17
Ipinangadyi ni Jesus so manga Disipolo Niya
1 Pagkatapos na sabiyun adi ni Jesus, tinnangad iya sadto langit sagkud sinnabi, ?Ama, a oras innabot na. Tawan mo sa kamorawayan a kanimong Igin tanganing pamorawayan ika ka Igin. 2 Ta tinawan mo ako sa kapangyariyan sa ngamin na tawo, tanganing tawan ko sa boway na uda kasagkuran a ngamin na itinao mo sa Igin. 3 Adi amo a boway na uda kasagkuran: a mabisto ika nira, a uusad sagkud matood na Diyos, sagkud mabisto si Jesu Cristo, na isinobol mo. 4 Ipinabayad ko a kamorawayan mo sa kinaban, tapos ko na a trabawong ipinagibo mo kanaku. 5 Kaya Ama, itao mo kanaku ngowan a kamorawayan na daradara ko sa kaibaan mo bago pa lalangun a kinaban.?
6 ?Ipinabisto ko na ika sadto manga tawong itinao mo kanaku galin sa kinaban. Sadiri mo sira, sagkud itinao mo sira kanaku. Kinoyog nira a manga oosipun mo. 7 Isi na nira na a ngamin na itinao mo kanaku galin kanimo, 8 ta itinottoro ko kanda a manga katottoroan na itinao mo kanaku, sagkud inako man nira. Nasisigoro nira na ako matood na galin kanimo, sagkud naniniwala sira na ika a nagsobol kanaku.
9 Ipinapangadyi ko sira, bukung a kinaban na adi a ipinapangadyi ko kindi a ngamin na itinao mo kanaku, holi ta sira kanimo. 10 A ngamin na kanaku, kanimo, sagkud a ngamin na kanimo, kanaku sagkud e pamomorawayan ako sa paagi nira. 11 Sagkud ngowan, mig-iyan na ako kanimo, babayaan ko na a kinaban, alagad sira nasa kinaban pa. Amang banal, ingatan mo po sira sa paagi ka kapangyariyan ka ngaran mo, a ngaran na itinao mo kanaku, tanganing kin paonong ika sagkud ako uusad, amo man sira magin usad. 12 Mantang kaiba pa nira ako, iningatan ko sira sa paagi ka kapangyariyan ka ngaran mo, a ngaran na itinao mo kanaku. Inataman ko sira tanganing uda kanda mauda, pwera ka tawong nag-aanap ka kanyang kapaamakan, tanganing maotob a kasoratan. 13 Alagad ngowan omiiyan na ako kanimo, sagkud sinasabi ko adi mantang nasa kinaban pa ako tanganing mapono sira ka kaogmaan ko. 14 Naitao ko na kanda a oosipun mo, sagkud ikinaungut sira ka manga tawo sa kinaban na adi, ta buku na sirang taga kinaban, arug kong bukung taga kinaban. 15 Diri ko ipinapangadyi na koon mo sira sa kinaban na adi, kindi proteksyonan mo sira ki Satanas! 16 Buku sirang taga kinaban, arug ko na bukung taga kinaban. 17 Pakangbanalun mo sira ka kamatoranan, ta a oosipun mo kamatoranan. 18 Isinosobol ko sira sa kinaban arug ka pagkasobol mo kanaku sa kinaban. 19 Holi kanda, itinao ko a kanakung sadiri kanimo, tanganing sira man maitao kanimo sa paagi ka kamatoranan.?
20 ?Buku sana sira a ipinapangadyi ko, kindi pati man a manga naniniwala kanaku holi ko paayag ko manga parasonod ko. 21 Ipinapangadyi kong magkauusad logod sira ngamin, Ama, kin paonong ika sadi kanaku, sagkud ako san kanimo, sagkud sira man magin usad kanatu, tanganing magtobod a kinaban na isinobol mo ako. 22 Itinao ko kanda a pareyong kamorawayan na itinao mo kanaku, tanganing sira magin usad, arug mo sagkud ako na uusad. 23 Ako isan kanda sagkud ika sadi kanaku, tanganing sira magin usad sana. Holi kadi, maiisiyan ka manga tawo sa kinaban na ako isinobol mo sagkud nabubutan mo sira arug ka pagkabuut mo kanaku.?
24 ?Ama, itinao mo sira kanaku sagkud gosto ko na makaiba sira kin sari ako tanganing mabayad nira a kamorawayan ko, kamorawayan na itinao mo kanaku, ta nabutan mo ako bago pa lalangun a kinaban. 25 Matanos na Ama, diri ika bisto ka manga tawo sa kinaban, alagad bisto ko ika, sagkud isi man ka manga itinao mo kanaku na ika a nagsobol kanaku. 26 Ipinabisto ta ika kanda sagkud padagos na ipabibisto, tanganing a pagkabuut mo kanaku magpadagos kanda, sagkud ako man magpadagos kanda.?