Pakot imam-imam kepalaꞌ dangan guruꞌ-guruꞌ agama Yahudi intok ngamatoi Yesus
22
1 Pongo kiꞌ amad nyo odou tupal Rutiꞌ Lop Nogom Ragi, an senabit Paskah.a 2 Imam-imam kepalaꞌ dangan guruꞌ-guruꞌ agama Yahudi guyum kon ayu caraꞌ niro kalap ngamatoi Yesus, sobob iro alaꞌ daꞌ ulun suang.Yudas polon Yesus
3 Iblis nguasaꞌ Yudas, an karan no po senabit Iskariot, singkiring intad puluꞌ sag dungaiꞌ kiring murit Yesus. 4 Giri Yudas makou mai imam-imam kepalaꞌ dangan kutuo-kutuo tentaraꞌ an ngejagaꞌ Baloi Allah dangan iro mpakot, wat kon ayu no kalap nak Yesus daꞌ siro. 5 Iro manod laung dangan bejanjiꞌ nak so uong. 6 Yudas pon guang, dangan timpun intad togol ino ri po, oyo guyum woktuꞌ an piliꞌ, intok ulun suang lop pandai togol no nak Yesus mai siro.
Nyiap akan untuk odou Paskah
7 Matong nyo odou tupal Rutiꞌ Lop Nogom Ragi, daꞌ odou ino ulun-ulun nyembaliꞌ domba Paskah. 8 Giri Yesus mancuk Petrus dangan Yohanes, dagu kon Yesus, “Makou nakau duo nyiap akan Paskah untuk sitakau.” 9 Dagu kon niro daꞌ So, “Intok janaꞌ kuguang Mu akai nyidiaꞌ akan Paskah itu?” 10 Sambung kon Yesus, “Gaꞌ akau duo mumpos mai dalom kutaꞌ, akau duo ntamu ulun an ngibit belanai an udan no timug, mayaꞌ kau duo daꞌ so mai baloi an numpos ano. 11 Dangan dagu kamuyun duo daꞌ ulun an jampuꞌ baloi ino: Guruꞌ mendagu, ‘Intok janaꞌ Ku dangan murit-murit Ku mino ngakan daꞌ akan Paskah?’ 12 Giri ulun ino mino pilong ruang an daꞌ luting baloi ino daꞌ dimuyun duo, an pongo sidiaꞌ ngangaiꞌ intok ngakan no. Daꞌ dino nyo janaꞌ muyun duo nyidiaꞌ akan Paskah ino.” 13 Makaꞌ iro duo makou dangan iro duo kalap sariꞌ kon an benaraꞌ Yesus daꞌ siro duo. Giri iro duo nyidiaꞌ akan Paskah.
Yesus mbayaꞌ ngakan dangan murit-murit No
14 Togol pongo matong woktuꞌ no, Yesus ntudung ngakan mbayaꞌ dangan rasul-rasul No. 15 Dagu Kono daꞌ siro, “Aku kelangu laung ngakan daꞌ akan Paskah itu, sebelum Ku mino duol rasaꞌ. 16 Sobob Aku maraꞌ daꞌ dimuyun: Aku lop ngakan daꞌ akan Paskah itu ondo matong latiꞌ intad Paskah itu mangun togol Allah mirintaꞌ sebagai Rajaꞌ.” 17 Giri Yo ngalap golos an udan no timug anggur, dangan bitirimo kasiꞌ daꞌ Allah, giri Yo mendagu, “Nalap mu dangan benagiꞌ mu daꞌ dimuyun. 18 Sobob Aku maraꞌ daꞌ dimuyun: Intad igitutu Aku lop nginum ondo timug anggur itu matong togol no Allah mirintaꞌ sebagai Rajaꞌ.” 19 Giri Yo ngalap rutiꞌ, dangan bitirimo kasiꞌ daꞌ Allah, Oyo mising-mising rutiꞌ ino dangan nak so daꞌ siro, dagu Kono, “Su kiring Ku an tinak Ku daꞌ dimuyun, binal muyun nggirad sinitu untuk ngingot Dakon.” 20 Sinino po pongo niro ngakan, Oyo nak golos an udan no timug anggur daꞌ siro dangan Oyo mendagu, “Timug anggur itu mangun tetanduꞌ janjiꞌ Allah an bagu dangan dadaꞌ Ku an punujai untuk dimuyun.b 21 Tapiꞌ nilong muyun ulun an polon Dakon sino mbayaꞌ Dakon daꞌ mijaꞌ itu.c 22 Sobob Anak Minisiaꞌ mino ondot nggirad an pongo tenantuꞌ, tapiꞌ celakaꞌ nyo mino ulun an polon So.” 23 Giri iro nimpun gantano dangan an bokon, wat si daꞌ siro an mal angeno.
