10
Tottoro ni Jesus Manungud sa Diborsyo
(Mt. 19:1–12; Lk. 16:18)
1 Pangala pagkagalin nira ni Jesus sadto Capernaum, nag-iyan sira sadto rehiyon ko Judea, sadto loyo ko salog Jordan. Nag-iriyanan otro kanya so malakadakul na tawo kaya arug ko nakatuuran niya, tinottoroan niya sira. 2 Pangala agko rinnapong manga Pariseo tanganing porbaran iya sa paagi sa usad na onga, “Ono, tinotogotan raw ka Kasoratan na pwedeng sowayan ka lalaki a agom niya?” 3 Sinnimbag si Jesus, “Ono baya so minanda kaninyo ni Moises?” 4 Sinimbag sira, “Tinotogotan ni Moises na gomibo sa ligal na dokomento sa pagsosoway a lalaki tanganing masowayan a agom niya.” 5 Alagad sinnimbag si Jesus, “Holi ka kakusungan ninyo kaya tinawan kamo ni Moises sa arug kan na layi. 6 Alagad kin poon pa sa kapinonan ko lalangun ka Diyos a tawo, ‘Linalang sira na lalaki sagkud babayi.’ 7 Holi sa pagkalalang na adi, babayaan ka usad na lalaki a manga kag-igin niya tanganing makiusad ka magigin agom. 8 Kaya iya sagkud a babayi magigin usad ng awak. Diri na sira ibibilang pang darwa kindi usad na sana. 9 Kaya onoman na pinag-usad ka Diyos diri kaipowan na pagsowayun ka tawo.”
10 Pangala ko nakaabot na sira sa usad na baluy, nag-onga so manga disipolo manungud ko sinabi ni Jesus. 11 Sinimbag sira ni Jesus, “A siisay man na lalaking sowayan a agom pangala nangagom sa iba nagkakasala sa pagsambay kontra sa dating agom niya. 12 Arug man kan a babaying sinnoway sa agom pangala nagpaagom sa iba, nagkakasala man iya sa pagsambay kontra sa dati niyang agom.”
Pinagbendisyon ni Jesus so manga Igin
(Mt. 19:13–15; Lk. 18:15–17)
13 Pangala agko manga innabot na agko dorodarang manga igin. Dinara nira so manga igin tanganing mabendisyonan ni Jesus. Alagad tinuyaw sira ko manga disipolo ni Jesus na diri kinakaipowan na distorbowon si Jesus. 14 Ko mabayad ni Jesus na tinutuyaw ko manga disipolo so manga tawo, naungut iya kaya nginabilan niya so manga disipolo, “Pabayai sana ngani ninyo na romapo kanaku a manga igin. Diri ninyo sira pagpugulan ta sa manga tawong sa Diyos sana innaasa arug kad manga igin na adi naghahadi a Diyos. 15 Sinisigoro ko kaninyo na diri makaluluug sa Kahadian ka Diyos a usad na tawo anggan na diri niya inaako sa bilog niyang boway a paghahadi ka Diyos.” 16 Pangala usad-usad na kinulkul ni Jesus so manga igin, rinunan ko kamut niya sagkud benindisyonan.
Usad na Lalaking Mayaman
(Mt. 19:16–30; Lk. 18:18–30)
17 Ko miggalin na si Jesus, agko usad na lalaking dinnalagan parapo kanya sabay tiklod sadto atobangan niya pangala nag-onga, “Maraay na Maestro, ono po a kaipowan kong gibowon tanganing magkaagko boway na uda kasagkuran?” 18 Sinnimbag si Jesus, “Ngata ta binaoy mo kong maraay? Uda ibang maraay kindi a Diyos sana. 19 Isi mo a manga Kamandaan ka Diyos arug ka diri mangguraan, diri manambay, diri manaban, diri magtistigo sa botig, diri mandaya sagkud igalang mo a manga kag-igin mo.” 20 Sinnimbag so lalaki, “Sinonod ko na po a manga Kamandaan na an Maestro, poon pa ko igin pa sana ko.” 21 Pagsilung ni Jesus sadto lalaki, nakamati iya sa pagmakulug para kadi kaya sinabi niya, “Usad pang bagay a kaipowan mong gibowon, ipabakal mo a ngamin mong pagsorosadiri pangala itao mo sa manga pobri a sintabo tanganing magkaagko ika kayamanan sa langit pangala somonod ika kanaku.” 22 Namundu so lalaki ko marungug niya adi ta kadakul kaya ko manga pagsorosadiri niya kaya ginnalin iya na uda kaogmaan sa poso.
23 Pangala sinnilung si Jesus sadto manga tawo sabay sabi sadto manga disipolo, “Kadipisil makaluug ka usad na mayaman sa Kahadian ka Diyos!” 24 Nabigla so manga disipolo ko marungug nira na sinabi adi ni Jesus. Kaya sinabiyan sira otro ni Jesus, “Malakadipisil talagang makaluug sa Kahadian ka Diyos! 25 Ta mas madali pang makaluug a usad na kamelyo sa lobot ka ragom kisa ka usad na mayaman sa Kahadian ka Diyos.” 26 Holi ka sinabing adi ni Jesus orog na nabigla so manga disipolo kaya napaonga sira sa kada usad, “Siisay sana palan a maliligtas?” 27 Sinilngan sira ni Jesus pangala sinnabi, “Imposible adi para sa manga tawo alagad buku para sa Diyos. Kayang gibowon ka Diyos a ngamin na bagay.”
