Disaŋkindi 14

Isirayeel yab dūtì Tikati mɔɔl

1 Ti-Dindaan bí Mooyiisi yii: 2 «Tùkù Isirayeel yab bí fàtīí gítí Pii-Ayirooti tiŋki caŋin, Miigidool nì dimɔɔl kansikin. Bí gāā bi-tantib kí kàl̄ niin kí nīn túĺ Baal-Seefɔn tiŋkin, dimɔɔl caŋin. 3 Faaroo làá sòoǹ ni-pu yii: <Naŋkɔnampu Isirayeel yab gáatì ki túĺ ti-tiŋki laaba pú ki tú ki yìiǹ ní kuteeu dū-bi ki náĺ.> 4 M làá lùkutì Faaroo ní ú jàń ni-boon. Di sá yii Faaroo nì u-janjaliibi di làá yàntī bí ká man nyooti. Niinee Eejipiti yab làá béé yii man di sá ni-Dindaan.» Ní Isirayeel yab ŋá kii ti-Dindaan nín lī puee.

5 Bi nìn tùkū Faaroo yii Isirayeel yab yíkì. Niinee ní u nì u-kpambaliŋ landɔkɔŋu cúu kpántì bi-pu, ní bi bí yii: «Ba ní ti ŋá nan ní? Ba pu ní án nín bàà sá tí nīn ŋúb́ Isirayeel yab bí nīn sá ti-yumbuyee, ti yāntì bi nyáń ki búntì ní?» 6 Niinee ní Faaroo kpàl̄ u-janjatɔrɔkub taamui, ki yōoǹ u-janjaliibi bi nín jì bi-boon. 7 U nìn yōoǹ u-tɔrɔkub bin sá bimɔmmɔntiibee alaataa aluu ki kpáaǹ Eejipiti tɔrɔkub bin kíǹee kɔkɔ. Tɔrɔku kamaa poonee, bijanjaliibi bita di nìn bí. 8 Ti-Dindaan nìn pɔ́ɔkì Eejipiti bɔtiu Faaroo pɔbil, ní u yíkìi bíi jì Isirayeel yab boon, ama ní bíǹ nìn nyáń Eejipiti tiŋkin nì dibatɔl nì ifaal. 9 Eejipiti yab janjaliibi nì Faaroo janjatɔrɔkub taamui nì bijanjaliibi bitanjakaliibi yíkìi kùl̄ ki páaǹ Isirayeel yab boon. Bi nìn cúú-bi dimɔɔl caŋin, Pii-Ayirooti watil pú ki túĺ Baal-Seefɔn tiŋki, laakin bi nìn gāā bi-tantib ki kāl̀ee.

10 Ŋyunti ŋun Isirayeel yab dāa béè yii Eejipiti yab bíi jìń bi-boonee, nì bi nín dāa ká yii Faaroo nì u-naacimbi tóobiń-bee, bi nìn fāŋkì tikpil ní ki nìn bíi kūuntí ki yíì ti-Dindaan. 11 Bi nìn bí Mooyiisi yii: «Itaŋkpiifal kaa bí Eejipiti tiŋkinaaa? Ba pu ní a cáań-ti tí kpú kuteeun doo? Ba pu ní a yāntì ti yíkìń Eejipiti tiŋkin ní? 12 Ti nín nìn dáá bíń Eejipiti tiŋkinee, ti nìn tùkū ki cántì-si yii: <Yàntī-ti tí nīn sá Eejipiti yab yumbui. An sɔ́ tí nīn tūǹ atuun ki tìì Eejipiti yab ki jítiǹ tí kpú kuteeun.>» 13 Mooyiisi nìn kíí samaa yii: «Taa fàŋkìmaan! Nín̄ kāmaan soooo! Ni làá ká díǹ wiiŋŋu ti-Dindaan nín làá fīī-ni puee. Di sá yii Eejipiti yab bin ni wāĺ díǹ nee, ni pée gíti kpá kí ká-bi jaanjaan. 14 Nimbi dee, nín̄ kāmaan soooo, ti-Dindaan làá já kí tīī-ni.»

