KAMUS
Ago Piliꞌ intad Allah/Injil Ago wat Yesus dan senayu Allah mirintaꞌ. Yesus matong mai diniaꞌ itu intok mirintaꞌ sebagai Rajaꞌ, Oyo uyag daꞌ diniaꞌ itu, ondot dan tumuguliꞌ uyag ondo. Tukid ulun an sayaꞌ daꞌ Yesus dan ngakuꞌ So sebagai Rajaꞌ, iro sonolomot dangan dusaꞌ niro nampun.
Allah mirintaꞌ sebagai Rajaꞌ/ Kerajaan Allah Allah an mirintaꞌ sebagai Rajaꞌ daꞌ surgaꞌ dangan daꞌ bumiꞌ, ulun an sayaꞌ daꞌ Yesus Rajaꞌ Penyolomot, kon ondot, oyo uyag dangan Allah daꞌ dalom Kerajaan No.
Anak Allah Allah ngutus Anak No intok nyolomot minisiaꞌ (Yoh. 3:16). Yesus an senabit Anak Allah, sobob inaꞌ No kitian intad kuasaꞌ Lingu Allah. Maleikat pongo maraꞌ Oyo tu Anak Allah (Luk. 1:32-35). Ulun an sayaꞌ daꞌ Yesus po senabit anak Allah.
Anak Minisiaꞌ an tunulis daꞌ dalom kitab Daniel 7:13-14, Oyo no Rajaꞌ Penyolomot an mino matong. Togol Yesus ntukit wat So orop, Oyo makai karan Anak Minisiaꞌ.
1) Yesus matong intad Allah, Oyo no Allah.
2) Oyo no monong minisiaꞌ.
3) Kuasaꞌ Allah sino daꞌ So, kuasaꞌ daꞌ bumiꞌ dan kuasaꞌ daꞌ surgaꞌ.
Baloi Allah Janaꞌ ulun Yahudi ibadah, daꞌ kutaꞌ Yerusalem ino koy sino. Daꞌ luar no sino janaꞌ intok nyorob persembahan kurban, daꞌ dalom no sino janaꞌ intok nyorob kemenyan. Daꞌ dalom Baloi Allah sino po janaꞌ an paling kudus dan an kalap mumpos mai janaꞌ ino Imam Besar koyo, dan ulun Yahudi sayaꞌ, Allah sino daꞌ janaꞌ ino.
Baloi sembayang Janaꞌ ibadah an binal daꞌ kampung-kampung ulun Yahudi. Daꞌ dino ulun Yahudi intimung daꞌ odou Sabat intok kidingog ulun mbacaꞌ Kitab Allah dan maraꞌ atun agama Yahudi. Baloi sembayang ino po janaꞌ mutuo-mutuo ulun Yahudi ngadil bal-bal ulun, janaꞌ ino po intok ulun intimung mpakot, dan janaꞌ anak-anak belajar mbacaꞌ Kitab Allah.
Baptis ino daꞌ dagu Yunani latiꞌ no ponotolop mai timug, tanduꞌ no pongo butubat dangan sayaꞌ daꞌ Yesus.
Butubat latiꞌ no berantiꞌ mal dusaꞌ ginoi mayaꞌ dagu Allah. Ulun an guang tinirimo dangan nampun Allah arus butubat.
Buyag kububuwoi no mbayaꞌ daꞌ Allah Buyag an tinak Allah daꞌ ulun an sayaꞌ daꞌ Tuhan Yesus. Boi pon ulun pongo ondot, tapiꞌ totop uyag kububuwoi no dangan Allah.
Domba Ruraꞌ an nggirad kambing, ruraꞌ itu penting daꞌ budaya ulun Yahudi, ruraꞌ itu kalap nakan dangan po sebagai persembahan daꞌ Allah.
Dusaꞌ latiꞌ no bal dangan kadaꞌ an lop kuguang Allah. Ulun an budusaꞌ ino, ulun lop mayaꞌ dagu Allah dangan an ngapu kon an kuguang Allah.
Guburnur Ulun an paling bukuasaꞌ daꞌ dondo runuang janaꞌ no butugos.
Guruꞌ agama Yahudi Ulun an belajar daꞌ kitab Taurat an tunulis Musa. Iro po an ngatun pirintaꞌ Allah an tunulis daꞌ kitab Musa dangan ngatun adat yaki aduꞌ ulun Yahudi.
