18
A Parabola ko Babaying Balo sagkud Hokom
1 Iinistorya ni Jesus so usad na parabola tanganing itottoro kanda na kaipowan sirang pirming mangadyi sagkud diri maudaan sa paglaom. 2 Sinabi niya, “Sa usad na syodad agko usad na hokom na uda pagkatakot sa Diyos sagkud uda irinerespetong tawo. 3 Sa syodad man na adto agko usad na balo. Pirmi iyang nag-iiyan sadto hokom sagkud sinasabi, ‘Tabangan po ninyo ako tanganing diri ako madaug ka kasogot ko.’ 4 Uban ng nagparasayoma so hokom, alagad sa katapos-taposi sinabi niya sa sadiri niya, 'Dawa diri ako nakatatakot sa Diyos sagkud uda irinerespetong tawo, 5 holi ka balong adi na dinidistorbo ako, itatao ko na kanya kin ono a inaayat niya ta baka maoyam pa ako sa pagparabalikbalik niya.’ ” 6 Sinabi pa ka Kagorangnan, “Irungga ninyo a sinabi ka hokom na maraut. 7 Diri raw itatao ka Diyos a katanosan sa manga pinili niya na nag-aadrangay kanya alduw gab'i? Mag-ablada raw iya sa pagtabang kanda? 8 Sinasabi ko kaninyo, itatao tolos niya kanda a inaayat nira. Alagad sa pagbalik otro ka Igin sa Tawo sa kinaban na adi, agko pa kaya iya mababayad na tawong nagtotobod kanya?”
A Parabola ka Pariseo sagkud Parasingil sa Bowis
9 Sinabi man niya a parabolang adi sadto mga tawong mababa a pagsilung sa iba sagkud nag-uunang sira matanos. 10 “Agko darwang lalaking nagluug sa Templo tanganing mangadyi, so usad Pariseo sagkud so usad parasingil sa bowis. 11 Tinnindug so Pariseo sagkud nangadyi sa arug kadi sa sadiri niya, 'O Diyos nagpapasalamat ako kanimo ta buku akong arug ka iba na mataban, nandadaya, nananambay, o kaya arug ka parasingil sa bowis na adi. 12 Darwang beses akong nag-aayono sa luug sa usad na semana sagkud nagtatao man ako ka ikasampolong parte galin sa ngamin kong natotorakan.’ 13 Mantang, so mga nagsisingil sa bowis man nakatindug sa arayo sagkud diri basang makasilung sa langit. Tinotobtob niya so ruruggan niya sagkud sinasabi, ‘O Diyos, maerak po kamo kanaku na usad na makasalan!’ 14 Sinasabi ko kaninyo, a lalaking adi nag-oling pinatawad sa mga kasalan niya, alagad so ona diri. Ta a siisay man na nagmamataas ibinababa sagkud a nagpapakababa, itinataas.”
Benendisyonan ni Jesus so Sassadit na Igin
Mt. 19:13-15; Mk. 10:13-16
15 Irinarapo ko mga tawo ki Jesus magin so kandang manga talaginun tanganing ayatun na ipatong niya sadto mga igin a kamut niya. Ko mabayad adi ko mga disipolo, inungtan nira so mga tawo. 16 Alagad binaoy ni Jesus so mga disipolo sagkud sinabiyan, “Bayaan ninyong romapo kanaku a manga igin. Diri ninyo sira pag-ulangun holi ta sa manga arug nira a mapabibilang sa Kahadean ka Diyos. 17 Tandaan ninyo: a siisay man na diri nag-aako sa paghahadi ka Diyos arug ka usad na igin diri basang pighadean ka Diyos.”
So Lalaking Mayaman
Mt. 19:16-30; Mk. 10:17-31
18 Agko usad na namomoon sa banwaan na nag-onga ki Jesus, “Maraay na Maestro, ono po a kaipowan kong gibowon tanganing maako ko a boway na uda kasagkuran?”