Tukit togol ngakan dangan murit-murit No
24 Murit-murit Yesus gedagu-dagu wat si an paling penting daꞌ antaraꞌ niro.d 25 Yesus maraꞌ daꞌ siro, “Rajaꞌ-rajaꞌ mirintaꞌ ulun-ulun dangan arat tapiꞌ ulun-ulun totop nyabit so rajaꞌ an ngejagaꞌ siro. 26 Tapiꞌ maꞌ kau nggirad sinino, ulun an paling penting daꞌ antaraꞌ muyun arus mangun ulun an lop penting, dangan sinino po ulun an mimpin arus mangun ulun an ngelayan ulun bokon.e 27 Sobob si an labiꞌ penting: Ulun an ntudung ngakan daꞌ mijaꞌ, atau oyo an ngelayan? Pastiꞌ no ulun an ntudung ngakan. Tapiꞌ Aku lop nggirad sinino, togol Ku mbayaꞌ dimuyun Aku an ngelayan dimuyun. 28 Akau an totop mbayaꞌ Dakon daꞌ dalom duol rasaꞌ an pentamu Ku. 29 Dangan Aku mino nak kuasaꞌ daꞌ dimuyun untuk mirintaꞌ, nggirad Yamaꞌ Ku an nak kuasaꞌ daꞌ Dakon. 30 Akau po mino ngakan, dangan nginum kodondo mijaꞌ dangan Dakon daꞌ dalom Kerajaan Ku, dangan ntudung mirintaꞌ daꞌ puluꞌ sag dungaiꞌ sukuꞌ daꞌ Israel.
31 Simon, Simon, ingog mu piliꞌ-piliꞌ, iblis pongo tinak ijin intok nginyam-nginyam dimuyun nggirad jalai an natap pusuai so intad an piliꞌ dangan an lop piliꞌ. 32 Tapiꞌ Aku pongo sembayang untuk diyun, Simon, intok mu totop sayaꞌ daꞌ Dakon. Gaꞌ okou pongo mikad mayaꞌ Dakon ondo dangan kadaꞌ laung, benaraꞌ mu pegariꞌ-pegariꞌ mu intok niro totop sayaꞌ daꞌ Dakon.” 33 Dagu kon Petrus, “Tuhan, aku bisidiaꞌ penanjaraꞌ dangan ondot mbayaꞌ dangan Diyun!” 34 Tapiꞌ dagu kon Yesus, “Aku maraꞌ daꞌ diyun, Petrus, odou itu manuk lop nongkorok sebelum tulungaiꞌ surung okou galim lop kulig Dakon.” 35 Giri Yesus maraꞌ daꞌ siro, “Togol Ku ngutus dimuyun makou dangan lop ngibit dumpit, babaꞌ dangan sandal, sino kiꞌ akau kututus manaꞌ-manaꞌ?” 36 Sambung kon niro, “Lop,” dagu Kono daꞌ siro ondo, “Tapiꞌ igitutu, si an sino dumpit dangan babaꞌ, waiꞌ yo ngibit so, dangan si an lop nogom idap waiꞌ yo polon jubah no intok no ngolon idap. 37 Sobob Aku maraꞌ daꞌ dimuyun, ayat Kitab Allah an tunulis sinitu arus mangun daꞌ Dakon: ‘Ulun nyabit So ulun arat,’ dangan gitutu woktuꞌ no mangun.” 38 Dagu kon niro, “Tuhan su dungaiꞌ idap.” Sambung kon Yesus daꞌ siro, “Cukup nyo.”
Yesus sembayang daꞌ Getsemani
39 Giri Yesus mujai intad kutaꞌ Yerusalem, nggirad biasaꞌ no Oyo mai muruk Zaitun. Murit-murit No po mayaꞌ daꞌ So. 40 Togol Yesus dangan murit-murit No matong daꞌ janaꞌ ino, Oyo mendagu daꞌ siro, “Sembayang nakau, intok muyun lop budusaꞌ, togol iblis kiꞌ nginyam-nginyam dimuyun.” 41 Giri Yesus makou lop jojoꞌ alud intad murit-murit No, kiraꞌ-kiraꞌ talumpuluꞌ mitir alud no, giri Oyo sujud dangan sembayang, dagu Kono, 42 “Amaꞌ, gaꞌ Okou guang, maꞌ pusulung Dakon daꞌ duol rasaꞌ itu. Tapiꞌ, maꞌ yo an kuguang Ku an mangun, tapiꞌ an kuguang Mu.” 43 Maleikat pon matong intad surgaꞌ ntipilong daꞌ So dangan papangkor kadaꞌ No. 44 Oyo duol rasaꞌ laung daꞌ dalom kadaꞌ No, singgaꞌ Oyo sembayang dangan labiꞌ kadaꞌ laung, dangan potok umos No mai tanaꞌ nggirad dadaꞌ. 45 Pongo kon Yesus sembayang, Oyo ngkiriyod giri limikad mai murit-murit No, tapiꞌ Oyo ketamu siro katung turug, sobob iro susaꞌ kadaꞌ. 46 Dagu kon Yesus daꞌ siro, “Pat no akau lop turug, kadat nakau dangan sembayang, intok muyun lop budusaꞌ, togol iblis kiꞌ nginyam-nginyam dimuyun.”
