Disaŋkindi 9

Nnaabuŋmooŋmooti: tiwaŋkuti kúm

1 Ti-Dindaan bí Mooyiisi yii: «Cù Faaroo cee kí tùkù-u yii: <Ti-Dindaan Eebru yab Nimbɔtiu bí-si yii á yàntī u-nibul ń nyā kí cùú jāam̀-u. 2 A yaa tí yíì kaa yāntì bi cūtì ki gbíntìi ŋúb́-bee, 3 ti-Dindaan làá yàntī bìlbil kúm ń jēetí a-waŋkuti tin bí a-satinee pu. Bìlbil kúm min pɔ̄ɔ̄yee làá jēetí a-taamui nì a-gutaamui nì a-mammu nì a-naai nì a-piii nì a-ŋoobui pu. 4 Ti-Dindaan làá yàntī digàntil ń dòon̄ Isirayeel yab waŋkuti nì Eejipiti yab waŋkuti kansikin. Isirayeel yab waŋkuluku báà kubɔbɔ kaa làá kpú.»

5 Ti-Dindaan yóoǹ ŋyunti ki bí yii: «Fool ní m làá fu yàntī an bɔti ń jītí Eejipiti tiŋki pu.» 6 Kutaa wúntèe ní ti-Dindaan ŋá min u bí yii u làá ŋée. Eejipiti yab waŋkuti kɔkɔ kpíì, ama Isirayeel yab waŋkuluku báà kubɔbɔ kaa kpíì. 7 Faaroo tú binib cūtìi kpēē ní ki ká yii Isirayeel yab waŋkuluku báà kubɔ kaa kpíì. Nì míǹ kɔkɔee, u pɔ́ɔkì u-pɔbil kaa yāntì Isirayeel yab nyáń.

Nnaabululuuti: anal

8 Ti-Dindaan bí Mooyiisi nì Aarɔn yii: «Jáfímaan dibubul poon ŋfantam aŋaŋkul ali kí nīn ŋúb́, ni yaa bàn̄ Faaroo ceeyee, Mooyiisi ń dūú yàaǹ kutaa pu Faaroo nimbiin. 9 Án làá kpántí kukpɔŋkpɔŋu ní kí bìin̄ Eejipiti tiŋki kɔkɔ pu, ní án yàntī anal ń tɔ̄ binib nì tiwaŋkuti wunti pu kí kpántí ibuun Eejipiti tiŋki kɔkɔn.»

10 Mooyiisi nì Aarɔn jáfì ŋfantam ki bàn̄ ki ká Faaroo, ní Mooyiisi dū ŋfantamee ki yāaǹ kutaa pu Faaroo nimbiin, ní an yāntì anal tɔ́ binib nì tiwaŋkuti wunti pu ki kpántì ibuun. 11 Ibuun gbanti puee, Eejipiti yab kpaŋkpantiibi kaa ŋúń ki yúl̀ Mooyiisi nimbiin, kun puee ibuun nìn píń bi mun wunti pu kii an nín nìn píń Eejipiti yab kɔkɔ wunti pu puee ní. 12 Ama ti-Dindaan nìn pɔ́ɔkì Faaroo pɔbil ní waa pílifiǹ Mooyiisi nì Aarɔn, kii ti-Dindaan nín nìn pée tùkū Mooyiisi puee.

Nnaabululuúti: ataanyiŋkumbil

13 Ti-Dindaan bí Mooyiisi yii: «Fool kutaafaau pɔ̀lpɔlee, á fu cù Faaroo cee kí tùkù-u yii ti-Dindaan Eebru yab Nimbɔtiu bí-u yii: <Á yàntī m-nibul ń nyā kí cùú jāam̀-mi. 14 Di sá kɔŋkɔnnee, m làá dū nnaabu nín bí pu ŋu-ba ŋu-bee kɔkɔ kí tɔ̄ si nì a-kpambaliŋ nì a-tiŋki nib kɔkɔ pu, ní á béé yii ubɔ kaa bí kitiŋ nee pu kí dū u-ba kí ŋmàntīǹ man. 15 M bàà dūmaan bìlbil kúm ki kúntì sii nì a-tiŋki nib dooooyee kí dàkà m-pɔŋŋu. Naŋkɔnampu nee, ni bàà kpíì ki céetì kitiŋ pu pílpil. 16 Ama m yāntì á nīn bí kí ŋmā kí dàkà-si m-pɔŋŋu ní m-yindi ń gbìtī ilaan kɔkɔ^a. 17 Nì míǹ kɔkɔee, aa pú m-nibul nsan bí nyā. 18 An puee fool naŋkɔnampuee, m làá fu yàntī utaaja ń nì ataanyiŋkumbikpaan ń lítí. Doooo Eejipiti tiŋki nín kíĺ ki bí ki dāa sāā ŋyunti nee, an taauee kaa láá nìn̄ ataanyiŋkumbikpaan lítí míǹ ki ká. 19 Míǹ puee yàntī bí kóoǹní a-waŋkuti nì tin kɔkɔ a cáá an bí tisatinee kí cáań mmɔŋki. Kun puee utaaja làá fu nì, ní ataanyiŋkumbikpaan ń fu lítí kí kpɔ̀ binib nì tiwaŋkuti tin bí tisatin kaa kūnní mmɔŋkee.>»

