Yohanes Pembaptis
3
1 Daꞌ payang puluꞌ limo togol Tiberius mangun Kaisar daꞌ Roma, Pontius Pilatus mangun guburnur daꞌ runuang Yudea, Herodes mangun rajaꞌ daꞌ runuang Galilea. Filipus, dangan gariꞌ Herodes, mangun rajaꞌ daꞌ runuang Iturea dangan Trakonitis, sodongkon Lisanias mangun rajaꞌ daꞌ runuang Abilene. 2 Daꞌ payang ino Hanas dangan Kayafas mangun Imam Besar. Daꞌ togol ino nyo, Allah mendagu daꞌ Yohanes, anak Zakharia, daꞌ tanaꞌ lapang. 3 Makaꞌ Yohanes makou mai sariꞌ janaꞌ an daꞌ sungoi Yordan. Oyo padatong ago intad Allah sinitu, “Butubat nakau intad dusaꞌ-dusaꞌ muyun, dangan akau arus benaptis, supayaꞌ Allah ngampun dimuyun.” 4 Nggirad an tunulis daꞌ dalom kitab nabi Yesaya:“Sino ulun mendagu dangan liawo an tupal daꞌ tanaꞌ lapang, dagu no,
‘Seniap alan untuk Tuhan
dangan punutulid alan untuk So.
5 Tukid palug arus tinimbun,
tukid muruk arus ranataꞌ
sinino po alan an ingkol-ingkol arus punutulid, dangan alan an kuluang ranataꞌ mu.
6 Sariꞌ ulun mino gilong
Allah nyolomot minisiaꞌ.’ ” a
7 Giri dagu kon Yohanes daꞌ ulun suang an matong mai so untuk benaptis, “Hui, akau ulun arat! Si so an maraꞌ daꞌ dimuyun gaꞌ akau mino lop nukum Allah? b 8 Jadiꞌ binal muyun an piliꞌ mangun buktiꞌ gaꞌ akau pongo butubat! Daꞌ dalom kadaꞌ muyun, maꞌ kau bipikir akau mino lop nukum Allah, sobob akau kuturunan intad Abraham.c Sobob ino aku mendagu daꞌ dimuyun, Allah kalap mal anak-anak Abraham intad batu-batu itu! 9 Allah siap ngukum, nggirad taun an lop kubuaꞌ piliꞌ an siap tanagad pakai kapak dangan sonorob daꞌ apui.”d 10 Ulun suang ino gantano daꞌ Yohanes, “Gaꞌ sinino yo, kon an arus binal mai?” 11 Sambung kon Yohanes, “Si an sino dungaiꞌ lambar kurub, tinak muyun selambar daꞌ ulun an lop nogom kurub, dangan si an sino akan, oyo arus magiꞌ so daꞌ ulun an lop nogom akan.” 12 Sino tukang-tukang tagi pajak matong intok benaptis,e iro gantano daꞌ Yohanes, “Guruꞌ, kon an arus binal mai?” 13 Sambung kon Yohanes, “Maꞌ kau nagi labiꞌ intad an pongo tenantuꞌ.” 14 Sino tentaraꞌ-tentaraꞌ gantano daꞌ Yohanes, “Kon ayu mai, kon arus binal mai?” Sambung kon Yohanes daꞌ siro, “Maꞌ ngau, maꞌ kitak uong dangan ngancam. Akau arus mal gajiꞌ muyun cukup untuk buyag muyun!”
15 Togol ino ri ulun-ulun gantano dalom kadaꞌ niro, monong kiꞌ Yohanes tu Rajaꞌ Penyolomot an narung-arung niro. 16 Sobob ino Yohanes maraꞌ daꞌ siro, “Aku mbaptis dimuyun dangan timug, tapiꞌ mino sino Ulun an labiꞌ bukuasaꞌ intad dakon, ngolopos tali sandal No koyo aku lop taman. Oyo mino mbaptis dimuyun dangan Lingu Allah dangan apui. 17 Daꞌ longon No pongo sino liaban untuk ngatap dan mirisiꞌ bilod mobor ampo no. Unuꞌ bilod tinimung mai lumbung, tapiꞌ ampo no sonorob daꞌ apui an lop kalap lasaꞌ!”
