8
Pinakaun ni Jesus so 4,000 Katawo
(Mt. 15:32–39)
1 Makaagi so pirang alduw, malakadakul na naman otro ko manga tawong nag-iirungug kanya. Uda sira dorodarang manga pagkaun kaya binaoy ni Jesus so manga disipolo pangala sinabi, 2 “Naeerak ako ka manga tawo ta tolong alduw na sirang nagparasonodsonod kanaku sagkud naobos na so pagkaun nira. 3 Kin paoliun ko sira baka makapoy sira sa aagyan ta a iba pati kanda arayo pa a baluy.” 4 Sinnimbag so manga disipolo, “Kalangtadan po adi kaya diri po kita sadi makaaanap sa tinapay na pwedeng ipakaun sa arug kadi kadakul na tawo.” 5 Alagad inonga sira ni Jesus, “Pirang pidasong tinapay a dorodara ninyo?” Sinnimbag sira, “Pito po.” 6 Pangala ko masabiyan na ni Jesus so manga tawo na omula sadto raga, kinoko na niya so pitong pidasong tinapay sagkud nagpasalamat. Pangala binangabanga niya adi pagkatapos itinao sadto manga disipolo. Pangala, itinao man nira sadto manga tawo. 7 Agko man sira dorodarang gatikot na isura kaya ipinagpasalamat adi ni Jesus pangala ipinanao man sadto manga tawo. 8 Ngamin nakakaun sagkud nabosog. Pangala pitong bakol pa so natipon nirang natuda. 9 Nasa kwatro mil na kalalakiyan so nangagkaun pwera pa ko manga babayi sagkud manga igin. Pangala pinaoli na ni Jesus so manga tawo. 10 Pangala linnonad tolos iya kaiba so manga disipolo sadto bangka paiyan sadto rehiyon ko Dalmanuta.
Pag-anap sa Tanda ko manga Pariseo
(Mt. 16:1-4)
11 Pag-abot nira sadto logar na adto agko manga Pariseong rinnapo kanya tanganing porbaran si Jesus. Gosto nirang marunggan iya sa salang ngangabilun kaya nakipagdiskotir sira kanya sagkud inanapan nira iya sa milagro galin sa langit. 12 Napaangus sa ararum si Jesus sabay sabi, “Ngata ta pirmi kamong nag-aanap sa tanda? Sinisigoro ko kaninyo na uda itataong tanda sa manga tawo sa panawon na adi.” 13 Pangala, binayaan na niya so manga Pariseo sagkud nagsakuy otro paiyan sadto loyo ko ranuw.
A manga Disipolo sagkud a Bota
(Mt. 16:5-12)
14 Ko oras na adto, nalingaw na magdara sa tinapay so manga disipolo pwera ko usad na pidaso na isadto bangka. 15 Pangala, pinatanidan sira ni Jesus, “Magmaan kamo, likayan ninyo a lebadora ka manga Pariseo sagkud ni Herodes.” 16 Pinag-osipan adi ko manga disipolo pangala sinabi nira sa kada usad, “Sinasabi adi niya ta diri kita nakapagdara sa tinapay.” 17 Isi ni Jesus so pinag-oosipan nira kaya nag-onga iya, “Ngata ta nag-oorosipan kamo manungud sa diri ninyo pagdara sa tinapay? Ngata diri pa ninyo nabayad o naintidiyan so ginibo ko? Ono diri pa adi naabot ka isip ninyo? 18 Nabayad man ninyo sagkud narungug so nangyari. Ono narurumruman pa ninyo 19 kin pirang bakol so natipon na sobra ko binangabanga ko so limang pidasong tinapay para sa singko mil katawo?” Sinnimbag so manga disipolo, “Doseng bakol po so natuda.” 20 Inonga pa sira ni Jesus, “Sagkud ko binangabanga ko so pitong pidasong tinapay para sa kwatro mil katawo, pirang bakol man so natuda na natipon ninyo?” “Pito po.” simbag nira. 21 Pangala sinabi ni Jesus, “Ono naiintindiyan na ninyo na bukung tinapay a buut kong sabiyun ka lebadora kindi a manga tottoro ka manga Pariseo?”
