Marcos 9

¹ Sinabi ni Jesus sadto manga disipolo, “Sinisigoro ko kaninyo na agko nagkapira sadi manga nakatindug na adi na diri migraan anggan sa mabayad nira a pag-abot ka Kahadian ka Diyos na pono sa kapangyariyan.”

Pagkabayad ka Kahadian ka Diyos

(Mt. 17:1–13; Lk. 9:28–36)

² Pagkaagi sa unum na alduw, iniba ni Jesus sira si Pedro, Santiago sagkud Juan paiyan sa usad na alangkaw na kolod na uda ibang tawo. Pangala ko isadto na sira nagbago so itsora ni Jesus sadto mismo atobangan nira. ³ Pangala linniwanag saigo sa kapotian so bado niya. Uda makaarug kadi sa kapotian sadi kinaban dawa pa onong paagi sa pagkola. ⁴ Nabayad man ko tolong disipolo na bigla na sanang tinnonga si Elias sagkud si Moises na kaosip si Jesus. ⁵ Pangala nakasabi si Pedro sa, “Maestro, tama sana pong kaiba mo kami sadi tanganing makagibo kami sa tolong balayan na masisirongan, usad po kanimo, usad ki Moises sagkud usad ki Elias.” ⁶ Nasabi adi niya ta diri niya isi kin ono sasabiyun ta grabi so katakotan nira. ⁷ Pangala nalindongan sira ngamin sa panganoron. Pangala agko boses na nagngabil galin sadto panganoron, “Iya a nabubutan kong Igin, mag-irungug kamo kanya.” ⁸ Pagkarungug nira ko boses nangalagkalag tolos sira alagad uda na sira ibang nabayad kindi si Jesus na sana.

⁹ Ko pababa na sira si Jesus galin sadto kolod, pinatanidan niya so tolo na diri mag-istorya kiisay man manungud ko nabayad nira anggan na diri naboboway otro a Igin sa Tawo. ¹⁰ Kaya inilum sana nira so nabayad nira alagad nag-oorongaan sira sa kada usad kin ono buut sabiyun ni Jesus ko sinabi niyang ‘pagkaboway otro’ .

¹¹ Pangala inonga si Jesus ko tolo, “Ngata po ta sinasabi ka manga paratottoro ka Layi ni Moises na kinakaipowan na omabot na ngona si Elias bago a Cristo?” ¹² Sinnimbag si Jesus, “Matood na kinakaipowan na omabot ngona si Elias tanganing ianda a ngamin na bagay. Alagad nakasorat man sa Kasoratan na kinakaipowan magtius saigo sa kadakul na kasakitan sagkud diri aakoon ka manga namomoon ka manga Judio a Igin sa Tawo. ¹³ Sinasabi ko kaninyo na innabot na si Elias sagkud itrinato iya ko manga tawo sa kin ono sanang gosto nirang gibowon kanya arug ko nakasorat sa Kasoratan manungud kanya.”

Pinaraay ni Jesus so Igin na Sinasaniban sa Maraut na Espirito

(Mt. 17:14–21; Lk. 9:37–43)

¹⁴ Ko makababa na si Jesus kaiba so tolo, nabayad nira so malakadakul na tawo na nakapalibot sadto natagak na manga disipolo. Isadto man so manga paratottoro na nakikidiskotir kanda. ¹⁵ Pangala pagkabayad tolos kanda ko manga tawo, nangalas sira kaya nagdaralaganan sira parapo ki Jesus sagkud kinomosta iya. ¹⁶ Pangala inonga ni Jesus so manga tawo, “Ono a pinagdidiskotiran ninyo?” ¹⁷ Usad na lalaki sadto katatawowan so sinnimbag, “Maestro, dinara ko po kanimo a igin ko ta sinasaniban iya sa ngolang espirito. ¹⁸ Pag-inaataki iya ka maraut na espiritong adi, pinatotomba iya, pinasosobosobo a nganga sagkud magraragut a ngipun pangala manonoog a awak niya. Nag-ayat po ako sa tabang sa manga disipolo mo na kin pwedeng palayasun a maraut na espirito sa igin ko alagad diri nira kayang gibowon.”

¹⁹ Sinnimbag si Jesus, “Manga uda pagtobod! Anggan kono ko pa kamo kaipowan ipig-ibaiba? Anggan kono ko pa kamo kaipowan tottoroan? Daraa raw sadi iton na igin.” ²⁰ Kaya dinara nira so igin ki Jesus. Ko mabayad si Jesus ko espiritong sinnanib sadto igin, pinangubugkubug kadi so igin. Natomba iya sadto raga pangala nagparaligid sagkud nagparasobo na so nganga. ²¹ Pangala inonga ni Jesus so ama ko igin, “Gaomno na kauban na arug iya kan?” Sinnimbag so ama, “Poon pa po ko igin pa sana iya. ²² Dakul na pong beses na inapon a igin ko ka maraut na espirito sa kalayo sagkud sa salog tanganing guranun. Kaya kin agko po ika magiginibo, maerak po ika sagkud tabangan mo po kami.” ²³ Sinnimbag si Jesus, “Ono buut mong sabiyun ‘kin agko ika magiginibo?’ Posibli a onoman ngamin sa tawong agko pagtobod!” ²⁴ Kaya malang daling nakakagrat ko ama, “Nagtotobod po ako. Alagad tabangan mo po akong mauda a pagdorodarwa ko.” ²⁵ Pangala ko mamangno ni Jesus na malang daling nagdadakul ko manga tawo, pinagsabiyan niya so maraut na espirito, “Espiritong ngola sagkud bungug, lomayas ika siton! Nongka na ikang bomalik pa sadi igin na adi!” ²⁶ Nagparakagrat so maraut na espirito, pangala pinangubugkubug niya so igin bago adi linnowas. Kaya bagana bangkay so itsora ko igin. Kadakul ngani ko sinnabing guraan na iya. ²⁷ Pangala kinaptan ni Jesus so kamut ko igin sagkud tinabangan na bomangon pagkatapos nakatindug na iya.

