Kitab Injil
LUKAS
Lukas maraꞌ kon bal no nulis daꞌ Teofilus
1
1 Teofilus an nohormat ku, suang ulun pongo burusahaꞌ nulis sariꞌ ago wat an pongo mangun daꞌ unod-unod takau, 2 ulun suang an nulis wat angeno ulun an intad timpun gilong sariꞌ angeno dangan padatong wat ago ino. 3 Kon pongo ku guyum-guyum wat angeno intad timpun no, jadiꞌ aku mikir so labiꞌ piliꞌ aku nulis bukuꞌ itu dangan teratur daꞌ diyun Teofilus, 4 intok mu pandai sariꞌ an natun daꞌ diyun no, monong ano.Ago wat Yohanes Pembaptis nanak
5 Daꞌ jomon Herodes mangun rajaꞌ daꞌ runuang Yudea, sino singkiring imam karan no Zakharia intad rumbungan Abia,a danduꞌ no po intad kuturunan imam Harun karan no Elisabet. 6 Iro duo tu posonong kadaꞌ Allah, dangan iro duo mayaꞌ sariꞌ pirintaꞌ Allah dangan hukum-hukum Allah. 7 Iro duo lop sino anak sobob Elisabet lop kalap sino anak, dangan iro duo tu po pongo mutuo.
8 Sino togol iri, togol rumbungan Abia kalap giliran, Zakharia mal tugos no sebagai imam daꞌ tungkuangan Allah. 9 Sobob togol cabut undi intok nantuꞌ si so an butugos nggirad an biasaꞌ binal imam-imam ino, Zakharia an piniliꞌ munjob mai Baloi Allah intok nyorob kemenyan. 10 Katung kemenyan sonorob, ulun suang sembayang daꞌ luar. 11 Temengkanaꞌ koyo Zakharia gilong maleikat Tuhan ngkiriyod daꞌ siad pimidis janaꞌ nyorob kemenyan. 12 Gilong angeno oyo kiriang dangan alaꞌ. 13 Tapiꞌ maleikat ino maraꞌ daꞌ so, “Maꞌ alaꞌ Zakharia, sobob Tuhan Allah makan kon an pongo kinitak mu. Elisabet danduꞌ mu mino ganak anak laki dangan okou arus pekaran so Yohanes. 14 Okou mino sonong kadaꞌ dangan ulun suang po manod togol anak mu pongo nanak. 15 Sobob oyo mino mangun ulun adang daꞌ tungkuangan Tuhan, dangan oyo lop nginum timug anggur atau inum intok mauk.b Dangan oyo mino penanuꞌ Lingu Allah intad so daꞌ dalom tinai inaꞌ no. 16 Oyo mino mal ulun Israel limikad mai Tuhan, Allah niro. 17 Oyo mino makou nyugulu Tuhan daꞌ dalom lingu dan kuasaꞌ nggirad an tinak Tuhan daꞌ Elia, intok no mino ngibit yamaꞌ dangan anak bedamai,c dangan ulun an lop mayaꞌ dagu Tuhan mangun ulun an mayaꞌ dagu Tuhan, nggirad sinino Yohanes nyiap umat an taman daꞌ Tuhan.” 18 Giri dagu kon Zakharia daꞌ maleikat ino, “Senayu ku pandai so gaꞌ angeno mino mangun? Sobob akai duo danduꞌ ku pongo mutuo.” 19 Sambung kon maleikat ino daꞌ so, “Aku tu maleikat Gabriel.d Aku ngelayan daꞌ Allah, Oyo an mancuk dakon maraꞌ ago piliꞌ itu daꞌ diyun. 20 Sino togol no, kon an benaraꞌ ku tu mino monong mangun. Tapiꞌ karnaꞌ okou lop sayaꞌ, okou mangun bubo lop kalap mendagu matong kon an benaraꞌ ku tu monong-monong mangun.” 21 Katung ulun suang garung Zakharia, iro tuwiꞌ kon bal no buwoi daꞌ dalom Baloi Allah. 22 Kon Zakharia mujai, oyo lop kalap mendagu daꞌ siro, giri iro pon kelatiꞌ, gaꞌ oyo tu pongo gilong tetanduꞌ intad Allah daꞌ dalom Baloi Allah. Giri yo busulumaꞌ daꞌ siro, sobob oyo lop kalap mendagu. 23 Kon pongo akaiꞌ woktuꞌ no butugos daꞌ Baloi Allah, oyo pon muliꞌ mai baloi no.
