Kitab Injil
LUKAS
Pengantar
Kitab Injil Lukas tunulis intok maraꞌ Yesus tu Rajaꞌ Penyolomot an jenanjiꞌ Allah daꞌ ulun Israel dangan sariꞌ ulun an daꞌ diniaꞌ itu. Lukas tu doktor, oyo bedangan dangan rasul Paulus dan iro padatong Ago Piliꞌ intad Allah (Kol. 4:14; 2Tim. 4:11; Flm 1:24). Lukas nulis wat buyag Yesus nggirad ulun-ulun an nulis asal usul dangan adat istiadat, an pongo mangun daꞌ jomon gulu ri. Lukas nimpun guyum-guyum dagu Yesus intad ulun-ulun an mbayaꞌ Yesus. Pongo kon Lukas guyum-guyum sariꞌ angeno, giri yo nulis Kitab Injil itu daꞌ Teofilus. Teofilus tu ulun an sayaꞌ daꞌ Yesus, latiꞌ karan ano daꞌ dagu Yunani “dangan no Allah”. Sino ulun an maraꞌ Teofilus ngusaꞌ daꞌ pimirintaꞌ Roma, sino an bokon maraꞌ oyo no ulun adang dangan nambar ulun an nulis dangan magiꞌ Kitab Injil Lukas itu daꞌ ulun-ulun. Dalom kitab itu, Lukas maraꞌ dagu no dangan piliꞌ, kon bal Yesus matong mai diniaꞌ itu. Yesus matong kiꞌ guyum dangan nyolomot sariꞌ ulun an budusaꞌ (Luk. 19:10). Dalom Kitab Injil Lukas tu sino conto-conto Yesus pilong bal-bal No an piliꞌ daꞌ ulun-ulun susaꞌ buyag, daꞌ ulun-ulun an lop nanggop ulun an penting, daꞌ ulun-ulun an tebalu, daꞌ ulun-ulun an ngkagui, daꞌ ulun-ulun an lop ulun Yahudi, dangan daꞌ anak-anak.