Disaŋkindi 13

Dilákatil jiŋaaliu marab biba mun

1 Ti-Dindaan sòon̄ nì Mooyiisi ki bí-u yii: 2 «Á dū Isirayeel yab biseebiyaamu bininjab kɔkɔ kí sú-mi. Di sá yii unimpu kamaa biseebiki kininjabiki nì kuwaŋkuluu kamaa bipeepeekaaki kijaka sá ki tīī man ní^a.» 3 Mooyiisi bí Isirayeel nibul yii: «Ní nīn téetímaan ŋwiin nee pu, ti-Dindaan nín dū u-ŋampɔŋŋu ki nyántì-ni kuyuŋun Eejipiti tiŋkin puee. Yaadalee ní taa ŋmɔ́ kpɔnɔb bin poon bi ŋá ŋkpɔnɔnyɔkɔee. 4 Ni bíi nyēē Eejipiti tiŋki poon díǹ Ifin ŋmaliu un bi yíì Abiibee wiiŋŋu ŋubɔ dee^b. 5 Ti-Dindaan yaa cáá-ni ki kɔ́ǹ Kanaan yab nì Eeti yab nì Amɔɔr yab nì Eefi yab nì Jeebusi yab timmunee, ní dāá nīn ŋáań akoobil nee dibindi kamaa uŋmal nee poon ki tìì ti-Dindaan tinyool. Kitiŋ gbanti ní ti-Dindaan nìn pōoǹ ni-naanjab yii u làá dūú tīī-nee. Kitiŋ gbanti poon ní nnaabiim nì tisiil còol̀. 6 Ní dū iwiin iluli kí ŋmɔ́ kpɔnɔb bin kaa cáá ŋkpɔnɔnyɔkɔee. Ŋwinluluúti dalee, ní jī jiŋaal kí tīī ti-Dindaan tinyool. 7 Iwiin iluli gbanti poonee, ní taa ŋmɔ́ kpɔnɔb bin poon bi ŋá ŋkpɔnɔnyɔkɔee. Ni-tiŋki kɔkɔ poonee, bí taa ká ni-cee kpɔnɔ un poon bi ŋá ŋkpɔnɔnyɔkɔee àá ŋkpɔnɔnyɔkɔ ŋu-ba. 8 Jiŋaal gbanti poonee, ní dāá māafì ni-biyaamu yii: <Ti ŋáań míǹ ti-Dindaan nín nìn ŋá min ki tīī-ti ti nín nìn nyáń Eejipiti tiŋkin puee ní.» 9 Jiŋaal gbanti ń dāá nīn sá-ni diteetil, kí dāá nīn sá-ni kudaaŋŋu ni-ŋalii nì ni-yigbeeŋi pu, ní kí nīn téetí-ni yii ni máaǹ kí nìn sòoǹ ti-Dindaan marau pu, kun puee an sá nì u-ŋampɔŋŋu ní u nyántì-ni Eejipiti tiŋkin. 10 Dibintil kamaa jiŋaal nee wiiŋŋu yaa bāańee, ní ŋá min mara nee bí yii ní ŋée.

11 Ti-Dindaan làá cáá-ni kí kɔ́ǹ Kanaan tiŋkin kii u nín nìn pūtì ki pōoǹ ni nì ni-naanjab yii u làá dū-kì kí tīī-ni puee. 12 Niinee ní dāá dū ni-biseebiyaamu nninjabiyaamu kí sú ti-Dindaan. Ni-waŋkuti bipeepeekaamu njamu mun sá ti-Dindaan wanti ní. 13 Ní dū upii àá uŋoobu kí kpántí kimaŋ bipeepeekaaki kijaka. Ni yaa kaa kpántèe, ní nyīī kí gíí ki-sil kí kpú. Ama ni-nibul poon biseebiyaamu nninjabiyaamuee, ní pà mu-pu^c.

14 Boonee ni-biyaamu yaa láa bíi bàlifī-ni yii ba pu ní ni ŋáań mimmee, ní dāá kíí-bi yii: <Kun pu ti ŋáań mimmee di sá yii ti-Dindaan nìn dū u-ŋampɔŋŋu ní ki nyántì-ti kuyuŋu poon Eejipiti tiŋkin. 15 Faaroo nìn yíì kpataaa yii u kpá kí líí-ti tí búntí. Niinee ti-Dindaan yāntì Eejipiti yab biseebiyaamu nninjabiyaamu nì bi-waŋkuti bipeepeekaamu njamu kpíì kɔkɔ. An pu ní ti cáá ti-waŋkuti bipeepeekaamu njamu ki ŋáań saraa ki tìì ti-Dindaan, ní ki pà ti-biseebiyaamu nninjabiyaamu pu.> 16 Míǹ puee tin ti bíi ŋáań nee ń nīn sá-ni kudaaŋŋu ni-ŋalii nì ni-yigbeeŋi pu, kí nīn téetí-ni yii ti-Dindaan nìn dū u-ŋampɔŋŋu ní ki nyántì-ti Eejipiti tiŋkin.

Unimbɔti līī u-nibul nyɔkɔpu

17 Faaroo nín nìn yāntì Isirayeel yab nyáń u-tiŋkinee, Unimbɔti kaa nìn yāntì bi dī Fiiliistii yab tiŋki saŋŋu, niin mun di kaa bàà dátì^d. Unimbɔti nìn lī u-ban yii: «Binib nee yaa ká kujaau nsanni, bi-pɔbil làá yīkì ní bí bí yii bi làá fàtīí gítí Eejipiti tiŋkin.» 18 An pu ní Unimbɔti nìn yāntì bi dūu dī kuteeu pú ki pɔ́tì ki tin nyáń Tikati mɔɔl pu. Isirayeel yab nìn nyáń Eejipiti tiŋkin ki nóó tɔb akiti akiti kii bijanjaliibee.

19 Mooyiisi nìn kpáaǹ Jooseefi kpabiŋ, kun puee Jooseefi nìn bí u-nabiyaamu yii: «Unimbɔti làá jòoń-ni ní nyā kitiŋ nee poon. Ní pùtī yii ni làá dāá kpáaǹ m-kpabiŋ^e.»

20 Isirayeel yab nìn yíkì Sukooti tiŋki ní ki cūtìi gāā bi-tantib Eetaam tiŋki, kuteeu kúntilaŋki. 21 Ti-Dindaan u-ba di nìn līī bi-nyɔkɔpu. Ŋwiimpuee, u nìn bí ditagbancancaal poon ní ki dàkà-bi nsan, ní kunyeeuee ditagbancancaalee ń kpántí ŋŋmi ki ŋmíntí-bi. An pu ní bi nìn ŋūǹ ki còom̄ ŋwiimpu nì kunyeeu. 22 Ditagbancancaalee kaa sútí kí wàatī dinibul ŋwiimpu ní ditagbancancaal din sá ŋŋmee mun kaa sútí kí wàatī-bi kunyeeu.