22 Pangala nag-iyan sira sadto banwaan ko Betsaida. Sa logar na adto dinara kanya ko nagkapira so usad na lalaking bota. Nakimaerak sira ki Jesus na kin pwedeng rutaan niya so lalaki ko kamut niya. 23 Kaya kinabit niya so lalaki sagkud irinayo sadto kababaluyan pangala linostaban niya so mata ko lalaki sagkud rinutaan ko kamut niya. Pangala inonga niya so lalaki, “Ono nakababayad na ika?” 24 Ibinoklat ko lalaki so mata niya pangala nagngabil, “Nakababayad ako sa manga tawo na bagana nag-aaging manga kawoy.” 25 Irinuta otro ni Jesus so kamut niya sadto mata ko lalaki. Pangala ko iboklat ko lalaki so mata niya, agko na iya nabayad ta naraay na so mata niya. 26 Pangala sinabi ni Jesus kanya, “Pwede na ikang omoli alagad diri ika magbalik sadto kasintrowan.”
A Tonay na Pagkatawo ni Jesus
(Mt. 16:13–20; Lk. 9:18–21)
27 Pangala inniyan si Jesus kaiba so manga disipolo sadto kababaryowan na sakup ko Cesarea na sakup man ko Filipos. Mantang nag-aagi sira, inonga ni Jesus so manga disipolo, “Siisay kono ako sabi ka manga tawo?” 28 Sinnimbag so manga disipolo, “Agko manga nagsasabi na ika kono si Juan na Parabunyag. Sabi man ka iba ika kono si Elias. Agko man nagsasabi na usad kono ika sa manga propeta.” 29 Pangala inonga sira ni Jesus, “Alagad para kaninyo siisay ako?” Sinnimbag si Pedro, “Ika po a Cristo.” 30 Pangala pinatanidan sira ni Jesus na diri ipangistorya na iya talaga a Cristo.
Inistorya ni Jesus so Mamamatian niyang Kasakitan sagkud Kagranan
(Mt.16:21–28; Lk. 9:22-27)
31 Pangala pinonan ng itottoro ni Jesus sadto manga disipolo na kaipowan ka Igin sa Tawo na magtius sa dakul na kasakitan. Diri iya aakoon imbes ipaguguraan iya ka manga namomoon ka manga Judio, manga namomoon na padi sagkud manga paratottoro ka Layi ni Moises. Alagad maboboway man sana iya pagkaagi sa tolong alduw. 32 Malanglinaw ading sinabi ni Jesus. Pangala irinayo iya sa gatikot ni Pedro sadto ibang manga disipolo pangala dinawuy iya ni Pedro na diri magsabi sa arug kadto. 33 Pangala inatobang ni Jesus so ibang manga disipolo, pagkatapos pinagsabiyan niya si Pedro, “Romayo ika, Satanas! Ta a iniisip mo bukung para sa Diyos kindi para sa tawo.”
34 Pangala pinarapo ni Jesus so manga tawo sagkud so manga disipolo. Sinabi niya kanda, “Siisay man kaninyo gostong somonod kanaku, kaipowan niyang lingawan a sadiri niya sagkud kaipowan anda iyang magraan pagkatapos somonod iya kanaku. 35 A siisay man na gostong magligtas ka boway niya, mauudaan kadi alagad a siisay man na mag-atang ka boway holi kanaku sagkud ka Maray na Bareta, migkaagko boway. 36 Uda man sana kamutangan para sa usad na tawo dawa pa mapakanya a bilog na kinaban kin amo man sana adi a magigin rason na diri mapakanya a boway na uda kasagkuran. 37 Uda iya pwedeng itaong kabalyo para kadi. 38 A siisay man na masupug holi kanaku sagkud holi ka manga tottoro ko sa atobangan ka makasalan na manga tawo ngowan, ikasusupug man iya ka Igin sa Tawo ka pagbalik niya sadi kinaban dara a kamorawayan ka Ama niyang Diyos kaiba ana manga anghel.”