16
1 ?Sinasabi ko adi kaninyo tanganing diri kamo maudaan sa pagtobod kanaku. 2 Isisikwal nira kamo sadto manga sinagoga, sagkud omaabot a panawon na a siisay man na ginnuraan kaninyo mig-unang nagsisirbi iya sa Diyos. 3 Sagkud gigibowon nira adi ta diri nira ako bistado o a Ama. 4 Alagad sinasabi ko adi kaninyo, tanganing kin omabot a panawon na gibowon nira a manga bagay na adi, marumruman ninyo a sinabi ko kaninyo.?
A Trabawo ka Espirito Santo
?Diri ko adi sinabi kaninyo kadto, ta kaiba pa ako ninyo. 5 Alagad ngowan omiiyan na ako sadto nagsobol kanaku, alagad uda basang ni usad kaninyo innonga kin sari ako mig-iyan. 6 Sagkud ngowan na sinabi ko na adi kaninyo, a kaninyong poso napono sa kamunduan. 7 Alagad kaipowan ninyong maisiyan a kamatoranan. A paggalin ko makararaay kaninyo, ta diri omiiyan kaninyo a Paratabang kin diri ako miggalin. Alagad kin uda na ako, ipadadara ko iya kaninyo. 8 Pag-abot niya patotonayan niya sa manga taga kinaban na sala a pagkabisto nira manungud sa kasalan, manungud sa pagigin matanos, sagkud a pag-osgar ka Diyos. 9 Sala sira manungud sa kasalan, holi ta diri sira nagtotobod kanaku, 10 sala sira manungud sa pagigin matanos, holi ta omiiyan na ako sa Ama, sagkud diri na ninyo ako mababayad, 11 sagkud sala sira manungud sa pag-osgar ka Diyos, ta inosgaran na a namomoon ka kinaban na adi.?
12 ?Dakul pa akong manga sasabiyun kaninyo, alagad diri pa ninyo kayang intindiyun ngowan. 13 Alagad pag-abot ka Espirito ka Kamatoranan, aantabayan niya kamo ka ngamin na kamatoranan galin sa Diyos. Ta a sasabiyun niya bukung galin sa sadiri niya, kindi sa narungug niya, sagkud ipaaayag niya a manungud sa manga mingyariyun sa omaaboton. 14 Pamomorawayan niya ako ta aakoon ka Espirito galin kanaku a ipaaayag niya kaninyo. 15 A ngamin na sadiri ka kanakung Ama kanaku, kaya sinabi ko na galin kanaku a ipaaayag kaninyo ka Espirito.?
Kamunduan na Magigin Kaogmaan
16 ?Gatikot na sanang panawon diri na ninyo ako mababayad, sagkud pagkatapos ka gatikot na panawon, mababayad ninyo ako otro.?
17 So nagkapirang disipolo nag-osip-osip, ?Ono kaya a buut niyang sabiyun? Sinabi niya kanatu na gatikot na sanang panawon diri na ninyo ako mababayad, pagkatapos sa gatikot na panawon, mababayad ninyo ako sagkud sinabi man niya, ?Holi ta omiiyan ako sa kanakung Ama? ? 18 Ono buut sabiyun niya ka gatikot na panawon? Diri ta maintindiyan a sinasabi niya.?
19 Isi ni Jesus na gosto nirang omonga kanya, kaya sinnabi iya kanda, ?Nag-iinongaan kamo manungud ko sinabi kong, ?Gatikot na sanang panawon diri na ninyo ako mababayad, pagkatapos sa gatikot na panawon, mababayad ninyo ako otro? ? Bukung amo yan a pinag-oosipan ninyo? 20 Sinasabi ko kaninyo a kamatoranan: migtangis kamo sagkud migmundu, alagad a kinaban mig-ogma. Migmundu kamo alagad a kamunduan ninyo mababalyowan sa kaogmaan. 21 Kin a babayi madali ng mangigin, namumundu iya ta a kulug ka kanyang pingngigin innabot na, alagad kin a igin naipangigin na nalilingawan niya a kulug ta naoogma iya na so igin naipangigin na. 22 Arug man kamo kan: Ngowan namumundu kamo, alagad mababayad ko kamo otro, sagkud mapopono a kaninyong poso sa kaogmaan na diri maaaguw ka kiisay man.?
23 ?Sa alduw na an diri na ninyo kaipowan na mag-onga kanaku. Tandaan ninyo: onoman na ayatun ninyo sa Ama sa ngaran ko itatao niya kaninyo. 24 Anggan ngowan uda pa kamo inaayat kanya sa ngaran ko. Omayat kamo, sagkud kamo makareresibi, tanganing makompleto a kaninyong kaogmaan.?
Kapangganaan Kontra sa Kinaban
25 ?A manga adi sinabi ko kaninyo sa paagi sa parabola. Alagad omaabot a panawon na diri na ako migtottoro kaninyo sa arug kading paagi, kindi deretso na akong migtottoro manungud sa Ama. 26 Sa alduw na an, omaayat kamo kanya sa ngaran ko sagkud diri ko sinasabi na ako mismo a mig-ayat sa Ama para kaninyo. 27 Nabubutan kamo ka Ama, ta nabutan sagkud naniwala kamo na galin ako sa Diyos. 28 Galin ako sa Ama sagkud inniyan sadi kinaban, ngowan gomagalin na ako sadi kinaban sagkud bomabalik sa Ama.?
29 Sinabi ko manga disipolo niya, ?Ngowan po deretsowan na a pag-osip mo kanamu sagkud buku ng sa paagi sa parabola. 30 Isi na po namu ngowan na isi mo a ngamin na bagay, sagkud diri na kaipowan na ongaun pa ika ka siisay man. Holi kadi, naniniwala po kami na ika galin sa Diyos.?
31 Sinnimbag si Jesus, ?Naniniwala na kamo ngowan? 32 A oras omaabot, sagkud ngowan na, na migkasowaysoway kamo. Migkanyakanya kamong agi, sagkud babayaan ako. Alagad, diri ako nagsosolo ta kaiba ko a Ama. 33 Sinasabi ko adi kaninyo tanganing magkaagko kamo katoninungan sa pakikiusad ninyo kanaku. Makamamati kamo sa kadipisilan sa kinaban na adi, alagad pakusugun ninyo a kaninyong buut! Dinaug ko na a kinaban.?