Disaŋkindi 16

Maana nì njikpacimamu bɔti

1 Isirayeel yab kɔkɔ yíkì Eeliim tiŋkin ní ki bàn̄ Siini teeku kun bí Eeliim nì Siinaayi kansikinee. Isirayeel yab nín nyáń Eejipiti tiŋkin uŋmaliliiti iwiin saalku dalee ní bi bàn̄ Siini teekun. 2 Kuteeun niinee ní Isirayeel yab kɔkɔ bíi wòoǹ Mooyiisi nì Aarɔn. 3 Bi nìn bí-bi yii: «Ba pu ní ti-Dindaan kaa yāntì ti kpíì ŋyunti ŋun ti nìn bí Eejipiti ki kā ki kɔ́ĺ anaŋkumboon ki jīǹ tijin ki díkèe. Ama ní ni yōoǹní samaa nee kɔkɔ ki cáań kuteeun ŋkùm ń kpɔ̀-bi!»

4 Ní ti-Dindaan bí Mooyiisi yii: «M làá tīī-ni tijin tin làá nīn nyēeń yilpu ki lítí kitiŋ kii utaa nín nì puee^a. Kutaa kamaayee binib làá nīn fà min làá ŋmàntī-bi ŋwiin ŋubɔ jītamee ní. M là kí cɔ̄ŋkì-ni kí kpèè yii ni làá nīn tɔ́ m-marabaaa, naa làá nīn tɔ́-bi. 5 Iwiin iluu dal, ni yaa láa fāā ki tɔ́kɔǹee, án làá bùtī mili pu kí jītíǹ ni nín kpààa fà pu ŋwiin kamaayee.» 6 Ní Mooyiisi nì Aarɔn bí Isirayeel yab kɔkɔ yii: «Díǹ kujoou nee ní ni làá béé yii ti-Dindaan di nyántìń-ni Eejipiti tiŋkin. 7 Fool kutaafaauee, ni làá fu ká u-nyooti, kun puee ti-Dindaan gbìl̄ ni nín bíi gbùkum̄ puee. Ní taa dàkafì yii timbi ní ni wòoǹ. Timbi di sá bilab ní ni wòoǹ-ti?» 8 Mooyiisi gíti bí-bi yii: «Ti-Dindaan làá tīī-ni kujoou nee tinan ní ŋmɔ́, ní kutaafaauee ú fu tīī-ni tijin ní jī kí díkí, kun puee u gbìl̄ ni-gbukumii pu. Ní taa dàkafì yii timbi pu ní ni gbùkum̄. Timbi kaa pée sá tiba, an sá ti-Dindaan pu ní ni bíi gbùkum̄.»

9 Ní Mooyiisi bí Aarɔn yii: «Tùkù Isirayeel samaau kɔkɔ bí sútiń kí dāan̄ ti-Dindaan nimbiin, kun puee u gbìl̄ bi-gbukumii pu.» 10 Ŋyunti ŋun Aarɔn fōō dinyɔɔbundi ki bíi sòoǹ nì bee, ní bi fātì bi-nimbiin ki túĺ kuteeu pú. Dicilpu kpalaayee ní ti-Dindaan nyooti cílìń bi-pu ditagbancancaal poon. 11 Ní ti-Dindaan bí Mooyiisi yii: 12 «M gbìl̄ Isirayeel yab gbukumii pu. An puee tùkù-bi yii: <Kujoou nee, ni làá ŋmɔ́ tinan kí báĺ, ní fool kutaafaauee, ní fu jī tijin kí díkí ní kí béé yii man di sá ni-Dindaan ni-Nimbɔtiu.>»

13 Kujoouee ní inoon iba, i bí kii njikpacimamuee dɔ́miń^b ki kpátìi gbí Isirayeel yab kaaŋu pu, ní kutaafaauee dimalindi bīiǹ bi-kaaŋu boon ki māntìi tú. 14 Dimalindee nín fóotèe ní mbilimu mbilimu mubɔ dōoǹ ki pīiǹ ki kpátìi gbí an kɔkɔ. 15 Isirayeel yab kée kaa nyí kun an sée, ní ki bàlifī tɔb yii: «Ba wanti dee ní?» Ní Mooyiisi kíí-bi yii: «Tijin tin ti-Dindaan tīī-ni ní jēe dee^c. 16 Ti-Dindaan nín yóoǹ mara uŋyee sèé: <Ní fāā min unil kamaa ŋūǹ kí jēe. Báà ŋma ń fāā u-cindin niliu kamaa yil pu disambil diba kí sāā u-nib nyɔkɔm.>»

17 Isirayeel yab nìn ŋá míǹ. Biba nìn fāā tikpil ki lákatì ní biba mun fāā fiii an kaa bàn̄. 18 Ní bi dū disambilee ki ŋmāntì báà ŋma jinti, ní un fāā tikpilee kaa ká tiba ki páaǹ, ní un fāā fiiiyee kaa lóò tiba^d. Báà ŋma nìn pée ká min làá ŋmàntī ú jēe ní.