²⁸ Pangala ko makadagos na si Jesus sagkud so manga disipolo sa usad na baluy, pailum nirang inonga si Jesus, “Ngata raw po ta diri namu kayang palayasun a sinnanib na adto?” ²⁹ Sinnimbag si Jesus, “Diri mapapalayas a arug kadtong espirito kin uda pagpangadyi.”

Sinabi Otro ni Jesus so Kagranan Niya

(Mt. 17:22,23; Lk. 9:43b-45)

³⁰ Pangala paggalin sadto logar na adto nagpadagos sira sa pag-agi. Linnabos sira sadto logar ko Galilea. Abu ni Jesus na agko makaisi ko paglabos nira ³¹ ta tinotottoroan niya so manga disipolo na iya a Igin sa Tawo tatraydoron sagkud ipararakup ka manga gomuguraan kanya. Alagad pagkaagi sa tolong alduw pagkagraan niya maboboway iya otro. ³² Diri naintindiyan ko manga disipolo kin ono buut sabiyun ko sinabi ni Jesus alagad takot man sirang mag-onga.

A Tawong Nagmamawut na magin Alangkaw

(Mt. 18:1–5; Lk. 9:46–48)

³³ Pangala nakaabot sira sa logar na a ngaran Capernaum. Ko makaluug na sira sa usad na baluy, inonga ni Jesus so manga disipolo, “Ono pinagdidiskotiran ninyo sobagong nag-aagi kita?” ³⁴ Uda kanda sinnimbag ta sadto kaya agyan pinagdidiskotiran nira kin siisay kanda pinakaimportanti. ³⁵ Kaya innula si Jesus, pinarani niya so manga disipolo pangala sinabi, “A siisay man na nagmamawut na magin alangkaw sa ngamin kinakaipowan na magin ababa sa ngamin sagkud magin sirbidor ka ngamin.”

³⁶ Pangala nagkoko sa usad na igin si Jesus. Pinatindug niya adi sadto atobangan ko manga disipolo pangala kinulkul pagkatapos sinabi niya kanda, ³⁷ “A siisay man na omako sa usad na igin alang-alang kanaku innaako kanaku. Kaya a siisay man na omako kanaku buku sana ako a inaako kindi pati a nagmanda kanaku.”

Buku sanang Disipolo a agko Oportonidad na Magsirbi sa Diyos

(Lk. 9:49,50)

³⁸ Sinabi ni Juan ki Jesus, “Maestro, nakabayad po kami sa lalaking nagpapalayas sa demonyo gamit a ngaran mo. Buku po iyang kaiba ta kaya sinabiyan po namu iyang pomondo.” ³⁹ Sinnimbag si Jesus, “Diri ninyo iya pagpugulan ta a siisay man na nakakagibo sa milagro sa paagi ka ngaran ko diri man tolos migngabil sa maraut manungud kanaku. ⁴⁰ A siisay man na bukung kontra kanatu, oyon kanatu. ⁴¹ Sinisigoro ko kaninyo na matatawan sa premyo ka Diyos a siisay man na magtao kaninyo sa tobig na maiinom sa rason na kausad ko kamo.

Romayo sa Rason ka Pagkakasala

(Mt. 18:6–9; Lk. 17:1,2)

⁴² A siisay man na nagigin rason ka pagkakasala ka manga ordinaryong nagtotobod kanaku mas maray pa kanyang guran sa magubat na panggiling na bato sa liug sagkud iolog sa dagat ⁴³ Kaya kin a kamut ninyo ana nagigin rason ka pagkakasala ninyo, potolon mo. Mas maray pang usad sana kamut na maiyan sa langit kisa agko darwang kamut alagad maiyan man sana sa impiyerno kin sari ana kalayo diri napaparung. ^44-45 Kin a tiil mo a rason ka pagkakasala mo, potolon mo ta mas maray pang pilay na maiyan sa langit kisa agko darwang tiil na iapon man sana sa impiyerno. ^46-47 Kin a mata mo a rason ka pagkakasala mo, ilwatun mo ta mas maray pang agko usad na matang makaluug sa kahadian ka Diyos kisa agko darwang matang iapon sa impiyerno ⁴⁸ logar na kin sari a nagkakarabang ka kalayo uda kasagkuran sagkud logar na kin sari a manga olod na nagkakaun kanda diri natitigbak.

⁴⁹ Sinasabi ko adi ta poporbaran a pagkadibotado kanaku ka kada disipolo ko sa paagi ka manga kadipisilan. ⁵⁰ Arug ka asin, a kada disipolo importante. Alagad kin uda na asgad a asin, uda na adi kamutangan bilang asin. Pareyo man ka disipolong buku ng dibotado kanaku uda na iya kamutangan. Kaya pirmi kamong magin dibotado kanaku tanganing matoninung a pag-iribanan ninyo.”