Persembahan danduꞌ tebalu an susaꞌ buyag
21
1 Togol Yesus kilong ulun-ulun pangkor buyag nak uong daꞌ kutok persembahan. 2 Yesus po kilong singkiring danduꞌ tebalu an susaꞌ buyag nak dungaiꞌ kiping uong tembagaꞌ daꞌ kutok persembahan ino. 3 Giri Yesus mendagu, “Aku maraꞌ daꞌ dimuyun, danduꞌ tebalu an susaꞌ buyag itu nak labiꞌ suang intad ulun-ulun pangkor buyag ino. 4 Sobob ulun-ulun pangkor buyag ino nak persembahan kang koyo intad hartaꞌ niro, tapiꞌ danduꞌ tebalu itu boi pon oyo susaꞌ buyag, tapiꞌ oyo nak sariꞌ kon an sino daꞌ so.”Baloi Allah bunungkar
5 Togol tutukuraꞌ ulun mendagu wat Baloi Allah, dangan ngumpod Baloi ino, an binal dangan batu an piliꞌ dan pinipiliꞌ dangan bemasom-masom barang persembahan daꞌ Allah, giri dagu kon Yesus, 6 “Kon an nilong muyun daꞌ dino, sino odou no matong mino, lop nogom dondo pon batu an nampar daꞌ sawat batu an bokon, sariꞌ ano mino bunungkar.”
Susaꞌ dan duol rasaꞌ
7 Giri murit-murit No gantano daꞌ Yesus, “Guruꞌ, kiran angeno mino mangun? Dangan kon tetanduꞌ no, gaꞌ angeno mino mangun?” 8 Sambung kon Yesus, “Hati-hati kau, intok muyun lop senaluk. Sobob suang ulun matong makai karan Ku, dangan mendagu, ‘Aku tu Rajaꞌ Penyolomot,’ dangan ‘Amad nyo odou kiomot.’ Tapiꞌ maꞌ kau mayaꞌ siro. 9 Dangan gaꞌ akau kidingog wat mpatoi dangan sino an ngapu pimirintaꞌ, maꞌ kau kiriang. Sobob sariꞌ angeno mino arus labiꞌ gulu mangun, tapiꞌ lop angeno latiꞌ no kiꞌ amad odou kiomot.” 10 Oyo maraꞌ daꞌ siro, “Sukuꞌ-sukuꞌ mino ngapu sukuꞌ bokon dangan kerajaan ngapu kerajaan an bokon, 11 dangan mino sino gogor an pangkor dangan daꞌ sariꞌ janaꞌ mino, sino kagui dangan jomon bitil, dangan sino po mino mangun daꞌ kuanan tetanduꞌ-tetanduꞌ an tupal an mal ulun kiriang dangan alaꞌ. 12 Tapiꞌ sebelum sariꞌ angeno mangun, akau mino danakop, dangan punuduol. Akau mino nibit intok tenano-tano daꞌ baloi sembayang, dangan akau penanjaraꞌ, dangan akau po penadop mai rajaꞌ-rajaꞌ, dangan ulun-ulun bukuasaꞌ karnaꞌ akau murit Ku. 13 Togol ino nyo akau padatong Ago an Piliꞌ wat Dakon, 14 sobob ino, maꞌ apos kadaꞌ wat kon ayu muyun nyambung dagu an pumpan dimuyun. 15 Sobob Aku orop mino nak dimuyun dagu-dagu an piliꞌ, intok muyun lop kalap napu musuꞌ-musuꞌ muyun.a 16 Dangan mino mutuo, pegariꞌ, sariꞌ dangan gariꞌ, dan dangan-dangan muyun nak dimuyun mai musuꞌ muyun, ginoi tutukuraꞌ ulun intad dimuyun panatoi. 17 Akau mino konosou ulun suang, sobob akau murit-murit Ku. 18 Tapiꞌ lop sunguat pon abuk daꞌ utok muyun tatak. 19 Gaꞌ akau totop pangkor kadaꞌ, akau mino kalap buyag an kububuwoi no mbayaꞌ daꞌ Allah.”