Marab bin bi nìn síiǹ maana puee

19 Mooyiisi bí-bi yii: «Ubɔ ń taa kíń tijin kí kpāafì fool kutaafaau pu.» 20 Ama biba kaa nìn pílifì Mooyiisi nín nìn lī puee, ní ki kíǹ tijin ki kpáafì kutaa wúntì. Ku wúntèe ní an sūū ki ŋá akoosibil. Niinee ní Mooyiisi fōō diŋuul bi-pu. 21 Kutaafaau sá kamaayee, báà ŋma nìn fà min làá ŋmàntī ú jēe ní. Ŋwìiń yaa nìn píĺee ní un kíǹee ń dùntī.

22 Iwiin iluu dalee ní bí fāā bi nín nìn kpààa pée fà puee mili pu, unil kamaa yil puee asambil ali. Ní Isirayeel yab kpilib dɔ́miń ki tùkū Mooyiisi an bɔti. 23 Ní Mooyiisi bí-bi yii: «Ti-Dindaan nín yóoǹ mara uŋyee dee. Fool fu sá ŋwiŋŋuŋfikaa ní, ŋwiin ŋun sá ti-Dindaan wiiŋŋuee^d. Ní ŋàan̄ tin ni làá ŋàan̄ee, kí tɔ́kɔń tin ni làá tɔ́kɔńee. Tin yaa kíǹee, ní dūú kpāafì kí yóoń fool kutaafaau pu.» 24 Ní bi bɔ́ntì tijin ki yóoǹ fool pu, kii Mooyiisi nín bí yii bí ŋá puee. Ku wúntèe an kaa sūūyaaa, akoosibil mun kaa kɔ́. 25 Ní Mooyiisi bí-bi yii: «Jīmaan tijin tin ni fu ŋá foolee díǹ, kun puee díǹ di sá ŋwiŋŋuŋfikaa ki tīī ti-Dindaan. Ni yaa nyáń mmɔŋki díǹ, naa làá ká báà tiba dɔ̄. 26 Ni làá nīn pée fà tijin míǹ ní iwiin iluu, see ŋwinluluúti ŋun sá ŋwiŋŋuŋfikaayee dal baba ní naa làá ká tiba ki fāā.»

27 Nì míǹ kɔkɔee, Isirayeel yab kansikin biba nìn nyáń ŋwinluluúti dal kí bàà tí cùú fāā ní kaa ká. 28 Ní ti-Dindaan bí Mooyiisi yii: «Ni làá nīn pée yíití m-marab nì m-dàkatam yéè kí tin cáá sāā ŋyunti ŋulɔŋu ní? 29 Ní béé yii m tīī-ni ŋwiŋŋuŋfikaa ní dūú kàl̄ kí ŋùŋfì ní. An pu ní m tìì-ni iwiin iluu dal iwiin ili jinti, án nín làá ŋá pu winluli dalee, báà ŋma ń nīn kā u-dumpu kí taa nyā kí cù laabee.» 30 Ní Isirayeel yab kíǹ ki kàal̀ ŋwinluluúti dal ki ŋùŋfī.

31 Isirayeel yab nìn pú tijin gbanti diyindi yii maana. U nìn bí mbilimu mbilimu ki pīiǹ, ní ki mɔ̄ kii tisiil kalaauee.

32 Ní Mooyiisi bí yii: «Kpèèmaan ti-Dindaan nín lī puee sèé yii: <Ní lēē tijinee disambil diba kí kpāafì kí dāá nīn cáa dàkà ni-naantiibi bi mun ń ká ti-Dindaan nín nìn nyántìń-ni Eejipitee tijin tin u nìn cáa kpīintí-ni kuteeunee.>» 33 Ní Mooyiisi bí Aarɔn yii: «Fāā tijinee disambil diba kí ŋá diboolin ki cáá yóoń ti-Dindaan nimbiin, kí kpāafì-tì ni-naantiibi mun ń dāá yīkìí ká^e.» 34 Kii ti-Dindaan nín nìn bí Mooyiisi ń ŋá puee, Aarɔn nìn cáá tijinee nì dibool ki yóoǹ ti-Dindaan Poondi daaŋku^f nimbiin án ŋmā kí nīn bí ki téetí-bi.

35 Isirayeel yab nìn jíń tijin gbanti míǹ ní abin imuŋku ili, áli ki tin kɔ́ kitiŋ kin binib kóòyee. An dàkà yii bi pée jíń tijin gbanti míǹ ní ki tin bàn̄ Kanaan tiŋki kpaanyɔkɔ^g. 36 Bi-sambil din bi nìn cáa ŋmàntī tijinee saalaa di sá bi-gɔŋgɔŋwu.