24 Lop buwoi intad dino Elisabet danduꞌ no kitian, pongo gino Elisabet mongou daꞌ intok, limo bulan buwoi no oyo lop ntipilong, dagu kono, 25 “Igitutu Tuhan pongo nulung dakon, Oyo pon mobor kon an mal dakon uyuꞌ daꞌ tungkuangan ulun suang.”
Ago wat Yesus nanak
26 Onom bulan pongo tian Elisabet, Allah mancuk maleikat Gabriel makou mai kutaꞌ Nazaret, daꞌ runuang Galilea. 27 Maleikat Gabriel matong daꞌ Maria an masi semandak an sino apor karan no Yusuf,e kuturunan intad Rajaꞌ Daud. 28 Togol iri maleikat ino matong daꞌ Maria, dagu kono, “Salam daꞌ diyun, okou an bonorokot Tuhan. Tuhan ngembayaꞌ daꞌ diyun.” 29 Kidingog dagu maleikat ino, Maria pon kiriang dangan gantano-gantano dalom kadaꞌ, kon latiꞌ dagu maleikat ino. 30 Pongo gino maleikat ino maraꞌ daꞌ Maria, “Maꞌ alaꞌ, sobob okou piniliꞌ Allah intok kalap an piliꞌ. 31 Sinitu! Okou mino kitian, dan okou ganak anak laki. Okou arus pekaran So Yesus. f 32 Anak ino mino mangun ulun adang, dan senabit Anak intad Allah An Paling Sawat. Tuhan Allah mal So mangun rajaꞌ, nggirad yaki yaduꞌ No, rajaꞌ Daud. 33 Oyo no mino mangun Rajaꞌ an mimpin daꞌ kuturunan Yakub, ulun Israel, matong kububuwoi no dangan Kerajaan No an lop pandai akaiꞌ-akaiꞌ.”g 34 Sambung kon Maria daꞌ maleikat ino, “Kon ayu angeno kalap mangun? Sobob aku tu lop pongo turug dangan laki.” 35 Dagu kon maleikat ino, “Mino Lingu Allah tumun daꞌ timbou mu, kuasaꞌ Allah An Paling Sawat ngembayaꞌ daꞌ diyun. Oyon gen sobob no Anak an nanak mu no mino, kudus dangan senabit Anak Allah.” 36 Dagu kon maleikat ino ondo, “Nyam gilong, Elisabet dangan gariꞌ mu no, oyo pongo mutuo, ulun maraꞌ so lop kalap sino anak, boi sinino igitutu kitian noyo onom bulan. 37 Sobob sariꞌ ano kalap binal Allah.”h 38 Pongo gino dagu kon Maria, “Aku tu ripon Tuhan, mangun nyo daꞌ dakon dagu an benaraꞌ mu no.” Pongo gino maleikat ino pon makou ngiduꞌ Maria.
Maria makou ntamu Elisabet
39 Lop buwoi intad dino, Maria makou mai dondo kutaꞌ daꞌ runuang Yudea an janaꞌ no daꞌ muruk. 40 Oyo makou mai baloi Zakharia, togol no matong daꞌ baloi Zakharia oyo nyelambaꞌ Elisabet. 41 Kon Elisabet kidingog selambaꞌ intad Maria, anak tinian atu mungkuwet dangan Elisabet pon kunuasaꞌ Lingu Allah. 42 Giri Elisabet mendagu daꞌ Maria, “Okou tu an paling bonorokot intad sariꞌ danduꞌ suang! Bonorokot po anak an tinian mu no! 43 Si so aku tu, singgaꞌ inaꞌ Tuhan matong gilong dakon? 44 Sobob kon aku kidingog selambaꞌ mu no anak daꞌ dalom tian ku tu mungkuwet dangan manod. 45 Okou manod nano sobob okou sayaꞌ kon an benaraꞌ Tuhan daꞌ diyun no mino mangun.”
Maria ngumpod Allah
46 Giri dagu kon Maria,
“Kadaꞌ ku ngumpod Tuhan,
47 dangan kadaꞌ ku manod karnaꞌ Allah nyolomot dakon,
48 sobob Oyo gilong dakon, ripon No an temengkerarat.
Intad igitutu ulun suang nyabit dakon ulun an sonong buyag.
49 Sobob Allah An Paling Bukuasaꞌ pongo mal usaꞌ an tupal daꞌ dakon, dangan karan No kudus.
50 Dangan Allah masiꞌ daꞌ ulun-ulun an alaꞌ daꞌ So, intad jomon mai jomon.
51 Dangan kuasaꞌ No Oyo mal usaꞌ an tupal
dangan pusuai ulun-ulun an sawat kadaꞌ dan ngasou kon an kiꞌ binal niro.
