «Kpèèmaan ti-Dindaan nín bí yii tí ŋá puee sɔ̀.» 6 Ní Mooyiisi cáań Aarɔn nì u-jipɔmbi nyɔkɔpu ki yāntì bi fùl̄ nnyim kí nyā kí nīn bí circir. 7 U nìn dū poon bɔkutil ki pēeǹ Aarɔn ní ki dū ŋŋaabu dambalau ki gbìn̄-u, ní ki dū dibɔkutifɔkɔl mun ki pēeǹ-u, ní ki dū eefoodi^b ki léeǹ-u, ní ki dū dambala un kā eefoodi puee ki cúú u-caŋ. 8 U nìn dū kilɔbiki kin pāantí usaraaŋakpil bindi puee ki páaǹ-u ní ki dū Uriim nì Tumiim ki ŋá kilɔbikee poon^c. 9 U nìn dū ŋŋaabu ki fìn̄ u-yil ní ki dū sindaariya un bi nyūntì ki nántiǹ mpumpukumee ki nákáǹ nyɔkɔpu kí dàkà yii bi dū-u ki sú disaraaŋal tundi, kii ti-Dindaan nín nìn tùkū Mooyiisi yii ú ŋá puee. 10 Mooyiisi yōoǹ ŋkpam ní ki bātì ki yāaǹ circir kɔŋkooŋŋu pu nì tin kɔkɔ bí ŋu-poonee ní ki dū tiwanee kɔkɔ ki sú ti-Dindaan. 11 U nìn dū ŋkpamee ki yāaǹ nsaraafan pu ŋfunyɔm miluli ní ki bātì ki sītì nsaraafan pu nì tin kɔkɔ bi cáa tūǹ ŋu-pu ditundee nì kusampeeu^d nì kun pu ku tɔ́kɔ́ee ki dū an wantee kɔkɔ ki sú ti-Dindaan. 12 U ŋá míǹ ki dóòyee ní ki bātì ŋkpamee ki sītì Aarɔn yil pu ki dū-u ki sú ti-Dindaan. 13 Míǹ boonee ní Mooyiisi yāntì Aarɔn jipɔmbi mun sútì ki pìl̄-u ní u dū bi-bɔkutiŋ ki pēeǹ-bi ní ki dū dambalab ki gbìn̄-bi ní ki dū iŋaabu ki fìn̄ bi-yiliŋ kii ti-Dindaan nín bí yii ú ŋá puee.

14 U dóòyee ní ki dātìń dinabil din bi làá dūú ŋá ikpiti pɔ̄tam saraauee ki cáań, ní Aarɔn nì u-jipɔmbi dū bi-ŋalii ki páaǹ di-yil pu. 15 Ní Mooyiisi lāntì-dì ní ki dū u-ŋambiki ki sēē fatiku ki dūu jōō nsaraafan yiŋyi pu ki māntìi tú ki ŋá-ŋu circir. U nìn dū fatiku un kíǹee ki kpáatìi pɔ̀l̄ nsaraafanee taapu. Míǹ ní u ŋá ní ki dū nsaraafan ki sú Unimbɔti, bí nīn ŋáań ikpiti pɔ̄tam saraau ŋu-pu^e. 16 Mooyiisi yōoǹ ŋkpam min kɔkɔ bīī ina puee nì mpɔɔlam nì aceebil liitil nì ŋkpam min bīī ŋi-puee ki cáa wùn̄ ŋŋmi nsaraafan pu. 17 Ama bi yōoǹ dinabilee gbaŋŋu nì di-nanti nì di-bintee kɔkɔ ki cáa wùn̄ ŋŋmi dinaapaal kpaanceetiŋu kii ti-Dindaan nín kpáafì Mooyiisi yii ú ŋá puee.

18 Niinee ní Mooyiisi tí dātì upìja un bi làá dūú ŋá saraawɔkaayee ki cáań ní Aarɔn nì u-jipɔmbi dū bi-ŋalii ki páaǹ u-yil pu. 19 Ní Mooyiisi lāntì-u ní ki dū fatiku ki yāaǹ nsaraafan kɔkɔ pu ki māntìi tú. 20 Mooyiisi càkā upìjee nanti ní ki dū diyil nì ŋkpam ki dūu kútì ki wùn̄ ŋŋmi. 21 U dū nnyim ki fíntì ina nì ayaka ní ki dū upìjee nanti tin kíǹee kɔkɔ ki kútì ki dūu wùn̄ ŋŋmi nsaraafan pu ki ŋá saraawɔkaa, ní saraayee sɔnsɔfiŋu sɔ̄ŋkì ti-Dindaan pɔbil kii ti-Dindaan nín nìn kpáafì-u yii ú ŋá puee.