Imam Daꞌ jomon Musa matong daꞌ jomon Salomo kuturunan Harun an piniliꞌ Allah ngelayan daꞌ Balatanaꞌ Janaꞌ Sembayang. Daꞌ jomon Yesus imam ngelayan daꞌ Baloi Allah an daꞌ Yerusalem. Sino tulungaiꞌ mudil imam: Imam Besar, imam-imam kepalaꞌ dan imam-imam. Tugos imam ino, nak persembahan daꞌ Allah, ngatun pirintaꞌ Allah dangan sembayang daꞌ Tuhan untuk ulun Israel. Sariꞌ imam ino piniliꞌ intad kuturunan sukuꞌ Lewi, tapiꞌ lop suluru ulun sukuꞌ Lewi mangun imam. Daꞌ jomon Yesus, Imam Besar mangun pemimpin Pengadilan Agama Yahudi.
Janaꞌ makan persembahan Janaꞌ intok nyorob persembahan daꞌ Allah. An binal intad batu, lisak sinan, atau besi. Daꞌ dalom Baloi Allah sino janaꞌ makan persembahan intok nyorob kemenyan. Daꞌ kuangan Baloi Allah ino sino po janaꞌ intok nyorob persembahan kurban daꞌ Allah.
Kaisar Rajaꞌ an paling bukuasaꞌ daꞌ kerajaan Roma. Kaisar itu po mangun pemimpin an paling sawat daꞌ suluru runuang an kunuasaꞌ kerajaan Roma. Runuang Yudea dangan Galilea po kunuasaꞌ kerajaan Roma. Togol Yesus nanak, an bukuasaꞌ kaisar Agustus (31 Sebelum Masehi - 14 Masehi). Pongo gino kaisar Tiberius (14 - 37 Masehi) an bukuasaꞌ daꞌ togol Yohanes dangan Yesus ngelayan.
Keledai Ruraꞌ an nggirad kuda, keledai ino sarok panakai ulun Yahudi ngibit barang dan pununduk ulun.
Kiomot Togol Yesus matong an ngunduo surung no intok ngadil sariꞌ ulun daꞌ diniaꞌ itu.
Kitab Allah ino dagu Allah an tunulis daꞌ dalom tutukuraꞌ kitab. Daꞌ jomon Yesus kitab-kitab an sino daꞌ dalom Kitab Allah: Kitab Taurat, kitab nabi-nabi, kitab Mazmur dangan kitab sejarah ulun Israel.
Kitab Taurat ino udan no pirintaꞌ Allah an tunulis Musa. Kitab-kitab ino: Kejadian, Keluaran, Imamat, Bilangan dan Ulangan.
Kurban an tinak daꞌ Allah sebagai caraꞌ nyambaꞌ daꞌ So. Kurban ino kalap intad ruraꞌ, asil intad umo, tepung jalai, atau timug anggur. Ulun Yahudi ngibit kurban niro mai Baloi Allah an daꞌ Yerusalem, daꞌ dino tinak mai imam dan imam pajanaꞌ kurban niro daꞌ janaꞌ makan persembahan daꞌ Allah. Iro makan kurban untuk bitirimo kasiꞌ daꞌ Allah, atau supayaꞌ dusaꞌ niro nampun.
Kudus Allah ino Kudus, latiꞌ no Oyo lop nggirad sariꞌ an binal No, dan Oyo po bukuasaꞌ daꞌ sariꞌ an binal No. Oyo po bukuasaꞌ daꞌ sariꞌ lingu dangan an sino daꞌ surgaꞌ. Gaꞌ ulun atau barang senabit kudus, latiꞌ no, ulun atau barang ino piniliꞌ untuk ngelayan daꞌ Allah. Barang an kudus ino lop kalap liwo panakai.
Lingu Allah Allah, Oyo tu, Yamaꞌ, Anak, Lingu. Lingu Allah po senabit Lingu Kudus, Lingu Allah dangan Lingu Yesus (Kis. 16:7). Lingu Allah mimpin, nulung, dangan po nak kuasaꞌ daꞌ ulun-ulun an sayaꞌ daꞌ Allah.
Maleikat ino usaꞌ no ngelayan Allah dangan mal kon an kuguang Allah. Allah po ngutus maleikat untuk padatong bilin No.
