Yesus nanak
2
1 Daꞌ togol ino ri sino Kaisar, rajaꞌ an paling bukuasaꞌ daꞌ kerajaan Roma, karan no Agustus. Oyo nak pirintaꞌ intok mancuk ngedaptar sariꞌ ulun-ulun daꞌ kerajaan Roma. 2 Gitu nyo pendaptaran an timpun binal, togol Kirenius mangun guburnur daꞌ runuang Siria. 3 Makaꞌ sariꞌ ulun makou ngedaptar mai kutaꞌ asol niro.4 Togol ino ri po, Yusuf makou intad kutaꞌ Nazaret daꞌ runuang Galilea, mai kutaꞌ Daud an karan no Betlehem daꞌ runuang Yudea, daꞌ janaꞌ rajaꞌ Daud nanak, sobob Yusuf intad kuturunan rajaꞌ Daud. 5 Yusuf makou daptar mbayaꞌ dangan Maria apor no an katung kitian. 6 Togol niro duo matong daꞌ kutaꞌ Betlehem, daꞌ dino matong nyo woktuꞌ no Maria kiꞌ ganak. 7 Maria pon ganak Anak laki, Anak no an timpun. Oyo ngulukus So makai rampai, giri pudumpal Anak ino daꞌ janaꞌ intok akan ruraꞌ, sobob lop nogom janaꞌ intok mongou.
Tukang-tukang ngejagaꞌ domba
8 Daꞌ runuang ino, sino tukang-tukang ngejagaꞌ domba mongou daꞌ tanaꞌ an suang rumput an ngejagaꞌ ruraꞌ bunuyag niro daꞌ togol odou rondom. 9 Temengkanaꞌ koyo maleikat Tuhan ngkiriyod daꞌ amad siro, iro penetawang dangan lendadaꞌ an tawang intad Tuhan, dangan iro pon akaiꞌ alaꞌ. 10 Giri dagu kon maleikat ino daꞌ siro, “Maꞌ kau alaꞌ, sobob aku matong ngibit ago piliꞌ intad Allah, ago an posonong ulun suang. 11 Odou itu daꞌ kutaꞌ Dauda pongo nanak Penyolomot muyun, Oyo no Rajaꞌ Penyolomot, Oyo no po Tuhan. 12 Su nyo tanduꞌ no: Akau mino ntamu anak rumot an lunukus dangan rampai dangan punudumpal daꞌ janaꞌ intok akan ruraꞌ.”
13 Temengkanaꞌ koyo suang maleikat an bokon ilong mbayaꞌ dangan maleikat ino an ngumpod daꞌ Allah, dagu kon niro,
14 “Numpod nyo Allah daꞌ janaꞌ an paling sawat,
dangan damai nyo daꞌ bumiꞌ, daꞌ ulun-ulun an posonong kadaꞌ Tuhan.”
15 Pongo gino maleikat-maleikat ino ngiduꞌ daꞌ tukang-tukang ngejagaꞌ domba ino dangan limikad mai surgaꞌ, tukang-tukang ngejagaꞌ domba ino gebaraꞌ, dagu kon niro, “Kou takau mai Betlehem makou gilong an pongo mangun, an pongo benaraꞌ Tuhan daꞌ sitakau.” 16 Giri iro genayas makou mai Betlehem dangan ntamu daꞌ Yusuf dangan Maria, dangan anak rumot ino an katung dumumpal daꞌ janaꞌ akan ruraꞌ an bunuyag. 17 Togol tukang-tukang ngejagaꞌ domba gilong anak ino, iro maraꞌ kon an benaraꞌ maleikat daꞌ siro wat anak ino. 18 Sariꞌ ulun an kidingog dagu tukang-tukang ngejagaꞌ domba ino tuwiꞌ. 19 Tapiꞌ Maria nauꞌ so daꞌ dalom kadaꞌ no, dangan mikir latiꞌ sariꞌ angeno. 20 Pongo gino tukang-tukang ngejagaꞌ domba ino limikad mai tanaꞌ an suang rumput sambil ngumpod Allah, sobob sariꞌ an nilong niro dangan ningog niro tu, nggirad an pongo benaraꞌ maleikat-maleikat daꞌ siro.
Yesus sununot dangan tinak daꞌ Tuhan – Simeon dan Hana
21 Togol Anak ino umur No baluꞌ odou, Oyo sununot.b Iro pekaran So Yesus, karan an senabit maleikat, togol inaꞌ No lop pongo kitian.