22 Míǹ boonee ní u dātì upìjaliliiti ki cáań bí dūú ŋá saraa, bisaraaŋaliibi ń kíĺ bi-saraaŋatundi, ní Aarɔn nì u-jipɔmbi dū bi-ŋalii ki páaǹ upìjee yil pu. 23 Ní Mooyiisi lāntì-u ní ki dū fatiku ki jōō Aarɔn tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu. 24 Boonee ní Mooyiisi yāntì Aarɔn jipɔmbi sútì ki pìl̄-u ní u dū fatiku ki jōō bi-tafalam ŋgiil yaŋ pu nì bi-ŋambijaliŋ ŋgiil yaŋ pu nì bi-taŋambijaliŋ ŋgiil yaŋ pu ní ki dū fatiku un kíǹee ki kpáatìi pɔ̀l̄ nsaraafan ki māntìi tú. 25 Mooyiisi lēē ŋkpam nì dijugbindi^f nì ŋkpam min bīī ina puee nì mpɔɔlam nì aceebil liitil nì ŋkpam min bīī ŋi-puee nì diŋaŋgiitaal. 26 Kikabiki kiba nìn yú niin bi dū-kì ki sú ti-Dindaan. Kpɔnɔb bin baa ŋá ŋkpɔnɔnyɔkɔee nìn kā poon. U nìn lēē kpɔnɔb bin bi dū ŋkpam ki búuń ki púĺ ŋkpɔnɔnyɔkɔ kpá poonee ubɔ, nì ŋkpɔnɔwaamu mun pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee ubɔ, nì kalaabi bin bi dū ŋkpam ki ŋmālim̀ ki búuńee ubɔ. U nìn dū kɔkɔ ki páaǹ upìjee kpam nì u-ŋaŋgiitaal pu. 27 Ní Mooyiisi dūu ŋúbiǹ Aarɔn nì u-jipɔmbi ní bi dúkutì yilpu ki fíiǹ fíiǹ ti-Dindaan nimbiin. 28 Bi ŋá míǹ ki dóòyee ní Mooyiisi fātìi fōō bi-ŋaan ki dūu páaǹ saraawɔkaa un pá nsaraafan puee ki wùn̄ ŋŋmi. Míǹ ní bi nìn ŋá saraabi ní bisaraaŋaliibi kíĺ bi-tundi, ní saraayee sɔnsɔfiŋu nìn sɔ̄ŋkì ti-Dindaan pɔbil. 29 Mooyiisi nìn yōoǹ upìjee bindi, ki dúkutì yilpu ní ki fíiǹ fíiǹ ti-Dindaan nimbiin. Dijandi gbanti ní bi nìn dūu tīī Mooyiisi kii ti-Dindaan nín nìn síiǹ-u mara puee.

30 Niinee Mooyiisi yōoǹ ŋkpam nì fatiku un nìn bí nsaraafan puee ki dūu yāaǹ Aarɔn nì u-wampeeŋkaati pu nì u-jipɔmbi mun nì bi-wampeeŋkaati pu. Míǹ ní u ŋá ki dū Aarɔn nì u-jipɔmbi nì bi-wampeeŋkaati kɔkɔ ki sú ti-Dindaan.

31 Niinee ní Mooyiisi bí Aarɔn nì u-jipɔmbi yii: «Tɔ́kɔḿmaan tinan dikpafindi tantiu punyɔkɔki nyɔkɔpu. Ni yaa tɔ́kɔǹ-tèe, ní ŋmɔ́-tì niin nì kpɔnɔb bin kā kikabikin bi cáań ki ŋá saraayee kii m nín nìn tīī-si mara ki lī yii: <Aarɔn nì u-jipɔmbi di làá ŋmɔ́-tèe.> 32 Tinan nì kpɔnɔb bin ni ŋmɔ́ an kíǹee, ní dūú wà ŋŋmi. 33 Naa máaǹ kí yīkì circir kɔŋkooŋŋu punyɔkɔki nyɔkɔpu kí cáá sāā iwiin iluli dal. Naa máaǹ kí nyā áli iwiin iluli in bi síiǹ kí dūú ŋá saraabi ní kíĺ disaraaŋal tundee ń kúntí. 34 Kii ti nín ŋá pu díǹ nee, ti-Dindaan u-ba di síiǹ mara yii tí ŋá míǹ ní ní ká ni-kpitii pɔ̄tam. 35 Ni máaǹ kí nīn bí circir kɔŋkooŋŋu punyɔkɔki nyɔkɔpu ŋwiimpu nì kunyeeu kí cáá sāā iwiin iluli. Mimmee ni ŋūǹ kí tɔ̄ ti-Dindaan tundi kí taa kpú. Ti-Dindaan nín kpáafì-mi yii ḿ ŋá puee dee.»

36 Aarɔn nì u-jipɔmbi ŋá tin kɔkɔ ti-Dindaan dī Mooyiisi pu ki síiǹ-bi yii bí ŋée deedee.