Disaŋkindi 8

1 Ti-Dindaan^a bí Mooyiisi yii: «Tùkù Aarɔn yii ú tàntī u-kpandɔŋu kí túĺ ikpin nì ibun nì anyimbɔbil ní kpaabi ń nyā kí gbí Eejipiti tiŋki kɔkɔ.» 2 Ní Aarɔn tāntì u-kpandɔŋu ibun kɔkɔ pu, ní kpaabi nyáń ki gbí Eejipiti tiŋki kɔkɔ. 3 Ní Eejipiti yab kpaŋkpantiibi mun ŋá bi-kpaŋkpantiiku ki nyántì kpaabi kí gbéeǹ Eejipiti tiŋki poon kii Aarɔn nín ŋá puee.

4 Faaroo yíiń Mooyiisi nì Aarɔn ní ki bí-bi yii: «Mèèmaan ni-Dindaan ú kúntí man nì m-nibul tiŋkin kpaabi. Boonee m làá yàntī Isirayeel yab ń nyā kí cùú ŋá saraabi kí tīī-u.» 5 Ní Mooyiisi kíí-u yii: «Yóoń-mi ŋyunti ŋun a là ḿ dāá mèè kí tīī si nì a-kpambaliŋ nì a-nibulee, án nín làá ŋá pu ti-Dindaan ń kúntí kpaabi a-cee nì a-diiŋŋinee. Án làá pée kíń kpaabi bin kā Niil mɔɔlinee ŋmaniŋma ní.» 6 Ní Faaroo bí yii: «Á fu mèè fool.» Ní Mooyiisi bí-u yii: «An ŋān̄, m làá fu mèè kí tīī-si ní á béé yii ti-Dindaan ti-Nimbɔtiu nì ubɔ kaa ŋmà. 7 Kpaabi làá fu wāŋkì kí wàatī sii nì a-diiŋŋi nì a-kpambaliŋ nì a-nibul, ní án fu kíń kpaabi bin bí Niil mɔɔlinee ŋmaniŋma.»

8 Mooyiisi nì Aarɔn nyáń Faaroo cee ní Mooyiisi mēē ti-Dindaan ú kúntí kpaabi bin u dūu dáaĺ Faaroo tafalee. 9 Ti-Dindaan nìn ŋá Mooyiisi nín nìn mēē-u puee ní kpaabi nìn kpíì adiinni nì imɔŋki nì tisatin. 10 Ní bi kóoǹ ki bíl̀ akpuku akpuku, ní kitiŋ fōō ki núukì. 11 Ama ŋyunti ŋun Faaroo ká yii digìńdi bíi nyìkitī u-puee ní u pɔ́ɔkì u-pɔbil kaa ŋá min Mooyiisi nì Aarɔn lēe, kii ti-Dindaan nín nìn pée tùkū-bi puee.

Nnaabutataati: inaacib

12 Ti-Dindaan bí Mooyiisi yii: «Tùkù Aarɔn ú dúkutí u-kpandɔŋu kí fáá kitiŋ dikpɔŋkpɔndi ń yīkì kí kpántí inaacib kí gbí Eejipiti tiŋki kɔkɔ.» 13 Ní bi ŋá kii ti-Dindaan nín lī puee. Aarɔn dúkutì u-ŋal ki dū ŋkpandɔ ŋun u ŋúb́ee ki fáá kitiŋ ní dikpɔŋkpɔndi yíkì ki kpántì inaacib ki bīiǹ binib nì tiwaŋkuti pu. Eejipiti tiŋki kɔkɔ poonee, dikpɔŋkpɔndi nìn kpántì inaacib ní. 14 Ní Eejipiti yab kpaŋkpantiibi mun nìn mākaǹ kí dū bi-kpaŋkpantiiku kí kpántí inaacib, ama ní kaa ŋúń. Inaacib nìn mɔ̄tìi dɔ́miń ki bīiǹ binib nì tiwaŋkuti pu. 15 Bikpaŋkpantiibi bí Faaroo yii: «An sá Unimbɔti pɔŋŋu di bíi tūǹ ditundi din bí nee.» Ama nì míǹ kɔkɔee, Faaroo nìn pɔ́ɔkì u-pɔbil. Waa nìn pílifiǹ Mooyiisi nì Aarɔn, kii ti-Dindaan nín nìn pée tùkū-bi puee.