22 Matong nyo woktuꞌ Yusuf dangan Maria mal daꞌ adat mirisiꞌ, nggirad an tenantuꞌ hukum Taurat. Iro po ngibit Anak ino mai Yerusalem untuk tinak daꞌ Tuhan.c 23 Sobob daꞌ dalom hukum Tuhan an tunulis sinitu, “Tukid anak laki an akaꞌ arus tinak daꞌ Allah.”d 24 Iro po makan persembahan kurban dungaiꞌ kung pumpulu sungkukur atau dungaiꞌ kung anak pumpulu merpati nggirad an tenantuꞌ daꞌ hukum Tuhan.e
25 Togol daꞌ Yerusalem sino ulun karan no Simeon. Oyo ulun piliꞌ, dangan oyo mayaꞌ dagu Allah, oyo an katung garung woktuꞌ Allah nyolomot Israel. Lingu Allah ngembayaꞌ so, 26 dangan Lingu Allah pongo maraꞌ daꞌ Simeon, Simeon lop kalap ondot, gaꞌ oyo lop pongo gilong Rajaꞌ Penyolomot an jenanjiꞌ Tuhan. 27 Oyo matong mai Baloi Allah sobob nibit Lingu Allah. Togol ino ri po Yesus an masi rumot benibi ulun tuo No intok makan So daꞌ Allah nggirad an tenantuꞌ hukum Taurat. 28 Makaꞌ Simeon ngalap Anak ino, mibi So, dan ngumpod Allah, dagu kono, 29 “Gitutu, Tuhan, waiꞌ ripon Mu tu ondot dangan kadaꞌ an damai, nggirad dagu Mu. 30 Sobob aku pongo gilong Penyolomot an intad Diyun, 31 an pongo seniap Mu daꞌ sariꞌ ulun. 32 Penyolomot ino nggirad tawang, an petawang ulun-ulun bokon, singgaꞌ ulun-ulun ngormat daꞌ ulun-ulun Israel.”f
33 Yamaꞌ inaꞌ Anak ino tuwiꞌ kidingog kon an benaraꞌ Simeon wat Anak ino. 34 Giri Simeon sembayang supayaꞌ Tuhan mborokot siro dangan oyo maraꞌ daꞌ Maria, “Anak itu pongo piniliꞌ intad Allah intok ngukum dangan nyolomot ulun suang daꞌ Israel. Oyo mangun tanduꞌ intad Allah, an mino napu ulun suang, 35 makaꞌ akaiꞌ pandayan kon an daꞌ dalom kadaꞌ ulun suang. Maria, sino togol no mino kadaꞌ mu duol nggirad tonobok idap.”
36 Daꞌ dino po sino nabi danduꞌ an pongo tuo. Karan no Hana, anak Fanuel, intad sukuꞌ Asyer. Pongo turuꞌ payang nganduꞌ, 37 Hana mangun tebalu, gitutu umur no balumpuluꞌ apat payang. Oyo sarok mai Baloi Allah. Odou rondom oyo ibadah daꞌ Allah dangan caraꞌ puasaꞌ dangan sembayang. 38 Togol ino ri po oyo matong mai dino, oyo ngumpod Allah dangan oyo maraꞌ wat Anak ino daꞌ sariꞌ ulun an garung woktuꞌ Allah ngolopos ulun Yerusalem.
39 Pongo kon Yusuf dangan Maria mal an arus binal niro nggirad an pongo tenantuꞌ hukum Tuhan, iro muliꞌ mai kutaꞌ Nazaret daꞌ runuang Galilea.g 40 Anak ino buduang tupal dangan pangkor, Oyo buduang pintor dangan labiꞌ ningaꞌ Allah.
Yesus daꞌ Baloi Allah togol umur No puluꞌ sag dungaiꞌ payang
41 Tukid payang, ulun tuo Yesus makou mai Yerusalem daꞌ togol odou tupal Paskah.h 42 Togol umur Yesus puluꞌ sag dungaiꞌ payang, iro makou mai Yerusalem daꞌ odou Paskah ino nggirad biasaꞌ no. 43 Pongo kon odou Paskah ino iro muliꞌ, tapiꞌ Yesus masi mapung daꞌ Yerusalem, yamaꞌ dangan inaꞌ no lop pandai so. 44 Iro nantam Oyo makou mbayaꞌ dangan rumbungan niro tu daꞌ alan. Pongo songodou lakou niro, iro pon guyum So daꞌ sariꞌ dangan gariꞌ dan daꞌ sariꞌ ulun an kuligan niro daꞌ rumbungan ino. 45 Tapiꞌ iro lop ntamu So, jadiꞌ iro limikad mai Yerusalem intok guyum So. 46 Kon tulungaiꞌ odou iro kalap Yesus daꞌ dalom Baloi Allah. Oyo katung ntudung kidingog daꞌ sariꞌ guruꞌ agama Yahudi dangan gantano-gantano daꞌ siro. 47 Sariꞌ ulun an kidingog dagu No kumpod, sobob Oyo pintor, Oyo pon nyambung dagu dangan piliꞌ daꞌ ulun an gantano-gantano daꞌ So. 48 Ulun tuo No pon tuwiꞌ gilong So. Giri dagu kon inaꞌ No, “Anak ku, kon bal Mu mal sinitu daꞌ damon? Akai duo yamaꞌ Mu tu apos kadaꞌ guyum Diyun!” 49 Sambung kon Yesus, “Kon bal muyun duo guyum Dakon? Lop kiꞌ akau pandai Aku tu arus sino daꞌ dalom baloi Nyamaꞌ Ku?” 50 Tapiꞌ iro lop kelatiꞌ daꞌ dagu Yesus. 51 Giri Yesus muliꞌ mbayaꞌ ulun tuo No mai kutaꞌ Nazaret. Oyo totop mayaꞌ dagu ulun tuo No. Sariꞌ an pentamu inaꞌ No wat Yesus, tinauꞌ no daꞌ dalom kadaꞌ no.
52 Dangan Yesus buduang tupal dangan buduang pintor, Oyo ningaꞌ Allah dangan ningaꞌ minisiaꞌ. i