Ti-Dindaan cátì nsan dimɔɔl kansikin

15 Ti-Dindaan bí Mooyiisi yii: «Ba pu ní a kūuntí ki yíì-mi? Tùkù Isirayeel yab yii bí yīkì kí nīn còom̄ ki cá. 16 Sii yòon̄ a-kpandɔŋu kí dūú tàntī dimɔɔl pu kí cúú-dì kí búkutí mili nsan ń dòon̄ Isirayeel yab ń dùtī ŋkulimmi. 17 Man làá pɔ̄ɔkì Eejipiti yab pɔbiliŋ bí kɔ́ dimɔɔlin kí jà ni-boon. M làá dàkà Faaroo nì u-janjaliibi kɔkɔ nì u-janjatɔrɔkub, nì u-janjaliibi bitanjakaliibi m-nyooti. 18 M làá dī Faaroo nì u-janjatɔrɔkub nì u-janjaliibi bitanjakaliibi pu kí dàkà m-nyooti. Niin ní Eejipiti yab làá béé yii man di sá ni-Dindaan.»

19 Unimbɔti tuuŋŋu ŋun nìn līī Isirayeel yab nyɔkɔpuee gítì bi-boon. Míǹ mbaantiim ní ditagbancancaal din nìn līī bi-nyɔkɔpuee mun gítì bi-boon. 20 Di nìn cūtìi yúl̀ ki pītì Eejipiti yab kitil nì Isirayeel yab kitil kansikin. Eejipiti yab jandi púee, ditagbancancaalee nìn sá dibɔmbɔndi, ama ní Isirayeel yab jandi púee, di nìn ŋmíntí kunyeeu. An puee Eejipiti yab nì Isirayeel yab kaa nìn ŋūǹ kí sútí kí pìl̄ tɔb kunyeeu gbanti kɔkɔ.

21 Mooyiisi nìn tāntì u-ŋal dimɔɔl pu. Ti-Dindaan nìn yāntì kubuŋu kubɔ nyánní ŋwìiń nyalaŋki pú ki jítì mpɔn kunyamɔŋu ní ki téé dimɔɔl nyim. Dimɔɔl nìn cúu búkutì mili ní nsan dōoǹ ki kūń. 22 Isirayeel yab nìn cōom̀ ki jítì dimɔɔl kansikin ŋkulimmi^a, ní nnyim gāā aguŋkpaan bi-ŋaŋgiil pú nì bi-ŋaŋgan pú. 23 Eejipiti yab nìn páaǹ bi-boon. Faaroo taamui nì u-janjatɔrɔkub nì bitanjakaliibi kɔkɔ nìn kɔ́ dimɔɔlin ki dī-bi. 24 Ntaafaabɔmbɔmee ní ti-Dindaan un bí ditagbancancaal nì ŋŋmi poonee kpēē Eejipiti yab kitil pú, ní ki yāntì fìkil fikil kɔ́-bi. 25 U nìn yāntì Eejipiti yab tɔrɔkub taaŋi kpàl̄ ki pɔ́ɔkì ní disaŋkindi ŋá-bi digìńdi. Ní bi bí yii: «Tí sām̀maan Isirayeel yab, kun puee bi-Dindaan kútì bi-pu bi bíi jáà nì ti!»

26 Ní ti-Dindaan bí Mooyiisi yii: «Tàntī a-ŋal dimɔɔl pu nnyim ń fàtīí gítiń kí bìin̄ Eejipiti yab nì bi-janjatɔrɔkub nì bi-janjaliibi bitanjakaliibi pu.» 27 Mooyiisi nìn tāntì u-ŋal dimɔɔl pu. Kutaa tóob́ diwuntilee ní dimɔɔl fātìi gítì di nín nìn pée bí puee. Eejipiti yab bàà bí yii bí sāǹ ní ki dūu kɔ́ nnyimin, ní ti-Dindaan téé bi-kɔkɔ ki múĺ dimɔɔl kansikin. 28 Nnyim nìn fātìi gítìń ki bīiǹ Faaroo janjatɔrɔkub nì u-janjaliibi bitanjakaliibi kɔkɔ pu. Bin kɔkɔ nìn pée kɔ́ dimɔɔlin ki bíi jì Isirayeel yabee, ubambaanti kaa nìn ŋmátì. 29 Ama Isirayeel yab nìn cōom̀ ŋkulimmi dimɔɔl kansikin, ní nnyim gāā aguŋkpaan bi-ŋaŋgiil pú nì bi-ŋaŋgan pú.

30 Míǹ ní ti-Dindaan nìn dī ki nyántì Isirayeel yab Eejipiti yab ŋaan ŋwiin gbanti. Isirayeel yab nìn wāĺ Eejipiti yab nín kpíì ki dɔ̄ dɔ̄ dimɔɔgbandee. 31 Isirayeel yab nín nìn ká mpɔn ŋun ti-Dindaan nìn dàkā Eejipiti yabee ní bi fāŋkì-u, ní ki dū bi-mákal ki ŋá u nì u-tɔntɔnliu Mooyiisi pu.