Murit Ulun an mayaꞌ dangan belajar intad atun dan kon ayu buyag guruꞌ no, Yesus miliꞌ puluꞌ sag dungaiꞌ murit No, tapiꞌ sino po ulun bokon mayaꞌ So. Sariꞌ ulun an sayaꞌ daꞌ Yesus senabit po murit No, dangan po iro arus mal ulun bokon mangun murit Yesus.
Nabi Ulun an nutus Allah untuk padatong bilin No daꞌ minisiaꞌ. Conto no: Musa, dangan Elia.
Nerakaꞌ Janaꞌ an binal Allah untuk ngukum iblis dangan ulun an mayaꞌ daꞌ iblis. Daꞌ dino ulun mino ngerasaꞌ duol rasaꞌ an lop akaiꞌ-akaiꞌ. Daꞌ dino po sino apui an lop kalap lasaꞌ.
Nyambaꞌ ino an arus binal tetanduꞌ ulun ngormat daꞌ an senambaꞌ no. Suang caraꞌ ulun nyambaꞌ, sino sujud untuk nyambaꞌ, sino nyorob kurban untuk an senambaꞌ no, dangan ngumpod an senambaꞌ no.
Odou Paskah Odou tupal ulun Yahudi untuk ngingot Allah an pongo nulung siro intad Mesir. Sebelum niro mujai intad Mesir, iro arus nyembaliꞌ domba, dan dadaꞌ domba ino pinid daꞌ tiang bombong niro. Tukid tiang bombong an pinid dadaꞌ domba ino, anak an akaꞌ an sino daꞌ baloi ino lop panatoi Allah. Allah mancuk ulun Israel mal acaraꞌ daꞌ odou tupal ino. Sobob ino tukid payang ulun Israel nyembaliꞌ domba dan ngakan domba persembahan ino.
Odou Sabat Daꞌ budaya ulun Yahudi, odou Sabat itu timpun no intad odou jumat imaiꞌ matong odou sabtu imaiꞌ. Daꞌ dalom kitab Kejadian, onom odou buwoi no, Allah mal kuanan dangan bumiꞌ dangan sariꞌ udan no, giri Yo berantiꞌ daꞌ odou kuturuꞌ. Odou Sabat ino kudus. Daꞌ supuluꞌ pirintaꞌ Allah, Allah nyungkang ulun ngusaꞌ daꞌ odou Sabat. Daꞌ jomon Yesus sino suang aturan wat odou Sabat kon an kalap dangan lop kalap binal niro daꞌ odou ino.
Pengadilan Agama Lembaga an paling sawat daꞌ agama Yahudi an bukuasaꞌ an mutus ngukum atau ngolopos ulun. Iro sino tujumpuluꞌ kiring ulun adang ulun Yahudi, an pinimpin Imam Besar.
Pukung Kagui bagat daꞌ kungkung, ulun an kagui pukung nanggop lop birisiꞌ menurut aturan agama Yahudi. Ulun ino lop kalap ibadah mai Baloi Allah, oyo arus mongou daꞌ luar kutaꞌ dan lop kalap amad daꞌ ulun.
Rajaꞌ Penyolomot Rajaꞌ an pongo jenanjiꞌ Allah daꞌ rajaꞌ Daud, gaꞌ ulun intad kuturunan rajaꞌ Daud mino mirintaꞌ sebagai rajaꞌ kububuwoi no. Rajaꞌ Penyolomot ino, Rajaꞌ an jenanjiꞌ an mino ngolopos dangan nyolomot ulun.
Rasul Ulun an nutus Allah. Rasul biasaꞌ no panakai nyabit puluꞌ sag dungaiꞌ murit Yesus an nutus untuk mal daꞌ usaꞌ No (Mat. 10:1-2). Ulun bokon po an padatong Ago Piliꞌ intad Allah senabit rasul po (Rm. 16:7). Paulus po senabit rasul (Rm. 11:13).
Ripon Ulun an benancuk ngusaꞌ an lop tinak tambar, sobob ripon ino pongo nolon ulun an janaꞌ no ngusaꞌ. Ripon ino ulun an kala togol mpatoi, ulun an penaksaꞌ dan ulun susaꞌ buyag.