Yerusalem bunungkar
20 “Gaꞌ akau gilong kutaꞌ Yerusalem kinililing tentaraꞌ-tentaraꞌ, pandai nakau amad nyo kutaꞌ ino bunungkar. 21 Togol ino ulun-ulun an sino daꞌ runuang Yudea arus miduꞌ mai muruk, dangan ulun-ulun an sino daꞌ dalom kutaꞌ mujai intad kutaꞌ ino, dangan ulun-ulun an sino daꞌ luar kutaꞌ, maꞌ mumpos mai dalom kutaꞌ ino. 22 Sobob daꞌ togol ino nyo mino Allah ngukum ulun Yerusalem, dangan kon an denagu nabi-nabi nggirad an tunulis daꞌ Kitab Allah, sariꞌ angeno mino mangun.b 23 Daꞌ togol angeno mangun, duol rasaꞌ laung, danduꞌ-danduꞌ an katung kitian dangan an masi pititiꞌ anak rumot. Sobob sariꞌ ulun daꞌ runuang itu ntamu duol rasaꞌ laung sobob Tuhan ngukum ulun-ulun itu. 24 Dangan iro mino sino an panatoi pakai idap, sino po an danakop nibit mai runuang-runuang bokon. Ulun an lop kulig Allah po mino nguasaꞌ kutaꞌ Yerusalem, matong woktuꞌ an pongo tenantuꞌ Tuhan daꞌ siro akaiꞌ.”
Anak Minisiaꞌ mino matong – Sulumaꞌ wat taun ara
25 “Sino mino tetanduꞌ-tetanduꞌ daꞌ mato odou, bulan dangan bititin-bititin,c ulun-ulun daꞌ bumiꞌ itu mino alaꞌ dangan tuwiꞌ kidingog liawo nawok an tupal. 26 Ulun-ulun mino gobos alaꞌ karnaꞌ apos kadaꞌ gilong kon an pentamu niro daꞌ bumiꞌ itu, sobob mato odou, bulan dangan bititin-bititin daꞌ kuanan ino mino kasou. 27 Daꞌ togol ino, ulun-ulun mino gilong Anak Minisiaꞌ daꞌ laput matong dangan kuasaꞌ No belendadaꞌ tawang.d 28 Gaꞌ angeno mino mangun, ngkiriyod nakau, dangan akau arus kotog kadaꞌ, sobob amad togol no mino akau sonolomot.” 29 Giri Yesus mendagu wat sulumaꞌ itu daꞌ siro, “Nilong muyun pun taun buaꞌ ara, dangan pun taun buaꞌ an bokon. 30 Gaꞌ akau gilong pun taun ino pongo kubusak, akau pongo pandai kiꞌ amad nyo taun buaꞌ ino kiꞌ mawaꞌ. 31 Sinino po, akau pandai gaꞌ akau pongo gilong tetanduꞌ-tetanduꞌ an benaraꞌ Ku no mangun, akau pandai latiꞌ no amad nyo woktuꞌ no. 32 Aku maraꞌ daꞌ dimuyun, ulun-ulun an uyag daꞌ jomon itu lop pongo ondot togol tetanduꞌ-tetanduꞌ ino mino mangun. 33 Kuanan dangan bumiꞌ mino tatak, tapiꞌ dagu Ku tu mino lop tatak.”
Bilin Yesus intok siap togol odou No matong
34 “Piliꞌ-piliꞌ bal muyun, maꞌ kau sibuk daꞌ acaraꞌ dangan maꞌ nginum inum intok mauk, dangan maꞌ apos kadaꞌ daꞌ wat buyag muyun odou-odou, supayaꞌ togol odou Tuhan temengkanaꞌ matong, akau pongo siap. 35 Sobob odou Tuhan ino mino matong daꞌ sariꞌ ulun an daꞌ bumiꞌ itu. 36 Piliꞌ-piliꞌ bal muyun dangan sarok sembayang intok muyun pangkor ngadop kon an mino mangun, dangan intok muyun kalap ngadop daꞌ tungkuangan Anak Minisiaꞌ.” 37 Daꞌ mundok odou Yesus ngatun daꞌ Baloi Allah,e dangan daꞌ rondom odou Oyo makou turug daꞌ muruk Zaitun. 38 Dangan daꞌ nyuap-nyuap ulun suang matong mai So daꞌ Baloi Allah, intok kidingog dagu atun No.