20 Faaroo kpambaliŋ bin nìn fāŋkì ti-Dindaanee nìn yāntì bi-tɔntɔnliibi kpáaǹ tiwaŋkuti ki kūnnì mmɔŋki. 21 Ama ní bin kaa nìn fāŋkì ti-Dindaanee kaa nìn dū tibɔtee ki túń ditundi, ní ki yāntì bi-tɔntɔnliibi nì bi-waŋkuti bí tisatin.

22 Ti-Dindaan bí Mooyiisi yii: «Yòon̄ a-ŋal kí túĺ kutagbɔŋu utaaja ń nì ataanyiŋkumbikpaan ń lítí binib nì tiwaŋkuti nì tikpaajin tin kɔkɔ bí Eejipiti tiŋkinee pu.» 23 Ní Mooyiisi yōoǹ u-kpandɔŋu ki túĺ kutaa, ní ti-Dindaan yāntì itaatantati kíĺ, ní utaaja nìn̄, ní ataanyiŋkumbikpaan lítì, ní utaa tɔ́ kitiŋ kɔkɔ. Ti-Dindaan nìn yāntì utaaja nìn̄ ataanyiŋkumbikpaan lítì Eejipiti tiŋki pu. 24 Utaaja nìn̄ ataanyiŋkumbikpaan lítì nì itaaŋmɔŋmɔ tikpil. U nìn nìn̄ mpɔn mpɔn tikpil. Doooo Eejipiti tiŋki nín kíĺ ki bí ki dāa sāā an yuntiŋuee, an taajau juti kaa láá nìn̄ míǹ ki ká^b. 25 Ataanyiŋkumbikpaan nìn lítì Eejipiti tiŋki kɔkɔ, ki kūū kūū binib nì tiwaŋkuti tin bí tisatinee. Ŋi nìn bíil̀ tikpaajin kɔkɔ ki kɔ́fì isufi in yú tisatinee kɔkɔ. 26 See Gooseen^c tiŋki laakin Isirayeel yab kóòyee baba ní utaaja nì ataanyiŋkumbikpaanee kaa gbēē. 27 Niinee Faaroo yíiń Mooyiisi nì Aarɔn ní ki bí-bi yii: «Min bí nee, m béè yii m yīntì. Ni-Dindaan di sá deedeedaan ní man nì m-nibul fōō dibɔkpil. 28 Mèèmaan ni-Dindaan, utaaja nì ataanyiŋkumbikpaan nì itaatantati ń gbèen̄. M làá yàntī ní nyā, maa làá ti tàan̄-ni.» 29 Ní Mooyiisi bí-u yii: «M yaa nyáń kitiŋ poonee, m làá yòon̄ m-ŋalii kí túĺ ti-Dindaan watil pú kí mèè-u, ataanyiŋkumbikpaan nì itaatantati kɔkɔ làá ŋmīĺ ní á béé yii ti-Dindaan di yì kitiŋ kɔkɔ. 30 Ama m nyí yii nì míǹ kɔkɔee, sii nì a-kpambaliŋ kaa làá tí fàŋkì ti-Dindaan Unimbɔti.»

31 Utaajee nìn nìn̄ ki bíil̀ gulfa nì tijimpin tin bi yíì ɔɔjee, kun puee ɔɔji nìn bíi búù, ní gulfa bíi púkuḿ. 32 Ama tijimpin tin bi yíì bilee nì seegilee^d tíǹ kaa lòoǹ malaa, an pu ní utaajee kaa nìn bíil̀ tíǹ..

33 Mooyiisi yíkì Faaroo cee ki nyáń kitiŋinee ní ki yōoǹ u-ŋalii ki túĺ ti-Dindaan watil pú ki mēē, ní utaaja nì ataanyiŋkumbikpaan nì itaatantati gbēeǹ. 34 Faaroo ká yii utaaja nì ataanyiŋkumbikpaan nì itaatantati gbēeǹee, ní u nìkī ikpiti diŋál ní u nì u-kpambaliŋ fātìi pɔ́ɔkì bi-pɔbiliŋ. 35 Faaroo pɔbil nìn pɔ́ɔkì ní u yíì kaa yāntì Isirayeel yab nyáń, kii ti-Dindaan nín nìn dī Mooyiisi pu ki sòon̄ puee.