Yesus danakop
47 Togol Yesus katung mendagu, ulun suang pon matong, singkiring intad puluꞌ sag dungaiꞌ murit No, an karan no Yudas, oyo makou mbayaꞌ daꞌ ulun suang ino. Yudas pon narab Yesus giri ngadokf So. 48 Dagu kon Yesus daꞌ Yudas, “Uy Yudas, okou polon Anak Minisiaꞌ dangan adok mu tu?” 49 Togol murit-murit Yesus an mbayaꞌ So daꞌ dino, iro gilong kon an kiꞌ mangun, dagu kon niro, “Tuhan, napu mai kiꞌ iro tu makai idap?” 50 Giri singkiring intad murit-murit Yesus nyusug ripon Imam Besar ino, singgaꞌ tilingo pimidis no ukat. 51 Tapiꞌ dagu kon Yesus daꞌ siro, “Pongo nyo.” Yesus pon nongkoi tilingo ulun ino dangan piga so. 52 Yesus mendagu daꞌ imam-imam kepalaꞌ, kutuo-kutuo tentaraꞌ an ngejagaꞌ Baloi Allah, dangan mutuo-mutuo ulun Yahudi an matong intok ngadakop So, dagu Kono, “Kuwon muyun Aku tu ulun arat kiꞌ, singgaꞌ akau matong ngibit idap dangan ngibit taun intok ngalapos? 53 Tukid odou Aku tu sino mbayaꞌ dangan dimuyun daꞌ Baloi Allah, akau lop ngadakop Dakon. Tapiꞌ gitutu nyo woktuꞌ no akau ngadakop Dakon, togol kuasaꞌ iblis mal usaꞌ no.”
Petrus galim lop kulig Yesus
54 Giri Yesus danakop nibit mai baloi Imam Besar. Petrus pon mayaꞌ So intad alud. 55 Daꞌ unod-unod tungkuangan baloi ino sino ulun-ulun nyidu apui dangan ntudung ngililing daꞌ apui ino. Petrus po mbayaꞌ ntudung dangan siro. 56 Singkiring ripon an danduꞌ kilong Petrus ntudung mbayaꞌ siro an ntudung ngililing apui. Danduꞌ ino gonsolong daꞌ Petrus, dagu kono, “Ulun itu po an mbayaꞌ dangan Yesus.” 57 Tapiꞌ Petrus galim, dagu kono, “Lop, aku lop kulig Ulun ino!” 58 Lop buwoi intad dino, sino po ulun bokon kilong daꞌ Petrus, dagu kono, “Okou po singkiring ulun intad murit-murit No!” Tapiꞌ Petrus mendagu, “Lop, lop yo aku!” 59 Sejam intad dino, singkiring ulun bokon mendagu, “Monong nyo, ulun itu an mbayaꞌ daꞌ Yesus, sobob ulun itu po ulun Galilea.” 60 Tapiꞌ Petrus mendagu, “Lop, aku lop pandai an denagu mu no.” Togol ino po, katung no mendagu, manuk pon nongkorok. 61 Yesus pon gilinga gilong Petrus, giri Petrus kingot dagu Yesus daꞌ so, “Odou itu manuk lop nongkorok sebelum tulungaiꞌ surung okou galim lop kulig Dakon.” 62 Petrus pon mujai giri nangiꞌ dangan susaꞌ kadaꞌ.
Yesus nibit daꞌ tungkuangan Pengadilan Agama
63 Ulun-ulun an ngadakop Yesus numbulang dangan mabal So. 64 Iro nutub mato No dangan gantano, “Si an mabal Diyun?” 65 Suang po tumbulang niro daꞌ Yesus. 66 Daꞌ odou nyuap mutuo-mutuo ulun Yahudi, imam-imam kepalaꞌ dangan guruꞌ-guruꞌ agama Yahudi intimung, iro ngibit Yesus mai Pengadilan Agama. 67 Dagu kon niro, “Monong kiꞌ Okou Rajaꞌ Penyolomot?” Sambung kon Yesus, “Boi pon Aku maraꞌ so daꞌ dimuyun, tapiꞌ akau lop sayaꞌ so; 68 sinino po, gaꞌ Aku gantano daꞌ dimuyun, akau po lop nyambung dagu Ku no. 69 Intad igitutu Anak Minisiaꞌ mino ntudung daꞌ pimidis mbayaꞌ dangan Allah An Paling Bukuasaꞌ.” 70 Sariꞌ niro mendagu, “Gaꞌ sinino yo, monong kiꞌ Okou tu Anak Allah?” Sambung kon Yesus, “Akau orop an mendagu gaꞌ Aku tu Anak Allah.” 71 Dagu kon niro po ondo, “Takau lop perlu ulun bokon intok maraꞌ salaꞌ No, sobob takau pongo kidingog kon an benaraꞌ No.”