18 Yohanes munau ulun-ulun suang dangan bemasom-masom punau an benaraꞌ no daꞌ togol no maraꞌ Ago Piliꞌ intad Allah daꞌ ulun suang. 19 Giri Yohanes po negur rajaꞌ Herodes sobob Herodes nganduꞌ Herodias pegalong no orop, dangan oyo mal bal arat an bokon. 20 Tapiꞌ Herodes nguduang mal bal an arat ondo dangan punjob Yohanes mai penjaraꞌ.f
Yesus benaptis
21 Pongo kon ulun suang ino benaptis, Yesus po benaptis. Woktuꞌ No katung sembayang, kuanan tubukaꞌ, 22 daꞌ sawat No tumun Lingu Allah an nggirad pumpulu merpati. Intad kuanan ingog dagu Allah, “Okou Anak Ku an ningaꞌ Ku dangan posonong kadaꞌ Ku.”g
Daptar kuturunan Yesus
23 Togol Yesus nimpun daꞌ usaꞌ No, kiraꞌ-kiraꞌ umur No talumpuluꞌ payang. Nggirad an benaraꞌ ulun, Oyo anak Yusuf, Yusuf yamaꞌ no Eli, 24 Eli yamaꞌ no Matat, Matat yamaꞌ no Lewi, Lewi yamaꞌ no Malkhi, Malkhi yamaꞌ no Yanai, Yanai yamaꞌ no Yusuf, 25 Yusuf yamaꞌ no Matica, Matica yamaꞌ no Amos, Amos yamaꞌ no Nahum, Nahum yamaꞌ no Hesli, Hesli yamaꞌ no Nagai, 26 Nagai yamaꞌ no Maat, Maat yamaꞌ no Matica, Matica yamaꞌ no Simei, Simei yamaꞌ no Yosekh, Yosekh yamaꞌ no Yoda, 27 Yoda yamaꞌ no Yohanan, Yohanan yamaꞌ no Resa, Resa yamaꞌ no Zerubabel, Zerubabel yamaꞌ no Sealtiel, Sealtiel yamaꞌ no Neri, 28 Neri yamaꞌ no Malkhi, Malkhi yamaꞌ no Adi, Adi yamaꞌ no Kosam, Kosam yamaꞌ no Elmadam, Elmadam yamaꞌ no Er, 29 Er yamaꞌ no Yesua, Yesua yamaꞌ no Eliezer, Eliezer yamaꞌ no Yorim, Yorim yamaꞌ no Matat, Matat yamaꞌ no Lewi, 30 Lewi yamaꞌ no Simeon, Simeon yamaꞌ no Yehuda, Yehuda yamaꞌ no Yusuf, Yusuf yamaꞌ no Yonam, Yonam yamaꞌ no Elyakim, 31 Elyakim yamaꞌ no Melea, Melea yamaꞌ no Mina, Mina yamaꞌ no Matata, Matata yamaꞌ no Natan, Natan yamaꞌ no Daud, 32 Daud yamaꞌ no Isai, Isai yamaꞌ no Obed, Obed yamaꞌ no Boas, Boas yamaꞌ no Salmon, Salmon yamaꞌ no Nahason, 33 Nahason yamaꞌ no Aminadab, Aminadab yamaꞌ no Admin, Admin yamaꞌ no Arni, Arni yamaꞌ no Hezron, Hezron yamaꞌ no Peres, Peres yamaꞌ no Yehuda, 34 Yehuda yamaꞌ no Yakub, Yakub yamaꞌ no Ishak, Ishak yamaꞌ no Abraham, Abraham yamaꞌ no Terah, Terah yamaꞌ no Nahor, 35 Nahor yamaꞌ no Serug, Serug yamaꞌ no Rehu, Rehu yamaꞌ no Peleg, Peleg yamaꞌ no Eber, Eber yamaꞌ no Salmon 36 Salmon yamaꞌ no Kenan, Kenan yamaꞌ no Arpakhsad, Arpakhsad yamaꞌ no Sem, Sem yamaꞌ no Nuh, Nuh yamaꞌ no Lamekh, 37 Lamekh yamaꞌ no Metusalah, Metusalah yamaꞌ no Henokh, Henokh yamaꞌ no Yared, Yared yamaꞌ no Mahalaleel, Mahalaleel yamaꞌ no Kenan, 38 Kenan yamaꞌ no Enos, Enos yamaꞌ no Set, Set yamaꞌ no Adam, Adam anak intad Allah.