52 Oyo putun ulun-ulun an bukuasaꞌ intad tugos no dangan nyangkat buyag ulun-ulun temengkerarat.
53 Oyo makan an piliꞌ daꞌ ulun an bitil, dangan mancuk ulun an pangkor buyag makou lop ngibit manaꞌ-manaꞌ.
54 Oyo nulung ulun Israel ripon an piniliꞌ No,
sobob Oyo ngingot intok masiꞌ daꞌ nyaki aduꞌ takau.
55 Nggirad an jenanjiꞌ No daꞌ yaki yaduꞌ takau, timpun no intad Abraham dangan kuturunan no matong kububuwoi no.” i
56 Dangan tulungaiꞌ bulan buwoi Maria mongou mbayaꞌ Elisabet, giri yo muliꞌ mai baloi no.
Yohanes Pembaptis nanak
57 Togol pongo matong woktuꞌ Elisabet ganak, anak no laki. 58 Ulun an amad baloi no, dangan, dangan gariꞌ no kidingog ago Tuhan piliꞌ daꞌ Elisabet, iro pon mayaꞌ manod daꞌ so. 59 Daꞌ togol umur anak ino baluꞌ odou. Iro matong gilong anak ino sununot.j Iro kiꞌ pekaran anak ino Zakharia nggirad karan yamaꞌ no. 60 Tapiꞌ inaꞌ no mendagu, “Maꞌ pekaran so Zakharia, oyo arus penakaran Yohanes.” 61 Dagu kon niro daꞌ so, “Lop nogom pegariꞌ mu an karan no sinino.” 62 Giri iro nak tanduꞌ intok gantano daꞌ Zakharia kon karan kuguang no daꞌ anak ano. 63 Zakharia kitak batu intok nulis, giri yo nulis, “Karan no Yohanes.” Sariꞌ niro daꞌ dino pon tuwiꞌ. 64 Togol ino po Zakharia kalap mendagu dangan ngumpod Allah. 65 Sariꞌ ulun an amad daꞌ baloi no tuwiꞌ, dangan ago ino ingog daꞌ sariꞌ runuang Yudea. 66 Dangan sariꞌ ulun an kidingog ago ino gantano daꞌ dalom kadaꞌ niro, “Kon ayu bangun anak itu mino?” Sobob Tuhan ngembayaꞌ daꞌ so.
Zakharia ngumpod Allah
67 Giri Zakharia yamaꞌ Yohanes kunuasaꞌ Lingu Allah, giri padatong bilin intad Allah, dagu kono,
68 “Numpod takau Tuhan, Allah ulun Israel,
sobob Oyo matong nulung sitakau dangan ngolopos sitakau intad musuꞌ.
69 Allah nak penyolomot an pangkor daꞌ sitakau,
intad kuturunan Daud ripon No,
70 Allah makan penyolomot an pangkor daꞌ sitakau, nggirad dagu No an pongo pinidatong nabi-nabi No an kudus daꞌ jomon gulu ri,
71 intok ngolopos sitakau intad musuꞌ-musuꞌ takau
dangan intad ulun an osou daꞌ sitakau,
72 Oyo masiꞌ daꞌ yaki aduꞌ takau
dangan ngingot janjiꞌ No an kudus,
73 janjiꞌ an pongo tinak No daꞌ Abraham yamaꞌ kuturunan takau, Oyo po makan janjiꞌ ino daꞌ sitakau,
74 supayaꞌ takau, lopos intad musuꞌ,
dangan intok takau lop alaꞌ ibadah daꞌ So,
75 dangan sinino takau kalap buyag kudus dangan posonong kadaꞌ Tuhan kububuat buyag takau.
76 Okou anak ku, okou mino senabit nabi intad Allah An Paling Sawat.k
Okou nutus labiꞌ gulu intad Tuhan intok nyiap alan daꞌ So,
77 intok maraꞌ daꞌ ulun-ulun No gaꞌ iro tu mino solomot, sobob Allah pongo ngampun dusaꞌ-dusaꞌ niro.
78 Karnaꞌ Allah masiꞌ dangan ngingaꞌ sitakau,
Oyo matong intok nyolomot sitakau,
nggirad tawang mato odou mujai daꞌ odou nyuap,
79 Oyo matong intok petawang siro an buyag no rondomlm dangan alaꞌ ondot, Oyo ngembayaꞌ sitakau supayaꞌ takau uyag damai dangan So.”
80 Yohanes anak Zakharia buduang tupal dangan Allah mal lingu no buduang pangkor. Oyo mongou daꞌ tanaꞌ lapang, matong togol no oyo nimpun usaꞌ no daꞌ ulun-ulun Israel.