Salib Dungaiꞌ putul taun an penalang nujok pinikiriyod daꞌ tanaꞌ an panakai ulun Roma intok ngukum ulun arat matong ondot. Sulumaꞌ Yesus wat ulun an mayaꞌ daꞌ So, iro duol rasaꞌ nggirad nyan salib.
Sayaꞌ latiꞌ no ulun nganggop bonor kon an narop no, sayaꞌ kon an lop pongo nilong no. Gaꞌ ulun sayaꞌ daꞌ Allah, oyo nganggop bonor kon dagu Allah dan guang mayaꞌ daꞌ dagu Allah.
Solomot Allah an nyolomot minisiaꞌ. Allah ngutus Yesus mai diniaꞌ dan ondot untuk ngolopos minisiaꞌ intad dusaꞌ. Allah guang minisiaꞌ uyag mayaꞌ kon an nerencanaꞌ No togol No mal minisiaꞌ.
Sulumaꞌ ino panakai untuk ngatun ulun, sulumaꞌ itu ntukit wat minisiaꞌ dangan an bokon an nilong tukid odou. Yesus sarok ngatun makai sulumaꞌ No mpigirad kon ayu Allah dan kon ayu caraꞌ ulun uyag gaꞌ Allah sino dalom buyag no.
Sunot Daꞌ budaya ulun Yahudi anak laki an umur no baluꞌ odou, arus sununot. Allah po maraꞌ intok sariꞌ anak laki-laki arus sununot latiꞌ no sebagai tetanduꞌ iro tu jampuꞌ Allah.
Surgaꞌ Janaꞌ an paling piliꞌ an sinidiaꞌ Allah untuk ulun an mayaꞌ dagu No dangan sayaꞌ daꞌ So. Surgaꞌ itu janaꞌ Allah mongou. Yesus maraꞌ Allah ino Yamaꞌ No an daꞌ surgaꞌ (Mat. 6:1-9). Yesus orop po an matong intad surgaꞌ (Yoh. 6:38-42) dangan pongo limikad mai dino (Luk. 24:51), Oyo mino matong intad surgaꞌ mai diniaꞌ (Luk. 21:27).
Tanaꞌ lapang Janaꞌ an puaꞌ, dan bumuruk. Lop nogom ulun an mongou daꞌ dino. Tapiꞌ ulun-ulun an sarok tunukit daꞌ dalom Kitab Allah sino an pongo uyag daꞌ dino, tapiꞌ lop iro mongou kububuwoi no daꞌ dino. Ulun Israel makou daꞌ tanaꞌ lapang, apat puluꞌ payang buwoi no kiꞌ mai tanaꞌ an jenanjiꞌ Allah daꞌ siro. Dan Daud miduꞌ mai dino togol rajaꞌ Saul kiꞌ ngamatoi so.
Tukang tagi pajak Ulun an ngusaꞌ nagi uong pajak untuk tinak mai pimirintaꞌ Roma. Pimirintaꞌ Roma nak tambar daꞌ ulun an nagi pajak daꞌ runuang an kunuasaꞌ niro. Iro sarok nagi labiꞌ intad kon an tenantuꞌ. Ulun Yahudi an mangun tukang tagi pajak ino konosou ulun-ulun niro orop. Iro nanggop ngapu daꞌ aturan agama dan sukuꞌ niro, iro nanggop lop taman nyambaꞌ Allah.
Ulun Farisi Dondo kulumpuk agama Yahudi, iro mayaꞌ laung aturan agama, dan nongkoi adat ulun Yahudi.
Ulun Saduki Kulumpuk ulun Yahudi an piliꞌ buyag. Iro maraꞌ an penting ino mai Baloi Allah dangan makan kurban persembahan daꞌ Allah. Ulun Saduki lop sayaꞌ gaꞌ ulun pongo ondot kalap tumuguliꞌ uyag ondo.
Ulun sukuꞌ Lewi Iro tu sukuꞌ intad puluꞌ sag dungaiꞌ sukuꞌ an sino daꞌ Israel. Iro tu piniliꞌ Allah untuk ngelayan So.
Yerusalem Ibu kutaꞌ Israel timpun intad jomon rajaꞌ Daud. Kutaꞌ ino pusat pimirintaꞌ dan po pusat ulun Israel nyambaꞌ daꞌ Allah, sobob Baloi Allah sino daꞌ dino.