17
Kasalan, Pagtobod sagkud Obligasyon
(Mt. 18:6-7, 21-22; Mk. 9:42)
1 Sinabi ni Jesus sadto manga disipolo niya, “Dawa kono diri mauuda a pinaggagalinan ka kasalan, alagad erak man ka manga tawong amo a pinagponan ka kasalan. 2 Maraay pa kanya a guran sa usad na dakulung galingan na bato sa liug sagkud iapon sa dagat, kisa amo pagponan ka kasalan ka usad na manga sassadit na adi. 3 Kaya magmaan kamo!
Kin magkasala a ngod mo, sabiyan mo iya, sagkud kin iya magsulsul, patawarun mo. 4 Kin iya nagkasala kanimo pitong beses sa usad na alduw, sagkud pitong beses man magrapo kanimo sagkud magsabing, ‘Nagsusulsul ako’ , patawarun mo.”
Pagtobod sa Diyos
5 Sinabi ko manga apostol sa Kagorangnan, “Rogangan mo pa a kanamung pagtobod!”
6 Nagsimbag so Kagorangnan, “Kin agko kamo pagtobod na arug kasadit ka tolang sa mostasa, pwede ninyong sabiyun sa sikomorong adi, ‘Magabot ika sagkud matanum sa dagat’ , somosonod an kaninyo.
7 Ipamutang ta na usad kaninyo agko mamandaan na nag-aarado o nag-aataman sa manga karnero. Paggalin niya sadto bokid, sasabiyan raw ninyo na, ‘Mayna, ula na tanganing magkaun na ika’ , 8 buku raw na arug kadi a sasabiyun ninyo, ‘Ianda mo ko sa panggab'iyan, magsangli ika sagkud pagsirbiyan mo ako mantang nagkakaun, pagkatapos ko, magkaun naman ika.’ 9 Pasasalamatan raw niya so mamandaan ta ginigibo niya so iminamanda kanya? 10 Arug man kan kamo, kin nagibo na ninyo a ngamin na ipinagigibo kaninyo, sasabiyun ninyo, ‘Kami mamandaan sana na uda kamutangan; ginigibo sana namu a kanamung trabawo’ . ”
Pagpaomay ko Sampolong Pudpurun
11 Sa pag-aagi ni Jesus paiyan sa Jerusalem, naagi iya sadto karoronan ko Samaria sagkud Galilea. 12 Ko lomuluug na iya sadto baryo, sinabat iya ko sampolong pudpurun. Pinnondo sira sadto oroarayo, 13 sagkud nagkagrat, “Jesus, Kagorangnan, maerak man po ika kanamu!” 14 Ko mabayad niya sira, nagsabi iya, “Omagi kamo, ipabayad ninyo a sadiri ninyo sadto manga padi.” Ko sira nag-aagi na, naomayan na sira.
15 Agko usad kanda, ko mamangno na naomayan na sira, nagbalik sagkud nag-omaw sa Diyos sa makusug na boses. 16 Dinnapla iya sadto atobangan ni Jesus sagkud nagpasalamat, sagkud a tawong adi Samaritano.
17 Nag-onga si Jesus, “Bukung sampolo so naomayan? Sari so siyam? 18 Uda ibang natorakan sagkud nagbalik tanganing mag-omaw sa Diyos pwera sa dayowan na adi?” 19 Pangala, sinabiyan iya ni Jesus, “Tomindug ika sagkud omagi; pinaomayan ika holi ka kanimong pagtobod.”
So Pag-abot ka Kahadian ka Diyos
(Mt. 24:23-28, 37-41)
20 Ngowan, inonga si Jesus ko manga Pariseo kin kono mig-abot a kahadian ka Diyos. Sinnimbag iya, “A kahadian ka Diyos mig-abot na uda tanda na mababayad, 21 uda man migsabi na, ‘Nagpoon na sadi o sadto,’ ta a kahadian ka Diyos san na inyo.”
22 Pangala, sinabi niya sa manga disipolo, “Mig-abot a panawon na mamawutun ninyo na mabayad a usad sa manga alduw ka Igin sa Tawo, alagad diri an ninyo mababayad. 23 Agko man migsabi kaninyo, ‘Sadto iya! o Isadi iya!’ Diri kamo magsonod kanda. 24 Ta kin a Igin sa Tawo magbalik na otro, migliwanag iya arug sa kitkilat na nagkikilyab sa kalangitan sagkud nagliliwanag sa tigsaporo. 25 Alagad kaipowan ngona iyang makamati sa dakulung kasakitan, sagkud isikwal ka manga tawo ngowan.
26 Kin ono so nangyari ko panawon ni Noe, amo man mingyari ka pagpaiyan sadi ka Igin sa Tawo. 27 A manga tawo nangagkakaun, nangag-iinom sagkud nangag-aagom, anggan sa alduw na naglonad si Noe sa arka. Pangala, nag-abot so baha sagkud nalumus sira ngamin.
28 Pareyo man ko panawon ni Lot: so manga tawo nangagkakaun sagkud nangag-iinom, nagbabakal sagkud nangagpapabakal, nagtatanum sagkud nagtotogrok sa baluy. 29 Alagad ko alduw na bayaan ni Lot so Sodoma, nag-oran sa kalayo sagkud asopre sagkud natotong sira ngamin.
30 Arug man kan a alduw na migpabayad a Igin sa Tawo. 31 Sa alduw na an, a tawong nasa atupa diri na mababa tanganing koon a kanyang pagsorosadiri sadto luug ko kanyang baluy. So nasa bokid diri na magpaoli. 32 Narumruman ninyo so agom ni Lot. 33 A siisay man na gostong iligtas a kanyang boway, mauudaan kan, sagkud a siisay man na maudaan ka boway niya, amo makaliligtas kanya. 34 Sinasabiyan ko kamo: Agko darwang lalaki na natotorog sa usad na batangan; a usad kokoon sagkud a usad itatagak. 35 Agko man darwang babayi na magkaibang naggagalingan; a usad kokoon sagkud a usad itatagak. 36 Agko man darwang lalaking nagtatrabawo sa bokid, a usad kokoon sagkud a usad itatagak.”
37 Nag-onga so manga disipolo, “Sari po, Kagorangnan?”
Nagsimbag iya, “Kin sari a guraan, sadto man nangagtitipon a manga bowetreb.”