28 Pangala nginnabil si Pedro, “Paono kami? Isi mo kin paono namu binayaan ngamin na bagay tangani sanang somonod kanimo!” 29 Sinabiyan sira ni Jesus, “Sinisigoro ko kaninyo na a siisay man na magdesisyon na bayaan ana baluy, manga ngod, manga kag-igin, agom, manga igin o raga man holi kanaku sagkud ka Maraay na Bareta, 30 migkaagko sanggatos kadobli pang baluy, manga ngod, manga kag-igin, manga igin sagkud manga raga ngowan na manga panawon. Makamamati man iya sa pagpersigir galin sa ibang tawo holi kanaku sagkud ka Maraay na Bareta. Alagad, boway na uda kasagkuran a mamamatian niya. 31 A ngamin na tawong inoona a sadiri, tatawan sa pinakaababang importansya alagad a manga tawong inoori a sadiri, tatawan sa pinakaalangkaw na importansya.”
A Ikatlong Beses na Pagsabi ni Jesus manungud ko Kagranan niya
(Mt. 20:17–19; Lk. 18:31–34)
32 Pangala nagtokad si Jesus sadto syodad ko Jerusalem. Nakasosonod kanya so manga disipolo na nangangalas saigo kin ngata ta paiyan pa si Jesus sadto Jerusalem. Naandal man so ibang manga nagsosonod. Pangala binaoy ni Jesus so Dose sagkud isinoway otro sadto kadaklan. Sinabi niya kanda kin ono mingyari kanya, 33 “Mag-irungug kamo! Paiyan kita ngowan sadto Jerusalem, logar na kin sari a Igin sa Tawo tatraydoron sagkud itatao sa manga namomoon na padi sagkud sa manga paratottoro ka Layi ni Moises. Oosgaran nira ako na guranun pangala itatao nira ako sa manga bukung Judio. 34 Iinsoltowon, lolostaban sagkud aampakun man ako ka manga bukung Judio sagkud guguranun alagad pagkaagi sa tolong alduw maboboway ako otro.”
So Inaayat ni Juan sagkud ni Santiago
(Mt. 20:20–28)
35 Pangala rinnapo so manga igin ni Zebedeo na sira si Santiago sagkud Juan sadto ki Jesus, “Maestro, gosto po namung itao mo kanamu ana onoman na aayatun namu.” 36 Sinimbag si Jesus, “Ono gosto ninyong itao ko kaninyo?” 37 “Paulaan mo po a usad kanamu sa too mo sagkud a usad sa wala mo kin naghadi na ika.” 38 Sinnimbag si Jesus, “Diri basang ninyo isi kin ono a inaayat ninyo kanaku. Ngata, kaya raw ninyong tiusun a aagyan kong pasakit?” 39 Sinnimbag so darwa, “Kaya po namu.” Alagad sinabiyan sira ni Jesus, “Amo titiusun ninyo a pasakit na aagyan ko sagkud mabubunyagan kamo kin paono ako bubunyagan, 40 alagad uda ako poder na togotan kin siisay a pauulaun ko sa too o sa wala ko ta nakatagama sana yan sadto manga kipowan talagang omuula san.” 41 Ko marungug adi ko sampolong disipolo, naungut sira sadto magngod na Juan sagkud Santiago.
42 Pangala pinarapo ni Jesus kanya so manga apostol sabay sabi, “Isi ninyo na a manga naghahadi ka manga kahadian sadi ibabuw ka raga amo a pinakanasosonod sa ngamin na bagay sagkud amo a pinakamakapangyariyan. 43 Diri adi kaipowan mangyari kaninyo. A siisay man na gostong magin alangkaw sa pagsilung ka tawo kinakaipowan na magsirbi tanganing ibilang na namomoon sagkud importanteng tawo. 44 Kinakaipowan iyang magin serbidor ka kada usad tanganing matawan iya sa importansya. 45 Ta maski ngani a Igin sa Tawo diri nag-iyan sadi tanganing magpasirbi kindi tanganing magsirbi sagkud tanganing itao a boway niya matobos sana a kadaklan.”
Pinaraay ni Jesus si Bartimeo na Bota
(Mt. 20:29–34; Lk. 18:35–43)
46 Pagkatapos kadi, nagpaiyan si Jesus kaiba so manga disipolo sadto Jerico. Pangala ko nag-aagi na sira sagkud so manga tawo galin sadto Jerico, nalabosan nira so botang lalaki na nakikilimos na nag-uula sadto gilid ko tinampo. A ngaran niya Bartimeo. Igin iya ni Timeo. 47 Kaya ko marungug ni Bartimeo na si Jesus na tagaNazaret so naglalabos, kinnagrat iya, “Jesus, Igin ni David, kaeraki man ako!” 48 Alagad kadakul ko naooyam kanya kaya pinapondo iya sa pagkagrat imbes orog pa niyang kinusugan so pagkagrat, “Igin ni David, kaeraki man ako!” 49 Pangala pinnondo si Jesus sabay manda sadto manga disipolo, “Baoya raw iya.” Kaya binalikan ko manga disipolo si Bartimeo pangala sinabiyan, “Mag-ogma na ika ta ipinababaoy na ika kaya mos na.” 50 Kaya malangdali niyang ikinawigtik so pang-alikbuy sabay lokso pangala nag-ispid ng rinnapo ki Jesus. 51 Pangala inonga iya ni Jesus, “Ono gosto mong mangyari?” Sinnimbag si Bartimeo, “Maestro, gosto ko pong makabayad.” 52 Kaya sinabiyan iya ni Jesus, “Holi ta tinnobod ika kanaku, maraay na ika kaya agi na paoli” Kadto tolos nakabayad na si Bartimeo kaya sinnonod iya ki Jesus.