19 Sinnimbag si Jesus, “Ngata mo ako ta binabaoy na maraay? A Diyos sana a maraay! 20 Isi mo a manga kamandaan, ‘Diri ika manambay, diri ika mangguraan, diri ika magtaban, diri ika magtestigo sa botig, sagkud irespeto mo a kanimong ina sagkud ama.’ ”
21 Sinabi ko lalaki, “A ngamin pong an ginigibo ko poon pa ko igin pa ko.”
22 Pagkarungug kadi sinabi ni Jesus, “Usad na bagay pa a kolang kanimo. Ipabakal mo a ngamin mong pagsorosadiri sagkud ipanao mo sa manga pobre a kinabakalan, sagkud migkaagko ika kayamanan sadto langit. Pagkatapos bumalik ika, sagkud somonod kanaku.” 23 Namundu so lalaki ko marungug adto, ta malangyaman kaya niya.
24 Nabayad ni Jesus na namumundu so lalaki kaya sinabi niya, “Malakadipisil para sa manga mayayaman a makaluug sa kahadean ka Diyos! 25 Mas madali pang makaluug sa lobot ka ragom a usad na kamelyo kisa makaluug sa kahadean ka Diyos a usad na mayaman.”
26 Nag-onga so manga isadto na nag-iirungug, “Kin arug kan, siisay po kaya a makaliligtas?”
27 “A manga bagay na diri pwedeng gibowon ka tawo kayang gibowon ka Diyos, ” simbag ni Jesus.
28 Nagsimbag man si Pedro, “Silngan po ninyo, binayaan na po namu a istaran namu sagkud nagsonod kaninyo.”
29 Sinabi ni Jesus kanda, “Tandaan ninyo, kin bayaan ka siisay man a baluy niya, agom, manga ngod, manga kag-igin, o manga igin alang-alang sa kahadean ka Diyos, 30 mig-ako ika na orog pa sa boway na adi. Sagkud sa panawon na omaabot, mig-ako iya sa boway na uda kasagkuran.”
Ikatolong Pagsabi ni Jesus manungud sa Kagranan Niya
Mt. 20:17-19; Mk. 10:32-34
31 Isinoway ni Jesus so Dose sagkud sinabi kanda, “Mig-iyan kita sa Jerusalem sagkud sadto maootob a ngamin na isinorat ko manga propeta manungud sa Igin ka Tawo. 32 Itatao iya sa kamut ka manga bukung Judio, pigtoyatoyaun, sagkud lolostaban. 33 Popokpokon iya sagkud guguranun, alagad sa ikatolong alduw bobowayun iya otro.” 34 Alagad so Dose uda naintindiyan sadto narungug nira; diri nira maintindiyan so buut sabiyun kadto, sagkud diri man nira maintindiyan so sinasabi ni Jesus.
Pinaraay so Lalaking Bota
Mt. 20:29-34; Mk. 10:46-52
35 Ko arani na si Jesus sa Jerico; agko usad na lalaking bota so nakaula sadto gilid ko raran sagkud nakikilimos. 36 Ko marungug niyang naglalabos so malakadakul na tawo, nag-onga iya kin ono so nangyayari.
37 “Nag-aagi si Jesus na tagaNazaret,” simbag nira kanya.
38 Sagkud nagkagrat iya, “Jesus, Igin ni David! Kaerakan mo po ako!”
39 Pinapondo iya ko manga tawo sadto onaan niya, alagad mas orog na magkusug so pagkagrat niya, Igin ni David, maerak po ika kanaku!”
40 Pinnondo si Jesus sagkud ipinabaoy so bota. Pagrapo ko bota inonga iya ni Jesus, 41 “Ono a gosto mong gibowon ko para kanimo?” “Kagorangnan, gosto ko po kintanang makabayad otro,” simbag niya.
42 Sagkud sinabi ni Jesus, “Mingyari a gosto mo! Pinaraay ika ka pagtobod mo.”
43 Kadto tolos nakabayad so bota sagkud nagsonod ki Jesus na nag-oomaw sa Diyos. Ko mabayad adi ko manga tawo, nag-omaw sira ngamin sa Diyos.