Disaŋkindi 7

1 Ní ti-Dindaan bí Mooyiisi yii: «Pīlifì, m làá dū-si kí kpántí kii Unimbɔtee ní Faaroo cee, ní a-maan Aarɔn ń nīn sá a-bɔnaatiliu. 2 Sii di làá tùkù Aarɔn tin kɔkɔ m sòon̄ nì see ní úǹ ń dūú nàatī Faaroo, án nín làá ŋá pu ú yàntī Isirayeel yab ń nyā u-tiŋkinee. 3 Ŋyunti gbantee ní man ḿ yàntī Faaroo pɔbil ń pɔ̄ɔkì ní ḿ bùtī m-daanti nì m-maamaacib Eejipiti tiŋkin^a. 4 Ama Faaroo kaa làá pīlifiǹ-ni. M làá dàkà Eejipiti yab m-pɔŋŋu, kí dáaĺ bi-tafal ŋkpitim pu, ní kí nyāntí m-nibul Isirayeel yab Eejipiti tiŋkin bí nīn nóó tɔb akiti akiti kii bijanjaliibee. 5 M yaa láa dàkā-bi m-pɔŋŋu míǹ ki nyántì Isirayeel yab bi-kansikinee, niin ní bi dāa béetí yii man di sá ni-Dindaan.»

6 Ní Mooyiisi nì Aarɔn ŋá kii ti-Dindaan nín tīī-bi mara bí ŋá puee deedee. 7 Ŋyunti ŋun bi nìn cūtìi sòon̄ nì Faarooyee, Mooyiisi nìn cáá abin imuŋku inaa, ní Aarɔn cáá abin imuŋku inaa nì abin ata.

Faaroo yíì kaa pílifiǹ Mooyiisi nì Aarɔn

8 Ti-Dindaan bí Mooyiisi nì Aarɔn yii: 9 «Faaroo yaa bālifì-ni yii ní ŋá maamaaci ubɔee, á tùkù Aarɔn yii ú yòon̄ u-kpandɔŋu kí lúkú kitiŋ Faaroo nimbiin, ŋu làá kpántí ukoobu.»

10 Niinee Mooyiisi nì Aarɔn nín cá Faaroo cee, ní ki ŋá kii ti-Dindaan nín bí yii bí ŋá puee. Aarɔn dū u-kpandɔŋu ki lúkú kitiŋ Faaroo nì u-kpambaliŋ nimbiin, ní ŋu kpántì ukoobu. 11 Ní Faaroo yíiń bibɔɔbi nì bikpaŋkpantiibi bin bí Eejipitee, ní bi mun dū bi-kpaŋkpantiiku ki ŋá míǹ mbaantiim. 12 Báà ŋma dū u-kpandɔŋu ki lúkú ní ŋu kpántì ukoobu. Ama ní Aarɔn kpandɔŋu dū bíǹ kpandɔi ki nátì. 13 Nì míǹ kɔkɔee, Faaroo pɔbil gbíntìi pɔ̄ɔ̄ waa gbìl̄ ki tīiǹ Mooyiisi nì Aarɔn kii ti-Dindaan nín pée lī puee.

Nnaabupeepeekaa: nnyim kpántì fatiku

14 Ní ti-Dindaan bí Mooyiisi yii: «Faaroo pɔbil pɔ̄ɔ̄, waa là kí yàntī Isirayeel yab ń búntí. 15 Fool kutaafaauee, á fu kíntí Faaroo ŋyunti ŋun ní u cá dimɔɔgbandee. Ní cīití-u Niil mɔɔl caŋin. Á fu nín̄ ŋúb́ ŋkpandɔ ŋun a dūu kpántì ukoobuee a-ŋaan. 16 Á fu tùkū-u yii: <Ti-Dindaan Eebru yab Nimbɔtiu di túnní-mi ḿ dāá tùkù-si yii á yàntī u-nibul ń cù kuteeun kí jāam̀-u, ama ní ki dāa sāā díǹ nee, aa pílifiǹ-u. 17 M làá dū m-kpandɔŋu nee kí fáá Niil nyim ní mí kpántí fatiku. Ti-Dindaan bí yii ḿ ŋá míǹ ní á béé yii úǹ di sá ti-Dindaan^b. 18 Ijɔm in kɔkɔ bí Niil mɔɔlinee làá kpú, ní nnyim ń bīil̀ ní Eejipiti yab kaa làá ti ŋmā kí nyɔ̀ nnyim gbanti.>» 19 Ti-Dindaan gíti bí Mooyiisi yii: «Tùkù Aarɔn yii ú yòon̄ u-kpandɔŋu kí tàntī Eejipiti yab nyiŋfii nì bi-buŋyi nì bi-nyimbɔbiliŋ kɔkɔ pu, án nín làá ŋá pu Eejipiti nyiŋfii kɔkɔ ń kpántí fatiku ki kpáaǹ bi-booŋŋi nì bi-lɔnti poonee.»

20 Mooyiisi nì Aarɔn ŋá kii ti-Dindaan nín bí yii bí ŋá puee. Aarɔn yōoǹ u-kpandɔŋu ki fáá nnyim min dɔ̄ Niil mɔɔlinee Faaroo nì u-kpambaliŋ nimbiin, ní ibun kɔkɔ nyim kpántì fatiku. 21 Ní ijɔm in kɔkɔ bí dimɔɔlinee kpíì, ní dimɔɔl nyim núukì. Ní Eejipiti yab kaa ti ŋūǹ kí nyɔ̀-mì. Niinee Eejipiti tiŋki kɔkɔ dūu kpántì fatiku.

22 Ama Eejipiti yab kpaŋkpantiibi mun dū bi-kpaŋkpantiiku ki ŋá míǹ mbaantiim. Faaroo pɔbil pɔ́ɔkì waa pílifì Mooyiisi nì Aarɔn, kii ti-Dindaan nín pée lī puee. 23 Faaroo fātìi nín gítí u-dumpu kaa fātìi tɔ́ tin jítèe poon tiba. 24 Ní Eejipiti yab kíĺ ki bíi gbì anyimbɔbil Niil mɔɔl caŋin ki nyàab̀ nnyim kí nyɔ̀, kun puee baa nìn gíti ŋūǹ kí nyɔ̀ dimɔɔl nyim.

25 Ti-Dindaan nìn yāntì Niil mɔɔl kpántì fatiku míǹ ki tin sāā iwiin iluli.

Nnaabuliliiti: kpaabi

26 Míǹ boonee^c ní ti-Dindaan bí Mooyiisi yii: «Cùú tùkù Faaroo yii: <Man ni-Dindaan bí yii á yàntī m-nibul ń nyā kí cùú jāam̀-mi. 27 A yaa yíì yii bí taa cùee, m làá yàntī kpaabi ń dāá kpátí kí gbí a-tiŋki kɔkɔ poon. 28 Kpaabi làá gbí Niil mɔɔl poon, ní kí nyānní kí dāan̄ kí kɔ́ a-dumpu nì a-diikun nì a-dooŋu pu, kí kɔ́ a-kpambaliŋ dumpui nì a-tiŋki kɔkɔ nib dumpui, ní kí kɔ́ bi-faŋyi nì bi-sambiliŋ poon. 29 Kpaabee làá jɔ̄m̀ kí tɔ́kɔń sii nì a-tiŋki kɔkɔ nib nì a-kpambaliŋ kɔkɔ pu.>»