Nnaabunanaati: ikpiŋki

16 Ti-Dindaan bí Mooyiisi yii: «Fool kutaafaau pɔ̀lpɔlee, á fu péé ki kíntí Faaroo ŋyunti ŋun u yaa fu nyáń ki cá dimɔɔgbandee kí tùkù-u yii: <Ti-Dindaan bí yii á yàntī m-nibul ń búntí kí cùú jāam̀-mi. 17 A yaa kaa yāntì bi búntèe, m làá yàntī ikpiŋki ń fu nyā sii nì a-kpambaliŋ nì a-tiŋki nib pu nì a-diiŋŋin. Ikpiŋki gbanti làá kpátí kí gbí Eejipiti yab diiŋŋin kí kpáaǹ kitiŋ laakin bi yúee. 18 Ama yaadalee, m làá gàntī Gooseen tiŋki laakin m-nibul kóòyee. Baa làá ká ikpiŋki gbanti báà ubɔ niin, ní á béé yii man ni-Dindaan bí kitiŋ nee poon. 19 Niinee m làá dāá fīī m-yab ní digàntil ń dòon̄ man nibul nì sii yal kansikin. Fool ní kudaaŋŋu gbanti làá fu ŋá.>»

20 Ní ti-Dindaan lafun ŋá kii u nín lī puee. U yāntì ikpiŋki dɔ́miń ki gbí Faaroo cindin nì u-kpambaliŋ diiŋŋin, ní Eejipiti tiŋki kɔkɔ dūu kpántì ikpiŋki ŋma. 21 Niinee ní Faaroo yíiń Mooyiisi nì Aarɔn ní ki bí-bi yii: «Cùmaan kí ŋá saraabi kí tīī ni-Nimbɔtiu kitiŋ nee poon, ní taa nyā!» 22 Ní Mooyiisi kíí-u yii: «Aayee, an kaa ŋān̄ tí ŋá míǹ, kun puee saraabi bin ti làá ŋá kí tīī ti-Dindaan ti-Nimbɔtiuee sá mbusukpaan ní Eejipiti yab cee. Bi yaa ká ti bíi ŋáań an saraabee, bi làá yāŋkì-ti ataŋkpee kí kpɔ̀ ní^b? 23 An puee ti làá nyā kí còom̀ iwiin ita kuteeu pu ní ti-Dindaan ti-Nimbɔtiu ń dàkà-ti saraabi bin an sá tí ŋá kí tīī-uee.» 24 Ní Faaroo bí-bi yii: «M kíí kí yàntī ní cù kuteeu pu kí ŋá saraabi kí tīī ni-Dindaan ni-Nimbɔtiu, ama ní taa nyā kí cù ndan. Ní mèèmaan ni-Nimbɔtiu kí tīī-mi.» 25 Mooyiisi kíí-u yii: «M yaa pée nyáń a-ceeyee, m làá mèè ti-Dindaan ní foolee ú fu kúntí ikpiŋki sii a-ba pu nì a-kpambaliŋ nì a-tiŋki nib pu. Ama sii Faaroo, á taa ti mɔ̄ntì-ti kí pìin̄ samaa nsan bí taa cù kí ŋá saraabi kí tīī ti-Dindaan.»

26 Mooyiisi nyáń Faaroo ceeyee ní ki mēē ti-Dindaan. 27 Ti-Dindaan nìn ŋá min Mooyiisi bālifèe, ki kúntì ikpiŋki Faaroo nì u-kpambaliŋ nì u-tiŋki nib cee, báà ukpiŋki kaa ti kíǹ. 28 Ama min bí nee muee, Faaroo fātìi tí pɔ́ɔkì u-pɔbil kaa yāntì Isirayeel nibul búntì.