Disaŋkindi 15

Mooyiisi nì Isirayeel yab gāā dijajil laŋŋu

1 Niinee ní Mooyiisi nì Isirayeel yab gāā nlan nee ki pàkā ti-Dindaan yii^a:

«M làá gāā nlan kí pàkà ti-Dindaan,

kun puee u dàkā u nín sá ukpaan puee.

U téé itaamu nì bitanjakaliibi ki tɔ́ dimɔɔlin.

2 Ti-Dindaan di sá man pɔŋŋu,

úǹ ní m làá nīn gà ilan ki nyɔ́ŋkí.

Úǹ di fīī-mi^b, úǹ di sá m-Nimbɔtiu,

m làá nīn nyɔ́ŋkí-u.

Úǹ di sá m-baa Nimbɔtiu,

m làá yòon̄ u-yindi yilpu.

3 Ti-Dindaan di sá ubaatandaan,

u-yindi di sá ti-Dindaan.»

4 «U dū Faaroo janjatɔrɔkub nì u-janjaliibi

ki tɔ́ dimɔɔlin.

U-janjaliibi bimɔmmɔntiibi

gbíntì Tikati mɔɔlin.

5 Nnyim bīiǹ bi-pu,

bi sīntì nnyim taapu kii ditaŋkpalee.»

6 «Ti-Dindaan, a-ŋaŋgiil cáá mpɔŋkpaan,

ŋúǹ di nàantí a-nannanliibi.

7 A lafun sá ukpaaneeee!

A lábitì a-nannanliibi ki cìb̄.

A yaa gíí diŋuulee, a náań nì ŋŋmi ní,

ní ki wù a-nannanliibi kii timoolee.

8 Kubuŋu kun nyēeń a-maŋfataabuŋyinee

yāntì nnyim kóoǹ ki kpáfì.

Nnyinjil yáatì ki yúl̀ kii digundee,

nnyim min bí taapuee fōō ki pɔ́ɔkì dimɔɔl kansikin.

9 Binannanliibi nìn lī yii:

<Ti làá jà bi-boon kí tin cúú-bi,

kí yàkatī ti nín jáń ki fōō tin bi-ceeyee,

ní kí nīn kíǹ ki cáá tikpil an lákatí.

Ti làá fúutí ti-tàataajimmu ní kí pɔ̄ɔkiǹ-bi.>

10 Ama ní sii ti-Dindaan púfì

ní mmɔɔnyim bīiǹ bi-pu.

An cáá-bi ki sīntì taapu

nnyim poon poon kii tikúbɔnee.

11 Óo ti-Dindaan, inimbɔti kansikinee, ŋma di bí kii sii?

Ŋma di bí kii sii ki bí circir ki jìl̀ yéè?

A sá un tūǹ atuŋkpaanee ki máaǹ inyɔŋki,

a ŋáań maamaacib!

12 A tāntì a-ŋaŋgiil

ní kitiŋ dū-bi ki náĺ.

13 A dū a-neendi

ki fōō a-nibul ki líì.

A dū a-pɔŋŋu ki kpōotì-bi

ki cáa cáǹ circir tiŋki kin a cúú ki síiǹ-bee.

14 Anibul gbìl̄ an bɔti ní tifaandi cúú-bi,

ní Fiiliistii yab pɔbiliŋ bíil̀.

15 Ijawaan kɔ́ Eedoom tiŋki bɔtiibi,

Moowaab janjaliibi fāŋkì yɔ́kɔ́ yɔkɔ,

ní Kanaan yab wunti kpíì.

16 Dinyoondi nì tifaandi cúú-bi!

Bi nín ká a-ŋampɔŋŋu ŋun a dūu jòoń-tee

ní bi ŋmíl̀ fɔ́ŋfɔŋ kii ditaŋkpalee,

áli a-nibul dāa jítì ki dóò, ti-Dindaan,

dinibul din ní a dée.

17 A cáǹ-bi a-jool din sá a-fakalee pu

kí dū-bi kí kàan̄ niin.

A bɔ́ntì mpaan kí nīn kóò niin, ti-Dindaan,

Circir kɔŋkooŋŋu ŋun sii ti-Dindaan dū a-ŋalii ki máńee.

18 Ti-Dindaan, sii di sá ubɔti kí nīn pée cáa cá jaanjaan!»

19 Faaroo taamui nì u-janjatɔrɔkub nì u-tanjakaliibi nín kɔ́ dimɔɔlinee, ti-Dindaan nìn yāntì mmɔɔnyim bīiǹ bi-pu. Ama ní Isirayeel yab bíǹ dūtì dimɔɔl ŋkulimmi.

20 Niinee Aarɔn niisal Miiriyam un sá Unimbɔti bɔnaatiliuee yōoǹ kigaŋgaŋ, ní binimpoobi kɔkɔ mun dɔ́miń ki kútì u-pu nì bi-gaŋgammu ki bɔ̀ɔ́ ki ŋōō. 21 Binimpoobee yaa bíi gà ilanee ní Miiriyam ń kíí-bi yii:

«Gāāmaan ilan kí nyɔ̄ŋkì ti-Dindaan,

kun puee u dàkā u nín sá ukpaan puee.

U téé itaamu nì bitanjakaliibi ki múĺ dimɔɔlin.»

ISIRAYEEL YAB SAŊKINDI KUTEEUN 15–18

Maara nyim bɔti

22 Mooyiisi yōoǹ Isirayeel yab bi yíkì Tikati mɔɔl ki túĺ Suur teeku watil. Bi cōom̀ iwiin ita kuteeun kaa ká nnyim kí nyɔ̀. 23 Bi nìn bàn̄ Maara ki ká nnyim, ama kaa ŋúń ki nyùn̄-mì, kun puee mi nìn tū. An pu ní bi kíǹ ki yíì niin yii Maara, taapu di sá yii <ntuntun>. 24 Ní samaa kɔkɔ kíĺ ki bíi wòoǹ Mooyiisi ki lì yii: «Ba ní ti làá nyɔ̀?» 25 Ní Mooyiisi kúuǹ ki yíiń ti-Dindaan ní úǹ dàkā-u ndɔ ŋubɔ u dūu tɔ́ nnyimin ní mi mɔ́ɔkì.

Niin ní ti-Dindaan nìn tīī Isirayeel yab marab nì akoobil, niin mun ní u nìn tí cɔ́ŋkì-bi. 26 U nìn bí-bi yii: «Ni yaa pílifí man ni-Dindaan ni-Nimbɔtiu nín sòoǹ puee mmɔntiim, ki ŋáań tin bí deedee m-nimbiinee, ki yaa gbìl̄ m-marab ki ŋúb́ akoobil kɔkɔee, maa làá yàntī iween in m nìn dūu tɔ́ Eejipiti yab puee ń gbēē-ni. Di sá yii man di sá ni-Dindaan un cāantí-nee.»

27 Isirayeel yab dūu bàn̄ Eeliim tiŋkin. Inyimbul saalaa nì ili nì ibafi imuŋku ita nì saalaa nìn bí niin. Ní bi kàl̄ ki kɔ́ĺ inyimbulee.